Urtean Zeharreko XX. astelehena
I. urtean
I. Irakurgaia
Jaunak
buruzagiak sortuarazo ebazan,
baina
israeldarrek ez eutsien jaramonik egin buruzagiei be.
Epaileak liburutik
Ep 2, 11-19
Egun hareetan, Jaunari atsegin ez jakona
egin eben israeldarrek, Baal sasijainkoaren idoloak gurtuz. Egiptotik atara
ebazan Jauna, euren asaben Jainkoa, baztertu eta inguruan bizi ziran herrietako
jainko arrotzen ondoren joan ziran, hareen aurrean ahuspeztuz; holan, Jaunaren
hasarrea biztu eben. Beraz, Jauna baztertu eta Baalen eta Astarteren idoloak
gurtu ebezan.
Jaunak, Israelen aurka biziro hasarraturik,
lapurren esku itzi ebazan, eta honeek lapurreta egin eutsien; Jaunak
inguruetako arerioei saldu eutsezan, eta israeldarrek ezin izan eutsoen eutsi
arerioen aurrean. Burrukara joatean, beti galtzaile ataratzen ziran, euren
aurka eben-eta Jauna, berak zin eginez esan eutsen lez. Israeldarrak gero eta
estuago egozan.
Orduan, Jaunak buruzagiak sortuarazo ebazan,
israeldarrak lapurren eskuetatik libratzeko. Baina israeldarrek ez eutsien
jaramonik egin buruzagiei be eta desleial izan ziran Jaunagaz, jainko arrotzak
gurtuz eta hareen aurrean ahuspeztuz. Behingoan aldendu ziran euren asaben bidetik;
honeek Jaunaren aginduak obedidu ebezan, baina ondorengoek ez eben bardin
jokatu.
Jaunak buruzagiren bat sortzen ebanean,
buruzagiagaz izaten zan Jauna, eta, ha bizi zan bitartean, salbatu egiten
ebazan arerioen eskuetatik, errukitu egiten zan-eta israeldarrak zapaltzaileen
menpean negarrez ikustean. Baina, buruzagia hiltzean, gaiztotu egiten ziran
barriro israeldarrak, euren gurasoak baino okerrago jokatuz: beste jainko
batzuen atzetik joaten ziran eta gurtu egiten ebezan, hareen aurrean ahuspeztuz.
Ez eben aldatzen euren jarduera gaiztoa eta jokabide setatsua.
Jaunak esana.
Erantzun salmoa
Sal 106 [105], 34-35. 36-37. 39-40. 43ab eta 44 (R/. ik. 4a)
R/. Gogoratu gutaz, Jauna,
zeure herriaganako onginahiagaitik.
V/. Ez ebezan herriak hondatu,
Jaunak
agindu eutsen lez.
Jentilekin
nahastu ziran
eta
hareen ohiturak ikasi ebezan. R/.
V/. Hareen idoloak gurtu ebezan
eta
galbide izan jakezan horreek.
Euren
seme-alabak
opari
eskeini eutsiezan deabruei. R/.
V/. Holan jokatuz, euren buruak kutsatu
eta
Jainkoari desleial izan jakozan.
Biztu
zan Jainkoaren hasarrea bere herriaren aurka
eta
zapuztu egin eban bere ondarea. R/.
V/. Hamaika aldiz libratu ebazan;
baina
hareek, euren jarreran setatsu.
Ikusi
eban, halan be, Jaunak hareen larrialdia
eta entzun
ebazan hareen garrasiak. R/.
II. urtean
I. Irakurgaia
Ezekiel seinale
izango da zuentzat:
harek egin dauan guztia egingo dozue.
Ezekielen Profezia liburutik
Ez 24, 15-24
Honan berba egin eustan Jaunak: «Gizaseme,
bat-batean kenduko deutsut zeure begien pozgarri dozun emaztea; baina zuk ez
egin dolurik, ez hasi aieneka eta negarrez. Egin negar isilean, baina ez egin
ohiko dolurik; jantzi buruzapia eta oinetakoak, ez estaldu aurpegia eta ez jan
hileta-ogirik».
Goizean hitz egin neutsan herriari;
iluntzean hil jatan emaztea eta biharamonean bete neban agindutakoa. Herriak
esan eustan: «Ez ete deuskuzu azaldu behar zer esan nahi dauan egiten dozunak?»
Erantzun neutsen: «Hau esan eustan Jaunak:
"Berba egiozu Israel herriari: Hau dino Jainko Jaunak: Zuen babesleku eta
harrogarri, begien pozgarri eta bihotzen lilura dan neure santutegia
profanatuko dot. Jerusalemen itzi zenduezan seme-alabak gerran hilko dira.
Orduan, Ezekielek egin dauana egingo dozue: ez dozue aurpegia estalduko, ezta
hileta-ogirik jango be. Ez dozuez buruzapia eta oinetakoak kenduko, ez dozue
dolu egingo, ez negarrik; zeuen txarkeriakaitik lur jota geratuko zarie eta
alkarren artean negar-zotinka ibiliko. Ezekiel seinale izango da zuentzat:
harek egin dauan guztia egingo dozue. Eta hori jazotzean, orduan jakingo dozue
Neu nazala Jainko Jauna"».
Jaunak esana.
Erantzun salmoa
Dt 32, 18-19. 20. 21 (R/. ik. 18a)
R/. Sortu zinduzan Jainkoa zenduan baztertu.
V/. Sortu zinduzan Harkaitza zenduan baztertu,
mundura
ekarri zinduzan Jainkoaz zinan ahaztu.
Seme-alaben
iraina ikustean,
zapuztu
egin ebazan Jaunak. R/.
V/. Esan eban bere kautan:
«Ezkutatu
egingo deutset aurpegia
eta
ikusiko dot zer amaiera daben,
jente
makurra dira-eta,
leialtasunik
bako seme-alaba. R/.
V/. Jainko ez dan bategaz mindu ninduen,
euren
idolo ezerezekin iraindu;
herri
ez dan bategaz minduko ditut Neuk be,
nazino
tentel bategaz irainduko». R/.
I. eta II. urteetan
Aleluia
Mt 5, 3
R/. Aleluia.
V/. Zorionekoak gogoz behartsu diranak,
eurena
dabe-eta Jainkoaren erreinua. R/.
Ebanjelioa
Guztiz ona izan
nahi badozu, zoaz, saldu zeure ondasunak,
eta altxorra
izango dozu zeruan.
✠ Jesu Kristoren Ebanjelioa San Mateoren liburutik
Mt 19, 16-22
Aldi haretan, gazte batek Jesusengana
hurreratu eta esan eutson: «Maisu, zer onik egin behar dot betiko bizitza
eskuratzeko?» Jesusek erantzun eutson: «Zergaitik itauntzen deustazu onari
buruz? Jainkoa bakarrik da ona. Betiko bizitzan sartu gura badozu, bete
aginduak».
