Urtean Zeharreko XVIII. astelehena
I. urtean
I. Irakurgaia
Nik bakarrik ezin dot herri hau guztia eroan.
Zenbakiak liburutik
Zen 11, 4b-15
Egun hareetan, hauxe esan eben israeldarrek:
«Nork emongo deusku haragia jateko? Gogoan dogu Egipton doarik jaten genduan
arraina, baita hango pepino, meloi, porru, kipula eta berakatzak be. Orain,
barriz, makaltzen goaz, "mana" baino ikusten ez dogula».
Iturri-bedarraren haziaren antzekoa zan
mana, erretxina-kolorekoa. Sakabanatu egiten zan jentea mana batzeko, eta,
errotan eiho edo motroiloan birrindu ondoren, lapikoan egosi eta orio-ogiaren
gustuko opilak egiten ebezan. Gauez, kanpalekuan iruntza egitean, gainean
agertzen zan mana be.
Jakin eban Moisesek herria, senitarteka
batuta, nor bere txabolako atean negarrez egoala. Jauna biziro hasarratu zan;
Moises be mindurik egoan, eta Jaunari esan eutson: «Zergaitik hartzen dozu
txarto zeure zerbitzari hau? Zergaitik kentzen deustazu zeure konfiantza eta
botatzen deustazu gainera herri osoaren zama? Nik sortua ete da, ba, herri hau?
Nik ekarria ete mundura, Zuk niri esateko: "Hartu egizu lepoan, inudeak
umetxua lez, eta eroaizu asabei agindutako lurraldera"? Nondik atarako dot
nik haragia, herri honi guztiari jaten emoteko? Haragi eske jabilt-eta
negarrez. Nik bakarrik ezin dot herri hau guztia eroan: zama astunegia da
niretzat. Holan erabili behar banozu, hil nagizu, arren, begiko banozu
behintzat, eta ez dot gehiago neure zorigatxa jasan beharrik izango».
Jaunak esana.
Erantzun salmoa
Sal 81 [80], 12-13. 14-15. 16-17 (R/. ik. 2a)
R/. Egin pozez oihu laguntzaile dogun Jainkoari.
V/. Nire herriak ez eustan jaramonik egin,
Israelek
ez eustan obedidu.
Orduan
zapuztu egin nituan euren burugogorkeriagaitik:
bizi
daitezala euren gurarira! R/.
V/. Ai neure herriak entzungo baleust!
Ai
Israel nire bidetik balebil!
Bat-batean
zapalduko neukez haren arerioak,
eskua
luzatuko neuke haren zapaltzaileen aurka. R/.
V/. Menpean izango leukez Jaunari gorroto
deutsoenak;
horra
hareen zoria betiko!
Garirik
onenaz janarituko neuke neure herria,
eztirik
gozoenaz asetuko. R/.
II. urtean
I. Irakurgaia
Hananias, ez
zara Jaunak bialdua,
eta guzurrezko konfiantza emoten deutsazu
herri honi.
Jeremias Profetaren liburutik
Jr 28, 1-17
Judako Sedekiasen erregealdiko laugarren
urtean, bosgarren hilean, Hananias profetak, jatorriz Gabaongoa zan Azurren
semeak, tenpluan Jeremiasegaz topo egin eta abadeen eta herri osoaren aurrean
esan eutson:
«Hauxe dino Jaun ahalguztidunak, Israelen
Jainkoak: "Apurtu egin dot Babiloniako erregearen buztarria, eta urte
biren buruan bihurtuarazo egingo ditut toki honetara Babiloniako errege
Nabukodonosorrek bertatik hartu eta Babiloniara eroan ebazan Jaunaren tenpluko
tresnak. Eta Joakin, Judako errege Joakimen semea, eta Judatik Babiloniara
erbesteraturik joandako guztiak be, bihurtuarazo egingo ditut –dino Jaunak–,
izan be apurtu egingo dot-eta Babiloniako erregearen buztarria"».
Jeremias profetak erantzun eutson Hananias
profetari, tenpluan egozan abadeen eta herri osoaren aurrean: «Amen!
Halan egingo ahal dau Jaunak! Beteko
ahal ditu zuk iragarritako hitzak eta bihurtuarazoko Babiloniatik Jaunaren tenpluko
tresnak eta erbesteratu guztiak! Baina entzun ondo zuri eta herri osoari esaten
deutsuedan hau: "Ni eta zu baino lehen be, beti izan dira profetak, eta
horreek gerra, gosea eta izurria iragarri ebezan herrialde askorentzat eta
erreinu ahaltsuentzat. Profetak bakea iragartzen badau, ostera, haren hitza
betetzean bakarrik jakingo da benetan Jaunak bialdua dana"».
Orduan, Hananias profetak, Jeremiasen
lepotik buztarria kendurik, apurtu egin eban eta herri osoaren aurrean esan
eban: «Hau dino Jaunak: "Holantxe apurtuko dot, urte biren buruan,
Babiloniako errege Nabukodonosorren buztarria, eta herri guztien lepotik
kenduko dot"». Orduan, Jeremias profeta bere bidetik joan zan.
Hananias profetak Jeremiasen lepoko
buztarria apurtu eta, alditxu batera, honan berba egin eutson Jaunak Jeremiasi:
«Zoaz eta esan Hananiasi: "Hau dino Jaunak: Zurezko buztarria apurtu dozu,
bai, baina Nik, haren ordez, burdinazkoa egingo dot". Beraz, hau dino Jaun
ahalguztidunak, Israelen Jainkoak: "Burdinazko buztarria ezartzen deutset
lepoan herri honeei guztiei, Babiloniako errege Nabukodonosorren menpeko izan
daitezan; basapiztiak eurak be haren menpe izten ditut"».
Jeremias profetak esan eutson, orduan,
Hananias profetari: «Entzun orain, Hananias: "Ez zara Jaunak bialdua, eta
guzurrezko konfiantza emoten deutsazu herri honi. Horregaitik, hau dino Jaunak:
Desagertuarazo egingo zaitut lurretik. Aurten hilko zara, zeure hitzen bidez
Jaunaren kontra jartzera eroan dozu-eta herria"». Hananias profeta urte
haretan bertan hil zan, zazpigarren hilean.
Jaunak esana.
Erantzun salmoa
Sal 119 [118], 29 eta 43. 79-80. 95 eta 102 (R/. 68b)
R/. Irakatsi niri, Jauna, zeure arauak.
V/. Aldendu nigandik jokabide faltsua
eta
emoidazu zeure legea dohaitzat.
Ez
aldendu nire ahotik hitz egiazkoa,
zure
erabagietan dot-eta itxaropen. R/.
V/. Betorkidaz, ostera, Zuri begirune deutsuenak,
zure
aginduak ezagutzen dabezanak.
Bego
nire bihotza akats barik zure arauetan,
lotsagarri
geratu ez nadin. R/.
V/. Gaiztoak zelatan ditut ni galtzeko;
baina
ni zure aginduetara zuhur nago.
Ez
naz zure erabagietatik aldentzen,
Zeuk
deustazu-eta irakasten. R/.
I. eta II. urteetan
Aleluia
Mt 4, 4b
R/. Aleluia.
