XXV. Astea

Urtean Zeharreko XXV. astelehena

I. urtean

 

I. Irakurgaia

Jainkoaren herriko diran guztiak igon begie Judako Jerusalemera,
eta eraiki begioe etxea Jaunari.

Esdras liburuaren hasiera

Esd 1, 1-6

    Pertsiako errege Ziroren lehenengo urtean, Jeremias profetaren ahoz Jaunak esana bete zedin, Pertsiako errege Zirori barrutik eragin eutson Jaunak, eta harek agindu hau zabaldu eban, hitzez eta idatziz, bere erreinu osoan:
    «Hau dino Pertsiako errege Zirok: "Lurreko erreinu guztiak emon deustaz Jaunak, zeruetako Jainkoak, eta Judako Jerusalemen berari tenplua eraikitzeko agindu deust. Beraz, zuen artean haren herriko diran guztiek izan begie euren Jainkoa lagun eta igon begie Judako Jerusalemera, eta eraiki begioe etxea Jerusalemen dagoan Jainkoari, Israelen Jainko Jaunari. Bizirik gelditutako israeldarrei lagundu begie bizi diran inguruko jenteak: emon begiez zidarra, urrea, ondasunak, abereak eta nork bere borondatezko opariak, Jerusalemen dagoan Jainkoaren tenplurako"».
    Orduan, urteteko prestatu ziran Judaren eta Benjaminen familietako buruak, abadeak eta lebitarrak, hau da, Jerusalemen dagoan Jaunaren tenplua eraikitzera joateko Jainkoak barrutik eragin eutsen guztiak. Auzokoek eskuzabal lagundu eutsien, eta zidar eta urrezko ontziak, ondasunak, abereak eta bitxi ederrak emon eutsiezan, nork bere borondatez eskeinitakoaz gainera.

Jaunak esana.

 

Erantzun salmoa

Sal 126 [125], 1-2b. 2c-3. 4-5. 6 (R/. ik. 3a)

R/.   Gurekin handikiro jokatu dau Jaunak.

V/.   Jaunak Sionen zoria aldatu ebanean,
amesetan lez gengozan.
Barrez bete jakun orduan ahoa,
poz-oihuz mihina. R/.

V/.   Jentil-herrietan be esan eben:
«Handikiro jokatu dau Jaunak hareen alde».
Handikiro jokatu dau Jaunak gure alde,
eta pozarren gagoz! R/.

V/.   Aldatu, Jauna, gure zoria,
euri-jasek basamortua lez.
Malkoz erein ebenek
pozez batzen dabe. R/.

V/.   Negarrez joan ziran,
hazi-zorroa eroanez;
poz-oihuka datoz,
gari-txolak ekarriz. R/.

 

II. urtean

I. Irakurgaia

Gorroto deutso Jaunak maltzurrari.

Esaera Zaharrak liburutik

Es 3, 27-34

    Ene seme, ez ukatu mesederik behar dauanari,
zure esku badago egitea.
Lagunak behar dauana badozu, ez esan berari:
«Zoaz eta bihurtu, bihar emongo deutsut».
Ez pentsatu txarto egiterik zugaz nasai bizi dan lagunari.
Ez hasi inogaz auzitan arrazoirik barik,
berak ez badeutsu ezelako kalterik egin.
Ez zaitez indar zalearen inbidiaz bizi,
ezta hartu be haren biderik.
Gorroto deutso Jaunak maltzurrari,
baina bere konfiantza emoten zuzenari.
Gaiztoaren etxea dau Jaunak madarikatzen
eta zintzoaren egoitza bedeinkatzen;
harroputzei burla deutse egiten, eta apalei babesa emoten.

Jaunak esana.

 

Erantzun salmoa

Sal 15 [14], 2-3a. 3b-4b. 5 (R/. ik. 1b)

R/.   Zintzoa zure mendi santuan biziko da, Jauna.

V/.   Akatsik barik eta zuzen jokatzen dauana;
bihotzean egiazale izan
eta mihinaz inor loitzen ez dauana. R/.

 V/.  Hurkoari gatxik egiten ez deutsona,
auzokoa iraintzen ez dauana.
Jaunak baztertua gitxiesten dauana
eta  jainkozaleak ohoratzen dituana. R/.

V/.   Dirua lukurreriaz mailegatzen ez dauana
ezta errubakoaren kaltetan eskupekorik hartzen be.
Holan jokatzen dauana
ez da sekula kili-kolo egongo. R/.

 

I. eta II. urteetan

Aleluia

Mt 5, 16

R/.   Aleluia.

V/.   Zuen argiak danen aurrean egin behar dau argi,
        zuen egintza onak ikusiz,
        zeruko zuen Aita goratu dagien. R/.

 

Ebanjelioa

Argimutilaren gainean ipintzen dau argia,
sartzen diranek argia ikusi dagien.

✠ Jesu Kristoren Ebanjelioa San Lukasen liburutik

Lk 8, 16-18

        Aldi haretan, Jesusek esan eutson jenteari: «Inork ez dau argia biztuten eta ontzipean gordetzen edota ohepean ipintzen, ezpada ze, argimutilaren gainean ipintzen dau, sartzen diranek argia ikusi dagien. Izan be, ez dago ezer gordeta agertuko ez danik, ezta ezkutuan be jakingo eta argiratuko ez danik.
        Begiratu, beraz, zelan entzuten dozuen! Izan be, daukanari emon egingo jako; ez daukanari, ostera, badaukala uste dauana be kendu egingo jako».

