Urtean Zeharreko XXIX. astelehena
I. urtean
I. Irakurgaia
Liburu Santuak
gugaitik be badino;
gu be, harengan
sinisten dogunok,
zintzotzat
hartuko gaitu-eta Jainkoak.
San Paulo Apostoluak Erromatarrei egindako epistolatik
Erm 4, 20-25
Senideok: Jainkoaren agintzariaren aurrean,
Abraham ez zan sinisgogor izan, ezta zalantzan ibili be, indartu egin zan,
ostera, sinismenean; holan, Jainkoak egia inoala autortu eban, ziur ekian-eta
Jainkoak badauala ahalmena agindutakoa betetzeko. Horrexegaitik, hain zuzen,
zintzotzat hartu eban Jainkoak.
Baina Liburu Santuak ez dau hori haregaitik
bakarrik esaten, geugaitik be badino; gu be, Jesus gure Jauna hildakoen artetik
biztu ebanagan sinisten dogunok, sinismenari esker zintzotzat hartuko gaitu-eta
Jainkoak: gure pekatuakaitik emon ebelako Jesus heriotzara eta gure
salbazinorako izan zalako biztua.
Jaunak esana.
Erantzun salmoa
Lk 1, 69-70. 71-72. 73-75 (R/. 68)
R/. Bedeinkatua Jauna, Israelen Jainkoa,
agertu eta bere herria askatu dauana!
V/. Salbazino-indarra deusku emon
bere
morroi Daviden etxean.
Halan
aginduta eukan antxinatik
bere
profeta santuen ahoz. R/.
V/. Salbatuko ginduzala geure arerioen menpetik,
gorroto
gaituan guztien eskutik.
Holan
agertu dau gure gurasoenganako errukia
eta
gogoratu da bere itun santuaz. R/.
V/. Gure guraso Abrahami egindako zinaz:
berak
emongo euskula,
arerioen
eskutik askaturik,
bildur
barik bera zerbitzea,
santu
eta zuzen izanez haren aurrean
geure
bizitza guztian. R/.
II. urtean
I. Irakurgaia
Jesusegaz
batera berbiztu ginduzan
eta zeruetan
jesarriarazo.
San Paulo Apostoluak Efesoarrei egindako epistolatik
Ef 2, 1-10
Senideok: Zuek hilda zengozen zeuen
hutsegite eta pekatuakaitik, hori zan-eta zuen jokabidea sasoi baten, mundu
honen joerei jarraituz; munduan agintzen daben indarren buruzagiaren menpeko
zinien, jente errebeldeagan diharduan espirituaren menpeko. Gu guztiok be halan
bizi izan ginan lehen, geure giza grina txarrei jarraituz, geure grina eta
burutapen gaiztoek agindutakoa eginez; izatez, guk be zigorra merezi genduan,
beste guztiek lez.
Baina errukian aberatsa dan Jainkoak halako
maitasun neurribakoaz maite izan gaitu-eta, geure pekatuakaitik hilda
gengozala, bizia emon euskun Kristogaz batera –onginahi hutsez zagoze
salbatuak–, eta Kristo Jesusegaz batera berbiztu ginduzan eta zeruetan
jesarriarazo. Honan, Jesu Kristogan guretzat hain ona izanez agertu nahi izan
deutse datozan gizaldiei, zein ugaria eta eskuzabala dan bere onginahia.
Izan be, onginahi hutsez salbatuta zagoze
fedearen bidez; eta hori ez dator zuengandik, Jainkoak emonda baino; ez dator
egiteetatik, inor harrotu ez dadin.
Izan be, Jainkoak eginak gara; harek sortu
gaitu Kristo Jesusengan, on egiten ahalegindu gaitezan, Jainkoak guretzat aldez
aurretik erabagi eban lez.
Jaunak esana.
Erantzun salmoa
Sal 100 [99], 2. 3. 4. 5 (R/. 3b)
R/. Jaunak egin gaitu, harenak gara.
V/. Lurtar guztiok, egin irrintzi Jaunari,
zerbidu
egizue Jauna pozaren pozez,
sartu
zaiteze oihu alaiz haren aurrera. R/.
V/. Jakizue Jauna dala Jainkoa,
harek
egin gaitu, harenak gara,
haren
herri eta haren larreko artalde. R/.
V/. Sartu haren tenpluko ateetatik eskerrak
emonez,
haren
atarietan gorazarreak abestuz.
Emon
eskerrak, bedeinkatu haren izena. R/.
V/. «Ona da-eta Jauna,
haren
maitasuna betikoa,
haren
leialtasuna gizaldiz gizaldikoa». R/.
I. eta II. urteetan
Aleluia
Mt 5, 3
R/. Aleluia.
V/. Zorionekoak gogoz behartsu diranak,
eurena
dabe-eta Jainkoaren erreinua. R/.
Ebanjelioa
Norentzat izango dok pilatu doana?
✠ Jesu Kristoren ebanjelioa San Lukasen liburutik
Lk 12, 13-21
Aldi haretan, jente arteko batek esan eutson
Jesusi: «Maisu, esaiozu nire anaiari
ondasunak neugaz erdibana egiteko».
Jesusek
erantzun eutson: «Lagun, nork jarri nau Ni zuen artean epaile edota
ondasun-banatzaile?» Eta jenteari esan eutson: «Kontuz! Gorde zeuen burua
diru-gosetik ze, ondasunek ez deutsoe inori bizia segurtatzen, ugariak izanda
be».