V/. Gizakia ez da ogiz bakarrik bizi,
Jainkoaren
ahotik urteten dauan hitz guztitik baino. R/.
Ebanjelioa
A urtean, Ebanjelio hau aurreko domekan irakurri izan danean, martitzeneko Ebanjelioa irakurriko da: Mt 14, 22-36.
Begiak
zerurantz jasorik, dedeinkapen-otoitza egin
eta ikasleei
emon eutsezan ogiak, eta ikasleek jenteari.
✠ Jesu Kristoren Ebanjelioa San Mateoren liburutik
Mt 14, 13-21
Aldi haretan, Joan Bateatzailearen
heriotzaren barri jakitean, Jesus leku bakarti batera joan zan bera
bakarrik txalupaz. Baina konturatu egin zan jentea eta oinez jarraitu eutson
herrietatik. Txalupatik urtetean,
Jesusek jentetza handia ikusi eban; erruki izan zituan eta gaixoak osatu
eutsezan.
Iluntzean, ikasleek hurreratu eta esan
eutsoen: «Leku bakartia da hau eta orduak aurrera doaz. Bialdu egizu jentea,
auzoetara joan eta jatekoa erosi dagian». Jesusek esan eutsen: «Ez dabe zertan
joan; emoiezue zeuok jaten». Hareek, orduan: «Ez daukagu hemen bost ogi eta
arrain bi besterik». Eta Jesusek: «Ekarri hona».
Jenteari bedar gainean jesartzeko agindu
ostean, hartu zituan bost ogiak eta bi arrainak, eta, begiak zerurantz jasorik,
bedeinkapen-otoitza egin, ogiak zatitu eta ikasleei emon eutsezan, eta ikasleek
jenteari. Asetzeraino jan eben guztiek, eta gelditutako hondarrez hamabi otzara
bete batu zituen. Bost mila gizon inguru
ziran jan ebenak, emakumeak eta umeak aparte.
Jaunak esana.
IRUZKINA
Jesusek neurriak hartzen dauz. Bateatzaileagaz egin dabena egin leikeela beragaz ere, eta leku bakartia bilatzen dau.
Baina aurkituko daben beste batzuk ere bila jabilkoz. Zeozer ikusten dau jenteak Jesusengan; agintariengan edo erlijio-buruzagiengan aurkitzen edo ikusten ez dabena. Eta honei Jesusek ez deutse lepo emongo: errukitu egingo jake.
Ikasleek ez dabe ardurarik hartu gura; baina Jesusek behartu egingo dauz daukena danen esku jarten. Egiten dauan otoitzak ondasun guztien jaubea Jainkoa dala iragarten dau; eta banantzeko aginduak, behartsurik badago ez daukagula pilatzeko eskubiderik. Hau ikasiko bagendu. Ibiliko ez bagina ondasun pilaketan, behartsu bihar geu izan geintekezala-eta… Baina ez dogu ikasten; ez daukagu besteengan uste onik. Zergaitik ete da?
Zenbakiek ere (bost ogi eta arrain bi = 7) badauke esangurarik: osotasuna (aldi mesianikoetako otorduan gagoz, ba: danentzakoa da, eta ugaria (hondakinez 12 otzarakada batuko dira; ez da ezer alperrik galdu behar.
Eta kultura haretan ogia eta arraina jaki oinarri-oinarrikoak diran hainean, banantzen dana norberenetik partekatzen dala (norberaren zati bat) emoten dau aditzera.
…eta barriro bilatuko dau Jesusek bakartadea, eta sartuko da otoitzean… Hantxe aurkituko dau indar eta argi, gainera jatorkonari erantzun ahal izateko.
Urtean Zeharreko XVIII. martitzena
I. urtean
I. Irakurgaia
Moises ez da
gainerako profetak lakoa:
zelan ausartu
zarie haren kontra txarto esatera?
Zenbakiak liburutik
Zen 12, 1-13
Egun hareetan, Miriamek eta Aaronek txarto
esaka jardun eben Moisesen aurka, emakume etiopiar bategaz ezkondua egoala-eta.
Hau inoen: «Moisesen bidez bakarrik berba egin ete dau Jaunak? Ez ete dau gure
bidez be berba egin?» Eta Jaunak entzun eban kexua. Moises oso gizon apala zan,
munduko gizonik apalena. Bat-batean honan berba egin eutsen Jaunak Moisesi,
Aaroni eta Miriami: «Zoaze hirurok alkarketa-txabolara».
Joan ziranean, Jauna laino-habean jatsi eta
alkarketa-txabolako sarreran kokatu zan. Eta Aaroni eta Miriami dei egin
eutsen. Hurreratu ziran biak, eta Jaunak esan eutsen: «Entzun, esan behar
deutsuedana:
Zuen
artean Jaunaren profetarik bada,
ikuskaritan
agertzen naiako eta amesetan berba egiten.
Ez,
ostera, neure zerbitzari Moisesi:
konfiantza
osoko gizona dot neure etxean;
ahoz
aho berba egiten dot haregaz,
aurrez
aurre, eta ez hitz-erdika.
Harek
Jaunaren irudia ikusten dau.
Zelan ausartu zarie, bada, Moises nire
zerbitzariaren kontra txarto esatera?» Biziro hasarratu zan Jauna hareen aurka
eta alde egin eban. Eta lainoa alkarketa-txabolaren gainetik aldentzean, Miriam
legenarrak jota agertu zan, edurra baizen zuri.
Miriamengana bihurturik, legenarrak hartuta
ikusi eban Aaronek, eta esan eutson Moisesi: «Parkatu, Jauna! Ez ezarri guri
burubakokeriaz egin dogun pekatua. Ez bedi jazo Miriam amaren sabeletik urten
orduko haragia erdi-janik dauan umegalduaren pareko». Moisesek oihu egin eutson
Jaunari: «Arren, Jauna, osatu egizu!»
Jaunak esana.
Erantzun salmoa
Sal 51 [50], 3-4. 5-6b. 6c-7. 12-13 (R/. ik. 3a)
R/. Erruki, Jauna, pekatu egin dogu-eta.
V/. Erruki nitaz, ene Jainko, zeure maitasunaz,
hondatu
nire hobena zeure neurribako errukiaz.
Garbitu
nagizu zeharo neure errutik,
garbitu
neure pekatutik. R/.
V/. Autortzen dot, bai, neure hobena,
begi
aurrean dot eten barik neure pekatua.
Zure
aurka, zure aurka bakarrik, egin dot pekatu,
zure
begietan oker dana egin dot. R/.
V/. Horregaitik, arrazoi izango dozu salatzean,
errubako
izango zara epaia emotean.
Hara,
errudun jaio nintzan,
pekatari
ninduan amak sortu. R/.
V/. Ene Jainko, sortu bihotz garbia nigan,
barritu
arnasa sendoa nire barruan.
Ez
nagizu bota zeure aurretik,
ez
kendu niri zeure arnasa santua. R/.
II. urtean
I. Irakurgaia
Zeure pekatu
ikaragarriakaitik egin deutsut hori.
Jakoben
herriaren zoria aldatuko dot.