Harek, barriz: «Zein agindu?» Eta Jesusek:
«Ez hil inor, ez egin adulteriorik, ez ostu, ez egin guzurrezko testigantzarik,
hartu aintzat aita-amak, eta maitatu lagun hurkoa zeure burua lez».
Gazteak, orduan: «Hori guztiori bete dot;
zer falta dot oraindik?» Jesusek erantzun eutson: «Guztiz ona izan nahi badozu,
zoaz, saldu zeure ondasunak eta emon behartsuei, eta altxorra izango dozu
zeruan; gero, erdu eta jarraitu Niri».
Berba honeek entzutean, nahigabeturik joan
zan gaztea, ondasun handien jabe zan-eta.
Jaunak esana.
IRUZKINA
Izan daigun gogoan: ebanjelioko gazteak Lege guztia txikitatik bete arren bere zalantzak ditu: Legea beteteak ez deutso emon betiko bizitzaren ziurtasunik.
Non gelditzen dira danaren gainetik Legea betetea jarten dabenak, Legea absolututzak daukenak?
Jesusen erantzunak itun (edo triste) izten dau gaztea eta lepo emoten deutso Jesusi. Aberastasunak ditu ziurtasun iturri. Eta aberastasunak izango ditu hegaz egitea galazoko deutsoen lastrea.
Beste alde batetik, harrigarria bada ere, Jesusek ez dauz lehenengo zerrendako hiru aginduak (Jainkoari dagokiozanak) aitatzen. Argi dauka harengana heltzeko bide bakarra senidea, beste gizakia, ondoan daukaguna, dala.
Jarrera honek beste asko ere atzera botako leukez, asko garalako Jainkoa maite dogula uste dogunak, eta haren nahia beteten; baina ez deutsagu horrenbesteko abegi onik egiten senideari, gehideari.
Geuri ere beste ziurtasun batzuk ez ete deuskue galazoten abiadurea hartzea hegaz egiteko?
Urtean Zeharreko XX. martitzena
I. urtean
I. Irakurgaia
Gedeon, askatu
egizu Israel.
Neuk bialtzen
zaitut!
Epaileak liburutik
Ep 6, 11-24a
Egun hareetan, Jaunaren aingerua Ofra
herritxura etorri eta arteondo baten azpian jesarri zan. Arteondoa Abiezerren
senitarteko Joaxena zan. Gedeonek, Joaxen semeak, dolarean ziharduan garia
jotzen, madiandarrek ikusi ez egien. Jaunaren aingeruak agertu eta esan eutson:
«Jauna zugaz, gudari kementsu!»
Gedeonek erantzun: «Parkatu, ene jauna!
Baina Jauna gugaz bada, zelan jazo jaku hau guztia? Zertan dira gurasoek
kontatzen euskuezan jazoera harrigarri hareek, Jaunak Egiptotik atara ginduzala
esaten euskuenean? Orain, izan be, eskutik itzi gaitu Jaunak eta madiandarren
menpe jarri».
Jaunak begira jarri eta esan eutson: «Zoaz
eta askatu egizu Israel zeure indarrez madiandarren menpetik. Neuk bialtzen
zaitut!» Gedeonek erantzun: «Parkatu, Jauna, baina zelan askatuko dot Israel?
Nire senitartea Manasesen leinuko ahulena da, eta ni txikiena gure aitaren
etxean».
Jaunak orduan: «Zeugaz izango nozu Ni;
holan, madiandar guztiak batera menperatuko dozuz». Gedeonek, barriro: «Benetan
begiko banozu, emoidazu ezaugarri bat, berba egiten deustana Zeu zarala
jakiteko. Ez joan hemendik, eskeintza zure aurrean jartzera ni bihurtu arte».
Jaunak erantzun eutson: «Hementxe egongo naz zu etorri arte».
Joan zan Gedeon eta auma bat prestatu eban
eta, lakari bat urunez, legamina bako ogiak egin ebazan; gero, haragia otzaran
eta saldea lapikoan harturik, arteondo azpira eroan eta Jaunari eskeini
eutsozan. Jaunaren aingeruak esan eutson: «Hartu haragia eta ogiak, eta ipini
harkaitz honen gainean, eta isuri saldea». Halan egin eban Gedeonek. Orduan,
Jaunaren aingeruak eskuan eban makilaz haragia eta ogiak ikutu ebazan; sugarrak
urten eban harkaitzetik eta haragia eta ogiak kiskaldu egin ebazan. Ondoren,
desagertu egin zan Jaunaren aingerua Gedeonen aurretik.
Jaunaren aingerua zala ohartzean, esan eban
Gedeonek: «Ai, ene Jainko Jauna! Jaunaren aingerua ikusi dot aurrez aurre!»
Jaunak esan eutson: «Bakea zugaz! Ez bildurrik izan, ez zara hilko». Gedeonek
altarea eraiki eban bertan Jaunaren omenez, eta «Jauna bakea» ezarri eutson
izena.
Jaunak esana.
Erantzun salmoa
Sal 85 [84], 9. 11-12. 13-14 (R/. ik. 9b)
R/. Jaunak bakea agintzen deutso bere herriari.
V/. Entzungo dot Jainkoak dinoana:
Jaunak
bakea agintzen deutse bere herriari eta fededunei,
barriro
konfiantza agertzen deutsoenei. R/.
V/. Maitasunak eta leialtasunak alkar dabe
aurkitzen,
justiziak
eta bakeak alkar besarkatzen.
Leialtasuna
lurretik da ernetzen,
justizia
zerutik jaisten. R/.
V/. Jaunak emongo dau euria,
eta
gure lurrak ekarriko bere uzta.
Haren
aurretik joango da justizia,
haren
pausuei jarraituko deutse ongizateak. R/.
II. urtean
I. Irakurgaia
Zu gizaki huts
zara eta ez jainko,
nahiz eta
Jainkoaren pareko zarala uste dozun.
Ezekielen Profezia liburutik
Ez 28, 1-10
Honan berba egin eustan Jaunak: «Gizaseme,
esaiozu Tiroko erregeari: Hau dino Jainko Jaunak: Harropuzturik, hau esan dozu:
"Jainko naz eta jainkoaren tronuan nago jesarrita, itsasoaren
erdian"; baina zu gizaki huts zara eta ez jainko, nahiz eta Jainkoaren pareko
zarala uste dozun. Daniel bera baino jakintsuagoa ei zara! Ez da ezer zuk ez
dakizunik. Zeure jakituriaz eta trebeziaz egin zara aberats: urrea eta zidarra
metatu dozu zeure gordailuetan; merkataritzarako zenduan trebetasunez erruz
ugaritu dozuz ondasunak, eta aberastasunak harropuztu egin zaitu"».