Gero, parabola hau kontatu eutsen: «Gizon
aberats bati lurrak uzta handia emon eutson. Eta holantxe pentsatzen hasi zan
berekautan: “Zer egin, ze ez daukat uzta non jasorik”. Eta beretzat esan eban:
“Badakit zer egin: garautegi zaharrak bota eta handiagoak egingo dodaz eta
hareetan jasoko dodaz garia eta gainerakoak. Gero, esango deutsat neure
buruari: “Ea, mutil! Badaukak hor gordeta urteetarako nahiko ondasunik; hartu
atseden, jan, edan eta ondo bizi!”
Baina Jainkoak esan eutson: “Burubako
halakoa! Gaur gauean bertan hil behar dok. Norentzat izango dok pilotu doana?”»
Eta holantxe amaitu eban Jesusek: «Horra zer
gertatzen jakon, Jainkoarentzat aberats izan beharrean, ondasunak beretzat
pilotzen dituanari».
Jaunak esana.
IRUZKINA
Handia zan lehenengo kristau senitarteetan diruaren arazoa. Ez eutsoen hareek behin-betiko erantzunik emon arazo horri, ahalegintzen baziran ere euren arteko inork ez eiala beharrizanik izan.
Gaur egun ere handia da ondasunen arazoa. Ez dira gitxi bizi izateko beharrezkoa dala dirua uste dabenak, eta geroa ziurtatzeko metatzen ahalegintzen diranak.
Eta orduko aldietan baino gure bizitza biologikoa luzeagoa da, ba; ordukoek baino asko gehiago behar dogu, beharrizan gehiago ere sortu doguzalako, eta erosotasun maila handiagoak ezagutzen doguzalako…
Ez ete gara itsu geratu beharrizan horri erantzun guran? Ez ete gara diruaren, erosotasunaren eta sortuazo doguzan beharrizanei erantzun gura izatearen morrontzan jausi? Bizitza biologikoa baino ez da gure ardurea?
Jesusen inbitazinoa gure ardurak senideak izan daitezala da. Hareen zerbitzuan emoten dan bizitza da benetan betea dana; ez, ostera, ondasunez inguraturik dagoana.
Urtean Zeharreko XXIX. martitzena
I. urtean
I. Irakurgaia
Gizon
bakarraren pekatuagaitik heriotza nagusitu bazan,
zenbatez
gehiago ez ete dira salbatuak nagusi izango betiko bizian!
San Paulo Apostoluak Erromatarrei egindako epistolatik
Erm 5, 12. 15b. 17-19. 20b-21
Senideok: Gizon baten bidez sartu zan
pekatua munduan, eta pekatuagaitik heriotza; holan, heriotza gizaki guztiengana
zabaldu zan, guztiek egin ebelako pekatu. Izan be, gizon bakar baten pekatuaz
danak hil badira be, askoz ugariago zabaldu da danentzat Jainkoaren grazia eta
dohaia, beste gizon bakar bati esker, Jesu Kristori esker, hain zuzen be.
Gizon bakarraren pekatuagaitik heriotza
nagusitu bazan, zenbatez gehiago ez ete dira betiko bizian nagusi izango bakar
batengaitik, Jesu Kristogaitik, salbazinoaren grazia eta dohai oparoa hartzen
dabenak!
Beraz, baten pekatuak gizaki guztiei
gatxespena ekarri eutsen lez, baten leialtasunak gizaki guztiei salbazinoa eta
bizia ekarri deutse. Eta baten obedientzia ezagaitik guztiak pekatari izan
ziran lez, baten obedientziagaitik guztiak zuzen izango dira.
Pekatua ugaritu zanean, are ugariago izan
zan Jainkoaren onginahia; izan be, pekatua, heriotza ekarriz, nagusi izan zan
lez, Jainkoaren onginahia be, gizakia zuzentzat hartuz, nagusi izango da betiko
bizia emonez, Jesu Kristo gure Jaunaren bitartez.
Jaunak esana.
Erantzun salmoa
Sal 40 [39], 7-8a. 8b-9. 10 eta 17 (R/. ik. 8a eta 9a)
R/. Hemen nozu, Jauna, zure nahia egin dagidan.
V/. Zuk ez dozu sakrifiziorik eta eskeintzarik
nahi izan,
ez
erre-oparirik eta pekatuen parkamen-oparirik eskatu;
baina
belarriak edegi deustazuz.
Horregaitik
dinot: «Hemen nozu». R/.
V/. Hau dago nitaz liburuan idatzita:
egin
dagidala zure nahia.
Atsegin
dot, ene Jainko,
barru-muinetan
dot zure legea. R/.
V/. Iragarri dot batzar nagusian zure justizia,
ez
ditut ezpanak itxi, ondo dakizu, Jauna.
Poztu
eta alaitu beitez Zugaz
zure
bila dabiltzanak.
«Handia
da Jauna» esan begie beti
zure
salbazinoa maite dabenek. R/.
II. urtean
I. Irakurgaia
Kristo da gure
bakea.
Bat egin ditu
berak herri biak.
San Paulo Apostoluak Efesoarrei egindako epistolatik
Ef 2, 12-22
Senideok: Lehenago ez zenduen Mesias
zeuekin, eta ez zenduen parterik Israel herriaren eskubideetan; ez zenduen
zerikusirik Jainkoaren agintzari eta itunetan, eta itxaropenik barik eta Jainkorik
barik bizi zinien munduan. Orain, barriz, Kristo Jesusengan zagoze. Sasoi baten
urrun zinienok, hurreratu egin zarie Kristoren heriotzari esker.
Izan be, Kristo da gure bakea. Bat egin ditu
berak herri biak, bereizten ebazan hesia, areriokeria, deseginez. Bere
gorputzean baliobakotu dau legea bere agindu eta arauekin, eta herri biekin
beragan gizadi barri bakarra sortu dau, bakeak eginez. Herri biak Jainkoagaz
adiskidetu ditu eta kurutzeko heriotzaren bidez gorputz bakar baten alkartu,
hareen arteko areriokeria beragan ezereztuz.