Jeremias Profetaren liburutik
Jr 30, 1-2. 12-15. 18-22
Honan berba egin eutson Jaunak Jeremiasi:
«Hauxe dino Jaunak, Israelen Jainkoak: "Idatzi liburu baten Nik esan
deutsudazan mezu guztiak".
Izan be, hauxe dino Jaunak:
"Erremediorik
bakoa da zure hondamena, Israel,
osatuezina
zure zauria.
Ez
da inor zutaz arduratzen danik;
ez
dago zure zauriarentzat osabiderik.
Ahaztu
egin zaitue zeure adiskide guztiek,
ez
dira zutaz arduratzen.
Bai,
arerio batek lez jo zaitut,
gogor
zigortu, zeure gaiztakeria kontaezinakaitik,
zeure
pekatu ikaragarriakaitik.
Zertan
egin garrasi zeure hondamenagaitik?
Zure
oinazeak ez dau erremediorik.
Zeure
gaiztakeria kontaezinakaitik,
zeure
pekatu izugarriakaitik egin deutsut hori".
Hauxe dino Jaunak:
"Horra,
Jakoben herriaren zoria aldatuko dot,
errukitu
egingo naz haren herrialdeaz;
oraingo
hondakinen gainean berreraikiko da uria,
egoan
tokian jasoko jauregia.
Gorespen-kantak
igongo dabe handik, pozezko oihuak.
Ugarituko
ditut eta ez dira gitxituko;
ohoratuko
ditut eta ez dabez gitxietsiko.
Lehengo
egoeran ezarriko ditut hareen ondorengoak:
hareen
batzarra nire aurrean sendo!
Zigortu
egingo ditut hareen zapaltzaile guztiak.
Herrikoa
izango dabe buruzagia,
euren
artetik sortua agintaria.
Nigana
hurreratuko dot, eta ondora etorriko jat.
Bestela,
nor ausartuko litzateke Nigana hurreratzen?
–dino
Jaunak–.
Neure
herri izango zaituet
eta
zeuen Jainko izango nozue Ni"».
Jaunak esana.
Erantzun salmoa
Sal 102 [101], 16-18. 19-21. 29 eta 22-23 (R/. ik. 17)
R/. Eraiki dau Jaunak barriro Sion
eta bera aintzaz betea agertu da.
V/. Begirune izango deutsoe nazinoek Jaunaren
izenari,
lurreko
errege guztiek haren aintzari,
Jaunak
Sion barriro eraikitzean
eta
bera aintzaz betea agertzean.
Bihurtuko
da zapalduaren otoitzera,
ez
dau gitxietsiko honen eskaria. R/.
V/. Bego hau idatzirik hurrengo gizaldiarentzat,
eta
sortzeko zorian dagoan herriak goratuko dau Jauna.
Jaunak
bere santutegi garaitik begiratu egin dau,
zerutik
lurrera begiratu,
katiguen
aieneak entzuteko
eta
heriotzara kondenatuak askatzeko. R/.
V/. Zure zerbitzarien seme-alabak seguru biziko
dira,
hareen
ondorengoek iraungo dabe zure aurrean.
Iragarri
dagiela Sionen Jaunaren izena,
Jerusalemen
haren gorespena,
herriak
euren erregeekin batera
Jauna
gurtzera batuko diranean. R/.
I. eta II. urteetan
Aleluia
Jn 1, 49b
R/. Aleluia.
V/. Maisu, Zu Jainkoaren Semea zara;
Zu
Israelgo Erregea zara. R/.
Ebanjelioa
Nahi bada, batez ere, A urtean, Ebanjelio hau astelehenean irakurria izan danean, Mt 15, 1-2. 10-14, irakurri daiteke.
Agindu egidazu ur gainean Zeugana joateko.
✠ Jesu Kristoren Ebanjelioa San Mateoren liburutik
Mt 14, 22-36
Jentea asetu ondoren, ontzian sartuarazo
ebazan Jesusek bere ikasleak eta bere aurretik bestaldera joateko agindu
eutsen, berak jenteari agur egin bitartean. Jentea bialdu eta gero, mendira
igon eban Jesusek berak bakarrik, otoitz egitera. Ilundu ebanean, han egoan
bakarrik. Txalupa, ordurako, lehorretik urrun joian, olatuek astindua, haizea
kontra eban-eta.
Goizaldera, Jesus hareengana joan zan, ur
gainean oinez. Ikasleak, ur gainean ibiltzen ikusi ebenean, ikaratu egin ziran,
mamuren bat zalakoan, eta bildurraren bildurrez deadarka hasi ziran. Baina
Jesusek behingoan egin eutsen berba: «Izan bihotz! Neu naz; ez bildur izan!»
Orduan Pedrok esan eutson: «Jauna, benetan Zeu bazara, agindu eidazu ur gainean
Zeugana joateko». Jesusek erantzun: «Zatoz!»
Pedro ontzitik jatsi eta Jesusengana abiatu
zan, ur gainean oinez. Baina, haizearen indarra igartzean, bildurra sartu jakon
eta, urperatzen hasirik, deadar egin eban: «Jauna, salbatu nagizu!» Behingoan
Jesusek eskua emon eta heldu egin eutson, esanez: «Sinismen gitxiko hori!
Zergaitik izan dozu zalantza?»
Ontzira igon ebenean, haizea gelditu egin
zan. Eta ontzian egozanak Jesusen aurrean ahuspez jarri ziran, esanez: «Benetan
be Jainkoaren Semea zara Zu!»
Itsasoa igaro ostean, Genesareten heldu
ziran lehorrera. Bertakoek, Jesus ezagutu ebenean, inguruko lurralde guztian
zabaldu eben barria, eta gaixo guztiak eroan eutsoezan. Soineko-ertza behintzat
ikutzen izteko eskatzen eutsoen, eta ikutzen eben guztiak osatuta gelditzen
ziran.
Jaunak esana.
IRUZKINA
Azalpen errezik ez daukan pasarte baten aurrean gagoz. Egoera esanguratsu baten aurrean jarten gaitu: txalupa Eleizearen ezaugarri litzateke; itsasoa Jainkoaren arerioena eta haizea arriskuena…
Jesus otoitzera doan bitartean ikasleak etxerantzakoa egiten dabe, baina haizeak astindutako itsasoan sartzen dira eta eurak ere olatuek astinduta ezinean dihardue.
Arriskuan aurkitzen diranen laguntzan abiatzen da Jesus, baina poza baino gehiago bildurra sartzen deutse. Mamua, menperatu ezineko indarren ezaugarri da. Jainko itxura baten aurrean bildurrak hartua izatea Itun Zaharreko egoera arrunta da. Jainko kanpotikoa iruditzeak horixe dakar: bildurra, uste ona baino gehiago, arazoak laguntza baino gehiago.
Egoera horretan Pedrok beste ikasleak baino ausartagoa agertu gura dau, eta irrigarri gelditzen da, Jesusek agertzen deutson leuntasuna ulertzen ez badogu ere. Haren pareko agertu gura dau, baina heldutasun ibilbiderik egin barik, bat-batean, Jesusen erregalu lez.
Beste ikasleen jarrerea da gauzarik arruntena: bildurrak jota agertzea eta harrituta.