Jaunak esana.

 

IRUZKINA

Batez ere ikasleentzako dei-oharrak dira entzundakook. Jainkoaren hitza, bizitza argitu behar dauan argia, ez da gordeta eukiteko.

Jakinik argia egiteko argizariak edo orioak gitxitzen joan behar dauala, galtzearen bildurrez, argi egiteari itzi egin leio. Hau ez da onartzekoa.

Argia (Jainkoaren Hitza) ez da hartzen, ba, gordeta eukiteko katepean, bildurrez... Hauxe litzateke ontzipean gordeta eukitea, edo argi egin ez daian leku baten (ohepean) eukitea.

Ikasleak ardura handiz hartu behar izango dau Jainkoaren hitza zabaltzea, argi egitea, horretarakoxe hartu dau-eta argia. Beharrezko izango dau, ba, berak biztuta egotea.

Baina ondo entzun ete dau? Hementxe dago gakoa. Ikaslea ezin ibili daiteke ustez. Ondo entzun behar dau, hartu dauana, eta ez uste dauana iragarteko.

Jainkoaren hitza ez da norberea, hartua baino, eta zabaltzeko hartua, ez gordeta eukiteko.

 

 

Urtean Zeharreko XXV. martitzena

I. urtean

I. Irakurgaia

Amaitu eben Jainkoaren etxea eraikitzea,
eta Pazkoa ospatu eben.

Esdras liburutik

Esd 6, 7-8. 12b. 14-20

        Egun hareetan, Pertsiako errege Dariok hau idatzi eutsen Eufrates ibaiaren sartaldeko agintariei:
        «Itzi judeguen gobernariari eta herri-arduradunei Jaunaren etxeko lanak egiten; eraiki dagiela Jainkoaren etxea lehengo leku berean. Hona zelan jokatu behar dozuen Jainkoaren etxea eraikitzen diharduen herri-arduradunekin: gizon horreen gastuak Eufrates ibaiaren sartaldeko eskualdean batutako erregearen zerga-dirutik ordainduko dira, zehatz-mehatz eta eten barik. Neuk, Dariok, emoten dot agindu hau. Bete bedi zehatz-mehatz».
        Judeguen arduradunek ondo eroan ebezan aurrera eraikitze-lanak, Ageo profetaren eta Idoren seme Zakariasen profeziaren arabera; eta eraiki eben azkenean etxea, Israelen Jainkoak eta Ziro, Dario eta Artaxerxes Pertsiako erregeek agindu eben lez. Adar hilaren hogeta hiruan amaitu eben etxea, Darioren erregealdiko seigarren urtean.
        Israeldarrek, abadeek, lebitarrek eta erbestetik etorritako beste guztiek pozik ospatu eben Jainkoaren etxearen sagarapen-jaia. Jaietan ehun zezen eskeini ebezan, berrehun ahari eta laurehun bildots; baita hamabi aker be, Israelgo leinu bakotxeko bat, Israel osoaren pekatuen parkamen-oparitzat. Gero, abadeak euren mailetan eta lebitarrak euren taldeetan ezarri ebezan Jainkoaren zerbitzurako Jerusalemen, Moisesen liburuan idatzita dagoan lez.
        Erbestetik etorriek lehenengo hilaren hamalauan ospatu eben Pazkoa. Lebitarrek egin eben garbikuntza guztiek batera; beraz, garbi egozan danak; holan, erbestetik etorritako guztientzat, euren senide abadeentzat eta eurentzat, hil ahal izan ebezan pazko-bildotsak.

Jaunak esana.

 

Erantzun salmoa

Sal 122 [121], 1-2. 3. 4-5 (R/. ik. 1b)

R/.   Goazen pozik Jaunaren etxera!

V/.   Hau bai poza nirea, esan eustenean:
«Goazen Jaunaren etxera!» .
Hona orain nire oinak
zure ateetan, Jerusalem. R/.

V/.   Jerusalem, uri lez ondo eraikia,
beragan sendo batua! R/.

V/.   Hara igoten dabe leinuek, Jaunaren leinuek,
Israelen lege danez, Jaunaren izena gorestera.
Han dagoz ezarriak auzi-mahaiak,
Daviden jauregiko mahaiak. R/.

II. urtean

I. Irakurgaia

Esaera batzuk.

Esaera Zaharrak liburutik

Es 21, 1-6. 10-13

    Erregearen bihotza ubidea da Jaunaren eskuetan:
nahi dauan alderantz zuzentzen dau.
Gizakiak zuzen deritxe haren jokabide guztiei,
baina Jaunak ditu kontzientziak aztertzen.
Nahiago dau Jaunak gizakiak justiziaz eta zuzenbidez jokatzea,
sakrifizioak eskeintzea baino.
Begirada harroa, gogo handinahia,
gaiztoen argia: dana da pekatu.

Saiatuaren egitasmoak irabazia,
zalapartaka dabilenarenak beti pobrezia.
Guzurrez altxorrak eskuratzea
heriotzara daroan amets alperrekoa da.
Gaiztoak txarra dau gogo biziz deseatzen,
Harroputza zigortzean, zuhur bihurtzen da heldubakoa,
eta, zuhurrari dagokion heziketaz, lortzen dau jakintza.

Jainko zuzena begira dago gaiztoaren etxekoei:
hondamenera botatzen ditu gaiztoak.
Behartsuaren oihuari belarriak ixten deutsozanari
ez deutsoe entzungo berari be, deadar egitean.