Bere etorreraz bakearen Barri Ona ekarri
eban: bakea zuei, urrun zinienoi, eta bakea hurrean ziranei; izan be, bai
batzuk eta bai besteok beraren bidez hurreratu gaitekez Aitagana, Espiritu
berarengan alkarturik.
Ez zarie, beraz, arrotz, ez atzerritar,
Jainkoaren herriko kide baino eta Jainkoaren familiako, apostoluen eta profeten
oinarri gainean eraikiak, Kristo Jesus bera giltzarri dala. Honengan ondo
finkaturik, eraikin osoa gora doa, tenplu santu bihurtzeraino Jaunagan. Honengan parte zarie zuek be besteekin batera,
Espirituagan Jainkoaren bizileku bihurtzeraino.
Jaunak esana.
Erantzun salmoa
Sal 85 [84], 9ab eta 10. 11-12. 13-14 (R/. ik. 9b)
R/. Jaunak bakea agintzen deutso bere herriari.
V/. Entzungo dot Jainkoak dinoana:
Jaunak
bakea agintzen deutse bere herriari eta fededunei.
Hurrean
dabe salbazinoa begirune deutsoenek;
bai,
gure lurraldean kokatuko da Jaunaren aintza. R/.
V/. Maitasunak eta leialtasunak alkar dabe
aurkitzen,
justiziak
eta bakeak alkar besarkatzen.
Leialtasuna
lurretik da ernetzen,
justizia
zerutik jaisten. R/.
V/. Jaunak emongo dau euria,
eta
gure lurrak ekarriko bere uzta.
Haren
aurretik joango da justizia,
haren
pausuei jarraituko deutse ongizateak. R/.
I. eta II. urteetan
Aleluia
Lk 21, 36
R/. Aleluia.
V/. Egon erne eta egin otoitz une oro,
zutunik
egon ahal zaitezen Gizonaren Semearen aurrean. R/.
Ebanjelioa
Zorionekoak
morroi horreek, nagusiak, heltzean,
zain aurkitzen
baditu!
✠ Jesu Kristoren ebanjelioa San Lukasen liburutik
Lk 12, 35-38
Aldi haretan, Jesusek esan eutsen ikasleei:
«Zagoze prest, jantziak lotuta eta kriseiluak biztuta; izan zaiteze nagusia
ezteguetatik noiz bihurtuko zain dagozan morroiak bezalakoak, heldu eta atea jo
baizen laster edegitzeko prest dagozan morroien modukoak.
Zorionekoak morroi horreek, nagusiak,
heltzean, itxaroten aurkitzen baditu! Egia dinotsuet: erropak aldaturik,
mahaian jesarriazoko ditu eta zerbitzen hasiko jake. Eta gauerdian nahiz
goizaldean badator eta holan aurkitzen baditu, zorionekoak hareek!
Jaunak esana.
IRUZKINA
Zer ikasi eben Jesusen lehen jarraitzaileek eratu ebezan senitarteetan? Zer erein eban Jesusek bere jarraitzaileengan? Gauza askoren artean, hementxe aurkitzen dogu senitarte hareetako jarrera bat: une oro harrerarako prest egotea; senitartearen jarrerea zerbitzua izan eitela.
Eta gauza handitzat dauken horren barri emoten deusku. Eta horixe dala, dinoskue, esna (itxarrik) egoteko erea. Bestela lo dago, eginbeharretik kanpo dago.
Jarrera hori, urteen poderioz, lausotzen joan da, eta guztiz desitxuratuta geratu da. Erratzeko ardura barik esan geike, kristau senitarteen gaurko ardurea ez dala senidea, norbere salbazinoa baino, edo beharrizanetarako Jainkoaren laguntza eskuratzea.
Jesusen jarraitzaile izatea eta haren irakatsiak gauzatzea ahazten diranean, eta erdian norbere ardurak jarten diranean —eta ardura bakar lez—, Jesusentzat garrantzizko gauza bakarra zana alde batera jaurtitzen dogu.
Gure eginbeharra ez da Jainkoa zerbitzatzea, behartsuari harrera egitea eta haxe zerbitzatzea baino. Horretan aurkitzen bagaitu, berak jarriazoko gaitu bere mahaian eta zerbitzatuko gaitu.
Urtean Zeharreko XXIX. eguaztena
I. urtean
I. Irakurgaia
Heriotzatik
bizira bihurtutako gizaki lez,
jarri zeuen
gorputz-atalak Jainkoaren zerbitzura.
San Paulo Apostoluak Erromatarrei egindako epistolatik
Erm 6, 12-18
Senideok: Pekatua ez bedi gehiago nagusi
izan zuen gorputz hilkorrean. Ez jarri beraren grina gaiztoen menpean, ezta
eskeini be pekatuari zeuen gorputz-atalak, gaiztakeria egiteko tresna bihurtuz.
Bestetara, eskeini zeuen burua Jainkoari, heriotzatik bizira bihurtutako gizaki
zarienez, eta jarri zeuen gorputz-atalak Jainkoaren zerbitzura, ona egiteko
tresna bihurtuz. Holan, pekatuak ez dau zuen gain aginterik izango, ez
zagoze-eta legepean, Jainkoaren onginahiaren menpean baino.
Beraz, zer? Pekatu egingo ete dogu, legepean
ez, Jainkoaren onginahiaren menpean gagozalako baino? Ez horixe! Badakizue,
norbaiten menpean jartzen bazarie esklabo lez hari obeditzeko, obeditzen
deutsazuen haren esklabo egiten zariela: pekatuari obeditzeko bada, heriotzara
zoaze; Jainkoari obeditzeko bada, barriz, salbazinora.