Pasarte honek
Jesusen jainkotasunera hurreratu gura gaitu, eta haren mailara heltzeko
heldutasun ibilbidea egitea dagokigula dinosku. Horixe da Jesusengan aurkitzen doguna:
otoitzean Jainkoagaz estu-estu lotuta dagoala.
Edo nahiago bada, eta, batez be, A urtean, Ebanjelio hori astelehenean irakurri izan danean, beste hau irakurri daiteke:
Ebanjelioa
Nire Aitak
landatu ez dauan landarea
sustraitik
atarako dabe.
✠ Jesu Kristoren Ebanjelioa San Mateoren liburutik
Mt 15, 1-2. 10-14
Aldi haretan, Jerusalemdik etorritako
lege-maisu eta fariseu batzuk hurreratu jakozan Jesusi eta itaundu eutsoen:
«Zergaitik hausten dabe zure ikasleek zaharren ohitura? Ez dabe eskuen
garbikuntza egiten jan aurretik».
Jenteari dei egin eta esan eutson Jesusek:
«Entzun eta ulertu ondo: Gizakia ez dau ahotik sartzen danak lohitzen; ahotik
urtetzen deutsonak, horrek kutsatzen dau gizakia».
Hurreratu jakozan orduan ikasleak eta esan
eutsoen: «Badakizu berba horreekaz fariseuak hasarratuta itzi dozuzana?» Jesusek
erantzun eutsen: «Zeruko nire Aitak landatu ez dauan landarea sustraitik
atarako dabe. Itziezue! Itsu dira, eta itsu-gidari. Eta itsuaren gidaria itsua
bada, biak jausiko dira zulora».
Jaunak esana.
Urtean Zeharreko XVIII. eguaztena
I. urtean
I. Irakurgaia
Ikertutako
lurraldeaz
txarto esaka hasi ziran israeldarren aurrean.
Zenbakiak liburutik
Zen 13, 1-2. 25–14, 1. 26-29. 34-35
Egun hareetan, Jaunak esan eutson Moisesi
Parango basamortuan: «Bialdu egizuz gizaseme batzuk israeldarrei emongo
deutsedan Kanaango lurraldea ikertzera: leinu bakotxetik bat, buruzagien
artetik aukeraturik».
Berrogei egunez lurraldea ikertzen ibili
ondoren, bihurtu ziran eta, Kadexera, Parango basamortura, heldurik, Moises,
Aaron eta israeldarren alkarte osoagaz batu ziran. Guztiaren barri emon eta
lurraldeko frutuak erakutsi eutsiezan. Txosten hau azaldu eutsoen Moisesi:
«Joan gara bialdu ginduzuzan lurraldera. Benetan, esnea eta eztia darion
lurraldea da. Begira hango frutuak. Halan be, hango jentea indartsua da, eta
hango uriak gotorrak eta handiak; gainera, Anak erraldoiaren ondorengoak be
ikusi doguz; Negeveko basamortuan amalektarrak bizi dira; mendialdean hititak,
jebusearrak eta amortarrak; itsasaldean eta Jordango ibarrean, barriz,
kanaandarrak».
Moisesen kontra jenteak ziharduan
zurrumurrua isilduarazoz, esan eban Kalebek: «Ea, igon eta egin gaitezan
lurralde horren jaube, gai gara-eta horretarako». Baina haregaz ikertzera
joandakoek inoen: «Ez, ezin deutsegu eraso, gu baino indartsuagoak dira-eta».
Eta ikertutako lurraldeaz txarto esaka hasi
ziran israeldarren aurrean: «Ikertzen ibili garan lurraldeak bertako biztanleak
irunsten ditu, eta han ikusi dogun jentea ikaragarri handia da. Erraldoiak,
Anaken ondorengoak be ikusi doguz; guk hareen ondoan matxinsaltoak emoten
genduan, eta halantxe ikusten ginduezan hareek gu». Orduan, israeldarren
alkarte osoa oihuka hasi zan eta gau osoa negarrez emon eban.
Ikertzaileak bihurtu ziranean, Jaunak
Moisesi eta Aaroni berba egin eutsen, esanez: «Noiz arte jardun behar dau herri
gaizto honek nire kontra marmarka? Entzun ditut, bai, israeldarren nire aurkako
marmarrak. Esaiezu, bada: Hau dino Jaunak: "Ala Ni Jainkoa! Zuei
entzunaren arabera jokatuko dot zuekin. Izen-batuketakoan hogei urtez gorako
zinienon gorpuak basamortu honetan geldituko dira luze, nire kontra marmarka
jardun dozuelako. Lurraldea ikertzen berrogei egun emon bazenduen, berrogei
urte emon beharko dozue zeuen erruak ordaintzen: egun bakotxeko urte bat. Holan
ikasiko dozue zer dakarren Niri aurka egiteak. Nik, Jaun honek, zin dagit hau
egingo deutsadala nire aurka bat etorri dan herri gaizto honi: basamortuan
hondatuko dira eta hilko"».
Jaunak esana.
Erantzun salmoa
Sal 106 [105], 6-7b. 13-14. 21-22. 23 (R/. ik. 4a)
R/. Gogoratu gutaz, Jauna,
zeure herriaganako onginahiagaitik.
Edo: Aleluia.
V/. Pekatu egin dogu gurasoen antzera,
oker
jokatu dogu, errudun gara.
Gure
gurasoek, Egipton zirala,
ez
ebezan ulertu zure egintza harrigarriak. R/.
V/. Laster ahaztu ziran haren egintzez
eta
ez eben itxaropenik jarri haren egitasmoan.
Jan-gose
bizia sortu jaken basamortuan
eta
Jainkoa tentatu eben eremuan. R/.
V/. Ahaztu egin ziran Jainkoaz, euren
salbatzaileaz,
Egipton
gauza ikusgarriak egin ebazanaz,
Kam-en
lurraldean egintza harrigarriak
eta
Itsaso Gorrian ikaragarriak egin ebazanaz. R/.
V/. Prest egoan Jainkoa hareek hondatzeko,
Moises
bere aukeratuagaitik izan ez balitz;
tartean
sartu eta Jainkoaren aurrean jarri zan,
haren
hasarre hondatzailea baretzeko. R/.
II. urtean
I. Irakurgaia
Maite zaitut, betidanik maite.
Jeremias Profetaren liburutik
Jr 31, 1-7
«Sasoi haretan —dino Jaunak—, Israelgo leinu
guztien Jainko izango naz, eta hareek nire herri izango dira».
Hau dino Jaunak:
«Basamortuan
azaldu neutsan onginahia
heriotzatik
ihes egin eban herriari;
bere
atseden-bidean da Israel».
Urrunetik agertu jako Jauna eta esan deutso:
«Maite
zaitut, betidanik maite;
horregaitik
naiatzu eten barik leial.
Barriro
eraikiko zaitut,
eta
sendo iraungo dozu, Israel neskatila eder;
danbolina
eskuan dozula urtengo dozu barriro
jaizaleekin
dantzara.
Barriro
landatuko dozuz mahastiak
Samariako
mendietan;
landatu
dabezanek jasoko dabe uzta.
Bai,
badator eguna, zaintzaileek
Efraimgo
mendialdean oihu egingo dabena:
"Ea,
igon daigun Sionera,
goazen
Jaunagana, geure Jainkoagana"».