Jaunak esana.

 

 

Erantzun salmoa

Sal 119 [118], 1 eta 27. 30 eta 34. 35 eta 44 (R/. 35a)

R/.   Gidatu nagizu, Jauna, zeure aginduen bidetik.

V/.   Zorionekoak jokabide akats bakoa dabenak,
Jaunaren lege-bidean dabiltzanak.
Ulertarazo niri zeure legeen bidea,
eta hausnartuko ditut zure egintza harrigarriak. R/.

V/.   Leialtasun-bidea dot aukeratu,
aurrean ditut zure erabagiak.
Emoidazu ulermena, eta beteko dot zure legea,
bihotz-bihotzez dot gordeko. R/.

V/.   Gidatu nagizu zeure aginduen bidetik,
horixe dot-eta atsegin.
Eten barik nahi dot gorde zure legea,
betiren beti. R/.

 

I. eta II. urteetan

Aleluia

Lk 11, 28

R/.   Aleluia.

V/.   Zorionekoak Jainkoaren hitza entzun
        eta betetzen dabenak. R/.

 

Ebanjelioa

Honeek ditut Nik ama eta anai-arreba:
Jainkoaren hitza entzun eta betetzen dabenak.

✠ Jesu Kristoren Ebanjelioa San Lukasen liburutik

Lk 8, 19-21

    Aldi haretan, ama eta anai-arrebak joan jakozan Jesusi, baina jentearen jenteaz ezin heldu ziran beragana. Eta jakin eragin eutsoen Jesusi: «Hor dituzu kanpoan ama eta neba-arrebak, Zeu ikusi nahian».
    Jesusek erantzun eutsen: «Honeek ditut Nik ama eta anaia-arreba: Jainkoaren berbea entzun eta betetzen dabenak».

Jaunak esana.

 

IRUZKINA

«Alkarturik errezatzen dauan familiak alkarturik irauten dau» esaten zan aldiko baten. Eta familia osoa arrosarioaren inguruan alkartzen zan. Gaur amestu ere ezin daiteke egin holangorik.

Hemen beste gauzarik ikusten dogu: Jesusentzat Jainkoaren Hitza da alkartasun indar. Eta haren inguruan eraikitzen dan familia da benetakoa. Kontuan izanik Jainkoaren hitza, entzunez gain, bete ere egin behar dala.

Jesusen haragi-familia Israel zaharraren irudi da. Jesusen bila doaz haren altzora bihurtu daiten. Baina Jesusek beste aukera bat egin dau: Aitatzat Jainkoa aukeratu dau, eta honexen antzeko izan behar dau.

Onura handia da familia; haretatik kanpo norbera ez da ezer; eta han aitarenera emon behar da. Jesusek ezin dau Joserenera emon, lotuta eta mugatuta aurkituko leukelako bere burua.

Zeruko Aitarenera emoten dau eta holan familia zabalago baten aukerea egin dau; etxekoak ere haraxe dagoz deituak, eta Jainkoaren Hitza izango dabe ardatz.

 

 

Urtean Zeharreko XXV. eguaztena

I. urtean

I. Irakurgaia

Geure Jainkoak ez gaitu eskutik itzi
geure esklabotzan.

Esdras liburutik

Esd 9, 5-9

    Nik, Esdrasek, arratsaldeko opari-orduan urten neban neure nahigabe-alditik; soinekoa eta soingainekoa urratuta nebazala, belauniko jarri eta Jaunagana, neure Jainkoagana, jaso nituan eskuak, eta esan neutsan:
    «Ene Jainko, lotsa gorrian nago begiak Zugana jasotzeko; geure gaiztakeriek buruz gain egin deuskue eta gure pekatuak zerurainokoak dira. Gure gurasoen egunetatik gaur arte handia izan da gure errua; geure gaiztakeriakaitik, atzerriko erregeen esku jausi gara gu eta gure erregeak eta gure abadeak, eta ezpata eta katigutza, harrapaketa eta lotsa gorria jasan behar izan dogu, eta horixe da gaurko gure egoerea.
    Baina orain, bat-batean, mesede egin deusku Jaunak, geure Jainkoak: bizirik gorde dau herriaren zati bat eta bere toki santuan bizitzen itzi deusku; geure Jainkoak begiak argitu deuskuz eta arnasa emon deusku geure esklabotzan. Esklabo gara-eta; baina gure Jainkoak ez gaitu eskutik itzi geure esklabotzan. Pertsiako erregeen onginahia geuganatu deusku eta indarbarritu egin gaitu, geure Jainkoaren etxea eraiki eta haren horma jausiak jasotzeko, eta babesa emon deusku Judan eta Jerusalemen».

Jaunak esana.

 

Erantzun salmoa

Tb 13, 2. 3-4a. 4bcd. 5. 8 (R/. 2a)

R/.   Bedeinkatua, beti bizi dan Jainkoa!

V/.   Berak dau zigortzen eta bera da errukitzen,
berak dau jatsiarazoten Herio-leza sakonera,
eta berak igonarazoten Hondamendi handitik;
ezerk ez dau ihes egiten haren eskutik. R/.

V/.   Emon ospe Jaunari, israeldarrok, nazinoen aurrean,
harek sakabanatu zaitue-eta hareen artean,
han erakutsi deutsue bere handitasuna. R/.

V/.   Goratu egizue bizidun guztien aurrean,
ha da-eta gure Jaun eta Jainko,
bera gure Aita gizaldien gizaldietan. R/.

