VII. Astea

Urtean Zeharreko VII. astelehena

I. urtean

I. Irakurgaia

Gauza guztien aurretik sortua da jakituria.

Siraken liburuaren hasiera

Si 1, 1-10

    Jakituria guztia Jainkoagandik dator, haregaz dago beti.
Itsas hondarra, euri-tantak,
gizaldiz gizaldiko egunak, nork zenbatu?
Zeruaren garaiera, lurraren zabalera,
itsasoaren sakonera, nork neurtu?
Gauza guztien aurretik sortua da jakituria,
betidanik adimena eta zuhurtasuna.

Jakituriaren sustraia nori emon jako aditzera?
Haren egintza trebeak nork ezagutu?
Bat bakarra da jakituna, biziro bildurgarria:
Jauna, bere tronuan jesarrita dagoana.
Berak sortu eban jakituria, harek ikusi eta neurtu be,
harek banatu berak egindako guztien gain;
gizaki guztiei emon deutse bere eskuzabaltasunez,
eta ondino esku zabalagoz maite dabenei.

Jaunak esana.

 

Erantzun salmoa

Sal 93 [92], 1ab. 1c-2. 5 (R/. 1a)

R/.   Errege da Jauna, ospez jantzia.

V/.   Errege da Jauna, ospez jantzia,
Jauna indarrez jantzia eta inguratua! R/.

V/.   Sendo ezarria dago mundua,
ez dago kili-kolo.
Zure tronua sendo ezarria dago betidanik,
betikoa zara Zu! R/.

V/.   Zure erabagiak fidagarri dira;
zure etxea santutasunez eder, Jauna,
betiereko egunetan. R/.

 

II. urtean

I. Irakurgaia

Bekaizkeriaz eta norgehiagokeriaz beterik bazagoze,
ez harrotu.

Santiago Apostoluaren epistolatik

St 3, 13-18

    Senide maiteok: Zuen artean jakitunik eta eskarmentu handikorik badala? Erakutsi begi hori bere biziera jatorraz eta jakituriari dagokion gozotasunaz. Baina bekaizkeriaz eta norgehiagokeriaz beterik bazagoze, ez harrotu eta ez ibili egiaren kontra guzurretan.
    Hori ez da goitik datorren jakituria, lurrekoa baino, giza maila hutsekoa eta deabruarena. Bekaizkeria eta norgehiagokeria diran tokian, han dira nahastea eta era guztietako gaiztakeriak. Goitik datorren jakituria, barriz, garbia da lehenengo; gainera, baketsua, bihozbera, amore-emoilea, errukitsua eta frutu onak dakarzana, alderdikeriarik eta itxurazalekeriarik bakoa. Bakegileek bakean ereiten dabe eta frututzat zuzentasuna batzen.

Jaunak esana.

 

Erantzun salmoa

Sal 19 [18], 8. 9. 10. 15 (R/. 9a)

R/.   Jaunaren arauak zuzenak dira,
        bihotzaren pozgarri.

V/.   Jaunaren legea bikain, barrua arnasbarritzen dau;
Jaunaren mandamentua fidagarri, heldubakoa zuhur egiten dau. R/.

V/.   Jaunaren arauak zuzen, bihotzaren pozgarri;
Jaunaren agindua distiratsu, begien argigarri. R/.

V/.   Jaunaganako begirunea garbi, iraunkor betiko,
Jaunaren erabagiak egiazko, dan-danak bidezko. R/.

V/.   Hartu egizuz atseginez nire hitz eta gogoetak,
Jauna, ene harkaitz eta askatzaile. R/.

 

I. eta II. urteetan

Aleluia

Ik. 2 Tm 1, 10

R/.   Aleluia.

V/.   Kristo Jesus gure Salbatzaileak heriotza ezereztu dau
        eta bizia argitu Barri Onaren bidez. R/.

 

Ebanjelioa

Sinistu nahi dot! Lagundu sinisbako honi!

✠ Jesu Kristoren Ebanjelioa San Markosen liburutik

Mk 9, 14-29

    Aldi haretan, Jesus eta berarekin zituan lagunak menditik jatsi eta ikasleakana heldu ziranean, jentetza handia ikusi eben hareen inguruan, eta lege-maisu batzuk eurekin eztabaidan. Jentea harrituta gelditu zan Jesus ikustean eta lasterka joan jakozan agurtzera. Jesusek itaundu eutsen ikasleei: «Zer zenduen horreekin eztabaidan?»
    Jentarteko batek erantzun eutson: «Maisu, hemen ekarri deutsut neure semea: berba egiten izten ez deutsan espiritua dauka. Non edo han espiritua jaubetzen jakonean, lurrera botatzen dau, eta mutikoa, adurra dariola eta hagin-karraskadaka, gogor-gogor eginda gelditzen da. Zure ikasleei eskatu deutset espiritua botatzeko, baina ezin izan dabe».
    Jesusek esan eutsen: «Hau gizaldi sinisgogorra! Noiz arte egon behar ete dot zuekaz? Noiz arte jasan behar ete zaituet? Ekarri mutikoa». Ekarri eutsoen, eta espirituak, Jesus ikusteagaz batera, gogor astindu eban mutikoa, eta lurrean iraulka eta adurra eriola itzi eban.
    Jesusek itaundu eutson aitari: «Noiztik dago holan?»  Harek erantzun: «Ume-umetarik. Askotan bota izan dau harek surtara baita uretara be, hil eragiteko. Ezer egin ahal badozu, errukitu zaitez gutaz eta lagundu eiguzu». Jesusek esan eutson: «Ahal dodan dinozu? Dana ahal dau sinisten dauanak». Orduan, mutikoaren aitak deadarka: «Sinistu gura dot! Lagundu sinisbako honi!»
    Jesusek, jentea pilotuz joiala ikusirik, gogor eraso eutson espiritu gaiztoari: «Espiritu gorra eta mutua, Neuk agintzen deuat: urten egik honengandik eta ez sartu barriro». Espirituak, garrasika eta itzelezko astindua emonez, urten egin eban. Mutikoa hilda lez gelditu zan; hilda egoala inoan askok; baina Jesusek eskutik hartu eta altzatuazo egin eban, eta mutikoa zutunik jarri zan.
    Jesus etxeratu zanean, ikasleek itaundu eutsoen bakarrean: «Eta guk, zergaitik ezin izan dogu espiritua bota?» Jesusek erantzun eutsen: «Era honetako espirituak botatzeko bide bakarra otoitza da».