Beraz, hau dino Jainko Jaunak: «Zeure burua
Jainkoaren pareko egin dozulako, atzerritarrak ekarriko ditut zure kontra,
herrien arteko ankerrenak; zure jakituriaren emoitzarik ederrenak desegingo
dabez ezpataz eta zure ospe distiratsua zikinduko. Hildakoen tokira jatsiazoko
zaitue eta heriotza gogorra emongo deutsue itsasoaren erdian. Zeure hiltzaileen
aurrean jainko zarala esaten jarraituko ete dozu, zuk, gizaki huts zaran
horrek? Sinisbakoei dagokien heriotza lotsagarria izango dozu atzerritarren
eskuetan, Neuk, Jainko Jaunak, esan dot-eta».
Jaunak esana.
Erantzun salmoa
Dt 32, 26-27b. 27c-28a. 30. 35c-36b (R/. 39c)
R/. Neuk dot heriotza eta bizia emoten.
V/. Hau ninoan: «Sakabanatu egingo neukez,
hareen
gogorapena be gizakien artetik desagertuazoko».
Baina
arerioen irainaren bildur nintzan,
arerioek
oker ulertuko eben bildur. R/.
V/. Hau esango eben-eta:
«Geure
indarrez nagusitu gara,
ez
dau Jaunak egin hori guztia».
Zentzuna
galdu dauan jentea da. R/.
V/. Izan be, zelan leiteke batek mila
pertsegitzea,
bik
hamar milari ihes eragitea,
euren
harkaitz daben Jaunak saldu
eta
arerioen esku itzi ditualako ez bada? R/.
V/. Hurrean da hareen hondamen-eguna,
laster
dator hareentzat prestaturik dagoana.
Defendatuko
dau-eta Jaunak bere herria,
errukituko
da bere zerbitzariez. R/.
I. eta II. urteetan
Aleluia
2 Ko 8, 9
R/. Aleluia.
V/. Jesu Kristo, aberats izanik, behartsu egin
zan,
bere
behartsu izateaz zuek aberats egiteko. R/.
Ebanjelioa
Jostorratzaren
begitik gamelua igarotzea errazago,
aberatsa Jainkoaren erreinuan sartzea baino.
✠ Jesu Kristoren Ebanjelioa San Mateoren liburutik
Mt 19, 23-30
Aldi haretan, Jesusek esan eutsen ikasleei:
«Benetan dinotsuet: aberatsa nekez sartuko da zeruetako erreinuan. Barriro
dinotsuet: jostorratzaren begitik ganbelua igarotzea errezago, aberatsa
Jainkoaren erreinuan sartzea baino».
Berbok entzutean, ikasleek, zeharo
harriturik, holan inoen: «Nor salbatu leiteke, orduan?» Jesusek begira-begira
jarri eta esan eutsen: «Gizakiarentzat ezinezkoa da hori, baina Jainkoak dana
leike».
Orduan, Pedrok esan eutson: «Hara, guk dana
itzi dogu, Zuri jarraitzeko. Zer izango da guretzat?»
Jesusek erantzun eutsen: «Benetan dinotsuet:
Jainkoak mundu hau erabarritzean eta Gizonaren Semea bere aintzazko tronuan
jesartzean, zuek be, nire jarraitzaileok, hamabi tronutan jesarriko zarie,
Israelgo hamabi leinuak epaitzeko. Eta Nigaitik etxea, senideak, aita, ama,
seme-alabak edota lurrak izten dituanak, ehun halako hartuko dau eta betiko
bizitza jasoko ondare.
Orain lehenengo diran asko azkeneko izango
dira, eta orain azkeneko diranak lehenengo».
Jaunak esana.
IRUZKINA
Jesusek dinoan aberatsa nekez sartuko da zeruetako erreinuan berbeak berez ete dakar pobrea errez sartuko da zeruetako erreinuan?
Pedroren itaunak jarten gaitu hausnarketa bidean, arterago ikusi dogun gazte aberatsaren erantzuna kontuan izanik.
Gazte aberatsak bere ondasunak zituan ziurtasun iturri; ez ebazan bazterrera itzi nahi Jesusi jarraitzeko. Eurei lotuegia egoan.
Baina Pedrok ordezkoa edo ordaina eskatzen dau Jesusi jarraitzeagaitik: bere etxea eta arrantza ontzia itzi dauz… Non dauka burua? Hau ere ez ete dago ondasunei lotuta? Jesusen proposamena ez dogu ondo ulertu bide horreetan bagabilz.
Zeruetako erreinua ez da geure ahaleginez lortu geiken gauzea (ezinezkoa dogu), Jainkoaren erregalua baino. Eta z jaku hain errez egiten hau ulertzea.
Horregaitik gure tira-birak: Jesusi jarraitzea geure buruari uko egin barik nahi izatea.
Ondasunei lotuak ez egoteko eta dana Jainkoaren erregalu lez bizi izateko erea Jesusi jarraitzea da.
Urtean Zeharreko XX. eguaztena
I. urtean
I. Irakurgaia
Erregea nahi
dogu agintari, esaten diharduzue,
Jauna errege
dozuela.
Epaileak liburutik
Ep 9, 6-15
Aldi haretan, Sikemgo buruzagi guztiak eta
Bet-Miloko jentea batu eta errege izentatu eben Abimelek Sikemen egoan
arteondoaren alboan.
Jotamek, hori jakin ebanean, Garizim
mendi-gailurrera igon eta oihuka esan eban: «Entzun egidazue, Sikemgo
buruzagiok, eta Jainkoak entzun deizuela zuei!
Behin baten, zuhaitzek erregea izentatu nahi
eben eurentzat. Eta olibondoari esan eutsoen: "Izan hadi gure
errege". Baina olibondoak erantzun eutsen: "Eta jainkoak eta
gizon-emakumeak ohoratzeko dan neure orioa emoteari uko egin behar ete jeutsat,
zuhaitzen gainean kulunka ibiltzeko?" Orduan, zuhaitzek ikondoari esan
eutsoen: "Hator, eta izan hadi gure errege". Baina ikondoak erantzun
eutsen: "Eta neure frutu gozoa eta ederra emoteari uko egin behar ete
jeutsat, zuhaitzen gainean kulunka ibiltzeko?"
Ondoren, zuhaitzek mahatsondoari esan
eutsoen: "Hator, eta izan hadi gure errege". Baina mahatsondoak
erantzun eutsen: "Eta jainkoak eta gizon-emakumeak pozten dituan neure
ardaoa emoteari uko egin behar ete jeutsat, zuhaitzen gainean kulunka
ibiltzeko?" Azkenik, zuhaitz guztiek elorriari esan eutsoen: "Hator,
eta izan hadi gure errege". Elorriak erantzun eutsen: "Benetan zeuen
errege izentatu nahi banozue, zatoze nire kerizpean babestera; bestela, sortu
bedi sua elorritik, eta iruntzi begiz Libanoko zedroak be"».
Jaunak esana.
Erantzun salmoa
Sal 21 [20], 2-3. 4-5. 6-7 (R/. 2a)
R/. Jauna, zure indarraz pozten da erregea.