Hau dino Jaunak:
«Egin
oihu pozaren pozez Jakoben herriagaitik,
egin
irrintzi herrien buru danagaitik.
Egin
oihu, goratu Jauna, esanez:
"Salbatu
dau Jaunak bere herria,
Israelen
bizirik geldituak"».
Jaunak esana.
Erantzun salmoa
Jr 31, 10. 11-12b. 13 (R/. ik. 10d)
R/. Zainduko gaitu Jaunak,
artzainak artaldea bezala.
V/. Entzun, herriok, Jaunaren hitza,
iragarri
urruneko kostaldeetan:
«Israel
sakabanatu ebanak berak batzen dau
eta
artzainak artaldea lez zaintzen». R/.
V/. Jaunak Jakob herria askatu dau,
indartsuagoaren
eskutik libratu.
Poz-oihuka
etorriko dira Sion mendira,
Jaunaren
ondasunetara helduko dira. R/.
V/. Neskek pozik egingo dabe dantzan
mutil
eta agureekin batera.
Hareen
dolua alaitasun bihurtuko dot,
atsekabearen
ondoren, kontsolatu eta alaituko ditut. R/.
I. eta II. urteetan
Aleluia
Lk 7, 16
R/. Aleluia.
V/. Profeta handia sortu da gure artean,
eta
Jainkoa bere herria salbatzera etorri da. R/.
Ebanjelioa
Emakumea, handia da zure fedea!
✠ Jesu Kristoren Ebanjelioa San Mateoren liburutik
Mt 15, 21-28
Aldi haretan, Tiroko eta Sidongo lurraldera
aldendu zan Jesus. Haretan, inguru hareetan bizi zan emakume kanaandar bat
deadarka hasi jakon: «Jauna, Daviden Semea, erruki zakidaz! Oinaze gorritan
dauka deabruak nire alaba». Baina Jesusek ez eutson berbarik erantzun.
Ikasleak, hurreraturik, erreguka ebilkozan:
«Egiozu jaramon, eta doala, ze deadar baten datorkigu atzetik». Jesusek,
ostera: «Israel herriko ardi galduakana bakarrik bialdu nau Jainkoak».
Baina emakumea, hurreraturik, ahuspez jarri
jakon, esanez: «Lagundu eidazu, Jauna!» Jesusek, orduan: «Ez dago ondo
seme-alabei ogia kendu eta txakurrei botatzea». Emakumeak erantzun eutson:
«Bai, Jauna, halantxe da; baina txakurrek be jaten ditue nagusien mahaitik
jausten diran ogi-apurrak».
Orduan, Jesusek esan eutson: «Emakume,
handia da zure sinismena! Jazo bekizu gura dozun hori». Eta une harexetatik
osaturik gelditu jakon alaba.
Jaunak esana.
IRUZKINA
Jesusen lehenengo jarraitzaile taldeei ez jaken errez egingo, ez, atzerritarrekazko (paganoekazko) hartu-emonak. Eurena baino ez zan Jainkoa ala danena? Jainkoaren seme-alaba eurak baino ez ziran (judeguak baino ez), ala paganoak ere baziran Jainkoaren seme-alaba?
Arazo honen barri emotera jatorkula pasarte hau esan daiteke. Jesus, bere bila dabizenen artetik urrundu guran dabil, eta pagano herrialdera abiatzen da. Eta maisua danak alkarrizketa izango dau paganoa eta emakumea dan bategaz.
Eta argigarria da koadroa esku hartzen dabenen jarrereaz jabetzeko.
Jesusek entzun-gor egiten deutso emakumearen oihuari: erruki zakidaz! Emakumea da errukiaren beharrean dagoana? Noraino egin dau bere arazo alabearena dana? Eta ikasleek emoten daben erantzun-eskaria bada ardurazkoa, ala arazoa gainetik kentzearren egiten dan eskaria da?
Jesusen erantzun gogorrean emakumeak haren erantzunik ezean aurkitu ez dauan zirrikitua aurkitzen dau. Eta honen ama-bihotzak zabalduko deutsoz ateak: alabea da laguntza beharrean dagoana, eta halantxe aurkezten deutso eskarian; eta horrexek ahalbidetzen dau miraria.
Zenbat muga eta oztopo aurkitu geikezan gainditu beharrekoak gure bizitzan miraria gauzatu daiten!
Urtean Zeharreko XVIII. eguena
I. urtean
I. Irakurgaia
Ur-parrastak urten eban.
Zenbakiak liburutik
Zen 20, 1-13
Egun hareetan, israeldarren alkarte osoa
Tzin basamortura heldu eta Kadexen gelditu zan aldi baterako. Han hil zan
Miriam eta bertan lur emon eutsoen.
Ez zan han herriarentzat urik, eta Moisesen
eta Aaronen aurka jagi ziran. Herriak aurpegi emon eutson Moisesi, esanez: «Ai
gu be Jaunak hilarazo ebazan senideekin batera hil izan bagina! Zergaitik
ekarri dozue Jaunaren alkartea basamortu honetara? Gu eta gure abereak
hiltzeko? Zergaitik igonarazo zeuskuen Egiptotik eta bazter negargarri honetara
ekarri? Hemen ezin da ezer erein, ez dago ikondorik, ez mahastirik, ez
granadaondorik, ezta edateko urik be».
Batzarra itzirik, Moises eta Aaron alkarketa-txabolaren
sarrerara joan eta lurreraino ahuspeztu ziran. Jaunaren aintza agertu zan, eta
esan eutson Jaunak Moisesi: «Hartu makila eta, zeure anaia Aaron lagun dozula,
batu israeldarren alkartea; gero, agindu harkaitzari danen aurrean, eta honek ura
emongo dau. Harkaitzetik ura atarako dozu eta jenteari eta abereei emongo
deutsezu edaten».
Jaunak agindu lez, hartu eban Moisesek
alkarketa-txabolan Jaunaren aurrean egoan makila; gero, alkartea batu eben
Moisesek eta Aaronek harriaren aurrean, eta Moisesek esan eutsen: «Entzun,
errebeldeok: harkaitz honetatik ura sortuarazoteko gauza ete gara?» Moisesek
eskua jaso eta birritan jo eban makilaz harkaitza. Ur-parrastak urten eban, eta
jenteak eta abereek edan eben.
Jaunak, ostera, esan eutsen Moisesi eta
Aaroni: «Ez zarie Nitaz fidatu eta ez dozue nire santutasuna israeldarren
aurrean autortu; horregaitik, ez dozue zuek sartuarazoko herri hau Nik emongo
deutsadan lurraldean». Jazoera hau dala-eta, iturri harek «Meribako Urak» dau
izena –hau da, «Auzi Urak»–, han emon eutsoen-eta israeldarrek aurpegi Jaunari,
eta honek bere santutasuna agertu eutsen.
Jaunak esana.
Erantzun salmoa
Sal 95 [94], 1-2. 6-7c. 7d-9 (R/. 7d. 8a)
R/. Entzungo ahal dozue gaur Jaunaren ahotsa:
«Ez gogortu zeuen bihotza».