Jaunak esana. 

 

Iruzkina

Zergaitik ete garoaz eztabaidara erlijinoak? Eztabaidotatik ezer onik ez atarateko gainera!

Nork autortu daike ez daukala sinismenik, edo, daukana, motelegia dala? Ba ete dabe sinismenik Jesusen ikasleek eurek ere?

Ebanjelioko gazte deabruak hartua herri guztiaren ezaugarri izan daiteke. Dagoan egoera horretatik ezin dabe askatu ez erlijio agintariek, ez Jesusen ikasleek ere. Eta honeik harrituta dagoz…

Hemen jazoko dan osakuntzea ere mailaka egingo da:

—Alkarrizketeak sinismenik ezaren autorkuntzea ekarriko dau (gaztearen aitagan);

—Jesusen aginduaz gaztea hilda lez geratzen da; eta jenteak hildakotzat emoten dau;

—Jesusek eskutik oratu eta jagiazo egingo dau;

—Ikasleen harridureak erantzuna izango dau: sinismena ez da Jainkoagazko lotura estua baino; ez da bati emon eta galdu daiteken ezer. Otoitzean garatu beharrekoa baino.

Holantxe aurkitzen dogu Jainko askatzailea, salbatzailea.

 

 

Urtean Zeharreko VII. martitzena

I. urtean

I. Irakurgaia

Prestatu zeure burua probarako.

Siraken liburutik

Si 2, 1-13 (gr. 1-11)

    Ene seme, Jauna zerbidu nahi badozu,
prestatu zeure burua probarako.
Sendotu bihotza eta eutsi gogor,
ez larritu estualdian.
Lotu zakioz Jaunari, ez aldendu harengandik,
eta goratua izango zara azken orduan.

Onartu egizu jazo lekizuken guztia,
izan jasankor zeure apalaldiko ezbeharretan,
sutan probatzen da-eta urrea
eta apalkuntzaren labean Jainkoak gogoko dituanak.
Izan uste on Jaunagan, eta berak lagunduko deutsu,
zuzendu zeure jokabidea eta itxaron beragan.

Jaunari begirune deutsazuenok, sinistu haren errukian,
ez desbideratu, jausi ez zaitezen.
Jaunari begirune deutsazuenok, izan uste on harengan,
ez jatzue saririk faltako.
Jaunari begirune deutsazuenok, maitatu egizue Jauna
eta berak argiz beteko deutsue bihotza.

Begira antxinako belaunaldiei eta ikusi:
Nork jarri eban uste ona Jaunagan, eta ustel urten?
Nork iraun harenganako begirunean, eta baztertua izan?
Nork egin eutson dei, eta harek entzungor egin?
Ez! Jauna errukitsua eta bihozbera da,
pekatuak parkatu eta salbatu egiten dau atsekabealdian.

Jaunak esana.

 

Erantzun salmoa

Sal 37 [36], 3-4. 18-19. 27-28. 39-40 (R/. ik. 5)

R/.   Itzi Jaunaren esku zeure zoria,
        berak ekinean jardungo dau-eta.

V/.   Izan konfiantza Jaunagan eta egin on dana,
bizi lurraldean eta zaindu leialtasuna.
Izan bedi Jauna zure atsegina,
eta emongo deutsu zure bihotzak eskatzen dauana. R/.

V/.   Jauna arduratzen da zintzoen biziaz,
betiko iraungo dau hareen ondareak;
zoritxar-sasoian ez dira lotsagarri izango,
asebeteak dira izango gose-egunetan. R/.

V/.   Alde gatxetik, egin on dana,
eta beti izango dozu non bizia;
zuzenbidea maite dau-eta Jaunak
eta ez ditu bertan behera izten bere fededunak. R/.

V/.   Jaunagandik dator zintzoen salbazinoa,
bera dabe gotorlekua arrisku-sasoian;
Jaunak lagundu eta onik ataratzen ditu,
gaiztoengandik onik atara eta salbatzen,
harengan babesten dira-eta. R/.

 

II. urtean

I. Irakurgaia

Eskatu eta hartzen ez badozue,
txarto eskatzen dozuelako da.

