VIII. Astea

Urtean Zeharreko VIII. astelehena

I. urtean

I. Irakurgaia

Etorri barriro Goi-goikoagana
eta alboratu bidebakokeriatik.

Siraken liburutik

Si 17, 20-28 (gr. 24-29)

    Damu diranei bihotz-barritzeko aukera emoten deutse Jaunak,
eta adorea galduta dagozanak indarbarritzen.
Bihurtu, bada, Jaunagana, eta itzi pekatua,
egin otoitz haren aurrean eta itzi pekaturako bideak.
Etorri barriro Goi-goikoagana eta alboratu bidebakokeriatik,
gorrotatu bene-benetan Jaunari iraingarri jakona.

Nork goratuko dau Goi-goikoa Hilen Egoitzan?
Bizi diranek bakarrik emon leikioe aintza.
Gizakia hil eta izateari iztean, amaitu da gorespena!
Bizirik eta osasuntsu dagoanak goratu leike Jauna.
Bai handiak dirala Jaunaren errukia eta parkamena,
harengana bihurtzen diranentzat!

Jaunak esana.

 

Erantzun salmoa

Sal 32 [31], 1-2. 5. 6-7 (R/. 11a)

R/.   Poztu eta alaitu Jaunagan, zintzook.

V/.   Zorionekoa hobena kendu
eta pekatua parkatu deutsoena.
Zorionekoa Jaunak errurik aurkitzen ez deutsana,
barruan maltzurkeriarik ez dauana. R/.

V/.   Orduan, autortu neutsun neure pekatua,
neure errua ez neutsun ezkutatu.
Esan neban: «Autortuko deutsat Jaunari neure hobena»,
eta Zuk parkatu zeunstan neure pekatuaren errua. R/.

V/.   Horregaitik, otoitz egin deizula fededunak
larrialdian aurkitzean;
uriolak erasota be, ez dau harrapatuko.
Zeu zaitut babesleku, arriskutik libratzen nozu,
askapen-kantuz inguratzen. R/.

 

II. urtean

I. Irakurgaia

Maite dozue Jesu Kristo, ikusi ez badozue be;
eta, harengan sinisten dozuela,
esan ezin ahalako pozez alaitzen zarie.

San Pedro Apostoluaren lehenengo epistolatik

1 P 1, 3-9

    Bedeinkatua Jainkoa, Jesu Kristo gure Jaunaren Aita! Bere erruki handiaz itxaropen bizira sortu gaitu barriro, Jesu Kristo hilen artetik biztuz. Holan, hondatu, zikindu edota zimeldu ez leiteken ondarea itxaroten dogu, zuentzat zeruetan gordea dagoana. Jainkoaren indarrak zaintzen zaitue sinismenari esker, azken sasoian agertuko dan salbazinoa lortu dagizuen.
    Horregaitik, pozik zagoze, nahiz eta oraindino alditxu batez probaldi batzuk sufridu behar izango dozuezan. Holan, zuen sinismenak bere jatortasuna erakutsiko dau, galkorra izan arren sutan garbitzen dan urrea lez; eta urrea baino askoz baliotsuagoa dan zuen sinismenak gorespena, aintza eta ohorea lortuko dau, Jesu Kristo agertuko danean.
    Maite dozue Jesu Kristo, ikusi ez badozue be. Eta ikusi barik harengan sinisten dozuela, ezin esan ahalako pozez, poz distiratsuz, alaitzen zarie eta zeuen sinismenaren helburua, zeuen salbazinoa, lortzen dozue.

Jaunak esana.

 

Erantzun salmoa

Sal 111 [110], 1-2. 5-6. 9 eta10c (R/. 5b)

R/.   Gogoan dau beti Jaunak bere ituna.

        Edo: Aleluia.

V/.   Bihotz-bihotzez emoten deutsadaz eskerrak Jaunari,
zintzoekin batera batzarrean alkarturik.
Jaunak eginak handi dira,
gogoko dabezan guztientzat aztergai. R/.

V/.   Begirune deutsoenei janaria emon deutse,
gogoan dau beti bere ituna.
Egintzetan agertu deutsa bere indarra herriari,
beste nazinoen lurraldeak emonez berari. R/.

V/.   Askatasuna emon deutsa bere herriari,
betiko ezarri dau bere ituna,
santua eta bildurgarria da haren izena.
Betiko dirau Jaunaren gorespenak. R/.

 

I. eta II. urteetan

Aleluia

2 Ko 8, 9

R/.   Aleluia.

V/.   Jesu Kristo, aberats izanik, behartsu egin zan,
        bere behartsu izateaz zuek aberats egiteko. R/.

 

Ebanjelioa

Saldu daukazun guztia, eta jarraitu Niri.

✠ Jesu Kristoren Ebanjelioa San Markosen liburutik

Mk 10, 17-27

    Aldi haretan, Jesus abiatzera joiala, gizon bat etorri jakon lasterka eta, aurrean belaunikaturik, itaundu eutson: «Maisu ona, zer egin behar dot betiko bizitza ondaretzat jasotzeko?»
    Jesusek erantzun eutson: «Zergaitik dinostazu ona? Inor ez da ona, Jainkoa besterik. Badakizuz aginduak: ez hil inor, ez egin adulteriorik, ez ostu, ez egin guzurrezko testigantzarik, ez egin kalterik, hartu aintzat aita-amak». Harek, orduan: «Maisu, gazte-gaztetarik bete izan dot hori guztia».
    Jesus begira jarri jakon maitasunez, eta esan: «Gauza bat besterik ez jatzu falta: zoaz, saldu daukazun guztia eta emon behartsuei, eta altxorra izango dozu zeruan; gero, zatoz eta jarraitu Neuri». Berba honeek entzutean, ilun jarri zan gizona eta atsekabez joan, ondasun handien jabe zan-eta.
    Orduan, Jesusek, ingurura begiratuz, esan eutsen ikasleei: «Bai nekez sartuko dirala aberatsak Jainkoaren erreinuan!» Harrituta laga zituan ikasleak esaldi honek. Baina Jesusek barriro be:
    «Ene semeok eneok, gatxa da benetan Jainkoaren erreinuan sartzea! Jostorratzaren begitik ganbelua igarotzea errezago, aberatsa Jainkoaren erreinuan sartzea baino».
    Ikasleek, gero eta harrituago, alkarri inotsen: «Nor salbatu leiteke, orduan?» Jesusek begira-begira jarri eta esan eutsen: «Gizakiarentzat ezinezko da, baina Jainkoarentzat ez, ze, dana egin leike Jainkoak».