V/. Jauna, zure indarraz pozten da erregea,
zure
garaipenaz izugarri alaitzen.
Gura
ebana emon deutsazu
eta
harek eskatua ez deutsazu ukatu. R/.
V/. Bedeinkazinoz eta mesedez bete dozu,
urre
garbizko koroa ezarri deutsazu buruan.
Bizia
eskatu deutsu, eta Zuk emon,
haren
egunak betiko luzatuz. R/.
V/. Zure garaipenaz handi da haren ospea,
aintzaz
eta ohorez inguratu dozu.
Izan
be, betiko dedeinkazinoa emon deutsazu,
pozez
bete dozu zeure aurrean. R/.
II. urtean
I. Irakurgaia
Horreen hagin
artetik atarako ditut ardiak
eta ez dabez
barriro janari izango.
Ezekielen Profezia liburutik
Ez 34, 1-11
Honan berba egin eustan Jaunak: «Gizaseme,
berba egin nire izenean Israelgo artzainen aurka, hitz egin nire izenean
artzainei: "Hau dino Jainko Jaunak: Zoritxarrekoak euren burua larratzen
daben Israelgo artzainak! Ez da artaldea artzainek larratu beharrekoa? Esnez
janaritzen zarie, artulez janzten eta bildotsik gizenenak hiltzen dozuez, baina
ez dozue artaldea zaintzen. Ez dozuez ahulak indartzen, ez gaixoak osatzen,
ezta zaurituak lotzen be; ez dozuez desbideratuak artaldera ekartzen, eta
galdutakoen bila be ez zarie joaten; indarrez eta gogorkeriaz, ostera, ezarri
deutsezue zeuen agintea. Eta, artzainik barik, ardiak sakabanatu egin dira eta
basapiztien harrapakin bihurtu. Mendi eta tontorretan noraezean dabil nire
artaldea; lurralde osoan dago sakabanatuta, eta inor ez da haretaz arduratzen,
ez haren bila joaten".
Entzun, beraz, artzainok, Jaunaren hitza:
"Ala Ni Jainko Jauna! Nire artaldea biluztua eta basapiztia guztien harrapakin
izan da, artzainik ez daualako, eta nire artzainak ez dira nire artaldeaz
arduratu; bestetara, euren burua zaindu dabe eta ez nire artaldea".
Horregaitik, entzun, artzainok, Jaunaren hitza: Hau dino Jainko Jaunak:
"Artzainen kontra ekingo deutsat; neure artaldea bihurtzera behartuko
ditut eta artzain-kargutik botako; holan, ez dabe aurrerantzean euren burua
larratuko; horreen hagin artetik atarako ditut ardiak eta ez dabez barriro
janari izango".
Hau dino-eta Jainko Jaunak: "Ni Neu
egingo naz artaldearen kargu, Neu arduratuko haretaz"».
Jaunak esana.
Erantzun salmoa
Sal 23 [22], 1-3. 4. 5. 6 (R/. 1)
R/. Jauna dot artzain, ez naz ezeren beharrean.
V/. Jauna dot artzain, ez naz ezeren beharrean;
larre
gurietan etzunazoten nau,
ur-bazter
nasaira eroaten
eta
indarrak deustaz barritzen;
bide
segurutik naroa,
bere
izenari ohore eginez. R/.
V/. Ibar baltz ilunean banabil be,
ez
naz gatxaren bildur,
Zu
nigaz bazagoz;
zure
artzain-makilak nasaitzen nau. R/.
V/. Mahaia atontzen deustazu
arerioen
begi-bistan;
orioz
igurzten deustazu burua,
gainezka
dot edontzia. R/.
V/. Zoriona eta maitasuna ditut lagun,
bizitzako
egun guztietan,
eta
Jaunaren etxean biziko naz
amaibako
egunetan. R/.
I. eta II. urteetan
Aleluia
Heb 4, 12
R/. Aleluia.
V/. Bizia da Jainkoaren hitza, bizia eta
eraginkorra,
eta
barruko pentsamentuak eta asmoak aztertzen ditu. R/.
Ebanjelioa
Inbidia dozu ala, ni ona nazalako?
✠ Jesu Kristoren Ebanjelioa San Mateoren liburutik
Mt 20, 1-16
Aldi haretan, Jesusek parabola hau esan
eutsen ikasleei: «Zeruetako erreinuagaz mahasti-nagusiagaz bezala gertatzen da.
Goizean goiz bere mahastirako behargin bila urten eban. Eguneko lansaria
zidarrezko txanpon baten berbatu ondoren, mahastira bialdu zituan langileak.
Goizeko bederatziak aldera barriro urten
eban eta, beste batzuk plazan lanerako zain ikusirik, esan eutsen: “Zoaze zeuok
be nire mahastira eta ordainduko deutsuet bidezko dana”. Eta hareek be joan
egin ziran. Urten eban barriro hamabiak aldera eta hirurak aldera, eta gauza
bera egin eban. Arratsaldeko bostak aldera be urten eban eta, beste batzuk
oraindino geldi aurkiturik, esan eutsen: “Zertan zagoze hemen egun osoan lanik
egin barik?” Hareek erantzun eutsoen:
“Ez gaitu inork hartu beharrerako”. Harek, orduan: “Zoaze zuek be nire
mahastira”.
Iluntzean mahasti-nagusiak esan eutson
arduradunari: “Deitu beharginei, eta emoiozu bakotxari bere soldata,
azkenekoetatik hasi eta lehenengoetara”. Etorri ziran, bada, arratsaldeko
bostetakoak, eta zidarrezko txanpon bana hartu eben. Lehenengo ordukoek, txanda
heldu jakenean, besteek baino gehiago hartuko ebela uste eben; baina hareek be
zidarrezko txanpon bana hartu eben.
Orduan, nagusiaren kontra marmarka hasi
ziran, eta esan eutsoen: “Azkeneko honeek ez dabe ordubete besterik lan egin,
eta gugaz bardindu dozuz, egun osoko nekea eta beroa eroan dogunokaz”. Baina
nagusiak erantzun eutson hareetariko bati: “Adiskide, ez deutsut
bidebakokeriarik egiten. Ez ete ginan berbatu zidarrezko txanpon baten? Eutsi
dagokizuna eta zoaz. Zuri beste emon gura deutsat azkeneko honi be. Ezin ete
dot neure diruaz nahi dodana egin? Ala inbidia dozu, ni ona nazalako?”
Holantxe, bada, azkenekoak lehenengo izango
dira eta lehenengoak azkeneko».
Jaunak esana.
IRUZKINA
Parabola hau entzuten daben gehientsuenek edo ez dabe onartzen, edo ez dabe bere senean ulertzen, edo gauza biak batera. Hau da: ez dabe onartzen ordain bardina hartu leikeena lanean 10 ordu jardun dauanak eta ordu bete baino jardun ez dauanak.