V/.   Zigortu egin zaitue zeuen bidebakokeriakaitik,
baina errukiz hartuko zaitue guztiok
eta batuko, sakabanatu zaituen nazino guztietatik. R/.

V/.   Bihurtu zaiteze, pekatariok,
egin haren aurrean zuzen dana!
Nork daki ez ete zaituen maite izango,
ez ete dan zuetaz errukituko. R/.

II. urtean

I. Irakurgaia

Ez nagizu egin ez txiro, ez aberats;
emon bakarrik bizitzeko behar dodana.

Esaera Zaharrak liburutik

Es 30, 5-9

    Ondo egiaztatuak dira Jainkoaren berba guztiak;
babesten ditu beragana jotzen dabenak.
Ez gehitu ezer haren hitzei,
agiraka egin eta guzurtitzat itzi ez zagizan.

Gauza bi eskatu deutsudaz, ene Jainko,
ez niri ukatu bizi nazan artean:
urrundu nigandik faltsukeria eta guzurra;
ez nagizu egin ez txiro, ez aberats;
emon bakarrik bizitzeko behar dodana,
izan be, asebeterik, baleiteke Zu ukatu
eta esatea: «Nor da Jauna?»,
edo, beharrizanean aurkituz, lapurretari emon
eta nire Jainko horren izena iraintzea.

Jaunak esana.

 

Erantzun salmoa

Sal 119 [118], 29 eta 72. 89 eta 101. 104 eta 163 (R/. 105a)

R/.   Kriseilu da zure hitza, Jauna, nire oinentzako.

V/.   Aldendu nigandik jokabide faltsua
eta emoidazu zeure legea dohaitzat.
Zein ona niretzat zure ahoko legea,
urre-zidarrezko milaka txanpon baino hobea. R/.

 V/. Betikoa da zure berbea, Jauna,
zerua baino iraunkorragoa.
Bide txar guztitik aldentzen ditut oinak,
zure berbea gordetzearren. R/.

V/.   Zure legeek zuhur egiten nabe;
horregaitik, gorroto ditut jokabide maltzur guztiak.
Higuin dot eta gorroto maltzurkeria,
baina maite dot zure nahia. R/.

 

I. eta II. urteetan

Aleluia

Mk 1, 15

R/.   Aleluia.

V/.   Hurrean da Jainkoaren erregetza, dino Jaunak;
        bihotz-barritu zaiteze eta sinistu Barri Ona. R/.

 

Ebanjelioa

Jainkoaren erreinua iragartzera
eta gaixoak osatzera bialdu ebazan.

✠ Jesu Kristoren Ebanjelioa San Lukasen liburutik

Lk 9, 1-6

    Aldi haretan, Jesusek, Hamabiak beragana baturik, deabru guztiak botatzeko ahalmena eta gatxak osatzeko indarra emon eutsen. Eta Jainkoaren erreinua iragartzera eta gaixoak osatzera bialdu zituan, esanez: «Ez hartu ezer biderako, ez makilarik, ez zakutorik, ez ogirik, ez dirurik, ezta aldatzeko soinekorik be. Etxe baten sartzen zarienean, gelditu bertan herri haretatik urten arte. Eta onartzen ez bazaituee, herri haretatik urtetean, astindu zeuen oinetako hautsa, hareen kontrako seinaletzat».
    Urten eben, bada, eta herriz herri joan ziran, Barri Ona iragarriz eta alde guztietan gaixoak osatuz.

Jaunak esana.

 

IRUZKINA

Jesusen inguruan alkartzen diranak haren antzeko izango dira, eta haren eginkizuna eurenganatuko dabe: Jainkoaren erreinuaren iragarle eta haretako langile bihurtuko dira.

Jainkoaren erreinuaren iragarpena diskurtso teorikoetan eta dotrina edukietan baino bizikera baten dago oinarrituagoa.

Bizikera horretan pobrezia da nabarmenena, eta ezeri loturik ez egotea. Uste osoa Jainkoagan eta honen bialduagan izan behar da, eta ez ziurtasunik emon leikeen ondasun eta ahalmenetan.

Iragarpen hau salbagarria da, askatzailea; eta ezeri lotu barik onartu behar dana.

Behar bada horrexegaitik aurkituko ditu aurkariak, onartu gura izango ez dabenak, atea zarratuko deutsoenak. Zenbat dagozan (gagozan?) ondasunen eta ahalmenen ziurtasuna nahiago dabenak (dogunak?)

Jesusek bere ahalmenaz janzten gaitu eta lotura menperatzaileetatik askatzen. Benetako osasuna emoten deusku.

 

 

Urtean Zeharreko XXV. eguena

I. urtean

I. Irakurgaia

Ekin tenplua eraikitzeari;
atsegin izango dot Nik hori.

Ageoren Profezia liburuaren hasiera

Ag 1, 1-8

    Darioren erregealdiko bigarren urtean, seigarren hilaren lehenengo egunean, Ageo profetaren bitartez berba egin eutsen Jaunak Xealtielen seme Zorobabel Judako gobernariari eta Jotzadaken seme Josue abade nagusiari, eta esan eutsen: «Hau dino Jaun ahalguztidunak: "Jaunaren etxea barriro eraikitzeko sasoia oraindino ez dala heldu, dino herri honek"».
    Honan berba egin eban, ba, Jaunak Ageo profetaren bidez: «Eta sasoia ete da zuek etxe dotoreetan bizitzeko, tenplua jausita dagoan bitartean? Hau dino, beraz, Jaun ahalguztidunak: "Egizue gogoeta zeuen egoeraz. Asko ereiten dozue eta gitxi jasotzen. Jaten dozue, baina betetzen ez; edaten dozue, baina asetzen ez; janzten zarie, baina berotzen ez; poltsa zulatuan jausten jatzuez lanaren irabaziak".
    Beraz, hau dino Jaun ahalguztidunak: "Egizue gogoeta zeuen egoeraz. Igon mendira, ekarri egurra eta ekin tenplua eraikitzeari. Atsegin izango dot Nik hori eta neure aintza agertuko dot han". Halan dino Jaunak».