Baina, Jainkoari eskerrak, pekatuaren
esklabo zinienok irakatsi jatzuen ikasbidea bihotzez onartu dozue eta,
pekatutik askatuta, onaren zerbitzura jarri zarie.
Jaunak esana.
Erantzun salmoa
Sal 124 [123], 1-3. 4-6. 7-8 (R/. 8a)
R/. Gure laguntza Jaunaren izena.
V/. Jauna gure alde egon ez balitz
–esan
begi Israelek–,
Jauna
gure alde egon ez balitz,
arerioek,
gure aurka jasotzean,
bizirik
iruntsiko ginduezan,
hasarre-sutan
egozan-eta gure kontra. R/.
V/. Urek iruntsiko ginduezan,
uholdeak
hondoratuko;
ur
indartsuek ginduezan hondoratuko.
Bedeinkatua
Jauna, ez gaitu-eta egin
hareen
hortzen harrapakin. R/.
V/. Txoria ehiztarien saretik lez gara libratu;
hausi
da sarea, eta gu libre geratu.
Gure
laguntza Jaunaren izena,
zeru-lurren
egilearena. R/.
II. urtean
I. Irakurgaia
Kristoren
misterioa orain agertu dau Jainkoak:
jentilak Kristo
Jesusegaz oinordekide dirala, hain zuzen be.
San Paulo Apostoluak Efesoarrei egindako epistolatik
Ef 3, 2-12
Senideok: Jakingo dozue, ziur, Jainkoak bere
onginahian zuen onerako emon deustan eginkizuna, goi-agerpenez jakinarazo
deust-eta bere asmo ezkutua, goratxuago labur idatzi deutsuedanez. Hori
irakurriz, bada, ikusi zeinkie zelan ulertzen dodan Kristoren misterioa.
Salbazino-asmo hau ez jaken lehengo gizaldiei jakinarazo; orain, ostera,
Espirituaren bidez bere apostolu santuei eta profetei agertu deutse Jainkoak. Eta
hauxe da Jainkoaren asmo ezkutua: Barri Onari esker, jentilak Kristo Jesusegaz
oinordekide dirala, haregaz gorputz bat bera osotzen dabela eta agintzari
beraren partaide dirala.
Barri On horren zerbitzari egin nau Jainkoak
onginahi hutsez, bere ahalmen indartsuaz emon deustan dohaiz. Niri, fededun
guztien artean txikiena nazan honi, dohai hau emon deust Jainkoak: Kristoren
neurribako aberastasuna jentilei iragartzea, eta guztiei argi adierazotea zelan
diharduan betetzen, Jainkoagan, gauza guztien egileagan, betidanik gordeta
egoan asmo ezkutuak. Holan, agirian jartzen jake orain, Eleizearen bitartez,
zeruetako aginteei eta ahalmenei Jainkoaren era askotako jakituria, berak
betidanik eban eta Kristo Jesus gure Jaunagan burutu dauan asmoaren jakituria.
Kristori esker eta beronengan dogun sinismenaren bitartez ausartzen gara
konfiantza osoz Jainkoagana hurreratzera.
Jaunak esana.
Erantzun salmoa
Is 12, 2. 3 eta 4bcd. 5-6 (R/. 3)
R/. Atarako dozue ura pozik
salbamenaren iturrietatik.
V/. Bai, Jainkoa dot salbatzaile!
Badot
uste on eta ez naz bildur,
Jauna
dot-eta indar eta kemen,
ha
neure salbazino. R/.
V/. Atarako dozue ura pozik
salbazinoaren
iturrietatik.
«Eskerrak
Jaunari, dei egin haren izenari,
iragarri
haren egintzak herriei,
aldarrikatu
zein bikaina dan haren izena. R/.
V/. Kanta Jaunari, bikain jokatu dau-eta,
jakin
begie honen barri mundu osoan.
Egin
poz-irrintzi eta oihu, Siongo bizilagunok,
handikiro
dihardu-eta zuen alde Israelgo Santuak». R/.
I. eta II. urteetan
Aleluia
Mt 24, 42a. 44
R/. Aleluia.
V/. Zagoze erne,
gitxien
uste dozuen orduan
etorriko
jatzue-eta Gizonaren Semea. R/.
Ebanjelioa
Asko emon jakonari, asko eskatuko jako.
✠ Jesu Kristoren ebanjelioa San Lukasen liburutik
Lk 12, 39-48
Aldi haretan, Jesusek esan eutsen ikasleei:
«Hartu gogoan hau: etxeko nagusiak, lapurra zein ordutan etorriko dan jakingo
baleu, ez leuke etxea zulatzen itziko. Egon prest zeuok be ze, gitxien uste
dozuen orduan etorriko da Gizonaren Semea».
Pedrok itaundu eutson: «Jauna, guretzat ala
danentzat esan dozu parabola hau?»
Jaunak erantzun: «Izan zaiteze etxejagole
zintzo eta zentzunduna lakoak, nagusiak, bere orduan behar dan janaria
banatzeko, morroien buru ipini dauana lakoak. Zorionekoa morroi hori, nagusiak,
heltzean, agindua egiten aurkitzen badau! Benetan dinotsuet: bere ondasun
guztien buru ipiniko dau. Baina morroia, nagusia atzeratu egingo dalakoan,
morroi-lagunak eta neskameak jotzen eta jan-edanean eta mozkorkerian hasten
bada, gitxien uste dauan egunean eta gitxien uste dauan orduan etorriko jako
nagusia, gogor zigortuko dau eta emongo deutso zintzo ez diranek merezidu
dabena.
Nagusiaren nahia zein dan jakin arren,
gauzak harek gura dauan lez eratzen edo egiten ez dituan morroiak zigor gogorra
izango dau; nagusiaren borondatea zein dan jakin barik, zigorra merezidu dauan
zeozer egiten dauanak, barriz, biguna. Asko emon jakonari, asko eskatuko jako;
eta askoren ardura emon jakonari, oraindik kontu handiagoa eskatuko».