V/. Zatoze, dagiogun poz-oihu Jaunari,
poz-irrintzi,
salbatzen gaituan harriari.
Aurkeztu
gakiozan eskerrak emonez,
dagiogun
jai txaloka eta kantari. R/.
V/. Zatoze, gurtu daigun ahuspezturik,
belaunikatu
gaitezan egin gaituan Jaunaren aurrean.
Bera
da-eta gure Jainkoa,
eta
gu harek larraturiko herria,
haren
zainpeko artaldea. R/.
V/. Entzungo ahal dozue gaur haren ahotsa:
«Ez
gogortu bihotza Meriban lez,
Masako
egunean basamortuan lez,
tentatu
egin ninduen-eta zuen gurasoek,
probatu,
Nik eginak ikusi arren». R/.
II. urtean
I. Irakurgaia
Itun barria
egingo dot
eta hareen
pekaturik ez dot gehiago gogoan izango.
Jeremias Profetaren liburutik
Jr 31, 31-34
Hauxe dino Jaunak: «Hara, badator Israel
herriagaz eta Juda herriagaz itun barria egingo dodan sasoia. Ez da izango
Egiptotik ataratzeko eskutik hartu nituanean hareen asabekin egin nebana lakoa,
hareek hausi egin eben-eta nire ituna, Ni hareen nagusia izan arren, dino
Jaunak.
Hona hemen etorkizunean Israelegaz egingo
dodan ituna, dino Jaunak: Barruan ezarriko deutset neure legea eta bihotzean
idatziko. Ni hareen Jainko izango naz, eta hareek nire herri izango dira.
Ez dabe alkarri irakatsi beharrik izango,
"Ezagutu Jauna" esanez, danek, txiki nahiz handi, ezagutuko nabe-eta,
dino Jaunak; parkatu egiten deutset-eta gaiztakeria, eta hareen pekaturik ez
dot gehiago gogoan izango».
Jaunak esana.
Erantzun salmoa
Sal 51 [50], 12-13. 14-15. 18-19 (R/. ik. 12a)
R/. Bihotz garbia, Jainko, sortu egizu nigan.
V/. Ene Jainko, sortu bihotz garbia nigan,
barritu
arnasa sendoa nire barruan.
Ez
nagizu bota zeure aurretik,
ez
kendu niri zeure arnasa santua. R/.
V/. Poztu nagizu barriro zeure salbazinoaz,
sendotu
nagizu zeure arnasa oparoaz.
Erakutsiko
deutsedaz gaiztoei zure bideak,
eta
Zugana bihurtuko dira pekatariak. R/.
V/. Sakrifizioak ez dozuz atsegin;
erre-oparia
eskeiniko baneutsu, ez zeunke onartuko.
Damuz
hausiriko espiritua da
Jainkoak
nahi dauan sakrifizioa;
Zuk
ez dozu gitxiesten, ene Jainko,
bihotz
hausia eta umildua. R/.
I. eta II. urteetan
Aleluia
Mt 16, 18
R/. Aleluia.
V/. Zu Pedro hatxa, harria;
hatx
horren gainean eraikiko dot Nik neure Eleizea,
eta
Heriotzaren indarrak ez jakoz nagusituko. R/.
Ebanjelioa
Zu Pedro zara,
hatxa;
zeruetako
erreinuko giltzak emongo deutsudaz.
✠ Jesu Kristoren Ebanjelioa San Mateoren liburutik
Mt 16, 13-23
Aldi haretan, Jesusek, Filiporen Zesareara
heldu zanean, itaun hau egin eutsen ikasleei: «Gizonaren Semea nor dala dino
jenteak?» Hareek erantzun: «Batzuek Joan
Bateatzailea dala; beste batzuek Elias; besteek Jeremias edo profetaren bat».
Jesusek, orduan: «Eta zuek, nor nazala
dinozue?» Simon Pedrok erantzun eban: «Zu Mesias zara, Jainko biziaren Semea».
Orduan, Jesusek esan eutson: «Zorionekoa zu,
Simon, Jonasen semea, hori ez deutsulako hazur-maminezko inork agertu, zeruko
nire Aitak baino. Eta hauxe dinotsut Nik: Zu Pedro zara –hatxa–; hatx horren
gainean eregiko dot Nik neure Eleiza, eta Herioaren indarrak ez jakoz
nagusituko. Zeruetako erreinuko giltzak emongo deutsudaz: zuk mundu honetan
lotua, zeruan be loturik geldituko da, eta zuk mundu honetan askatua, zeruan be
askatua».
Orduan, bera Mesias zala inori ez esateko
agindu eutsen Jesusek ikasleei.
Une haretatik hasi zan Jesus ikasleei
azaltzen beharrezko zala berak Jerusalemera igotzea, eta han asko sufridu
beharra ebala abadeburuen eta lege-maisuen aldetik; hil egingo ebela eta hiru
egunen buruan biztuko zala. Orduan, Pedro, Jesus aparte harturik, gogor egiten
hasi jakon: «Ezelan be ez, Jauna! Ez jatzu holakorik gertatuko!»
Baina Jesusek, bihurturik, esan eutson
Pedrori: «Alde nire ondotik, Satanas! Oztopo zara Niretzat, ze zure asmoak ez
dira Jainkoarenak, gizakiarenak baino».
Jaunak esana.
Urtean Zeharreko XVIII. barikua
I. urtean
I. Irakurgaia
Zure asabak
maite izan ebazan,
eta hareen
ondorengoak aukeratu.
Deuteronomioa liburutik
Dt 4, 32-40
Honan berba egin eutson Moisesek herriari:
«Itaundu antxinako sasoiei, zu baino lehenago izandakoei, Jaunak gizakia
munduan sortu ebanetik hasita; itaundu ea inoiz holakorik jazo edo entzun izan
dan munduaren ertz batetik besteraino. Ba ete da herririk, zuk lez Jainkoa
suaren erditik berbetan entzun eta bizirik gelditu danik? Izan ete da inoiz
jainkorik, herri bat beste herri baten menpetik atara eta beretzat hartzen
ahalegindu danik? Ba, horixe egin eban Jaunak, zuen Jainkoak, zuen begi-bistan
Egipton: ezaugarri, mirari eta egintza harrigarriz, burrukaren bidez, ahalmen
handiz, esku indartsuz eta ikarea zabalduz askatu zinduezan. Jauna dala Jainkoa
jakin dagizun ikusiarazo jatzu hori guztia, eta ez dala ha besterik.
Bere ahotsa entzunarazo eutsun zerutik zeure
irakaspenerako, eta lurrean bere su handia erakutsi eutsun, eta suaren erditik
harek esandako hitzak entzun zenduzan. Zure asabak maite izan ebazalako eta
hareen ondorengoak aukeratu ebazalako atara zaitu Egiptotik ahalmen handiz; zu
baino herri handiagoak eta ahaltsuagoak bota ditu, zu hareen lurraldean
sartuarazoteko eta hareen lurraldea zuri ondare emoteko, gaur jazotzen dan lez.