Jaunak esana.

 

Erantzun salmoa

Sal 149, 1-2. 3-4. 5-6a eta 9a (R/. 4a)

R/.   Maite dau Jaunak bere herria.

        Edo: Aleluia.

V/.   Kanta Jaunari kantu barria,
kanta haren gorespena fededunen batzarrean.
Poztu bedi Israel bere Egileaz,
alaitu siondarrak euren Erregeaz. R/.

V/.   Goratu begie haren izena dantza eginez,
jo begie harentzat danbolina eta zitara.
Maite dau-eta Jaunak bere herria,
garaipenez jantziko ditu umilak. R/.

V/.   Alaitu beitez fededunak Jainko ospetsuaz,
egin begie pozez oihu euren etzunlekuetan.
Bego Jainkoaren gorapena hareen eztarrian,
ohorea da haren fededun guztientzat. R/.

II. urtean

I. Irakurgaia

Ezer ez barririk eguzkipean.

Kohelet liburutik

Koh 1, 2-11

    Huskeria hutsa –dino Koheletek–,
huskeria hutsa, dana da huskeria.

Zer irabazi ataratzen dau gizakiak,
eguzkipean hartzen dituan neke-lan guztietatik?
Belaunaldiak joan, belaunaldiak etorri, munduak mundu dirau.
Sortzen da eguzkia eta sartzen,
eta bere tokira bihurtzen da, handik barriro urteteko.
Jotzen dau haizeak hegoalderantz, egiten dau jira iparralderantz;
batera jo, bestera jo, eta jira-biraka hasten da barriro.

Ibai guztiak itsasora doaz, eta itsasoak ez dau gainez egiten;
ibaiak, nora doazen,
harantz dira behin eta barriro joaten, bide bera eginez.
Ezin inork nahiko esan zein aspergarri dan guztia.
Ez da begia ikustez aspertzen, ez belarria entzutez asetzen.
Lehen izan zana izango da barriro,
lehen egina egingo da gero be.

Ezer ez barririk eguzkipean.
Zeozerez esan baledi «Horra, hori bai barria!»,
hori be jazotakoa da gure aurreko gizaldietan.
Ez gara gogoratzen antxinakoez;
halantxe gerokoez be, ez dira gogoratuko geroago izango diranak.

Jaunak esana.

 

Erantzun salmoa

Sal 90 [89], 3-4. 5-6. 12-13. 14 eta 17 (R/. ik. 1)

R/.   Jauna, gure ihesleku Zeu izan zara
        gizalditik gizaldira.

V/.   Gizakia hautsera bihurtuarazoten dozu,
esanez: «Bihurtu lehenera, gizakiok».
Bai, mila urte zure begietan
atzo igaro zan eguna adina,
gaualdi bat adina. R/.

V/.   Hor daroazuz gizakiak,
ametsa lez dira;
ernetzen dira goizean bedarra lez;
goizean erne eta loratzen da-eta,
arratsaldean zimeldu eta igartzen. R/.

V/.   Irakatsi eiguzu geure egunen kontua eroaten,
zuhurtasunaren muinaz jaubetu gaitezan.
Bihurtu zakiguz, Jauna! Noiz arte?
Erruki zaitez zeure zerbitzariez. R/.

V/.   Asetu gagizuz goizero zeure maitasunaz,
poztu gaitezan eta zoriontsu izan geure egun guztietan.
Betor gugana Jaunaren, gure Jainkoaren, gozotasuna
eta sendotu begi harek gure eskuen lana;
sendotu dagiala, bai, gure lana. R/.

 

I. eta II. urteetan

Aleluia

Jn 14, 6

R/.   Aleluia.

V/.   Neu naz bidea, egia eta bizia, dino Jaunak;
        ezin da inor Aitagana joan,
        nire bidez izan ezik. R/.

 

Ebanjelioa

Joani neuk ebagi neutsan samea. 

 Nor da hau, holakoak entzuten ditut-eta honi buruz?

✠ Jesu Kristoren Ebanjelioa San Lukasen liburutik

Lk 9, 7-9

    Aldi haretan, jakin eban Herodes agintariak gertatzen zan guztia, eta zer pentsatu ez ekiala egoan. Batzuek Joan Bateatzailea hilen artetik biztu zala inoen; beste batzuek Elias profeta agertu zala; beste honenbestek, barriz, antxinako profetaren bat biztu zala. Herodesek, ostera, holantxe inoan: «Joani neuk ebagi neutsan samea. Nor da, orduan, hau, ze, holakoak entzuten ditut honi buruz?» Eta Jesus ezagutzeko aukera bila ebilen.

Jaunak esana.

 

IRUZKINA

Jesusen aldiko judeguek baeukezan erreferenteak (Moises, Legea, Profetak...) eta euretan sartu gura eben Jesus. Baina ezinezko egiten jake, eta, batzuk uste dabena beste batzuk ezeztatu egiten eben...