Jaunak esana.
IRUZKINA
Jakin arren guk etorria dala Jauna, beti dagoala etorten geure artean dalako, gutariko gehienek —danok ez esatearren— hemen agertzen dan etorte hori azken etorrerea dalakoan gagoz. Horixe adierazten dau halako esaera harek: Autortuta aurkitu naiala Jainkoak.
Hau ahaztuz, Jauna geure artean dala eta une oro dagoala etorten, nasai aldiak hartu daitekez, behar ez dan tokietan sartuz, edo behar ez diran egintzetan jardunez.
Badirudi halangoak egozala aldi haretako kristau senitarteetan: egon behar zanara ez egonik, beste jardute batzutan ziharduanak.
Gogoan hartzera garoaz Jaunak, eta ez ezelango bildurrik sartzera, halantxe erabili bada ere sarritan esaera hori: Jainkoagandik danok hartu dogu bardin, baina, egoera ezbardinetan gagozanez, bakotxari bere arduraren mailan eskatzen jako.
Gure eginbeharra, ba, geure eskuzabaltasunaren neurrian emotea da. Hortxe ikusten dogu ze eragin dauan gugan Jainkoaren graziak.
Urtean Zeharreko XXIX. eguena
I. urtean
I. Irakurgaia
Pekatuaren
menpetik askatuta,
Jainkoaren
esklabo eginak izan zarie.
San Paulo Apostoluak Erromatarrei egindako epistolatik
Erm 6, 19-23
Senideok: Giza erara berba egiten deutsuet,
ulertzeko dozuen makaltasuna kontuan hartuz. Zeuen burua lizunkeriaren eta
gaiztakeriaren zerbitzura jarri zenduen lehen, guztiz gaiztotzeraino; era
berean orain, jarri zaiteze onaren zerbitzura, guztiz Jainkoarenak izan
zaitezen.
Pekatuaren esklabo zinienean, ez zenduen
onagaz loturarik. Eta zer frutu izan zenduen orduan? Orain lotsa be emoten
deutsue ordukoak, heriotza dau-eta ondorio.
Orain, ostera, pekatuaren menpetik askaturik
eta Jainkoaren esklabo eginik, guztiz Jainkoarenak izatea dozue frutu eta honek
betiko bizia dau ondorio. Pekatuak dakarren ordaina heriotza da; Jainkoak
emoten deuskun dohaia, barriz, betiko bizia, Jesu Kristo gure Jaunaren bitartez
emona.
Jaunak esana.
Erantzun salmoa
Sal 1, 1-2. 3. 4 eta 6 (R/. Sal 40 [39], ik. 5a)
R/. Zorionekoa
Jaunagan itxarobidea jartzen dauana!
V/. Zorionekoa gaiztoen aholkuari jarraitzen ez
deutsona,
pekatarien
bidean ez dabilena,
ezta
lotsabakoen batzarrean jesartzen be,
Jaunaren
legean atsegin dauana baino,
haren
legea gau eta egun hausnartzen dauana. R/.
V/. Ur-ertzean landatutako zuhaitzaren antzekoa
da:
emoten
dau bere sasoian frutua,
eta
ez jako orririk igartzen;
egiten
dauan guztiak ondo deutso urteten. R/.
V/. Ez holan gaiztoak, ez holan,
haizeak
daroan galautsaren antzekoak dira.
Horregaitik,
gaiztoak ez dira zutunik egongo auzian,
ezta
pekatariak be zintzoen batzarrean.
Jaunak
zaintzen dau zintzoen bidea;
gaiztoena,
barriz, galdu egiten da. R/.
II. urtean
I. Irakurgaia
Izan dadila
maitasuna zuen bizitzaren erro eta oinarri;
holan, Jainkoaren
betetasunaz beteko zarie.
San Paulo Apostoluak Efesoarrei egindako epistolatik
Ef 3, 14-21
Senideok: Belauniko jartzen naz Aitaren
aurrean, bai zeruan eta bai lurrean familia guztien sorburu danaren aurrean,
eta hau eskatzen deutsat: bere aintzaren aberastasunari dagokionez, sendotu
zagiezala bere Espirituaren indarrez, barrutik bizi zaitezen; bizi dadila
Kristo zuen bihotzean sinismenaren bidez eta izan dadila maitasuna zuen
bizitzaren erro eta oinarri. Holan ulertu ahal izango dozue, fededun guztiekin
batera, zein zabal eta luze, zein garai eta sakon dan Kristoren maitasuna;
ezagutuko dozue jakintza guztien gainetik dagoan maitasun hori, eta, holan,
Jainkoaren betetasunaz beteko zarie.
Jainkoari, gugan darabilen bere indarraz
gauza guztiak guk eskatu geinken nahiz pentsatu geinken baino askoz hobeto egin
leikiezanari, aintza Eleizan eta Kristo Jesusengan, gizaldiz gizaldi eta
gizaldien gizaldietan. Amen.
Jaunak esana.
Erantzun salmoa
Sal 33 [32], 1-2. 4-5. 11-12. 18-19 (R/. ik. 5b)
R/. Jaunaren graziaz dago lurra betea.
V/. Egin poz-oihu, zintzook, Jaunari,
zuzenei
dagokie, izan be, ha gorestea.
Ospatu
Jauna zitaraz,
jo
harentzat hamar hariko harpa. R/.
V/. Zuzena da-eta Jaunaren hitza,
fidagarria
harek egin dauan guztia.
Justizia
eta zuzenbidea dau maite,
Jaunaren
maitasunaz dago lurra beteta. R/.