Santiago Apostoluaren epistolatik

St 4, 1-10

    Senide maiteok: Nondik sortzen dira zeuen artean dozuezan hasarreak eta burrukak? Ez ete zeuen barruan burrukan dabiltzan grina txarretatik? Zeozer gogotsu gura izan eta eskuratu ezin dozuenean, hilketak egiten dozuez; zeozer nahi izan eta lortu ezin dozuenean, zarraparra sortu eta burrukan egiten dozue. Ez badaukazue, eskatzen ez dozuelako da; eskatu eta hartzen ez badozue, txarto eskatzen dozuelako da, zeuen grina txarrak asetzeko eskatzen dozuelako.
    Desleialak halakoak! Ez ete dakizue munduaren adiskide izatea Jainkoaren arerio izatea dala? Beraz, munduaren adiskide izan nahian dabilena Jainkoaren arerio egiten da. Ala Liburu Santuak alperrik diharduala uste dozue, hau esatean: «Gogo biziz maite dau Jainkoak gugan jarri dauan espiritua»? Bada, handiagoa da oraindino haren onginahia; horregaitik dino:

«Jainkoak aurre egiten deutse harroei,
baina mesede apalei».

    Jarri zaiteze, beraz, Jainkoaren menpean; egiozue aurre deabruari, eta ihes egingo dau zuengandik. Hurreratu zaiteze Jainkoagana, eta hurreratuko jatzue. Garbitu egizuez eskuak, pekatariok! Garbitu bihotza, gogo-biko zarienok! Autortu zeuen zoritxarra, egin dolu eta negar. Bihurtu bedi zuen barrea negar, zuen poza tristura. Apaldu zaiteze Jaunaren aurrean eta harek goratuko zaitue.

Jaunak esana.

 

Erantzun salmoa

Sal 55 [54], 7-8. 9-11a. 23 (R/. 23a)

R/.   Jarri zaitez Jaunaren eskuetan,
        zeure Ongileak deutsu eutsiko.

V/.   Hauxe dinot neure kautan: «Ai uso-hegoak banitu!
Hegan egingo neuke beste nonbaiten geratzeko.
Urrun bai urrun egingo neuke ihes,
basamortuan jarriko nintzateke bizitzen. R/.

V/.   Laster aurkituko neuke babesa
ekatxaren haize-burrundaratik».
Nahastu, Jauna, horreen mihin maltzurra.
Gogorkeria eta hasarrea ikusten ditut urian,
gau eta egun biraka harresietan. R/.

 V/.  Jarri zaitez Jaunaren eskuetan,
zure Ongileak deutsu eutsiko.
Ez dau sekula zintzoa jausten itziko. R/.

 

I. eta II. urteetan

Aleluia

Ik. Ga 6, 14

R/.   Aleluia.

V/.   Jainkoak libra naiala harrotzetik,
        gure Jaunaren gurutzean izan ezik,
        gurutze horri esker,
        mundua hilik dago-eta niretzat eta ni munduarentzat. R/.

 

Ebanjelioa

Gizonaren Semea gizakien esku itziko dabe.
Lehenengo izan nahi dauana izan bedi danetan azkena.

✠ Jesu Kristoren Ebanjelioa San Markosen liburutik

Mk 9, 30-37

    Aldi haretan, Jesus eta ikasleak Galilean zehar ebiltzan. Jesusek ez eban hori inork jakiterik gura, ze, ikasleei irakastera emona egoan. Holan inotsen: «Gizonaren Semea gizakien esku itziko dabe; hil egingo dabe, baina hil eta hiru egunera biztu egingo da». Hareek, ostera, ez eben ulertzen zer esan gura eutsen; itauntzeak, barriz, bildurra emoten eutsen.
    Heldu ziran Kafarnaumera eta, etxean egozala, Jesusek itaundu eutsen: «Zer eztabaida izan dozue bidean?» Baina hareek berbarik ez; ze, euren artean handiena nor ete zan eztabaidatu eben bidean.
    Jesarri zan Jesus eta, Hamabiei dei eginik, esan eutsen: «Lehenengo izan nahi dauana izan bedi danetan azkena eta danen zerbitzaria».
    Gero, umetxu bat hartu, hareen erdian jarri eta, besarkatuz, esan eutsen: «Holako ume bat nire izenean onartzen dauanak Neu onartzen nau, eta Ni onartzen nauanak, ez nau Neu onartzen, ezpada ze, bialdu nauana bera baino».

Jaunak esana.

 

Iruzkina

Behin eta barriro jarten deusku Markos ebanjelariak Jesus ikasleei heriotzearen inguruko azalpenak emoten. Honeek ez dabe inondik inora onartzen Jesusen heriotzea.

Jesusentzat bizitza Jainkoaren erreinuagaitik emon egiten dan dohaia da; ha beretzat gordeten ahalegintzen danak galdu egingo dau.

Zein gatx egiten jaken (egiten jakun) hau onartzea! Zer behar ete dogu Jesusen aukeraketara heltzeko? Zelan askatu geintekez lotuta gaukezan siniskera, ohikeria, handigura eta usteetatik?

Irakatsi egin behar deutse Jesusek ikasleei, eta inork enbarazurik egingo ez deutsen nonora daroaz. Sakona izan behar dau irakaskuntzak; inoren ingerentziarik eukiko ez dauana. Baina…

Prest ete gagoz gure usteak, ziurtasunak eta siniskerak albo batera itzi, eta Jesusi aditzeko, uste on osoa harengan jartera heltzeraino?