Zurrunbilo horretan Herodes bera ere agertzen da gauzea argi ikusi nahian, ezin onartu ebalako Juan Bateatzailea zanik, honi beronek moztu eutson-eta samea.

Baina, ezagutu daiteke Jesus eskema jakinetan begituta, edo Herodesek nahi dauan lez? Asetu daike, Jesus ezagutzeak, norbere kuriosidadea? Horren bila dabizenak hotz lagako ditu Jesusen irudiak.

Jesus ezagutzeko barritasuna onartzeko prest egon behar da; ez da bilatu behar lehengoren bat dala uste izatean. Entzun egin behar jako; jarraitu egin behar jako; ateak zabaldu behar jakoz; eta haren taldeko egin behar da, haren irakatsietan bizi izateko eta irakatsion zabaltzaile (apostolu) izateko.

Horrelaxe baino ezin daiteke ezagutu Jesus; eta, ezagutuz, maitatu. Arteragoko irudiak apurtu beharra dago.

 

 

Urtean Zeharreko XXV. barikua

I. urtean

I. Irakurgaia

Denpora gitxi barru
Jaunaren etxea aintzaz beteko dot.

Ageoren Profezia liburutik

Ag 1, 15b–2, 9

    Darioren erregealdiko bigarren urtean, zazpigarren hilaren hogeta batean, honan berba egin eban Jaunak Ageo profetaren bidez: «Berba egiezue Xealtielen seme Zorobabel Judako gobernariari eta Jotzadaken seme Josue abade nagusiari eta herriko gainerakoei, eta esan: "Ba ete da oraindino inor zuen artean Jaunaren etxea bere lehengo edertasun handian ikusi ebanik? Eta orain zelan dagoala begitantzen jatzue? Ez dozue ikusten ezereztuta dagoala?" Horregaitik, hau dino Jaunak: "Izan adore, Zorobabel! Izan adore, Jotzadaken seme Josue abade nagusia! Baita zuek be, lurraldean bizi zarien guztiok! Izan adore eta ekin lanari, Ni zeuekin nozue-eta –dino Jaun ahalguztidunak–. Egiptotik urten zenduenean agindu neutsuena eta nire espiritua zeuekin dozuez; ez, bada, bildurrik izan".
    Bai, hau dino Jaun ahalguztidunak: "Denpora gitxi barru, dardara eragingo deutset zeru-lurrei eta itsaso-lehorrei; herri guztiei dardara eragingo deutset; eta herri guztietako ondasunak hona etorriko dira, eta Jaunaren etxea aintzaz beteko dot –dino Jaun ahalguztidunak–. Neurea dot zidarra, neurea urrea –dino Jaun ahalguztidunak–. Handia izango da tenplu barriaren aintza, lehengoarena baino handiagoa –dino Jaun ahalguztidunak–, eta leku honetan emongo dot bakea" –halan dino Jaun ahalguztidunak–».

Jaunak esana.

 

Erantzun salmoa

Sal 43 [42], 1. 2. 3. 4 (R/. ik. 5bc)

R/.   Itxaron Jainkoagan; goratuko dot
        neure salbatzailea eta Jainkoa.

V/.   Egidazu justizia, Jainko,
defendatu nire auzia jente sinisbakoaren aurka,
libratu nagizu maltzur gaiztoaren eskutik. R/.

V/.   Oi Zuk, ene Jainko babesle horrek,
zergaitik baztertu nozu?
Zergaitik ibili behar dot ilun, arerioak zapaldua? R/.

V/.   Bialdu zeure argia eta egia, gidatu nagiela,
eta eroan zure mendi santura, zure bizilekura. R/.

V/.   Eta helduko naz Jainkoaren altarara,
neure poz betea dodan Jainkoagana.
Zitaraz goratuko zaitut, Jainkoa, ene Jainkoa. R/.

II. urtean

I. Irakurgaia

Gauza bakotxak bere sasoia dau eguzkipean.

Kohelet liburutik

Koh 3, 1-11

    Danak dau bere sasoia,
eta gauza bakotxak bere sasoia dau eguzkipean:
jaiotzeko sasoia eta hiltzeko sasoia,
landatzeko sasoia eta landatua ataratzeko sasoia,
erailtzeko sasoia eta osatzeko sasoia,
hondatzeko sasoia eta eraikitzeko sasoia.
negar egiteko sasoia eta barre egiteko sasoia,
aiene egiteko sasoia eta alai egoteko sasoia,
harriak jaurtitzeko sasoia eta harriak batzeko sasoia,
besarkatzeko sasoia eta banantzeko sasoia,
bilatzeko sasoia eta galtzeko sasoia,
gordetzeko sasoia eta botatzeko sasoia,
urratzeko sasoia eta josteko sasoia,
isiltzeko sasoia eta berba egiteko sasoia,
maitatzeko sasoia eta gorrotatzeko sasoia,
gudurako sasoia eta bakerako sasoia.

    Zer irabazi ataratzen dau lanean nekatzen danak? Ikusi dot Jainkoak gizon-emakumeei ezarri deutsen egitekoa, horretan jardun dagien. Gauza guztiak egoki egin ebazan, bakotxa bere sasoian, eta gizakien esku itzi eban mundua, aztertu egien; gizakiak, ostera, ezin ulertu Jainkoak hasieratik amaierara egin dituanak.

Jaunak esana.