Jaunak esana.

 

IRUZKINA

Zelango zapladea hartzen dogun ebanjelio-zati honetan agertzen jakun Jesusengandik!

Lehenengo ta behin, gure uste ona (konfiantza) zertan daukagun oinarrituta edo ezarrita salatzen deusku. Bizi izateko, beharrezkoa dogula dirua uste dogu; eta ha daukagunean, gure burua ziurtasunean aurkitzen dogu. Ha barik, galduta lez gabilz.

Eta Jainkoagazko hartu-emonetan, zeruan sartzeko, gure egite onak eta betekizunak doguz ziurtasuna emoten deuskuenak.

Zer erakusten dau horrek? Jainkoagan barik geure egiteetan dogula ustea.

Jesusen gomendioa: laga dana bertan behera; gero, zatoz eta jarritu neuri.

Ikasleen harridureak salatzen gaitu gu. Hareek ere ezin dabe ulertu aberatsei ezer ezinezko egiten jakenik. Eta gero eta harrituago dagoz Jesusen baieztapenez.

Geuri ere horrenbeste jazoten jaku, hain gagoz eginak betekizunak eta zereginak doguzala lagun uste izatera.

Eta ez! Gure egintza on guztiek ere ezin daikee zerua erosi. Ulertuko bagendu Erreinua doakoa dala, erregalua, onartzekoa eta iragartekoa, eta halantxe hartzen dala atsegina eta poza!...

 

Urtean Zeharreko VIII. martitzena

I. urtean

I. Irakurgaia

Aginduetara makurtzea opari salbagarria da.

Siraken liburutik

Si 35, 1-15 (gr. 1-12)

    Legea betetzen dauanak opari ugari eskeintzen dau,
aginduetara makurtzea opari salbagarria da.
Inori mesede egitea urun garbia oparitan emotea da,
eta limosna egitea gorespen-oparia eskeintzea.
Txarretik urruntzea atsegin jako Jaunari,
bidebakokeriatik ihes egitea benetako parkamen-oparia da.

Ez agertu Jaunaren aurrean esku hutsik,
legearen agindu dira-eta opari honeek guztiak.
Zintzoaren opariak altarea ohoratzen dau,
haren lurrun gozoak Goi-goikoaganaino igoten dau.
Zintzoaren oparia atsegin jako Jaunari,
haren oroigarria Jaunak ez dau ahaztuko.
Goratu egizu Jauna eskuzabalez,
eta ez izan zeken zeure uztaren lehen-frutuak emoten.
Egin zeure eskeintzak aurpegi alaiz,
eskeini pozik zeure hamarrenak.

Emon Goi-goikoari berak emondakoaren arabera,
emon eskuzabal zeure baliabideen neurrian,
ordainduko deutsu-eta, askoz gehiago ordaindu be.
Ez ibili zeure opariez Jauna erosi nahian,
ez deutsu-eta onartuko.
Ez oinarritu bidebakokeriazko oparietan;
epailea da Jauna,
eta ez dau harengan eraginik inoren izenak.

Jaunak esana.

 

Erantzun salmoa

Sal 50 [49], 5-6. 7-8. 14 eta 23 (R/. ik. 23b)

R/.   Zuzen dabilenari deutsat
        Jainkoaren salbamena erakusten.

V/.   Batu egizuz nire fededunak,
sakrifizioa eskeiniz nigaz ituna egin ebenak.
Iragarri begi zeruak haren justizia,
Jainkoa bera da epaile. R/.

V/.   Entzun, Israel, ene herri,
zure aurka egingo dodan autorpena.
Neu naz Jainkoa, zure Jainkoa!
Ez zaitut salatzen zeure sakrifizioakaitik;
zure erre-opariak aurrean ditut beti. R/.

V/.   Eskeini esker onezko oparia Jainkoari,
bete zeuk agindutakoak Goi-goikoari.
Esker onezko oparia eskeintzen deustanak,
horrek emoten deust aintza,
onbideratzen danari
erakutsiko deutsat neure salbazinoa. R/.

 

II. urtean

I. Irakurgaia

Jainkoak zuentzat prestaturiko dohaiaz berba egin eben profetek;
izan neurritsu eta itxaropentsu.

San Pedro Apostoluaren lehenengo epistolatik

1 P 1, 10-16

    Senide maiteok: Profetek, Jainkoak zuentzat prestaturiko dohaiaz berba egin ebenean, salbazinoa eben gogoan eta hau aztertzen ahalegindu ziran. Eurekin eben Kristoren Espirituak aldez aurretik adierazo eutsezan Mesiasen sufrimentuak eta ondorengo aintza, eta hori guztia noiz eta zelan jazoko zan aztertu eben. Jainkoak agertu eutsen, egiten eben profezia lana ez ebela eurentzat egiten, zuentzat baino. Eta hareek adierazoa, zerutik bialdutako Espiritu Santuaren eraginez, Barri Ona dei egiten deutsueenek iragartzen deutsuee orain. Aingeruak eurak be gauza horreek ikusteko gogo biziz dagoz.
    Horregaitik, prestatu zeuen gogoa zerbitzurako eta izan neurritsu. Jarri egizue zeuen itxaropen osoa Jesu Kristoren agerpenak ekarriko deutsuen dohaiean. Esaneko seme-alabei dagokienez, ez jarraitu ezjakinean bizi zinien sasoiko grina txarrei. Ostera, dei egin deutsuen Jainkoa santua dan lez, izan zuek be santu zeuen jokabide guztietan, honan dino-eta Liburu Santuak: «Izan santu, Ni santua naz-eta».