V/. Jaunaren asmoak, barriz, betiko dirau,
haren
burubideek gizaldiz gizaldi.
Zorionekoa,
Jauna Jainko dauan nazinoa,
harek
bere ondaretzat aukeratu dauan herria. R/.
V/. Jauna arduratzen da begirune deutsoenez,
haren
maitasunean itxaroten dabenez,
hareek
heriotzatik libratzeko
eta
gosetean bizirik gordetzeko. R/.
I. eta II. urteetan
Aleluia
Flp 3, 8-9
R/. Aleluia.
V/. Dana galdu neban
eta
dana zaborraren pareko jotzen dot,
Kristo
irabaztearren eta haregaz bat eginda bizitzearren. R/.
Ebanjelioa
Ez naz etorri
bakea ekartzera,
banaketa baino.
✠ Jesu Kristoren ebanjelioa San Lukasen liburutik
Lk 12, 49-53
Aldi haretan, Jesusek esan eutsen ikasleei:
«Lurrera sua ekartzera etorri naz, eta gurago neuke daborduko sutan balego!
Heriotza-uretan urperatu behar dot, eta hau larria hori bete arte!
Munduari bakea ekartzera etorri nazala uste
dozue ala? Bakea ez, banaketa baino. Ze, hemendik aurrera, etxe bateko bost
senideak banaturik egongo dira: hiru biren kontra eta bi hiruren kontra; aita
semearen aurka eta semea aitaren aurka, ama alabaren aurka eta alaba amaren
aurka, amaginarreba erranaren aurka eta errana amaginarrebaren aurka».
Jaunak esana.
IRUZKINA
Ez deusku, ba, sarri esaten Jesusek, bakea emoten deuskula, bere bakea, ez munduak emoten dauana lakoa? Zelan ulertu, edo horregaz bateratu, orain aurkitzen dogun Jesusen esaldi hori: Bakea ekartera ez, banaketa baino? Eta etxe bateko bost senideak banaturik egongo dira…
Ez da errexa ulertzea..., geure ikusmoldeak baditugu oinarri, behintzat. Hortik urten eta Jesusen hizkerara hurreratu behar izango dogu.
Jesusek aitatzen dauan sua Espirituaren garra da. Honek txarkeria guztia erre eta kixkali behar dau. Eta su horretan ikusi nahi izango leuke Jesusek mundu osoa.
Baina zenbat dagozan euren norkeriari, edo euren onurei begira, eta eurok jarten beste edozeren gainetik.
Espirituaren eraginean diharduenen aurka legokez burrukan honeik. Eta holangoak etxean bertan ere euki geikez.
Jesusen aukerea egiten dabenek besteen erasoak jasan behar izango dabez. Baina ez dabe bildurrik izan behar, Espirituaren garretan ibiliko dira-eta. Txarkeriaren indarrei men egiteak ez gaitu benetako bakera eroango, azalekora baino. Benetakoa Jesus aukeratzeak emongo deusku, erasoak sufritu behar izan arren.
Urtean Zeharreko XXIX. barikua
I. urtean
I. Irakurgaia
Nork askatuko
nau,
heriotzara
naroan neure izaera honetatik?
San Paulo Apostoluak Erromatarrei egindako epistolatik
Erm 7, 18-25a
Senideok: Ondo ikusten dot ez dagoala nigan
–nire giza grinetan, hain zuzen be– ezer onik; izan be, neure esku dago on egin
nahi izatea; ez, ostera, egitea. Nahi dodan ona ez dot egiten, eta nahi ez
dodan txarra egiten dot. Nahi ez dodana egiten badot, ostera, ez dot nik
egiten, nigan dabilen pekatuak baino.
Beraz, lege hau sentitzen dot neugan: ona
egin nahi dodala, txarrak urteten deustala. Neure barruan atsegin dot
Jainkoaren legea; baina neure gorputz-ataletan beste lege bat ikusten dot, nire
adimenaren legeari burruka egiten deutsona; eta nire gorputz-ataletan dabilen
pekatuaren legeak preso hartuta nauka.
Ene zoritxarra! Nork askatuko nau heriotzara
naroan neure izaera honetatik? Jainkoak, Jesu Kristo gure Jaunaren bitartez.
Eskerrak berari!
Jaunak esana.
Erantzun salmoa
Sal 119 [118], 66 eta 68. 76-77. 93-94 (R/. 68b)
R/. Irakatsi niri, Jauna, zeure arauak.
V/. Irakatsi niri ondo bereizten eta ezagutzen,
fidatzen
naz-eta zure aginduez.
Ona
zara eta ongilea,
irakatsi
niri zeure arauak. R/.
V/. Arren, kontsolatu nagiala zure maitasunak,
zeure
zerbitzari honi agindu deutsazunez.
Betorkit
zure errukia, bizibarritu nadin,
zure
nahian dot-eta gozamena. R/.
V/. Ez naz sekula ahaztuko zure legeez,
horreen
bidez nozu-eta biziarazoten.
Zeurea
nozu, salbatu nagizu,
zure
legeen bila naz-eta ahalegintzen. R/.
II. urtean
I. Irakurgaia
Bat bakarra da
gorputza, bat bakarra Jauna,
bat bakarra
sinismena, bat bakarra Bateoa.
San Paulo Apostoluak Efesoarrei egindako epistolatik
Ef 4, 1-6
Senideok: Nik, Jaunagaitik preso nagoan
honek, eskatzen deutsuet, bizi zaitezala hartu dozuen bokazinoari dagokionez.
Izan beti apal, otzan eta jasankor, alkar maitekiro eroanez. Ahalegindu zaiteze
Espirituak sortzen dauan batasunari eusten, bakearen lokarriz.