Autortu, beraz, gaur, eta izan beti gogoan
Jauna dala Jainkoa, goian zeruan eta behean lurrean; ez da besterik. Bete gaur
emoten deutsudazan legeak eta aginduak, zoriontsu izan zaitezen zu eta zure
ondorengo seme-alabak, eta luzaro bizi, Jaunak, zure Jainkoak, betiko emongo
deutsun lurraldean».
Jaunak esana.
Erantzun salmoa
Sal 77 [76], 12-13. 14-15. 16 eta 21 (R/. 12a)
R/. Gogoan ditut, Jauna, zure egintza handiak.
V/. Gogoan ditut, Jauna, zure egintza handiak,
gogoan,
bai, aspaldiko zure mirariak.
Buruan
darabildaz Zuk egindako guztiak,
hausnartzen
ditut zure egintza handiak. R/.
V/. Santua da, oi Jainko, zure jarduera!
Zein
jainko Zu baizen handi?
Zeu
zara Jainko mirarigile bakarra,
Zeuk
erakutsi deutsezu herriei zeure indarra. R/.
V/. Zeure beso ahaltsuaz askatu zenduan herria,
Jakoben
eta Joseren ondorengoak.
Artaldea
lez eroan zenduan zeure herria
Moisesen
eta Aaronen eskutik. R/.
II. urtean
I. Irakurgaia
Zoritxarrekoa zu, Ninibe, uri odolzale hori.
Nahumen Profezia liburutik
Na 2, 1. 3; 3, 1-3. 6-7
Hara, badator mendiz mendi
bakearen
barria dakarren albistaria.
Ospatu
zeure jaiak, Juda, bete zeure agintzariak.
Gaizkilea
ez da gehiago zugana etorriko,
zeharo
ezereztua gelditu da-eta.
Jaunak
barriro jasotzen dau
Jakoben
herriaren handitasuna, Israelen ospea;
mahastia
lez narrutu eben harrapariek,
mahats-aihenak
hondatuz.
Zoritxarrekoa
zu, Ninibe, uri odolzale hori,
maltzurkeriaz
eta indarkeriaz betea,
beti
harrapakin bila zabiltzana!
Entzun
zigor-zartadak, gurpilen zarata-hotsa,
zaldien
zalaparta, gudu-gurdien trinki-tranka!
Zaldizkoen
erasoa, ezpaten distira, lantzen tximistak!
Zaurituak
piloka, hildakoak metaka, hilotzak ezin konta ahala!
Hilotzetan
estropezu egiten da.
Zikinez
estalduko zaitut,
eta
irainez beteko, danen begi aurrean.
Ikusiko
zaituen guztiak aldendu egingo jatzuz, esanez:
«Birrinduta
gelditu da Ninibe; nor errukituko jako?
Non
aurkituko, kontsolatuko dauanik?»
Jaunak esana.
Erantzun salmoa
Dt 32, 35c-36b. 39abcd. 41 (R/. 39c)
R/. Neuk dot heriotza eta bizia emoten.
V/. Hurrean da hareen hondamen-eguna,
laster
dator hareentzat prestaturik dagoana.
Defendatuko
dau-eta Jaunak bere herria,
errukituko
da bere zerbitzariez. R/.
V/. Baina orain begira: Neu naz, Neu bakarrik,
ez
da Ni beste jainkorik.
Neuk
dot heriotza eta bizia emoten,
Neuk
dot zauritzen eta Neuk osatzen. R/.
V/. Nire ezpata distiratsua zorroztu
eta
justizia egiteari ekingo deutsadanean,
mendekua
hartuko dot neure arerioen aurka
eta
euren merezia emongo gorroto nabenei. R/.
I. eta II. urteetan
Aleluia
Mt 5, 10
R/. Aleluia.
V/. Zorionekoak zuzentasunagaitik erasoa jasaten
dabenak,
eurena
dabe-eta Jainkoaren erreinua. R/.
Ebanjelioa
Zer emon leike gizakiak barriro bizia eskuratzeko?
✠ Jesu Kristoren Ebanjelioa San Mateoren liburutik
Mt 16, 24-28
Aldi haretan, Jesusek esan eutsen ikasleei:
«Nire ondoren etorri nahi dauanak uko egin deiola bere buruari, hartu begi bere
kurutzea eta jarraitu beist. Izan be, bere bizia gorde gura dauanak galdu
egingo dau; bere bizia Nigaitik galtzen dauanak, ostera, eskuratu egingo dau.
Zertarako dau gizakiak mundu guztia
irabaztea, bere bizia galtzen badau? Eta zer emon leike gizakiak bizia barriro
eskuratzeko? Izan be, Gizonaren Semea bere Aitaren aintzaz beterik etorriko da
aingeruakaz eta orduan bakotxari bere jokabidearen arabera ordainduko deutso».
Egia dinotsuet: hemen diranetariko batzuk ez dira hilko, harik eta Gizonaren
Semea errege bezala etortzen ikusi arte».
Jaunak esana.
IRUZKINA
Bizitza, haragizko eta aldi baterako bizitza lez baino ulertzen ez badogu, inondik inora ere ezin izango dogu onartu, ez-eta ulertu ere, Jesusek dinoskuna.
Daukagun haragizko eta aldiko bizitza hau (bizitza biologikoa) zaintzea dagokigu eta garatzea. Baina bizitza biologiko honetatik harago ere joan geintekez, eta onartu Jainkoak bere bizitza partekatzen dauala gugaz. Honi sakoneko edo espirituzko bizitza deritxagu.
Hauxe da Jesusek bizi dauana, eta bizi izaten ahalegintzen dana eta elikatzen dauana Aitagazko hartu-emon luzeetan. Honen beharra dauka, barru-bizitza hori, Jainko-bizitza hori, garatu ahal izateko.
Zenbateraino dan haragizkoa baino garrantzizkoagoa bizitza hau, haragizkoa galtzeari ez deutso-eta garrantzirik emongo.
Edo bai: bizitza biologikoa besteekaz partekatzean galtzen dana da; besteak bizi izan daitezan emoten doguna da. Eta hauxe da Jesusi jarraitzean ikasten eta gauzatzen doguna.
Holan emoten, galtzen dan bizitza, Jainkoaren nahia egiten ereiten dan bizitza da. Eta hau frutu-emoilea da.
Urtean Zeharreko XVIII. zapatua
I. urtean
I. Irakurgaia
Maitatu egizu Jauna bihotz-bihotzez.
Deuteronomioa liburutik
Dt 6, 4-13
Moisesek honan berba egin eutson herriari:
«Entzun, Israel: Jauna gure Jainkoa Jaun bakarra da. Maitatu egizu Jauna zeure
Jainkoa bihotz-bihotzez, gogo osoz eta indar guztiz.
Izan beti gogoan gaur esaten deutsudazan
hitz honeek. Irakatsi behin eta barriro zeure seme-alabei, eta hitz egin
horreetaz etxean zagozala nahiz bidean zoazala, oheratzean nahiz jagitzean.
Lotu egizuz seinale lez eskumuturrean eta oroigarri lez bekokian, eta idatzi
etxeko ate-alboetan eta uriko sarreran.