Jaunak esana.

 

Erantzun salmoa

Sal 98 [97], 1. 2-3b. 3c-4 (R/. 2a)

R/.   Bere garaipena ezagutuazo dau Jaunak.

V/.   Kanta Jaunari kantu barria,
egintza harrigarriak egin ditu-eta;
garaipena emon deutsa bere eskumak,
bere beso santuak. R/.

V/.   Bere garaipena ezagutuazo dau Jaunak,
bere salbazino-egintza agertu nazinoen aurrean.
Ez da ahaztu bere maitasunaz,
Israel herriari deutsan leialtasunaz. R/.

V/.   Munduko bazter guztiek ikusi dabe
gure Jainkoaren garaipena.
Egin irrintzi Jaunari, lur osoa,
egin poz-oihu eta kantu, jo soinua. R/.

 

I. eta II. urteetan

Aleluia

Ik. Mt 11, 25

R/.   Aleluia.

V/.   Bedeinkatua Zu, Aita, zeru-lurren Jauna,
        erreinuari buruzko Barri Ona
        jente xumeari agertu deutsazulako. R/.

 

Ebanjelioa

Mundu honetan, ehun halako hartuko dozue erasoaldiekin batera;
datorren munduan, betiko bizia.

✠ Jesu Kristoren Ebanjelioa San Markosen liburutik

Mk 10, 28-31

    Aldi haretan, Pedrok esan eutson Jesusi: «Hara, guk dan-dana itzi dogu, Zeuri jarraitzeko».
Jesusek erantzun: «Benetan dinotsuet: Nigaitik eta Barri Onagatik etxea, senideak, ama, aita, seme-alabak eta lurrak izten dituanak, orain, mundu honetan, ehun halako hartuko dau: etxe, senide, ama, seme-alaba eta lur, erasoaldiakaz batera; eta gero, datorren munduan, betiko bizitza.
    Orain lehenengo diran asko azkeneko izango dira, eta orain azkeneko diranak lehenengo».

Jaunak esana.

 

IRUZKINA

     Ez dot uste Jesusek sariren baten atzetik ebilela erakutsiko ebanik. Zertara dator, orduan, Pedroren kezkea? Arterago gauza bat daukazu oraindino egiteko: saldu daukazun guztia, emon behartsuei eta gero jarraitu niri esan eutsolako bati, bere (eta lagunen) egoereaz kezkatuta ete dago, ba?

     Zenbat dagozan geure artean ere holan: zerura joatearren, arima salbatzearren, edo infernua saihestearren, edo Jainkoaren laguntza eskuratzearren…

     Jesusek beste ikuspegi bat agertzen dau: uste on osoa dauala Aitagan, eta, uste horretan bizi izanez, ez dauala ezelango beharrizanik. Aberastasunek, edo aginteak, edo jakintzak edo ondasunek… ez deutsoela ezelan ere ezer sakonekorik ziurtatzen. Azalkeriek ez dabe nortasuna apaintzen edo aberasten. Alderantziz: lotu eta morroi bihurtu leikee bat, eta baita besteak lotzera edo morroi bihurtzera bultzatu ere.

     Jesusek Jainkoaren Seme izateko aukerea egin dau. Librea da. Ohikeria eta ziurkeria guztien gainetik dago. Horregaitik agertu leikie behartsuei, baztertuei, emakumeei eta pekatariei Jainkoaren errukia eta maitasuna.

 

 

Urtean Zeharreko VIII. eguaztena

I. urtean

I. Irakurgaia

Autortu dagiela nazino guztiek, Jauna,
ez dagoala Zu beste Jainkorik.

Siraken liburutik

Si 36, 1-2a. 5-6. 13-l9 (gr. 1. 4-5a. 10-17)

    Erruki gutaz, Jauna, mundu osoaren Jainkoa,
zabaldu nazino guztietara Zeuganako begirunea.
Autortu dagiela, guk autortzen dogun lez,
ez dagoala, Jauna, Zu beste Jainkorik.
Barriztatu egizuz mirariak, errepikatu egintza harrigarriak.
Batu egizuz Jakoben leinu guztiak,
egizuz lurraldearen jaube, hasieran lez.

Erruki, Jauna, zure izena daroan Israel herriaz,
zeure lehen-semetzat hartu dozunaz.
Izan erruki Jerusalem zeure uri santuaz,
zeure atsedenleku egin dozunaz.
Bete Sion mendia zeure gorespenaz
eta tenplua zeure ospeaz.

Agertu zaitez hasieratik aukeratutako herriaren alde,
bete zeure izenean egindako profeziak.
mon saria Zugan itxaron dabenei,
eta izan beitez sinisgarri zure profetak.
Entzun, Jauna, zure zerbitzarion eskaria,
zeure herriagazko dozun onginahiaren arabera;
munduan diran guztiek autortu dagiela
Zeu zarala Jauna betiko Jainkoa.

Jaunak esana.

 

Erantzun salmoa

al 79 [78], 8. 9. 11 eta 13 (R/. ik. Si 36, 1b)

R/.   Erakutsi guri, Jauna, zeure errukiaren argia.

V/.   Ez leporatu guri geure aurrekoen erruak!
Betorkigu laster zure errukia,
Guztiz lur jota gagoz-eta. R/.

V/.   Lagundu eiguzu, gure Jainko salbatzaile horrek,
zeure izenari ohore eginez;
libratu gagizuz eta parkatu gure pekatuak
zeure izenaren ohoreagaitik. R/.

V/.   Heldu bedi Zuganaino presoen aienea,
libratu zeure indar handiaz heriotzara kondenatuak.
Eta guk, zure herri honek, Zuk larraturiko artalde honek,
eskerrak emongo deutsuguz beti,
zure gorespena zabalduko dogu gizaldiz gizaldi. R/.

 

II. urtean

I. Irakurgaia

Bildots garbi eta akats barik dan Kristoren odol baliotsuaz
izan zarie askatuak.