Halantxe da, giza zuzentasun edo justizia sozial deritxonean kokatuko bagina. Baina Jesusek badaki horrenbeste. Eta harek dinoana ulertzeko eta onartzeko, beste maila edo ulerkera baten jarri beharra daukagu.
Autortu daigun gure arteko hartu-emonetan eta Jainkoagazkoetan ez dala gauza bera jazoten.
Jainkoaren saria ez da gure lanaren ondoren datorrena, berak egiten dauan deia baino. Jainkoak bere erreinuan jardutera deitzen dau. Dei hori ez dogu gizaki guztiok aldi bardinean geuretzen. Baina erantzutean, berez hartzen dau saria, eta hartu daiken saririk handiena: Jainkoaren maitasuna.
Jainkoa ezin da zatitu, eta ezin dau apur bat edo gehiago emon, bere burua emoten dau-eta, bera dan guztia.
Urtean Zeharreko XX. eguena
I. urtean
I. Irakurgaia
Ondoetorria
egitera etxetik urtengo deustan lehenengoa
Jaunarentzat izango da eta erre-opari
eskeiniko deutsat.
Epaileak liburutik
Ep 11, 29-39a
Egun hareetan, Jaunaren espirituaren
eraginez, Galaaden eta Manasesen lurraldea igaro eta Galaadeko Mitzpara heldu
zan Jefte, eta handik amondarren lurraldera jo eban. Eta promes hau egin eutson
Jaunari: «Amondarrak eskura emoten badeustazuz, hareek garaitu eta bihurtzean
ondoetorria egitera etxetik urtengo deustan lehenengoa Jaunarentzat izango da
eta erre-opari eskeiniko deutsat».
Joan zan, bada, Jefte amondarren kontra
burrukara, eta Jaunak eskura emon eutsozan. Aroertik Minit arteko hogei uri
garaitu ebazan Abel-Keramimeraino. Garaipen izugarria izan zan, eta amondarrak
israeldarren menpe gelditu ziran.
Jefte Mitzpara, bere etxera bihurtu zanean,
alabeak urten eutson ondoetorria egitera, danbolina joz eta dantzari. Jeftek ez
eban beste seme-alabarik, haxe baino. Alabea ikustean, jantziak urratu eta esan
eban: «Ai, ene alaba! Lur jota itzi nozu. Zuk izan behar zoritxarra dakarztana!
Berbea emon deutsat Jaunari eta ezin atzera egin».
Alabeak erantzun eutson: «Aita, hitza emon
badeutsazu Jaunari, egizu nigaz agindudakoa; Jaunak zeure arerio amondarrez
mendekatzea emon deutsu-eta».
Gero, esan eutson: «Egidazu mesede hau
bakarrik: itzi egidazu hile bitan mendiz mendi lagunekin ibiltzen, ezkondu
baino lehen hil behar dodalako negar egiten». Aitak erantzun: «Zoaz!» Eta itzi
egin eutson joaten hile birako.
Neskea mendiz mendi ibili zan bere
lagunekin, ezkondu baino lehen hil behar ebalako negarrez. Hile biak igaro
ziranean, bihurtu zan aitagana, eta aitak bete egin eban agindudako promesa.
Jaunak esana.
Erantzun salmoa
Sal 40 [39], 5. 7-8a. 8b-9. 10 (R/. ik. 8a eta 9a)
R/. Hemen nozu, Jauna, zure nahia egin dagidan.
V/. Zorionekoa Jaunaz fidatzen dana,
idolo
eta sasijainkoakana jotzen ez dauana. R/.
V/. Zuk ez dozu sakrifiziorik eta eskeintzarik
nahi izan,
ez
erre-oparirik eta pekatuen parkamen-oparirik eskatu;
baina
belarriak edegi deustazuz.
Horregaitik
dinot: «Hemen nozu». R/.
V/. Hau dago nitaz liburuan idatzita:
egin
dagidala zure nahia.
Atsegin
dot, ene Jainko,
barru-muinetan
dot zure legea. R/.
V/. Iragarri dot batzar nagusian zure justizia,
ez
ditut ezpanak itxi, ondo dakizu, Jauna. R/.
II. urtean
I. Irakurgaia
Bihotz barria
emongo deutsuet
eta barruan
espiritu barria ezarriko.
Ezekielen Profezia liburutik
Ez 36, 23-28
Hau esan dau Jaunak: «Zuen bidez hareen
aurrean santu agertuko nazanean, orduan jakingo dabe nazino hareek Neu nazala
Jauna –dino Jainko Jaunak–.
Nazinoen artetik hartuko zaituet, lurralde
guztietatik batuko eta zeuen lurraldera ekarriko. Ur garbiz txipriztinduko
zaituet, eta garbi geldituko zarie; zeuen kutsadura eta idolatria guztietatik
garbituko zaituet.
Bihotz barria emongo deutsuet eta barruan
espiritu barria ezarriko. Harrizko bihotza kenduko deutsuet eta haragizkoa
emongo. Neure espiritua ipiniko dot zuengan, eta gai egingo zaituet nire legeen
arabera ibiltzeko eta nire aginduak arretaz betetzeko. Zuen asabei emon neutsen
lurraldean biziko zarie; nire herri izango zarie zuek, eta Ni zuen Jainko».
Jaunak esana.
Erantzun salmoa
Sal 51 [50], 12-13. 14-15. 18-19 (R/. Ez 36, 25)
R/. Ur garbiz txipriztinduko zaituet,
eta garbi geldituko zarie zeuen
kutsadura guztietatik.
V/. Ene Jainko, sortu bihotz garbia nigan,
barritu
arnasa sendoa nire barruan.
Ez
nagizu bota zeure aurretik,
ez
kendu niri zeure arnasa santua. R/.
V/. Poztu nagizu barriro zeure salbazinoaz,
sendotu
nagizu zeure arnasa oparoaz.
Erakutsiko
deutsedaz gaiztoei zure bideak,
eta
Zugana bihurtuko dira pekatariak. R/.
V/. Sakrifizioak ez dozuz atsegin;
erre-oparia
eskeiniko baneutsu, ez zeunke onartuko.
Damuz
hausiriko espiritua da
Jainkoak
nahi dauan sakrifizioa;
Zuk
ez dozu gitxiesten, ene Jainko,
bihotz
hausia eta umildua. R/.
I. eta II. urteetan
Aleluia
Ik. Sal 95 [94], 8a. 7d
R/. Aleluia.
V/. Gaur, ez gogortu bihotza;
entzun
Jaunaren ahotsa. R/.
Ebanjelioa
Deitu ezteguetara aurkitu ahala guztiak.
✠ Jesu Kristoren Ebanjelioa San Mateoren liburutik
Mt 22, 1-14
Aldi haretan, Jesusek barriro parabola bidez
berba egin eutsen abadeburuei eta herriko zaharrei: «Zeruetako erreinuarekin
gertatzen da bere semearen ezteguak ospatu zituan erregearekin bezala. Bialdu
zituan morroiak konbidatuei dei egitera, baina hareek ez eben etorri gura izan.