Jaunak, zeure Jainkoak, zure asaba Abrahami,
Isaaki eta Jakobi zin eginez zuri emongo eutsula agindutako lurraldean
sartuarazoko zaitu. Han, zuk eraiki bako uri handi ederrak aurkituko dozuz, zuk
batu bako era guztietako ondasunez betetako etxeak, zuk zulatu bako ur-putzuak,
zuk landatu bako mahastiak eta olibadiak. Asetzeraino jan ahal izango dozu.
Orduan, kontuz! Ez ahaztu Jaunaz, Egiptotik, esklabotzatik, atara zaituanaz.
Begirune izango deutsazu Jaunari, zeure Jainkoari, bera bakarrik gurtuko dozu
eta beraren izenean zin egingo».
Jaunak esana.
Erantzun salmoa
Sal 18 [17], 2-3b. 3c-4. 47 eta 51ab (R/. 2)
R/. Maite zaitut, Jauna, nire indar!
V/. Maite zaitut, Jauna, neure indar!
Jauna
da nire hatx, nire gaztelu,
bera
nire askatzaile. R/.
V/. Ene Jainko, nire harri babesgarri,
nire
babeski eta salbazino-indar,
nire
gordeleku goresgarri.
Dei
egin neutsan Jaunari,
eta
salbatu ninduan arerioakandik. R/.
V/. Gora Jauna! Bedeinkatua nire harkaitza!
Goratua
nire Jainko salbatzailea,
garaipen
handiak emon deutsoz erregeari,
maitasuna
agertu deutso bere igurtzitakoari. R/.
II. urtean
I. Irakurgaia
Zintzoa bere leialtasunari esker biziko da.
Habakuken Profezia liburutik
Hab 1, 12–2, 4
Ez zara Zu, Jauna, betidanik nire Jainkoa,
nire santua?
Zu
ez zara hiltzen!
Jauna,
nire harkaitza,
Zeuk
ezarri dozuz babiloniarrak zeure epaia betetzeko;
Zeuk
emon deutsezu indarra gu zigortzeko.
Garbiegiak
dozuz begiak gaiztakeriari begira egoteko,
jasanezina
dozu zapalketa.
Zelan
zagoz, bada, maltzur horreei begira?
Zelan
isilik, gaiztoak bera baino zuzenagoa
irunsten
dauan bitartean?
Itsasoko
arrain edo nagusirik bako narrasti balira lez
darabilzuz
gizakiak.
Zelan
amuak arraina,
halan
dabe babiloniarrek harrapatzen jentea:
sareetara
erakarri eta batzen dabez,
eta
jai egiten dabe pozez saltoka.
Sakrifizioak
eskeintzen deutsoez sareari
eta
intsentsua erretzen,
janari
gozoa eta oparoa emon deutsela-ta.
Eten
barik sarea hustutzen,
herriak
erruki barik hiltzen jarraituko ete dau?
Neure
talaian egongo naz, neure torrean zutunik,
Jaunak
zer esango deustan zain,
nire
kexari zer erantzungo deutson.
Orduan, Jaunak erantzun eustan:
«Idatzi
egizu agertuko deutsudana,
ezarri
taulatxuetan, erraz irakurtzeko eran.
Ikuskari
hau ez da beteko epea burutu arte,
baina
badoa helbururantz, ez dau huts egingo;
luzatzen
bada, zuk itxaron, berandu barik helduko da-eta.
Harroak
ez dau bakerik bere barruan;
zintzoa,
ostera, bere leialtasunari esker biziko da».
Jaunak esana.
Erantzun salmoa
Sal 9, 8-9. 10-11. 12-13 (R/. 11b)
R/. Ez dozu, Jauna, eskutik izten zure bila dabilenik.
V/. Jauna errege da betiko,
ezarri
dau aulkia auzirako;
justiziaz
gobernatzen dau mundua,
zuzenbidez
epaitzen herriak. R/.
V/. Jauna dau ihesleku zapalduak,
ihesleku
larrialdian.
Zugan
dabe konfiantza zure izena autortzen dabenek,
ez
dozu-eta, Jauna, eskutik izten zure bila dabilenik. R/.
V/. Egin kantu Jaunari, Sionen errege danari,
iragarri
herrien artean haren egintza bikainak.
Hiltzailea
zigorrik barik izten ez dauanak
gogoan
ditu dohakabeak,
ez
dau ahazten hareen deadarra. R/.
I. eta II. urteetan
Aleluia
2 Tm 1, 10b
R/. Aleluia.
V/. Kristo Jesus gure salbatzaileak heriotza
ezereztu dau
eta
bizia argitu Barri Onaren bidez. R/.
Ebanjelioa
Sinismena
bazendue,
ez litzateke
zuentzat ezinezkorik izango.
✠ Jesu Kristoren Ebanjelioa San Mateoren liburutik
Mt 17, 14-20
Aldi haretan, gizon bat hurreratu jakon
Jesusi eta, belaunikaturik, esan eutson: «Jauna, erruki zakioz nire semeari;
epilepsia emoten deutson deabrua dau eta gorriak ikusiazoten deutsoz. Sarritan
botatzen dau sutara eta uretara. Ekarri deutset zure ikasleei, baina ezin izan
dabe osatu».
Jesusek esan eutsen: «Hau gizaldi sinisgogor
eta makurra! Noiz arte egon behar ete dot zuekin? Noiz arte jasan behar ete
zaituet? Ekarri mutila hona».
Jesusek gogor eraso eutson deabruari eta
urten egin eban mutilagandik; ordu haretatik osatuta gelditu zan.
Ikasleek, Jesusengana hurreraturik,
bakarrean itaundu eutsoen: «Eta guk, zergaitik ezin izan dogu bota deabrua?» Jesusek
erantzun eutsen: «Zuen sinismena txikia dalako. Egia dinotsuet: sinismena
bazendue, mostaza-hazia baizen txikia izanik be, mendiari “aldatu hemendik
hara” esan ezkero, aldatu egingo litzateke; ez litzateke zuentzat ezinezkorik
izango».
Jaunak esana.
IRUZKINA
Jesusen bizikerea ez da zatikakoa, oso-osokoa baino. Jesusentzat ez dira kanpoko arerioak gizakia zirikatzen eta menpean hartzen dabenak; ez dira Jainkoak bialtzen dauzan zigorkadak ere. Norberagan ikusik behar dira mugak eta zinak, eta halantxe autortu. Hauxe litzateke oso-osoko pertsona lez bizi izatea.
Holan bizi dana bildurretatik askatua bizi da; ez dau parte txarreko indarrek menpean hartzen.
Baina holan bizi dan eta agertzen dan Jesus ez dabe ikusten bere ikasleek eurek ere. Hori ez da Jesusek baino ez daukan ezkutuko indar bat, beste arerioak menpean hartu ahal izateko hareena baino indar handiagoa. Ez da kanpotiko indarra.
Eta kexu da Jesus bere hurkoenek ere ez diralako gauza holan ikusteko. Eta sinismen txikiko deitzen deutse.
Hau ere (sinismena) ez da Jainkoaren ahalmena norberetzeko bidea, ezelango bildur barik, harengan uste on osoa jarrita, bizi izateko ahal mena baino.
Ikasiko ete dogu azaleko gauzak eta irudiak eta ulerkera baztertzen eta, Jesusen antzera, Jainkoagazko hartu-emonetatik bizi iaten?