San Pedro Apostoluaren lehenengo epistolatik

1 P 1, 18-25

    Senide maiteok: Badakizue zeuen gurasoengandik hartutako biziera zentzunbakotik askatuak izan zariela, ez gauza ustelkorrez, urrez nahiz zidarrez, bildots garbi eta akats barik lez zuen alde bere burua eskeini dauan Kristoren odol baliotsuaz baino. Mundua mundu izan aurretik egoan Kristo Jainkoaren asmoan eta azken sasoi honeetan agertu da zuen onerako. Eta zuek haren bidez sinisten dozue hilen artetik biztu eta aintzaz bete eban Jainkoagan; holan, zeuen sinismena eta itxaropena Jainkoagan jarri dozue.
    Orain zuek, egiaren mezuari obedituz, zeuen barrua garbitu dozue, senide lez alkar benetan maitatzeko. Maitatu egizue, bada, alkar bihotzez eta gartsu; izan be, barriro jaio zarie, eta ez hazi hilkorretik, hilezkorretik baino, bizia dan eta betiko dirauan Jainkoaren hitzetik. Hau dino Liburu Santuak be: «Gizaki guztiak bedarraren parekoak dira, haren edertasuna landako lorearena lakoa; igartzen da bedarra, jausten lorea; Jaunaren hitzak, ostera, betiko dirau». Hitz hau, barriz, zuei iragarri jatzuen Barri Ona da.

Jaunak esana.

 

Erantzun salmoa

Sal 147, 12-13. 14-15. 19-20 (R/. 12a)

R/.   Jerusalem, ospatu egizu Jauna!

        Edo: Aleluia.

V/.   Jerusalem, ospatu egizu Jauna,
Sion, goratu zeure Jainkoa,
zure ateen sarrailak indartu ditualako
eta seme-alabak zugan bedeinkatu. R/.

V/.   Zure mugetan bakea ezarri dau,
garirik onenaz ase zaitu.
Bialtzen dau lurrera bere mezua,
eta haren hitza bizkor eta arin doa. R/.

V/.   Bere hitza iragarri deutsa Jakoben herriari,
bere erabagiak eta aginduak Israeli.
Beste herriei ez deutse holakorik egin,
bere erabagirik ez deutse jakinazo. R/.

 

I. eta II. urteetan

Aleluia

Ik. Mk 10, 45

R/.   Aleluia.

V/.   Gizonaren Semea besteen zerbitzari izatera etorri da,
        eta bere bizia danen alde ordainsari emotera. R/.

 

Ebanjelioa

Jerusalemera igoten dihardugu, eta Gizonaren Semea
abadeburuen eta lege-maisuen esku itziko dabe.

✠ Jesu Kristoren Ebanjelioa San Markosen liburutik

Mk 10, 32-45

    Aldi haretan, Jerusalemera bidean gora joiazan ikasleak, eta Jesus aurretik. Ikasleak harrituta egozan, eta jarraitzen eutsoenak bildurrez joiazan. Jesusek Hamabiak barriro beregana batu, eta zer gertatuko jakon adierazten hasi jaken: «Begira, Jerusalemera igotzen dihardugu, eta Gizonaren Semea abadeburuen eta lege-maisuen esku itziko dabe; heriotzara kondenatuko dabe eta atzerritarren esku lagako; honeek burla egingo deutsoe eta txistua botako, zigortu eta hil egingo dabe; baina handik hiru egunera biztu egingo da».
    Santiagok eta Joanek, Zebedeoren semeek, Jesusengana inguratu eta esan eutsoen: «Maisu, eskatuko deutsuguna Zuk guri egitea gura genduke». Jesusek itaundu eutsen: «Zer gura dozue, bada, Nik zuei egitea?» Eta hareek: «Jesarri gaitezala bata zure eskuman eta bestea ezkerrean, Zu zeure aintzara heltzean».
    Jesusek esan eutsen: «Ez dakizue zer eskatzen zabiltzen. Gauza ete zarie Nik edan behar dodan kaliza mingotsa edateko, edo Nik urperatu behar dodan uretan murgiltzeko?» «Bai, gauza gara!», erantzun eutsoen.
    Jesusek, orduan: «Nik edan behar dodan kaliza mingotsa, bai, edango dozue, baita Nik urperatu behar dodan uretan urperatuko be; baina nire eskoi-ezkerretan jesartze hori ez dago nire esku inori emotea; Jainkoak norentzat dauan prestatuta, hari emongo jako».
    Beste hamarrak, hori entzutean, hasarre jarri ziran Santiagoren eta Joanen aurka. Jesusek dei egin eta esan eutsen: «Dakizuenez, herrien buruzagiek menpean hartzen ditue herriak eta handikiek euren agintea ezartzen deutsie. Ez dau holan izan behar zuen artean. Zuen artean handi izan gura dauana izan bedi zuen zerbitzari, eta zuen artean lehenengo izan gura dauana izan bedi danen morroi. Ze, Gizonaren Semea be ez da zerbidua izatera etorri, zerbitzari izatera baino, eta bere bizia danen alde ordainsari emotera».

Jaunak esana.

 

IRUZKINA

     Ez da erreza norbere ikuspegitik harago joatea. Jesusi Pedrok egindako galdereak horixe adierazoten eban eta, gaurkoan, anaia bien eskariak ere (eta horren aurrean beste ikasleek agertzen daben haserreak ere) horixe azaleratzen dau.

     Bat da Jesusek bizitzaz daukan ikuspegia, eta haren aurreango jarrerea. Baina ikasleek beste uste batzuetan dabe jarrita itxaropena.

     Alde batetik, Jesusen sendotasunak eta, oinak lurrean sendo jarrita daukazala Jerusalemera abiatzeak bildurra sartu deutse haragian. Eta gehiago, han heriotzeaz topo egingo dauala iragarten deutsoenean.

     Jesusek, bizitza besteen alde emon beharreko Jainkoaren dohai lez ulertzen dau. Ez dauka ezer beretzat. Dana da besteentzat. Horrela agertzen dau Jainkoaren izaerea.

     Ikasleek sarien itxaropenean jarraitzen deutsoe. Asko dauke ikasteko. Azkeneraino iraungo dabe euren usteotan… eta porrota jasango dabe.