Barriro beste morroi batzuk bialdu zituan
mandatu honegaz: “Esaiezue konbidatuei: Hara, gertu daukat bazkaria; hilda
daukadaz zezenak eta zekor lodituak, prest dago dana. Zatoze ezteguetara”.
Baina konbidatuek ez eutsoen jaramonik egin: bata bere lurretara joan zan,
bestea bere negozioetara eta gainerakoek, morroiei heldurik, irainez bete eta
hil egin ebezan.
Hasarratu zan erregea eta, bere soldaduak
bialduz, hil egin zituan hiltzaile hareek, eta su emon hareen herriari.
Gero, bere morroiei esan eutsen: “Ezteguak
prest dagoz, baina konbidatuak ez ziran gai. Zoaze, bada, bidekurutzeetara eta
deitu ezteguetara guztiak aurkitu ahala”. Urten eben morroiok bideetara eta
aurkitutako guztiak batu zituen, on nahiz txar. Eztegu-gela konbidatuz bete
zan.
Erregeak, bazkaltiarrak ikustera sartu
zanean, eztegu-jantzirik barik egoan bat ikusi eta esan eutson: “Adiskide,
zelan sartu zara hona eztegu-jantzirik barik?” Harek berbarik be ez. Erregeak
mahai-zerbitzariei esan eutsen, orduan: “Eskuoinak lotu eta bota egizue
kanpora, ilunpera; han izango da negarra eta hagin-karraskada!” Ze gehiago dira
deituak, aukeratuak baino».
Jaunak esana.
IRUZKINA
Ez jako errez egiten Jesusi Erreinuaren Barri Ona iragartea. Aurrez jarri jakoz erlijio-agintariak, eta zelatan daukaz zertan-hartan harrapatu guran.
Hau dala-eta, Jesusek gainez egin dauala esan daiteke, eta, horren ezaugarri, Mateorenean hiru parabola zuzentzen deutsez. Honexegaz amaituko dau Mateok, Nekaldiaren kontakizuna jarteko jarraian.
Seme bien parabola da bat; mahasti-zain hiltzaileena da beste bat, eta hauxe, errege-semearen ezkontzara deituena hirugarrena.
Judeguen tradizinoan argi dago ezkontzak Jainkoaren eta bere herriaren arteko hartu-emona irudikatzen dauana; eta otordu nagusiak Mesiasen aldietako ugaritasuna.
Ondo ulertzen dabe herriko zaharrek, farisearrek eta idazlariek Jesusek eurekaitik dinoala…
Handia da ukapena; eta txiki eta ezerezak uko egiteko arrazoiak. Baina Jainkoak ez dau atzerakarik egingo: herrialde guztietakoak dira deituak.
Adi, baina! Ez da doakoa. Jantzia behar da: onartzea, adi egotea, partekatzea…
Urtean Zeharreko XX. barikua
I. urtean
I. Irakurgaia
Bihurtu zan
Noemi Rutegaz, bere erran moabdarragaz,
eta Betleemera
heldu ziran.
Rut liburuaren hasiera
Rt 1, 1. 3-6. 14b-16. 22
Epaileen sasoian, gosetea izan zan Israelen,
eta Judako Betleemgo gizon bat Moabeko lurraldera joan zan bizitzera bere
emazte Noemigaz eta seme biekin.
Elimelek, Noemiren senarra, hil egin zan eta
emaztea seme biekin bakarrik gelditu zan. Honeek emakume moabtarrak hartu
ebezan emazte: batak Orpa eban izena eta besteak Rut. Hamarren bat urtez han
bizi ondoren, hil egin ziran seme biak be, eta Noemi, ez senar eta ez seme,
bakarrik gelditu zan.
Jakin eban Noemik Jaunak bere herriari
aldeko agertu eta janaria emon eutsola, eta erran biekin Moabeko lurraldetik
bere herrialdera bihurtzea erabagi eban.
Abiatu ondoren, amaginarreba besarkaturik
bere herrira bihurtu zan Orpa; Rut, barriz, amaginarrebagaz gelditu zan. Noemik
esan eutson: «Hara, zure koinata bere herrira eta bere jainkoagana bihurtu da;
zoaz zu be beragaz». Rutek erantzun eutson: «Ez barriro eskatu zu itzi eta
joateko; zu nora joan, hara joango naz neu be; zu non bizi, han biziko naz neu
be; zure herria izango da nire herri, eta zure Jainkoa nire Jainko».
Holan bihurtu zan Noemi Moabetik Rutegaz,
bere erran moabdarragaz. Garagarra igitaitzen hasteko sasoian heldu ziran
Betleemera.
Jaunak esana.
Erantzun salmoa
Sal 146 [145], 5-6b. 6c-7. 8-9a. 9b-10 (R/. ik. 2a)
R/. Goratu egizu Jauna, ene barrua.
Edo: Aleluia.
V/. Zorionekoa Jakoben Jainkoa lagun dauana,
Jauna
bere Jainkoa itxaropen dauana.
Berak
egin ditu zeru-lurrak eta itsasoa,
eta
horreetan dagoan guztia. R/.
V/. Betiko eusten deutso bere leialtasunari.
Zapalduen
eskubideak defendatzen ditu,
gose
diranei ogia emoten.
Jaunak
askatzen ditu presoak. R/.
V/. Jaunak zabaltzen ditu itsuen begiak,
Jaunak
jasotzen konkortuak,
Jaunak
maitatzen zintzoak,
Jaunak
ditu etorkinak zaintzen. R/.
V/. Umezurtzei eta alargunei zutunik deutse
eusten,
baina
gaiztoen nagusitza iraultzen.
Jauna
errege da betieran,
zure
Jainkoa, Sion, errege gizaldien gizaldietan! R/.
II. urtean
I. Irakurgaia
Hazur igarrok,
entzun Jaunaren hitza.
Israel etxe,
atarazoko zaituet hilobitik.
Ezekielen Profezia liburutik
Ez 37, 1-14
Egun hareetan, Jaunaren indarra jaubetu zan
nitaz, eta haren espirituak hartu eta hazurrez betea egoan haran baten erdian
itzi ninduan. Batera eta bestera ibiliazo ninduan hareen artean; hazur-pilo
izugarria egoan haranean, zeharo igartuta.
Jaunak esan eustan: «Gizaseme, bizi ete
leitekez hazur honeek barriro?» Erantzun neutsan: «Jauna, Zeuk jakingo dozu».
Harek, orduan: «Berba egin nire izenean
hazur honeei eta esan: "Hazur igarrok, entzun Jaunaren hitza. Hau esaten
deutse Jainko Jaunak hazur igar honeei: espiritua sartuazoko dot Nik zuengan,
eta biziko zarie. Zainez inguratuko zaituet, haragia eratuko dot zuen gainean,
narruazala zabalduko eta espiritua emongo deutsuet, bizi zaitezen. Eta jakingo
dozue Neu nazala Jauna"».