 

Erantzun salmoa

Sal 144 [143], 1a eta 2abc. 3-4 (R/. 1a)

R/.   Bedeinkatua Jauna, nire harkaitza.

V/.   Bedeinkatua Jauna, nire harkaitza,
nire laguntzailea eta gaztelua,
gotorlekua eta askatzailea,
nire babeskia eta kerizpea. R/.

V/.   Jauna, zer da gizakia Zu haretaz arduratzeko,
zer gizasemea Zuk harengan pentsatzeko?
Arnasaldi baten antzeko da gizakia,
ihesi doan kerizpearen antzeko haren egunak. R/.

 

I. eta II. urteetan

Aleluia

Mk 10, 45

R/.   Aleluia.

V/.   Gizonaren Semea besteen zerbitzari izatera etorri da,
        eta bere bizia danen alde ordainsari emotera. R/.

 

Ebanjelioa

Zu, Jainkoaren Mesias zara.
Gizonaren Semeak asko sufridu behar dau.

✠ Jesu Kristoren Ebanjelioa San Lukasen liburutik

Lk 9, 18-22

    Jesusek otoitzean bakarrik ziharduala, ikasleak hurreratu jakozan, eta Jesusek itaundu eutsen: «Nor nazala dino jenteak?» Hareek erantzun eutsoen: «Batzuek Joan Bateatzailea zarala; beste batzuek Elias; besteek, barriz, antxinako profetaren bat biztu dala». Jesusek, orduan: «Eta zuek, nor nazala dinozue?» Pedrok erantzun eutson: «Jainkoaren Mesias».
    Jesusek inori ez esateko agindu eutsen zorrotz. Eta esan eutsen, gainera, ikasleei: «Gizonaren Semeak asko sufridu beharra dauka; zaharrek, abadeburuek eta lege-maisuek gaiztotzat hartuko dabe eta hil, baina hirugarren egunean biztu egingo da».

Jaunak esana.

 

IRUZKINA

Jenteak badauka erreferenterik; eta erreferente irudi horreen artean sartu behar dabe Jesus. Eta ospe handikotzat dauke. Ez da gitxi. Baina egiazkoa da baieztapena? Hori da Jesusek gura izango leukeana?

Eta ikasleengandik hartzen dauan erantzuna... ez zabaltzeko agintzen deutse zorrotz. Ez ete da egia Jainkoaren Mesias dala?

Esaldi horren mamina da guzurra: Jesus ez da jenteak uste eta nahi dauan Mesias: erromatarren menpetik askatuko dauzana. Ez da hori Jesusen zeregina.

Eta azaltzen deutse bere zeregina Jesusek: erreinuaren iragarpena eta txikienekin bat egitea, honeen zerbitzuan bizi izatea... bizia kendu deieneraino...

Ete da hau ikasleek eurek ulertu ahal izango dabena? Prest ete dagoz Jesusen jarraitzaile maila horretaraino izateko?

Eta niri —gutariko bakotxari— egingo baleusku Jesusek galdera hori, zer erantzungo geuskio? Zer erantzuten deutsagu geure eguneroko bizikereaz?

 

 

Urtean Zeharreko XXV. zapatua

I. urtean

I. Irakurgaia

Etorriko naz eta zure erdian bizi izango.

Zakariasen Profezia liburutik

Za 2, 5-9. 14-15a

    Jaso nebazan begiak eta gizon bat ikusi neban, neurtzeko haria eskuan ebala. Eta itaundu neutsan: «Nora zoaz?» Harek erantzun: «Jerusalem neurtzera, haren luze-zabala zenbat dan jakiteko».
    Orduan, nigaz berbetan ziharduan aingerua aurreratu zan, baina beste aingeru bat bidera etorri eta esan eutson: «Zoaz agudo eta esaiozu mutil horri: "Uri edegia izango da Jerusalem, bertan izango dan bizilagun- eta abere-kopuru handiagaitik"».

    Hau dino Jaunak:

«Neu izango naz suzko harresi haren inguruan,
aintzaz beterik agertuko naz haren erdian».

    Hau dino Jaunak:

«Poztu zaitez eta alaitu, Sion uri eder hori,
zure erdian bizitzera nator-eta.
Egun haretan, herri asko alkartuko jakoz Jaunari,
eta neure herri izango ditut;
zure erdian biziko naz».

Jaunak esana.

 

Erantzun salmoa

Jr 31, 10. 11-12b. 13 (R/. ik. 10d)

R/.   Zainduko gaitu Jaunak,
        artzainak artaldea lez.

V/.   Entzun, herriok, Jaunaren hitza,
iragarri urruneko kostaldeetan:
«Israel sakabanatu ebanak berak batzen dau
eta artzainak artaldea lez zaintzen». R/.

V/.   Jaunak Jakob herria askatu dau,
indartsuagoaren eskutik libratu.
Poz-oihuka etorriko dira Sion mendira,
Jaunaren ondasunetara helduko dira. R/.

V/.   Neskek pozik egingo dabe dantzan
mutil eta agureekin batera.
Hareen dolua alaitasun bihurtuko dot,
atsekabearen ondoren, kontsolatu eta alaituko ditut. R/.

II. urtean

I. Irakurgaia

Gogoratu zeure Egileaz gazte zaran bitartean,
hautsa lurrera eta arnasa Jainkoagana bihurtu baino lehen.