     Berbiztuaren Espirituak atara behar izango dauz egoera eta uste horreetatik, eta ulertuko dabe Jesusen eskeintza, eta bizi izango dira beste era batera.

     Zelangoa da gure ustea? Atzerakada handia be handia ez ete dogu egin?

 

Urtean Zeharreko VIII. eguena

I. urtean

I. Irakurgaia

Jaunaren aintzaz betea dago harek egin dauana.

Siraken liburutik

Si 42, 15-26 (gr. 15-25)

    Jaunak eginak gogoratuko ditut orain,
ikusi dodana kontatuko.
Bere hitzaren bidez egin ditu Jaunak gauza guztiak,
eta haren nahiak ezarri deutse euren egitekoa.
Gauza guztiak argitzen ditu eguzki distiratsuak,
eta Jaunaren aintzaz betea dago harek egin dauana.
Jaunaren aingeruak be ez dira gauza
haren egintza harrigarri guztiak kontatzeko;
sendo ezarri ditu Jaun ahalguztidunak,
sendo iraun dagien beraren aintzaz.
Leza sakonak eta giza bihotzak arakatzen ditu,
ondo daki horreetan jazotzen dana,
zientzia guztia ezagutzen dau Goi-goikoak,
eta bere begiak sendo ditu sasoien zantzuetan.
Joana eta etorkizuna iragartzen ditu,
ezkutuko gauzen aztarnak azaltzen.
Giza pentsamentu batek be ez deutsa ihes egiten,
berba bakar bat be ez jako ezkutatzen.
Jakituriaz antolatu ditu bere egintza handiak,
betidanikoa eta betierekoa da-eta bera.
Ezin jako ezer gehitu, ez kendu,
ez dau ezelako aholkulariren beharrizanik.

Bai maitagarri dirala harek egindako guztiak,
nahiz eta ikusten doguna argi-izpia baino ez izan.
Danak bizirik dagoz eta betiko diraue,
behar dan guztietan haren esana egiten.
Gauza guztiak binaka doaz, bata bestearen aurrez aurre,
eta ez dau ezer akastunik egin.
Batak bestearen balioa sendotzen dau.
Nor aspertuko da haren aintza ikusteaz?

Jaunak esana.

 

Erantzun salmoa

Sal 33 [32], 2-3. 4-5. 6-7. 8-9 (R/. 6a)

R/.   Jaunak bere hitzaz egin dau ortzia.

V/.   Ospatu Jauna zitaraz,
jo harentzat hamar hariko harpa.
Kanta egiozue kantu barria,
jo trebe irrintzi eginez. R/.

V/.   Zuzena da-eta Jaunaren hitza,
fidagarria harek egin dauan guztia.
Justizia eta zuzenbidea dau maite,
Jaunaren maitasunaz dago lurra betea. R/.

V/.   Jaunak bere hitzaz egin dau ortzia,
bere aho-arnasaz astro guztiak.
Itsas urak hesi barruan batzen ditu,
ozeanoak gordailuetan sartzen. R/.

V/.   Izan begio bildur lur osoak Jaunari,
ikaratu beitez haren aurrean munduko biztanle guztiak.
Izan be, harek esan, eta dana egin zan;
harek agindu, eta izaten dau jarraitzen. R/.

         

II. urtean

I. Irakurgaia

Errege eta abade zarie, nazino santu,
dei egin deutsuen Jainkoaren egintza bikainak iragarri dagizuezan.

San Pedro Apostoluaren lehenengo epistolatik

1 P 2, 2-5. 9-12

    Senide maiteok: Ume jaiobarriak lez, desiatu egizue hitzaren esne garbia, horren bitartez hazi eta salbazino betera heldu zaitezen, Jauna zein ona dan dastatu dozuen ezkero. Harri bizia da Jauna, gizakiek baztertua, baina Jainkoaren begietarako aukeratua eta bikaina; harengana hurreratzen zariela, zuek be, harri bizi lez, espirituzko tenpluaren eraikintzan parte hartzen dozue eta abade sagaratuak zarie, Jainkoari atsegin jakozan espirituzko opariak Jesu Kristoren bitartez eskeintzeko.
    Zuek, ostera, jatorri aukeratua zarie, errege eta abade, nazino santua, Jainkoak beretzat eskuratutako herria, ilunpetatik bere argi zoragarrira dei egin deutsuen Jainkoaren egintza bikainak iragarri dagizuezan. Sasoi baten herri be ez zinienok, orain Jainkoaren herri zarie; errukirik barik zengozenok, orain errukia lortu dozue.
    Senide maiteok, munduan arrotz eta atzerritar zarienez, arren eskatzen deutsuet itzi dagizuezala alde batera zuen kontra burrukan dabiltzan giza grina txarrak. Jokatu egizue ondo jentilen artean; holan, orain gaizkiletzat salatzen bazaituee be, zuen egintza onak autortu beharko dabez eta Jainkoa goratuko dabe, bera kontuak hartzera etortzean.

Jaunak esana.

 

Erantzun salmoa

Sal 100 [99], 2. 3. 4. 5 (R/. 2c)

R/.   Sartu zaiteze oihu alaiz Jaunaren aurrera.

V/.   Lurtar guztiok, egin irrintzi Jaunari,
zerbidu egizue Jauna pozaren pozez,
sartu zaiteze oihu alaiz haren aurrera. R/.

V/.   Jakizue Jauna dala Jainkoa,
harek egin gaitu, berarenak gara,
haren herri eta haren larreko artalde. R/.

V/.   Sartu haren tenpluko ateetatik eskerrak emonez,
haren atarietan gorazarreak abestuz.
Emon eskerrak, bedeinkatu haren izena. R/.

V/.   «Ona da-eta Jauna,
haren maitasuna betikoa,
haren leialtasuna gizaldiz gizaldikoa». R/.

 

I. eta II. urteetan

Aleluia

Ik. Jn 8, 12

R/.   Aleluia.

V/.   Neu naz munduaren argia, dino Jaunak;
        Niri jarraitzen deustanak  izango dau bizirako argia. R/.