Hitz egin neban Jaunaren izenean berak
agindu lez, eta, nik hitz egin bitartean, hots bat izan zan: lurrak dardara
egin eban eta hazurrak bata besteagaz alkartzen hasi ziran. Gainean zainak eta
haragia sortzen jakezala ikusi neban eta narruazalez estaltzen zirala; baina ez
eben espiriturik.
Jaunak, orduan, esan eustan: «Berba egin
nire izenean espirituari, hitz egin, gizaseme. Hau esango deutsazu espirituari:
"Horra zer dinoan Jainko Jaunak: Zatoz lau haizeetatik, espiritu, eta
haize emon hildako honeei, bizi daitezan"».
Berba egin neban Jaunaren izenean berak
agindu eban lez, eta espiritua sartu zan hazurretan, bizitzara bihurtu ziran
eta zutunik jarri; gudaroste izugarria zan.
Esan eustan Jaunak: «Gizaseme, hazur horreek
Israel herri osoa dira. Hor dabiltz esaten: "Gure hazurrak igartuak dagoz,
galdua dogu itxaropena; gureak egin dau".
Berba egin, beraz, nire izenean eta esan:
"Horra zer dinoan Jainko Jaunak: Neuk edegiko ditut zuen hilobiak,
atarazoko zaituet zeuen hilobietatik, ene herri, eta Israelgo lurraldera
eroango.
Eta zuen hilobiak edegi eta horreetatik
atarazoko zaituedanean, ene herri, orduan jakingo dozue Neu nazala Jauna. Neure
espiritua ezarriko dot zuengan, eta bizibarritu egingo zarie. Zeuen lurraldean
ezarriko zaituet, eta jakingo dozue, Nik, Jaun honek, esandakoa bete egiten
dodala"». Halan dino Jainko Jaunak.
Jaunak esana.
Erantzun salmoa
Sal 107 [106], 2-3. 4-5. 6-7. 8-9 (R/. 1)
R/. Eskerrak Jaunari,
haren maitasuna betikoa da-eta.
Edo: Aleluia.
V/. Oihukatu begie Jaunak askatuek,
zapaltzailearen
eskutik askatu
eta
herrialde guztietatik, sortaldetik eta sartaldetik,
iparraldetik
eta hegoaldetik batutakoek. R/.
V/. Noraezean ebiltzan basamortuan,
bide
bakartietan, bizitzeko uririk aurkitu ezinik.
Gose
eta egarri ziran,
hilzorian,
adorea galdurik. R/.
V/. Baina larrialdian Jaunari deadar egin eutsoen
eta
libratu ebazan estualditik.
Bide
zuzenetik eroan ebazan,
bizitzeko
urira heldu arte. R/.
V/. Goratu begie Jauna agertu dauan
maitasunagaitik,
gizakien
alde egin dituan gauza harrigarriakaitik!
Asetu
ebazan egarri ziranak,
ondasunez
bete gose ziranak. R/.
I. eta II. urteetan
Aleluia
Sal 25 [24], 4b. 5a
R/. Aleluia.
V/. Ene Jainko, erakutsi niri zure bidezidorrak,
gidatu
nagizu zeure leialtasunean. R/.
Ebanjelioa
Maitatu egizu
Jauna zeure Jainkoa
eta lagun
hurkoa zeure burua lez.
✠ Jesu Kristoren Ebanjelioa San Mateoren liburutik
Mt 22, 34-40
Aldi haretan, Jesusek saduzearrak berba
barik itzi zituala jakitean, alkarregaz batu ziran fariseuak, eta euren arteko
legegizon batek azpikeriaz itaundu eutson Jesusi: «Maisu, zein da legeko
agindurik nagusiena?»
Jesusek erantzun: «Maitatu egizu Jauna zeure
Jainkoa bihotz-bihotzez, gogo osoz eta adimen guztiz”. Hauxe da agindurik
nagusiena eta lehenengoa. Eta bigarrena horren parekoa da: “Maitatu lagun
hurkoa zeure burua lez”. Agindu bi honeetan oinarritzen dira Liburu Santu
guztiak».
Jaunak esana.
IRUZKINA
Ondino Jauretxean (Tenpluan) dago Jesus, eta Farisearrek euren erasoaldiaz jarraitzen dabe. Zerga-ordainketa eta hildakoen biztuera izan badira arteragokoak, oraingo itauna —alkarregaz adostua— Legeari buruzkoa da. Zeozertan harrapatu guran dihardue…
Azaluskeria emoten dau itaunak, baina ordukoek eztabaida izugarrietan murgiltzen ziran gai hau zala-eta. Agindu askoren artean, behinena, garrantzizkoena, zein izan ete eitekean.
Jesusen erantzuna hareek eskatzen eutsoena baino harago doa. Nagusienari bigarren bat gehitzen deutso: Legearen oinarria oin bikoa balitz lez; eta bigarren hau barik herrenka balebil lez.
Jesusek argi dauka: Jainkoaganako maitasuna senideenganakoan gauzatzen eta nabaritzen dana. Ezer gitxirako da senideaganako maitasun barik egin daiteken gauzarik ederren eta onena ere.
Ulertu ete geike hau salbamena lortzeko Legea zelan bete gabiltzanok? Legea beteteak senideagana eta honen ona bilatzera ez bagaroaz badaezpadako jarrerea izango da gurea.
Urtean Zeharreko XX. zapatua
I. urtean
I. Irakurgaia
Jaunak
ondorengoa emon deutsu.
Jeseren
aita izan zan Obed; Jese, barriz, Daviden aita.
Rut liburutik
Rt 2, 1-3. 8-11; 4, 13-17
Baeban Noemik, bere senar Elimeleken
aldetik, senide bat, aberatsa eta izen handiko gizona, Booz izenekoa. Rut
moabtarrak esan eutson Noemiri: «Itzi egidazu solora joaten, igitariek izten
dabezan garagarburuak batzera. Aurkituko ahal dot bere ondoren batzen itziko
deustan nor edo nor!» Noemik erantzun: «Zoaz, ene alaba».
Joan zan, beraz, Rut eta igitarien atzetik
garagarburuak batzen hasi zan. Hain zuzen, Elimeleken senide Boozen soloan
suertatu zan. Boozek esan eutson Ruti: «Aizu, ene alaba, ez joan beste inongo
solora garagarburuak batzera. Gelditu hemen nire mirabeekin. Begira zein
arlotara doazan batzera eta jarraitu hareen atzetik. Zu bakean izteko esango
deutset morroiei. Egarritzean, edan mutilek betetako ontzietatik».
Rutek
lurreraino ahuspeztu eta
esan eutson Boozi:
«Atzerritarra naz ni; zer dala-eta
arduratzen zara nitaz eta hartzen nozu hain ondo?»