Kohelet liburutik

Koh 11, 9–12, 8

    Alaitu zaitez, mutil, gazte zaran bitartean,
izan zoriontsu zeure gaztaroan,
jarraitu egiozu zeure bihotzari eta zeure begien grinari.
Baina jakin, horreen guztien kontua
eskatuko deutsula Jainkoak auzian.
Kendu zeure bihotzetik kezkak, uxatu gatxa zeure gorputzetik,
gaztetasuna eta gaztaroa agudo joaten dira-eta.

Gogoratu zeure Egileaz gazte zaran bitartean,
aldi txarrak etorri baino lehen,
urte horreek etortzean «ez ditut atsegin» esango dozu-eta.
Orduan, eguzkia eta egun-argia, iretargia eta izarrak
ilundu egingo jatzuz,
eta euria egin ondoren barriro lainotuko dau.
Orduan eskuak dardarka jatzuz jarriko
eta hankak ahulduko;
hortz-haginak gitxituko, eta alperrik dozuz izango,
begiak be ilunpetan geldituko.
Belarriak itxiko jatzuz,
ezin izango dozu aditu errotarri-hotsik,
ezta entzun be txorien kanturik.
Ahotsa moteldu egingo jatzu.
Toki goietan ibiltzeak bildurra emongo deutsu,
baita bide zelaian ibiltzeak be.
Ulea zurituko jatzu, ibilera baldartuko
eta atsegin-grina hoztuko.
Izan be, gizakia bere betiko etxerantz doa
eta kalez kale dabiltz hiletariak.

Orduan, zidarrezko haria eten egingo jatzu,
urrezko ontzia hausiko, pitxerra iturrian apurtuko
eta putzu gainean txirringa printzatuko.
Hautsa lurrera bihurtuko da, handik sortua da-eta,
eta bizi-arnasa Jainkoagana bihurtuko, berak emona da-eta.

Huskeria hutsa –dino Koheletek–,
dana da huskeria.

Jaunak esana.

 

Erantzun salmoa

Sal 90 [89], 3-4. 5-6. 12-13. 14 eta 17 (R/. ik. 1)

R/.   Jauna, gure ihesleku Zeu izan zara
        gizalditik gizaldira.

V/.   Gizakia hautsera bihurtuarazoten dozu,
esanez: «Bihurtu lehenera, gizakiok».
Bai, mila urte zure begietan
atzo igaro zan eguna adina,
gaualdi bat adina. R/.

V/.   Hor daroazuz gizakiak,
ametsa lez dira;
ernetzen dira goizean bedarra lez;
goizean erne eta loratzen da-eta,
arratsaldean zimeldu eta igartzen. R/.

V/.   Irakatsi egiguzu geure egunen kontua eroaten,
zuhurtasunaren muinaz jaubetu gaitezan.
Bihurtu zakiguz, Jauna! Noiz arte?
Erruki zakiez zeure zerbitzariei. R/.

V/.   Asetu gagizuz goizero zeure maitasunaz,
poztu gaitezan eta zoriontsu izan geure egun guztietan.
Betor gugana Jaunaren, gure Jainkoaren, gozotasuna
eta sendotu begi harek gure eskuen lana;
sendotu dagiala, bai, gure lana. R/.

 

I. eta II. urteetan

Aleluia

Ik. 2 Tm 1, 10

R/.   Aleluia.

V/.   Kristo Jesus gure salbatzaileak heriotza ezereztu dau
        eta bizia argitu Barri Onaren bidez. R/.

 

Ebanjelioa

Gizonaren Semea gizakien esku itziko dabe.
Itauntzeak bildurra emoten eutsen.

✠ Jesu Kristoren Ebanjelioa San Lukasen liburutik

Lk 9, 43b-45

    Aldi haretan, Jesusek egiten zituanakaitik zurtz eginda egozan guztiak. Berak esan eutsen ikasleei: «Hartu ondo gogoan berbok: “Gizonaren Semea gizakien esku itziko dabe”». Hareek, ostera, ez eben ulertzen zertan ebilken; ilun gertatzen jaken, eta ez ziran esanahiaz jaubetzen; itauntzeak, barriz, bildurra emoten eutsen.

Jaunak esana.

 

IRUZKINA

Egia de min emoten deuskun edozer eta edonorengandik ihes egiten ahalegintzen garala. Baina, horren aurrean zerk eragiten deusku horren arrazoiaz galdetzea ere? Begiak itxita ibili nahi ete dogu gure bizitzan zehar? Horixe dalako ebanjelio zati honek Jesusen ikasleez dinoana. Geure jokaeraz ere ba ete dihardu?

Ez da hori, horraitino, Jesusen jarrerea. Jesusek ondo zabalik daukaz begiak eta entzumena ere bai. Horregaitik egiten da bat bazterreratuekaz eta pobreekaz, eta entzuten dau hareengan Aitaren deia; eta gauza da Izadiko gauzarik txikienean ere hori aurkitzeko eta bere esker ona eta goralpena jasoteko.

Atsegin bila, atsekabeetatik ihes egiten dihardugu? Gure makaltasunak berak eta geure mugek dakarskuez —nahi eta nahi ez, gaur ez bada, bihar— atsekabeak. Eta orduan? Jainkoa madarikatu?

Jesusek ez dau atsekabetik ihes egitea bilatzen, beti ere Jainkoaren nahia betetea bilatzen baino. Horexek emoten deutso ziurtasuna; eta horixe da, besteek ulertzen ez daben arren, bere aintza.

Badirudi gero ulertuko ebela hori haren ikasleek. Beranduegi?

Eta nik noiz ulertu neike hori?