Eredutzat, umea onartzea jarten deusku Jesusek. Umea ez zan kontuan hartzen, edozertarako erabilia zan… Prest gagoz maila horretara heltzeko, gure bizitza besteen zerbitzuan jarteko, galtzeraino, eta hori Jainkoaren erreinua iragartea dala uste izateko? Ala besteen gainetik egotea bilatzen dogu?

 

 

Urtean Zeharreko VII. eguaztena

I. urtean

I. Irakurgaia

Jakituria maite dabenak ditu Jaunak maite.

Siraken liburutik

Si 4, 12-22 (gr. 11-19)

    Jakituriak bere seme-alabak goratzen ditu
eta bere bila dabiltzanak zaintzen.
Ha maite dauanak bizia maite dau;
haren bila ahalegintzen diranak pozez beteko dira.
Ha dauanak aintza izango dau ondare,
gorabehera guztietan Jaunak bedeinkatu egingo dau.
Jakituria zerbitzen dabenek
Jainko santua dabe zerbitzen;
ha maite dabenak ditu Jaunak maite.
Haren esanera dagoanak mundua epaituko dau,
hari lotzen jakona seguru biziko da.

Inor jakituriaz fidatzen bada, bereganatu egingo dau,
eta ondorengoak be haren jaube izango dira.
Baina bide bihurrietatik
eroango dau lehenengo jakituriak,
bildurra eta ikara sufriduazoko deutsa,
heziketa zorrotzaz saminduko dau
eta proban jarriko bere aginduekin,
haretaz bene-benetan fidatu arte.
Ondoren, barriz, bete-betean bihurtu eta poztu egingo dau,
eta bere ezkutukoak azalduko deutsaz.
Baina desbideratzen bada, baztertu egingo dau
eta bere burua hondatzen itziko deutsa.

Jaunak esana.

 

Erantzun salmoa

Sal 119 [118], 165 eta 168. 171-172. 174-175 (R/. 165a)

R/.   Gainezka dabe bakea, Jauna,
        zure nahia maite dabenek.

V/.   Gainezka dabe bakea zure nahia maite dabenek,
ez ditu ezerk jausiazoko.
Gordetzen ditut zure legeak eta aginduak,
zeure aurrean dozuz nire ibilbide guztiak. R/.

V/.   Isuri begie nire ezpanek gorespena,
zure arauak irakatsi deustazuz-eta.
Iragarri begi zure agintzaria nire mihinak,
zuzenak dira-eta zure agindu guztiak. R/.

V/.   Gogo biziz gura dot, Jauna, zure salbazinoa,
eta zure nahian dot gozamena.
Bizi nadila, bizi, Zu goresteko,
izan dagidazala lagun zure erabagiak. R/.

 

II. urtean

I. Irakurgaia

Ez dakizue zuen bizitza zer izango dan.
Beste hau esan behar zeunkie: «Jaunak nahi badau».

Santiago Apostoluaren epistolatik

St 4, 13-17

    Senide maiteok: Entzun orain zuek, hau esaten dozuenok: «Gaur edo bihar halako urira joango gara, eta urtebete emongo dogu han, negozioak egiten eta dirua irabazten». Hau esaten dozue, eta ez dakizue zuen bizitza bihar zer izango dan. Une batez agertu eta behingoan desagertzen dan lainoa besterik ez zarie-eta!
    Beste hau esan behar zeunkie: «Jaunak nahi badau eta bizi bagara, hau edo bestea egingo dogu». Zuek, ostera, zeuen harrokeriaz puztuta zabiltze, eta holako harrokeria guztiak txarrak dira. Zelan on egin jakinik, egiten ez dauanak pekatu egiten dau.

Jaunak esana.

 

Erantzun salmoa

Sal 49 [48], 2-3. 6-7. 8-10. 11 (R/. Mt 5, 3)

R/.   Zorionekoak gogoz behartsu diranak,
        eurena dabe-eta Jainkoaren erreinua.

V/.   Entzun hau, herri guztiok,
zagoze adi, munduko biztanleok,
jente apal eta handiki,
aberats eta behartsu. R/.

V/.   Zergaitik bildur izan zoritxar-egunean,
maltzurren gaiztakeriak inguratzen nauanean?
Euren ondasunetan dabe horreek konfiantza
eta euren aberastasun handiaz harrotzen dira. R/.

V/.   Hara, gizakiak ezin dau bere burua askatu,
ezta Jainkoari bere biziaren erospen-saria ordaindu be.
Karuegia da biziaren erospen-saria,
inoiz ordaindu ahal izateko.
Amaibarik biziko ete da, bada?
Ez ete dau inoiz hilobia ikusiko? R/.

V/.   Ikusten doguz jakitunak hiltzen,
baita zentzunbakoak eta inozoak galtzen be,
euren ondasunak besterentzat itziz. R/.

 

I. eta II. urteetan

Aleluia

Jn 14, 6

R/.   Aleluia.

V/.   Neu naz bidea, egia eta bizia, dino Jaunak;
        ezin da inor Aitagana joan,
        nire bidez izan ezik. R/.

 

Ebanjelioa

Gure aurka ez dagoana gure alde dago.