Harek
erantzun: «Senarra hil ondoren, amaginarrebagaz zelan jokatu dozun kontatu
deuste: zelan zeure aita-amak eta sorterria itzi eta ezagutzen ez zenduan
herrira etorri zaran».
Booz Rutegaz ezkondu zan; alkartu ziran eta
Jaunak bedeinkatu egin eban Rut: umedun gelditu eta semea izan eban.
Emakumeek Noemiri esaten eutsoen:
«Bedeinkatua Jauna, ondorengoa emon deutsu-eta, hildakoaren izenak Israelen
iraun dagian. Ume hau zeure atsekabearen kontsolagarri eta zeure zahartzaroaren
euskarri izango dozu, horren maite zaituan eta zazpi seme baino hobea dozun
erranak emon deutsu-eta». Noemik umea semetzat hartu eta hazi eban.
Auzo-lagunek hau inoen: «Semea jaio jako
Noemiri», eta Obed ezarri eutsoen izena. Jeseren aita izan zan Obed; Jese,
barriz, Daviden aita.
Jaunak esana.
Erantzun salmoa
Sal 128 [127], 1-2. 3. 4-5 (R/. ik. 4)
R/. Honan izango da bedeinkatua
Jaunari begirune deutsona!
V/. Zorionekoa Jaunari begirune deutsona
eta
haren bideetan dabilena!
Zeure
lanaren frututik dozu jango,
zoriontsu
izango zara eta ondo zara biziko. R/.
V/. Emaztea mahatsondo emonkorraren antzeko
zure
etxe barruan;
seme-alabak
olibondo-kimuen antzeko
zure
mahai inguruan. R/.
V/. Hara zelan izango dan bedeinkatua
Jaunari
begirune deutsona!
Bedeinkatu
zagizala Jaunak Siondik,
gozatu
zaitezala Jerusalemen zorionaz
zeure
bizitzako egun guztietan. R/.
II. urtean
I. Irakurgaia
Jaunaren aintza tenpluan sartu zan.
Ezekielen Profezia liburutik
Ez 43, 1-7a
Egun hareetan, sortaldera dagoan aterantz
eroan ninduan gizonak. Eta Israelen Jainkoaren aintza ikusi neban sortaldetik
etortzen, ur handiena lako burrundaraz; haren aintzaren distirak argitzen eban
lurra. Jerusalem hondatzera etorri zanean izan nebana lakoa zan ikuskari hau,
eta Kebar ibaiaren ondoan izan nebana lakoa. Ni ahuspez jausi nintzan.
Jaunaren aintza tenpluan sartu zan
sortaldeko atetik. Orduan, espirituak gora jaso eta barruko atarira eroan
ninduan; Jaunaren aintzak betetzen eban tenplua.
Artean gizona nire ondoan egoala, norbaitek
tenplu barrutik berba egiten eustala ohartu nintzan. Esan eustan: «Gizaseme,
nire tronuaren lekua da hau, oinak jartzen ditudan lekua; hemen biziko naz
israeldarren erdian betiko».
Jaunak esana.
Erantzun salmoa
Sal 85 [84], 9ab eta 10. 11-12. 13-14 (R/. 10b)
R/. Gure lurraldean kokatuko da Jaunaren aintza.
V/. Entzungo dot Jainkoak dinoana:
Jaunak
bakea agintzen deutse bere herriari eta fededunei.
Hurrean
dabe salbazinoa begirune deutsoenek;
bai,
gure lurraldean kokatuko da Jaunaren aintza. R/.
V/. Maitasunak eta leialtasunak alkar dabe
aurkitzen,
justiziak
eta bakeak alkar besarkatzen.
Leialtasuna
lurretik da ernetzen,
justizia
zerutik jaisten. R/.
V/. Jaunak emongo dau euria,
eta
gure lurrak ekarriko bere uzta.
Haren
aurretik joango da justizia,
haren
pausuei jarraituko deutse ongizateak. R/.
I. eta II. urteetan
Aleluia
Mt 23, 9b. 10b
R/. Aleluia.
V/. Bakarra da zuen Aita, zerukoa,
eta
bakarra zuen gidaria, Kristo. R/.
Ebanjelioa
Esan, esaten dabe, baina egiten ez.
✠ Jesu Kristoren Ebanjelioa San Mateoren liburutik
Mt 23, 1-12
Aldi haretan, holantxe egin eutsen berba
Jesusek jentetzari eta ikasleei: «Lege-maisuak eta fariseuak Moisesen
maisu-aulkian jesarrita dagoz. Egizue, beraz, eta bete hareek esandako guztia;
baina ez egin egiten dabena; ze, esan, esaten dabe, baina egiten ez. Zama
astunak eta eroan ezinekoak lotzen ditue, eta besteei leporatzen; baina eurek
atzamar batez be ez ditue mogitzen. Egiten daben guztia, jenteak ikusteagaitik
egiten dabe; zinta zabalak erabiltzen ditue bekokian, eta borlatxu deigarriak
mantu barrenean. Afarietan lehenengo jarlekuak, eta sinagogetan aurreaurreko aulkiak
maite ditue, plazetan jenteak agur egitea eta guztiek “maisu” deitzea.
Zuek, ostera, ez itzi inori “maisu” deitzen,
ze bakarra da zuen maisua, eta zuek guztiok alkarren senide zarie. Eta ez deitu
lurrean inori “aita”, ze bakarra da zuen Aita, zerukoa. Eta ez itzi inori
“gidari” deitzen be, ze bakarra da zuen gidaria, Kristo.
Zuetariko handiena izan bedi zuen
zerbitzari. Bere burua goratzen dauana beheratu egingo dau Jainkoak, eta bere
burua beheratzen dauana goratu».
Jaunak esana.
IRUZKINA
Erasoaldi gogorra Jesusek jaurtiko dauana. Onartzen dau Jesusek Farisearren eta Lege-maisuen aginpidea; horretarakoxe dagoz-eta: herria zuzenbidean zehar eroateko.
Baina erabilten dituen zinta zabalak eta borlatxuak legea gogoratzeko eta ha bete ahal izateko barik, egiten dabela hori erakusteko ei zan. Giza makaltasunak eroan geinkez norbere burua ontzat, handitzat eta Jainkoaren gogokotzat ikustera. Arrisku horretan jausi ez ete ziran Lege-maisu eta Farisear hareik…
Behar bada, arrisku hori egoan lehen kristau alkarteetan ere. Eta Mateok, irakurri dogun zati horren bigarren aldian, horren barri emon gura deusku, eta hareentzat jarraibidea markatzen dau: senideen arteko hartu-emonak zelangoak izan behar daben.
Behin eta barriro agertzen dan gauzea hauxe Jesusen irakatsietan: gure jardunak gehidearen (projimoaren) ona bilatzen eta bultzatzen ez badau, badaezpadakoa da. Gehiago ondino, azaluskeria bada, Farisearrena langoa.