Bat bakarra da gorputza eta bat bakarra
Espiritua, Jainkoak egin deutsuen deiari dagokion itxaropena be bat bakarra dan
lez. Bat bakarra Jauna, bat bakarra sinismena, bat bakarra Bateoa; bat bakarra
guztien Jainkoa eta Aita, guztien gainetik dagoana, guztien bidez diharduana
eta guztiengan bizi dana.
Jaunak esana.
Erantzun salmoa
Sal 24 [23], 1-2. 3-4b. 5-6 (R/. ik. 6)
R/. Hau da, Jauna, zure aurpegi bila dabiltzanen taldea.
V/. Jaunarena da lurra, eta lurra betetzen
dauana,
mundua
eta bertan bizi diranak,
harek
ezarri dau-eta itsasoen gainean,
harek
finkatu lur azpiko ibaien gainean. R/.
V/. Jaunaren mendira nork igongo?
Haren
toki santuan nor egongo?
Eskuak
errubako eta bihotza garbi dituana,
sasijainkoetara
jotzen ez dauana. R/.
V/. Holakoa bedeinkatuko dau Jaunak,
justizia
egingo deutso Jainko salbatzaileak.
Hau
da haren bila ahalegintzen dan gizaldia,
Jakoben
Jainkoaren aurpegi bila dabilena. R/.
I. eta II. urteetan
Aleluia
Ik. Mt 11, 25
R/. Aleluia.
V/. Bedeinkatua Zu, Aita, zeru-lurren Jauna,
erreinuari
buruzko Barri Ona
jente
apalari agertu deutsazulako. R/.
Ebanjelioa
Badakizue
zeru-lurren itxurari igartzen,
eta zelan ez
deutsazue igartzen sasoi honi?
✠ Jesu Kristoren ebanjelioa San Lukasen liburutik
Lk 12, 54-59
Aldi haretan, Jesusek esan eutson jenteari:
«Sartaldean lainoa ikusi orduko, “euria dator” esaten dozue, eta halantxe
gertatzen da. Hegoak jotzen dauanean, barriz, “sargori dago” esaten dozue, eta
halantxe gertatzen da. Itxurazaleok! Badakizue zerulurren itxurari igartzen,
eta zelan ez deutsazue igartzen sasoi honi? Zergaitik ez dozue zeuok zeuotara
ebazten zuzena zer dan?
Zeure arerioagaz epaitegira zoazala,
ahalegindu zaitez bidean harekin konponbidea aurkitzen; osterantzean,
epaileagana eroango zaitu eta epaileak ertzainaren esku jarriko, eta ertzainak
kartzelara botako. Hara zer dinotsudan: ez dozu handik urtengo, azken zentimoa
ordaindu arte».
Jaunak esana.
IRUZKINA
Jesusen oraingo berbak ez dira apostoluei zuzenduak, edo ikasleei, ez eta farisearrei eta lege-maisuei edo abade buru eta zaharrei ere, jenteari baino: danentzat dira.
Eta, adi egiten deuskun iraunari: zelan ez deutsazue igarten sasoi honi? Zergaitik ez dozue zeuok zeuotara ebazten zuzena zer dan? Zeruko eta lurreko ezaugarriei igarten deutsegu, eta sasoi honi ez? Itxurazaleak ete gara?
Egia esan, beste edozertan dogu behar litzateken trebezia, arazoei geure jakintzaz eta kabuz eta geure ardurapean erantzuteko. Baina ez ete gara nagiegiak ona edo zuzena zer dan, edo zer dogun, ebazteko?
Gehienetan erosotasunean bizi gara, betekizunak ondo beteten doguzala uste izanik. Jesusen ustez, ez da nahikoa.
Norberak hartu behar dau ekimena, ez Legearen edo Arauen edo Ohituren gainetik jarteko. Baina bai guzti horretan norberari dagokiona aurkitzeko eta horreetan arduraz eta eskuzabaltasunik handienaz jokatzeko.
Nire erantzuna ez dabe besteek markatu edo behartu behar. Neurea da erantzukizuna, eta sasoi honi igarten jakin daidala eskatzen jat.
Urtean Zeharreko XXIX. zapatua
I. urtean
I. Irakurgaia
Jesus hilen
artetik biztu eban Jainkoaren Espiritua
zuengan bizi
da.
San Paulo Apostoluak Erromatarrei egindako epistolatik
Erm 8, 1-11
Senideok: Ez da kondenazinorik Jesu
Kristogaz bat diranentzat. Izan be, Jesu Kristori esker, bizia emoten dauan
Espirituaren legeak askatu egin zaitu pekatuaren eta heriotzaren legetik.
Legeak giza ahuleriagaitik ezin ebana Jainkoak egin dau, hau da, gurea lako
pekatuzko izaeran bialdu dau bere Semea, eta honek, bere burua
parkamen-oparitzat eskeiniz, kondenatu egin dau pekatua bere giza izaera
hilkorrean. Honan, bete geinke legeak eskatzen dauana, ez gara-eta giza grinen
arabera bizi, Espirituaren arabera baino.
Giza grinen arabera bizi diranek gogoa be
halakoa dabe; Espirituaren arabera bizi diranek, barriz, gogoa be
Espirituarena. Giza grinei jarraitzeak heriotzara daroa; Espirituari
jarraitzeak, barriz, bizira eta bakera. Izan be, giza grinei jarraitzen
deutsienak Jainkoaren aurkako dira; ez dabe nahi eta ez dira gauza be
Jainkoaren legeari obeditzeko. Horregaitik, grina txarren menpean bizi diranak
ezin izan gogoko Jainkoari. Zuek, ostera, ez zarie grina txarren menpean bizi,
Espirituaren menpean baino, Jainkoaren Espiritua zuengan bizi da-eta.