✠ Jesu Kristoren Ebanjelioa San Markosen liburutik

Mk 9, 38-40

    Aldi haretan, Joanek esan eutson Jesusi: «Maisu, gizon bat ikusi dogu zure izenean deabruak botatzen, eta galazo egin gura izan deutsagu, ez da gure taldekoa-eta».
    Baina Jesusek erantzun: «Ez galazo, ze, ez da inor, nire izenean mirari bat egin eta gero Nitaz txarto berba eginez jardungo dauanik. Ze, gure aurka ez dagoana gure alde dago».

Jaunak esana.

 

IRUZKINA

Zelan ulertu ete dogu eta geure egunerokoan bizi izan Jesusen maitasun-agindua! Agindu honek arerioak ere maitatzera garoazanean.

Senideak maitatzea, geure taldekoak edo eritxi berekoak maitatze lez ulertzen badogu, ez dogu Jesusen maitasun-agindua ondo ulertu.

Oraindino bide horrexetan dabilz —esan daiteke— Joanen taldekoak ere: eurak dira aukeratuak eta Jesusen jarraitzaileak; eta alkar maitatu behar dabe Jesusen aginduari jarraiki. Baina besteak? Euren taldeko ez diranak? Edo beste talde batzutan militatzen dabenak? Edo arerio ere dabezanak?

Geure artean ere badago, oraindino, holan ulertzen dauanik: taldekideak edo eritxi berekoak, edo lagunak maitatzeko agindua dala Jesusena.

Holan uste dabenek ez dabe ondo ulertu Jesusen maitasun-agindua.

Eta gatx egingo jake —beste kontestu baten bada ere— beste esaldi ha: «Gugaz ez dagoana geure aurka dago».

 

Urtean Zeharreko VII. eguena

I. urtean

I. Irakurgaia

Bihurtu Jaunagana luzatu barik.

Siraken liburutik

Si 5, 1-10 (gr. 1-8)

    Ez oinarritu aberastasunetan,
ez esan: «Ez dot beste ezeren beharrik».
Gogo biziak eta indarrak ez zagiezala
zeure bihotzaren grinak jarraitzera eroan.
Ez esan: «Nork ni menperatu?»,
benetan Jaunak zigortu egingo zaitu-eta.
Ez esan: «Pekatu egin eta ez jat ezer jazo»,
Jauna eroapen handikoa dalako da-eta hori;
baina ez zaitez parkamenaz hain seguru egon
pekatua pekatuaren gain pilatzeko.

Ez esan: «Handia da haren errukia,
parkatuko deustaz nire pekatu ugariak»;
izan be, errukiorra eta, era berean, hasarrekorra da-eta ha,
eta jausiazoko dau pekatariengana bere sumina.
Bihurtu Jaunagana luzatu barik, ez ibili gerotik gerora,
bat-batean helduko da-eta Jaunaren hasarrea
eta ezereztua izango zara zigor-egunean.
Ez oinarritu bidebakokeriazko aberastasunetan,
ez deutsue ezertarako balio izango ezbehar-egunean.

Jaunak esana.

 

Erantzun salmoa

Sal 1, 1-2. 3. 4 eta 6 (R/. Sal 40 [39], ik. 5a)

R/.   Zorionekoa
        Jaunagan itxaropidea jartzen dauana!

V/.   Zorionekoa gaiztoen aholkuari jarraitzen ez deutsana,
pekatarien bidean ez dabilena,
ezta lotsabakoen batzarrean jesartzen be;
Jaunaren legean atsegin dauana,
haren legea gau eta egun hausnartzen dauana. R/.

V/.   Ur-ertzean landaturiko zuhaitzaren antzekoa da:
emoten dau bere sasoian frutua,
eta ez jako orririk igartzen;
egiten dauan guztiak ondo deutsa urteten. R/.

V/.   Ez holan gaiztoak, ez holan,
haizeak daroan galautsaren antzekoak dira.
Jaunak zaintzen dau zintzoen bidea;
gaiztoena, barriz, galdu egiten da. R/.

 

II. urtean

I. Irakurgaia

Langileei ordaindu ez zeuntsien soldata deadarka dabil,
eta igitarien deadarrra Jaun ahalguztidunaren belarrietara heldu da.

Santiago Apostoluaren epistolatik

St 5, 1-6

    Entzun orain, zuek, aberatsok! Egizue negar eta aiene, gainera datorkizuezan zoritxarrakaitik. Ustelak jota dagoz zuen aberastasunak, eta sitsak janda zuen jantziak. Ugerrak jota dagoz zuen urre-zidarrak, eta uger hori izango dozue testigu zeuen kontra, eta suak lez jango dau zuen haragia. Auzi aurreko azkenak diran egun honeetan pilatu dozue aberastasuna.
    Zuen soloetan uzta batu eben langileei ordaindu ez zeuntsien soldata deadarka dabil, eta igitarien deadarrra Jaun ahalguztidunaren belarrietara heldu da. Bapo bizi izan zarie zuek hemen lurrean eta atseginetara emonak; holan, abereak lez gizendu zarie hilketa-egunerako. Errubakoa kondenatu dozue eta hil, eta inork ezin izan deutsue aurre egin.

Jaunak esana.

 

Erantzun salmoa

Sal 49 [48], 14-15b. 15c-16. 17-18. 19-20 (R/. Mt 5, 3)

R/.   Zorionekoak gogoz behartsu diranak,
        eurena dabe-eta Jainkoaren erreinua.