 

Ebanjelioa

Ikusi dagidala, Maisu!

✠ Jesu Kristoren Ebanjelioa San Markosen liburutik

Mk 10, 46-52

    Aldi haretan, Jesus ikasleekin eta jentetza handiarekin Jerikotik urtetean, Bartimeo itsua, Timeoren semea, eskean egoan bide-ertzean jarrita. Jesus Nazaretarra zala jakitean, deadarka hasi zan: «Daviden Seme, Jesus, erruki zakidaz!» Askok gogor egiten eutson isildu eragiteko; baina harek indartsuago egiten eban oihu: «Daviden Seme, erruki zakidaz!»
    Jesusek gelditu eta itsuari dei egiteko agindu eban. Deitu eutsoen, esanez: «Izan bihotz! Jagi, deika dabilkik». Bere soingainekoa jaurtiz, salto baten zutundu eta Jesusengana joan zan. Jesusek itaundu eutson: «Zer nahi dozu Nik zuri egitea?» Itsuak erantzun: «Ikusi dagidala, Maisu!» Jesusek esan eutson: «Zoaz, zeure sinismenak osatu zaitu». Une haretan bertan berreskuratu eban ikusmena, eta Jesusen ondorik joian bidean.

Jaunak esana. 

 

IRUZKINA

     Eta… irudi eredugarri lez hartuko bagendu Markosen ebanjelioko pasartetxo hau?

     Arterago Pedrok, anaia biek eta ikasle jarraitzaileek agertu dabena itsukeria ez ete da? Jesusen jarraian doazenek, itsua isilduazo guran, ez ete dabe itsukeria nabarmentzen?

     Ebanjelariak adibidetxo honegaz zera esango deusku: Jesusen zurru-murrua baino ez bada be gogoz entzuten dauanak bere itsukeriatik urteteko gogoa agertuko deutsola hari; eragozpen guztien gainetik helduko da harengana, eta lortuko dau ikusmena.

     Bartimeo bazterreratuen irudi litzateke; baina bazterrean jarraitzerik gura ez dauana da, eta ustea Jesusengan jarten dauana, jentea hori eragozten ahalegintzen bada ere.

     Eta Jesusek, danek dakien (badakiela uste daben) zeozer ozen agertu daiala eskatzen deutso: itsukeriatik urten gura dauala. Eta gura izate horrek ikusiazo egiten deutso.

     Behin baino sarriagotan pentsatzen dot, ea Jesus inguratuz jarraitzen deutsagula uste dogunok ez ete garan ikusmena lortu gura daben askorentzat eragozpen. 

Urtean Zeharreko VIII. barikua

I. urtean

I. Irakurgaia

Gure asabak gizon zintzoak izan ziran;
eta gizaldiz gizaldi bizi da hareen izena.

Siraken liburutik

Si 44, 1. 9-13

    Egin dagigun gizon ospetsuen gorapena,
gure asabena, belaunez belaun.
Batzuek ez dabe oroipenik itzi,
izan ez balira lez desagertuz;
izatera heldu ez balira lez dira,
eurak eta euren ondorengoak.
Ez, ostera, gure asabak, gizon zintzoak;
hareen egintza onak ez dira ahaztu;
hareen ondorengoengan diraue,
hareen ondarea seme-alabengana igaro da.

Honeek zintzo gorde dabez itunak,
ondorengoek be bai, eurei esker.
Hareen ondorenak beti iraungo dau,
eta hareen ospea ez da desagertuko.

Jaunak esana.

 

Erantzun salmoa

Sal 149, 1-2. 3-4. 5-6a eta 9a (R/. 4a)

R/.   Maite dau Jaunak bere herria.

        Edo: Aleluia.

V/.   Kanta Jaunari kantu barria,
kanta haren gorespena fededunen batzarrean.
Poztu bedi Israel bere Egileaz,
alaitu siondarrak euren Erregeaz. R/.

V/.   Goratu begie haren izena dantza eginez,
jo begiez harentzat danbolina eta zitara.
Maite dau-eta Jaunak bere herria,
garaipenez jantziko ditu umilak. R/.

V/.   Alaitu beitez fededunak Jainko ospetsuaz,
egin begie pozez oihu euren etzunlekuetan.
Bego Jainkoaren gorapena hareen eztarrian,
ohorea da haren fededun guztientzat. R/.

 

II. urtean

I. Irakurgaia

Nork bere dohaia hartu dau Jainkoagandik.
Jarri egizuez guztiok zeuen dohaiak besteen zerbitzura.

San Pedro Apostoluaren lehenengo epistolatik

1 P 4, 7-13

    Senide maiteok: Hurrean da gauza guztien azkena. Izan zaiteze, beraz, zentzundun eta neurritsu, otoitzari emonak bizitzeko. Batez be, gorde egizue bizi-bizirik alkarrenganako maitasuna, maitasunak pekatu askoren parkamena lortzen dau-eta. Egiozue abegi ona batak besteari, marmarrik barik.
    Nork bere dohaia hartu dau Jainkoagandik. Jarri egizuez guztiok zeuen dohaiak besteen zerbitzura, Jainkoaren era askotako dohaien administratzaile zintzo lez. Berba egiteko dohaia dauanak, adierazo dagiala Jainkoaren hitza; zerbitzuren bat dauanak, bete dagiala Jainkoak emoten deutsan indarraz, gauza guztietan Jainkoa goratua izan dadin Jesu Kristoren bitartez. Berari aintza eta ahalmena gizaldien gizaldietan. Amen.
    Senide maiteok, ez harritu zuek probatzeko hor biztu dan suagaitik, zeozer harrigarria jazotzen jatzuelakoan. Kontrara, poztu zaiteze, Kristoren sufrimentuetan partaide zarienean, bera aintzaz beterik agertzean pozez gainezka egon zaitezen.

Jaunak esana.

 

Erantzun salmoa

Sal 96 [95], 10. 11-12. 13 (R/. 13ab)

R/.   Badator Jauna lurra epaitzera.