Norbaitek Kristoren Espiritua ez badau, hori
ez da Kristorena. Kristo zuengan badago, barriz, gorputza pekatuagaitik hilda
egon arren, zuen espirituak badau bizia Jainkoaren salbazino-indarrari esker.
Jesus hilen artetik biztu eban Jainkoaren Espiritua zuengan bizi bada, Kristo
hilen artetik biztu ebanak berak biziarazoko dau zuen gorputz hilkorra be,
zuengan bizi dan Espirituaren bitartez.
Jaunak esana.
Erantzun salmoa
Sal 24 [23], 1-2. 3-4b. 5-6 (R/. ik. 6)
R/. Hau da, Jauna, zure aurpegi bila dabiltzanen taldea.
V/. Jaunarena da lurra, eta lurra betetzen
dauana,
mundua
eta bertan bizi diranak,
harek
ezarri dau-eta itsasoen gainean,
harek
finkatu lur azpiko ibaien gainean. R/.
V/. Jaunaren mendira nork igongo?
Haren
toki santuan nor egongo?
Eskuak
erru barik eta bihotza garbi dituana,
sasijainkoetara
jotzen ez dauana. R/.
V/. Holakoa bedeinkatuko dau Jaunak,
justizia
egingo deutso Jainko salbatzaileak.
Hau
da haren bila ahalegintzen dan gizaldia,
Jakoben
Jainkoaren aurpegi bila dabilena. R/.
II. urtean
I. Irakurgaia
Kristo da burua
eta berak emoten deutsoz gorputz osoari
barru-lotura
eta batasuna.
San Paulo Apostoluak Efesoarrei egindako epistolatik
Ef 4, 7-16
Senideok: Gutariko bakotxak Kristok emon
nahi izan deutson neurrian hartu dau dohaia. Horregaitik dino Liburu Santuak:
«Gorenera
igon ebanean,
katiguak
beragaz eroan ebazan
eta
gizakiei dohaiak emon eutsezan».
Igon ebala esatean, zer esan nahi dau,
aurrez beheko lur honetara jatsi zala baino? Jatsi zan ha, zeru gorenera dana
betetzera igon ebana bera da.
Berak egin ebazan batzuk apostolu, beste
batzuk profeta, beste batzuk Barri Onaren iragarle, beste batzuk artzain eta
irakasle; holan gai egiten ditu fededunak euren zerbitzu-lanerako eta Kristoren
gorputza eraikitzeko, harik eta danok Jainkoaren Semearen sinismen eta ezagutza
berbera izatera heldu arte, heldutasun beteko pertsona, Kristoren betetasunaren
neurriko pertsona, izatera heldu arte.
Ez gaitezan ume izan, edozein
irakaspen-haizek astinduak eta batera eta bestera eroanak, uste okerretan
jausiarazoteko trebe dan jente maltzurrak engainatuak. Bestela baino,
maitasunean benetakoak izanez, gauza guztietan hazi gaitezan, Kristori gero eta
gehiago egokituz. Bera da burua eta berak emoten deutsoz gorputz osoari
barru-lotura eta batasuna, atal guztiek, bakotxak bere jarduera bereziaren
arabera, gorputz osoaren alde egiten daben alkarlanaren bitartez; holan,
gorputza haziz eta maitasunean eraikiz doa.
Jaunak esana.
Erantzun salmoa
Sal 122 [121], 1-2. 3. 4-5 (R/. ik. 1b)
R/. Goazen pozik Jaunaren etxera!
V/. Ha, bai, poza nirea, esan eustenean:
«Goazen
Jaunaren etxera!»
Hona
orain nire oinak
zure
ateetan, Jerusalem. R/.
V/. Jerusalem, uri lez ondo eraikia,
beragan sendo batua! R/.
V/. Hara igoten dabe leinuek, Jaunaren leinuek,
Israelen
lege danez, Jaunaren izena gorestera.
Han
dagoz ezarrita auzi-mahaiak,
Daviden
jauregiko mahaiak. R/.
I. eta II. urteetan
Aleluia
Ez 33, 11
R/. Aleluia.
V/. Nik ez dot atsegin gaiztoaren heriotza, dino
Jaunak,
jokabidez
aldatu eta bizi dadila baino. R/.
Ebanjelioa
Bihotz-barritzen
ez bazarie,
guztiok era
berean galduko zarie.
✠ Jesu Kristoren ebanjelioa San Lukasen liburutik
Lk 13, 1-9
Aldi haretan, etorri jakozan batzuk Jesusi,
galilear batzuri gertatuaren barri emotera: zelan Pilatok hil zituan,
eskeintzen ziharduen oparien odolarekin hareena nahastuz. Jesusek erantzun
eutsen: «Uste ete dozue galilear hareek gainerako galilearrak baino pekatariagoak
zirala, holako heriotza izan ebelako? Ezetz dinotsuet, eta, bihotz-barritzen ez
bazarie, danok galduko zarie era berean.
Eta Siloeko torrea gainera jausita hil ziran
hamazortzi hareek, uste dozue gainerako jerusalemdarrak baino errudunagoak zirala?
Ezetz dinotsuet, eta, bihotz-barritzen ez bazarie, era berean galduko zarie
guztiok.
Eta parabola hau esan eutsen: «Gizon batek
ikondoa eukan, bere mahastian landatuta. Joan zan iko bila eta ez eban aurkitu.
Orduan, esan eutson mahastizainari: “Bada hiru urte ikondo honetara iko bila
natorrela, eta ez dot aurkitzen. Ebagi egizu. Zertarako euki hor, lurra
alperrik jaten?” Mahastijagoleak,
ostera, erantzun eutson: “Jauna, itziozu aurtengoz; bitartean, ingurua atxurtu
eta ongarria botako deutsat, ea aurrerantzean fruturik emoten dauan; eta
osterantzean, ebagi”».
Jaunak esana.