V/.   Horra hor euren buruaz fidatzen diranen zoria,
asebeterik bizi diranen azkena:
hilen egoitzara daroez ardiak lez,
Herioa dabe artzain. R/.

V/.   Zuzen-zuzenean jaisten dira hilobira,
amatatu egiten da hareen irudia,
hilen egoitza dabe bizileku.
Baina Jainkoak askatuko dau nire bizia
Herio-lezearen menpetik,
eta beragaz hartuko nau. R/.

V/.   Ez bildur izan inor aberasten bada,
bere etxeko ondasunak gehitzen baditu;
hiltzean ez dau beragaz ezer eroango,
aberastasunak ez deutsa jarraituko. R/.

V/.   Bizi zala, bere burua zoriontzen eban:
«Goratu egiten haue, dana ondo doakialako».
Baina asaben artera joango da,
gehiago argirik ikusiko ez dabenen artera. R/.

 

I. eta II. urteetan

Aleluia

Ik. 1 Ts 2, 13

R/.   Aleluia.

V/.   Onartu egizue Jainkoaren hitza,
        ez giza hitz huts lez,
        Jainkoaren hitz lez baino, halan da-eta. R/.

 

Ebanjelioa

Hoba dozu eskubakar betiko bizian sartu,
bi eskuak dozuzala infernura joan baino.

✠ Jesu Kristoren Ebanjelioa San Markosen liburutik

Mk 9, 41-50

    Aldi haretan, Jesusek esan eutsen ikasleei: «Mesiasen jarraitzaile zarielako, baso bete ur bada be emoten deutsuena, benetan dinotsuet, ez da saririk barik geldituko. Nigan sinisten daben txiki honeetakoren baten sinismena okerbidean jartzen dauanak, hoba leuke errotarria samatik lotu eta itsasora botako balebe.
    Zure eskuak galbidean jartzen bazaitu, ebagi egizu; hoba dozu eskubakar betiko bizitzan sartu, esku biak dozuzala infernura, amatatu ezineko surtara, joan baino.
    Zure oinak galbidean jartzen bazaitu, ebagi egizu; hoba dozu hankabakar betiko bizitzan sartu, oin biak dozuzala infernura jaurtia izan baino.
    Zure begiak galbidean jartzen bazaitu, atara egizu; hoba dozu begibakar Jainkoaren erreinuan sartu, begi biak dozuzala infernura jaurtia izan baino; han ez da hiltzen barruko harra, ezta sua be amatatzen.
    Izan be, suaz gazitu behar dira danak. Gauza ona da gatza; baina gatza gazatzen bada, zelan gazitu barriro? Euki egizue gatza zeuongan eta zagoze bakean alkarrekin».

Jaunak esana.

 

IRUZKINA

Jesusek saria aitatzen dau, saritua izatea. Saritua izango da detaile txikiena daukana bera ere.

Baina zer ulertzen dogu sariaz? Besteagaitik egiten dan edozer berez da saria, gizakoiago egiten gaitulako.

Era berean, bestea gizagetu daiken edozerk norbera gizagetzen dau, eta berez da norberaren kalterako.

Baina gu ez gabilz parametrootan. Guk uste dogu besteen alde egiten doguntxoa Jainkoak kontuan hartuko dauala eta horren ordaina emongo deuskula arinago-beranduago.

Holan pentsatzea izten ez badogu… Ez dogu inoiz ulertuko bestearen alde egin neikeana egiten ez badot, berez dodala kaltegarri, nire gizatasunean hazteko erea eukita gauzatu ez dodalako.

Hauxe da jazoten jakuna saria heriotza ondoren jatorkula uste dogunean.

Ulertu daigun, ba: gure lehen zeregina geure gizatasunean haztea da, eta hori bideratzen dauan edozer gauzatu beharrekoa dogu; eta eragozten dauan edozer saihestu beharreko.

Eta bardin bestea gizatze orduan ere.

 

Urtean Zeharreko VII. barikua

I. urtean

I. Irakurgaia

Balio neurtezina dau adiskideak.

Siraken liburutik

Si 6, 5-17

    Aho goxoak adiskideak ugaritzen ditu,
mihin atseginak hartu-emon onak gehitzen.
Izan daitezala asko agurtzen zaituenak,
baina aholkulariak milatik bat.
Adiskide bat egiten dozunean, ibili kontuz,
eta ez jarri arinegi konfiantza harengan,
izaten da-eta nor berari komeni jakonean lagun danik,
eta atsekabealdian irauten ez dauanik.
Izaten da adiskiderik, arerio bihurtu
eta, zuen arteko auzia argitaratuz, lotsatuazoten zaituanik.
Izaten da adiskiderik, mahaikide izan
eta atsekabealdian irauten ez dauanik;
oparotasunean zabiltzanean, zugaz bat da,
zure zerbitzariakaz be atsegingarri;
baina behea jota bazagoz, aurka jarriko jatzu
eta ezkutatu egingo da zugandik.
Urrundu zaitez arerioengandik, ibili kontuz adiskideekin.

Adiskide zintzoa babesleku segurua da;
aurkitzen dauanak altxorra aurkitzen dau.
Adiskide zintzoak ez dau preziorik, balio neurtuezina dau.
Adiskide zintzoa osasungarri da bizitzan;
Jaunari begirune deutsoenek aurkituko dabe.
Jaunari begirune deutsanak ondo bideratzen dau adiskidetasuna;
zelakoa dan bera, halakoa izango da laguna.