V/.   Esaizue nazinoetan: «Errege da Jauna.
Sendo ezarria dago mundua, ez da kili-kolo egongo;
herriak zuzenbidez ditu epaitzen». R/.

 V/.  Poztu bedi zerua, alaitu lurra,
egin begi orroe itsasoak eta bertako guztiak,
egin jai landa zabalak eta bertan dan guztiak,
egin poz-oihu, basoko zuhaitz guztiok. R/.

V/.   Jaunaren aurrean, badator eta,
badator lurra epaitzera.
Justiziaz epaituko dau mundua
eta leialtasunez herriak. R/.

 

I. eta II. urteetan

Aleluia

Ik. Jn 15, 16

R/.   Aleluia.

V/.   Neuk aukeratu zinduedazan zuek,
        eta eginkizun hau emon deutsuet:
        frutu ugaria eta iraunkorra emon dagizuela edonon,
        dino Jaunak. R/.

 

Ebanjelioa

Nire etxea otoitz-etxe izango da herri guztientzat.
Izan sinismen Jainkoagan.

✠ Jesu Kristoren Ebanjelioa San Markosen liburutik

Mk 11, 11-26

    Aldi haretan, jenteak goraka hartu ondoren, tenpluan sartu zan Jesus, Jerusalemen. Eta inguru guztira begiratu ondoren, ordurako berandu zan-eta, Betaniarantz urten eban Hamabiekin.
    Biharamonean, Betaniatik urten ebenean, Jesus gosetu egin zan. Eta orriz beterik egoan ikondoa urrutitik ikusirik, bertara joan zan, ikorik aurkitzen ete eban; baina ondora heltzean, ez eban orria besterik topatu, ez zan iko-sasoia-eta. Orduan, ikondoari esan eutson: «Ez dagiala gehiago inork hiregandik fruturik jan!» Ikasleek be entzun eutsoen.
    Heldu ziran Jerusalemera, eta, tenpluan sarturik, bertan saldu-erosietan ebiltzanak kanpora botatzen hasi zan Jesus eta diru-trukalarien mahaiak eta uso-saltzaileen postuak irauli egin zituan. Eta ez eutson inori tenplu barruan ezer eroaten izten. Gero, irakasten hasi jaken, esanez: «Ez ete dino Liburu Santuak: “Nire etxea otoitz-etxe izango da herri guztientzat? Zuek, ostera, lapur-zulo egina dozue».
    Abadeburuak eta lege-maisuak, hori jakin ebenean, Jesus zelan hilko hasi ziran; baina bildur ziran, ze, jente guztia harrituta egoan haren irakaspenaz. Iluntzean uritik kanpora urten eben Jesusek eta ikasleek.
    Biharamon goizean, bezperako lekutik igarotzean, ikondoa sustraietaraino igartuta ikusi eben. Gogoratu zan Pedro eta esan eutson Jesusi: «Begira, Maisu, Zuk madarikatutako ikondoa dana igartu da».
    Jesusek erantzun: «Izan sinismena Jainkoagan. Egiaz dinotsuet: Nor edo nork esaten badeutsa mendi honi: “Kendu hadi hortik eta urperatu hadi itsasoan”, eta mendiari agindu deutsana gertatuko dala zalantzarik barik sinisten badau, halantxe gertatuko jako. Horregaitik dinotsuet: Otoitzean eskatzen dozuen edozein gauza, sinistu lortuko dozuela, eta emongo deutsue Jainkoak.
    Eta otoitzean diharduzuela, parkatu inoren aurka ezer badozue, zeruko zeuen Aitak be zeuen hutsegiteak parkatu deizuezan. Zuek parkatzen ez badozue, zeuei ere ez deutsuez parkatuko zeruko Aitak zuen hutsegiteak».

Jaunak esana.

 

Iruzkina

     Gauza askoren barri emon gura deusku batera Markos ebanjelariak eta, laburrean, ulertezinak egiten jakuz. Ikondoa madarikatzea eta saltzaileak jauretxetik kanporatzea harrituta izten gaituen gauzak dira (ez zan frutu aroa; saltzaileak eginbeharreko gauzetan ebilzan…).

     Hasieran, jentearen txaloak hartuta sartu zala urian eta, berandu zalako, inguru guztira begiratuta urten ebala esan deusku eta Betaniarantza abiatu zala.

     Eta azkenean, otoitza parkamenagaz lotu behar dogula dinosku, parkatzen ez badogu Jainkoak ere ez deuskula-eta guri parkatuko. Hau ere harrigarria! Baldintzatu ete neike, ba, nik Jainkoaren parkamena? Eta horixe dinosku.

     Zer esan harrituta lagaten gaituen honeez? Zer iragarri gura deusku ebanjelariak?

     Ikondoa Israel herriaren irudi da. Jauretxea, beste horrenbeste. Zertarako da ikorik emoten ez dauan ikondoa? Edo zertarako fruturik emoten ez dauan kultoa?

     Joana da hutsa dan kultoaren aldia. Badator frutu on eta ugari emongo dauan aldia: Jainkoa espirituz gurtzea. Holantxe egingo da otoitz aurrerantzean eta otoitz edo kultu honek parkamena bere senean eroango dau. Jesus dogu oinarria.

 

Urtean Zeharreko VIII. zapatua

I. urtean

I. Irakurgaia

Aintza emongo deutsat jakituria irakatsi deustanari.

Siraken liburutik

Si 51, 17-27 (gr. 12-20)

    Eskerrak emon nahi deutsudaz eta Zu goratu,
eta zure izena bedeinkatu, Jauna.
Oraindino gazte nintzala, bidaiatzen hasi baino lehen,
zintzo bilatu neban jakituria neure otoitzean.
Tenplu aurrean otoitz egin neban ha lortzeko,
eta neure bizitzaren azkeneraino halan bilatuko dot.
Loratu zanean, haretaz poztu zan nire bihotza,
heltzen dagoan mahats-mordoaz lez.