Jaunak esana.

 

Erantzun salmoa

Sal 119 [118], 12 eta 16. 18 eta 27. 34-35 (R/. 35a)

R/.   Gidatu nagizu, Jauna, zeure aginduen bidetik.

V/.   Bedeinkatua Zu, Jauna,
irakatsi niri zeure arauak.
Zure arauetan dot gozamena,
zure hitzak ez ditut ahazten. R/.

V/.   Edegi nire begiak, ikusi daidazan
zure legearen irakaspen harrigarriak.
Ulertuazo niri zeure legeen bidea,
eta hausnartuko ditut zure egintza harrigarriak. R/.

V/.   Emoidazu ulermena, eta beteko dot zure legea,
bihotz-bihotzez dot gordeko.
Gidatu nagizu zeure aginduen bidetik,
horixe dot-eta atsegin. R/.

 

II. urtean

I. Irakurgaia

Ate-atean da epailea.

Santiago Apostoluaren epistolatik

St 5, 9-12

    Senideok: Ez ibili bata bestearen aurka marmarka, kondenatu ez zagieezan; begira, epailea ate-atean da.
    Senideok, hartu egizuez sufrimentuaren eta pazientziaren eredutzat Jaunaren izenean berba egin eben profetak. Zoriontsu autortzen doguz holako eroapena izan ebenak. Ezaguna dozue Joben pazientzia, eta badakizue zelako azkena emon eutson Jaunak; Jauna, izan be, bihozbera da eta errukiorra.
    Baina guztien gainetik, ene senideok, ez egin zinik, ez zeruagaitik, ez lurragaitik, ezta beste edozergaitik be. Zuek esan «bai», bai danean, eta «ez», ez danean, Jainkoak kondenatu ez zagiezan.

Jaunak esana.

 

Erantzun salmoa

Sal 103 [102], 1-2. 3-4. 8-9. 11-12 (R/. 8a)

R/.   Bihozbera eta errukiorra da Jauna.

V/.   Bedeinkatu begi nire arimak Jauna,
nire barru osoak haren izen santua.
Bedeinkatu begi nire arimak Jauna,
ez bedi ahaztu haren mesedeaz. R/.

V/.   Erru guztiak deutsuz parkatzen,
gatx guztiak osatzen;
zure bizia hilobitik askatzen dau,
maitasunez eta errukiz koroatzen zaitu. R/.

V/.   Bihozbera eta errukiorra da Jauna,
hasarregatxa eta onginahiz betea.
Ez dihardu eten barik auzitan,
ez dau hasarrea betiko gordetzen. R/.

V/.   Zelan zerua lurraren gainean garai,
halan haren maitasuna begirune deutsoenentzat handi;
zelan sortaldea sartaldetik urrun,
halan ditu harek gure hobenak gugandik urruntzen. R/.

 

I. eta II. urteetan

Aleluia

Ik. Jn 17, 17b. a

R/.   Aleluia.

V/.   Zure hitza da egia, Jauna;
        sagaratu gagizuz egiaren bidez. R/.

 

Ebanjelioa

Jainkoak bat egin dauana
ez begi gizakiak banatu.

✠ Jesu Kristoren Ebanjelioa San Markosen liburutik

Mk 10, 1-12

    Aldi haretan, Jesus Judeako mugetan sartu eta Jordan ibaiaz bestaldera igaro zan. Barriro jentetza handia batu jakon eta bera, ohi ebanez, irakasten hasi jaken.  Hurreratu jakozan fariseu batzuk eta, Jesus zertan harrapatuko, itaundu eutsoen: «Bidezko ete jako gizonari emaztea iztea?» Harek erantzun eutsen: «Zer agindu eutsuen horren gainean Moisesek?» Eta hareek: «Moisesek dibortzio-agiria idatzi eta emaztea izteko baimena emon euskun».
    Jesusek esan eutsen: «Zeuen burugogorkeriagaitik emon eutsuen Moisesek lege hori. Baina, munduaren hasieratik, Jainkoak gizonezko eta andrazko egin zituan; horregaitik, gizasemeak bere aita-amak itziko ditu eta emaztearekin alkartuko da, eta biak bat izango dira. Beraz, aurrerantzean ez dira bi, bat baino. Holan, bada, Jainkoak bat egin dauana ez begi gizakiak banatu».
    Gero, etxean, arazo berberari buruz itaundu eutsoen ikasleek. Jesusek esan eutsen: «Bere emaztea itzi eta beste bategaz ezkontzen danak adulterioa egiten dau lehenengoaren kontra; eta bere senarra itzi eta beste bategaz ezkontzen dan emazteak, adulterioa egiten dau era berean».

Jaunak esana.

 

IRUZKINA

Fariseuek deabruaren lanetan dihardue. Jesusi mahairatzen deutsoen arazoa urtenbide bakoa zan, euren artean etenbarik eztabaidatua; eta Jesusek erantzuten dauana erantzuten dauala ezin izango dau ihes egin.

Eta ikasleek eurek ere ez dakie nondik dabizen, haizeak nondik emoten deutsen.