Bide zuzenetik ibili dira nire oinak,
jakituriaren arrastoari gaztarotik jarraituz.
Ahalegin txikiena nahiko izan dot neureganatzeko,
eta zer ikasi asko aurkitu dot neuretzat.
Asko aurreratu dot hari esker;
aintza emongo deutsat jakituria irakatsi deustanari.
Ha egintzara eroatea erabagi dot,
onaz arduratu naz eta ez dot damurik.

Neure izate guztiaz burrukatu dot haren alde
eta arretatsu ibili naz legea betetzen.
Eskuak zerurantz jaso
eta hari buruzko nire ezjakintasunaren damu izan naz.
Jakituriara nire gogoa bideratu eta garbitasunean aurkitu dot.

Jaunak esana.

 

Erantzun salmoa

Sal 19 [18], 8. 9. 10. 11 (R/. 9a)

R/.   Jaunaren arauak zuzenak dira,
        bihotzaren pozgarri.

V/.   Jaunaren legea bikain, barrua arnasbarritzen dau;
Jaunaren mandamentua fidagarri, heldubakoa zuhur egiten dau. R/.

V/.   Jaunaren arauak zuzen, bihotzaren pozgarri;
Jaunaren agindua distiratsu, begien argigarri. R/.

V/.   Jaunaganako begirunea garbi, iraunkor betiko,
Jaunaren erabagiak egiazko, dan-danak bidezko. R/.

V/.   Urrea, urre araztua baino desiragarriago,
eztia, ezti barria baino gozoago. R/.

 

II. urtean

I. Irakurgaia

Jainkoak gorde zaikiez pekatuan jaustetik,
eta  bere presentzia aintzatsuan akatsik barik agertuazo.

San Judas Apostoluaren epistolatik

Ju 17. 20b-25

    Senide maiteok: Izan gogoan Jesu Kristo gure Jaunaren apostoluek aurrez iragarria. Zeuen bizitza sinismen guztiz santuaren oinarri gainean eraikiz eta Espiritu Santuak eraginez otoitz eginik, zagoze sendo Jainkoaren maitasunean, betiko bizia emongo deutsuen Jesu Kristo gure Jaunaren errukiaren zain. Errukitu zaiteze zalantzan dabiltzanez; salbatu egizuez, sutatik atarata; gainerakoez izan erruki, baina kontu handiz, euren jokabide txarraz kutsatu daben jantzia bera be gorrotatuz.

    Pekatuan jaustetik gorde eta bere presentzia aintzatsuan akatsik barik eta pozez agertuazo zaikiezanari, gure salbatzaile dan Jainko bakarrari, Jesu Kristo gure Jaunaren bitartez, aintza, handitasuna, ahalmena eta agintea gizaldi guztien aurretik, orain eta gizaldien gizaldietan. Amen.

Jaunak esana.

 

Erantzun salmoa

Sal 63 [62], 2. 3-4. 5-6 (R/. 2c)

R/.   Zure egarriz daukat gogoa, Jauna, ene Jainkoa.

V/.   Jainko, Zu ene Jainko,
goizetik nabilkizu bila,
zure egarriz daukat gogoa, zure gogo biziz ni nazan guztia,
lur idor, agor, ur bakoa lez. R/.

V/.   Holan egon nahi dot santutegian Zuri begira,
zure indarra eta ospea ikusiz.
Bizia baino ederragoa da-eta zure maitasuna,
goratuko zaitue nire ezpanek. R/.

V/.   Holan nahi zaitut bedeinkatu neure bizitzan,
eskuak jaso zure izenean.
Jakirik gozoenez lez naz asetuko,
eta nire ezpanek poz-oihuz zaitue goratuko. R/.

 

I. eta II. urteetan

Aleluia

Kol 3, 16a. 17c

R/.   Aleluia.

V/.   Bizi bedi oparo zuengan Kristoren hitza,
        haren bidez Jainko Aitari eskerrak emonez. R/.

 

EBANJELIOA

Zein aginpidez jokatzen dozu holan?

✠ Jesu Kristoren Ebanjelioa San Markosen liburutik

Mk 11, 27-33

    Aldi haretan, Jesus eta ikasleak Jerusalemera etorri ziran barriro. Jesus tenpluan ebilela, abadeburuak, lege-maisuak eta zaharrak hurreratu jakozan, itaunka: «Zein aginpidez jokatzen dozu era horretara? Nork emon deutsu horretarako agintea?»
    Jesusek erantzun eutsen: «Neuk be gauza bat itaunduko deutsuet; erantzuidazue, eta neuk be esango deutsuet zein aginpidez jokatzen dodan holan. Joan Bateatzaileak Jainkoaren aginduz ala giza aginduz bateatzen eban? Erantzun!»
    Hareek hauxe inoen euren artean: «Jainkoaren aginduz ebilela esaten badeutsagu, zergaitik ez geuntsan sinistu esango deusku. Baina zelan esan giza aginduz ebilela?» Honetarako, jentearen bildur ziran, ze, guztiek euken egiazko profetatzat Joan. Halandaze, erantzun eutsoen: «Ez dakigu».
    Jesusek, orduan: «Ba, Neuk be ez deutsuet esango zein aginpidez jokatzen dodan era horretara».

Jaunak esana.

 

IRUZKINA

     Agintarien hiru mailak alkarturik (Abade-buruak, Lege-maisuak eta Zaharrak) eskatzen deutsoez kontuak Jesusi. Gauza ofizialagorik ezin.

     Baina laster baten azaleratzen da zelango kontraesanean diharduen agintariok. Nork eskatu eutson kredentzialik Bateatzaileari? Eta gogoko eban jenteak, batez ere behe mailakoek, salbamen berbak hartzen ebezalako harengandik. Eta zelan geratzen zan instituzinoa?

     Jesusen itaunari ez erantzuteak, horraitino, agintarien jokabide maltzurra azaleratzen dau. Jentearen aurrean hareek daben zelan-halango izan ona arriskuan ez jartearren, ez dabe erantzunik emoten.

     Horrexek berak emoten deutso Jesusi hitz egiteko askatasuna.

     Ondo letorkigu eleizgizonoi honen inguruan apurtxo bat hausnartzea izen ona galtzearen bildurra baino handiagoa izan daiten gure jokabidearen zintzotasuna.