Jakin beharreko gauzea litzateke adulterioa judeguen artean ez zala sexu kontu bat, jabetasunaren aurkako kontua baino.

Eta honetan Fariseuek amestu ere ezin egin eikeen eremuan sartzen dauz Jesusek gizonezkoaren eta andrazkoaren parekotasuna aurkezten deutsenean. Hareek ez eben kontuan hartzen gizonaren aldetiko adulterioa baino; eta Jesusek emakumearena ere mahairatzen deutse.

Honetan Eleizeak zehatz jokatzen dau: maitasun kontua da ezkontza bizitza; maitasunean datza sakramentua. Benetako maitasuna apurtu-ezina da.

Arazoa maitasunean barik norberekerian oinarritzen dan ezkon-bizitza da. Maitasunik ez dan lekuan ez dago sakramenturik; egin leiteken gauza bakarra, haren ezgauzatasuna autortzea litzateke (nulo deklaratzea).

 

Urtean Zeharreko VII. zapatua

I. urtean

I. Irakurgaia

Bere irudiko egin eban Jainkoak gizakia.

Siraken liburutik

Si 17, 1-13 (gr. 1-15)

    Jaunak lurretik sortu eban gizakia
eta bertara bihurtuazo barriro.
Egun-kopuru eta denpora jakina ezarri eutsen
eta lurreko gauzen gain ahalmena emon.
Berea lako indarrez jantzi ebazan eta bere irudiko egin.
Gainerako bizidunei gizakienganako bildurra sartu eutsen,
basapiztien eta hegaztien nagusi izan eitezan gizakiak.

Mihina, begiak eta belarriak eratu eutsezan,
pentsatzeko eta aukeratzeko ahalmena emon.
Jakintzaz eta bereizmenez bete ebazan,
eta ona zer dan eta txarra zer dan irakatsi.
Bere argia jarri eutsen bihotzean,
bere egintzen handitasuna igarri egien.
Honan, haren izen santua goratuko dabe,
egintzen handitasuna aldarrikatuko.

Gainera, jakintza emon eutsen, baita bizia dakarren legea be.
Betiko ituna egin eban hareekin, bere erabagiak jakinazo.
Haren aintza handia ikusi eben gizakien begiek,
haren ahots gorena entzun hareen belarriek.
Esan eutsen: «Aldendu bidebakokeriatik»;
bakotxari aginduak emon eutsozan lagun hurkoari buruz.
Jaunak beti dau aurrean gizakien jokabidea,
hau ez da ezkutatzen haren begietatik.

Jaunak esana.

 

Erantzun salmoa

Sal 103 [102], 13-14. 15-16. 17-18a (R/. 17)

R/.   Jaunaren maitasuna betidanik betidaino
        begirune deutsoenentzat.

V/.   Zelan aita seme-alabentzat errukior,
halan Jauna begirune deutsoenentzat bihozbera;
ondo daki-eta zerez garan eginak,
gogoan dau hautsa garala gu. R/.

V/.   Gizakia! Haren egunak bedarraren pareko,
zelaiko lorea lez da loratzen
eta, haizeak ikutu orduko, behingoan galtzen,
egoan tokian lorratzik itzi barik. R/.

V/.   Jaunaren maitasuna, barriz, betidanik betidaino
begirune deutsoenentzat,
haren salbazino-asmoak belaunez belaun dirau
haren ituna gordetzen dabenentzat. R/.

 

II. urtean

I. Irakurgaia

Indar handia dau zintzoaren otoitz sutsuak.

Santiago Apostoluaren epistolatik

St 5, 13-20

    Senide maiteok: Zuetako inor sufritzen dagoala? Egin dagiala otoitz. Pozik dagoala? Kantatu dagizala gorazarreak. Zuetako inor gaixo dagoala? Dei egin deiela eleiza arduradunei, beraren alde otoitz egin eta Jaunaren izenean orioz igurtzi dagien. Fedez egindako otoitzak osasuna emongo deutsa gaixoari eta jagiazoko dau Jaunak, eta parkatu egingo deutsa, pekaturik egin badau.
    Autortu batak besteari zeuen pekatuak eta egin otoitz alkarren alde, salbatu zaitezen. Indar handia dau zintzoaren otoitz sutsuak. Gu lako gizakia zan Elias be, baina sutsu egin eban otoitz euririk egin ez egian, eta hiru urte eta sei hilabetean ez eban lurrean euririk egin. Gero, otoitz egin eban barriro, eta zeruak euria emon eban eta lurrak frutua ekarri.
    Ene senideok, zuetarikoren bat egiatik aldentzen bada eta beste batek bihurtuazoten badau, jakizue, pekataria okerreko bidetik zuzentzen dauanak bere burua heriotzatik salbatzen dauala, eta pekatu askoren parkamena lortzen.

Jaunak esana.

 

Erantzun salmoa

Sal 141 [140], 1-2. 3 eta 8 (R/. 2a)

R/.   Nire otoitza izan bedi, Jauna, zure aurrean
        intsentsua lez.

V/.   Jauna, deika naukazu, zatorkidaz bizkor!
Entzun nire ahotsa dei egiten deutsudanean.
Nire otoitza izan bedi zure aurrean intsentsua lez,
nire esku jasoak arrats-oparia lez. R/.

V/.   Ezarri, Jauna, zaintzailea nire ahoari,
gorde nire ezpanetako atea.
Zugan ditut begiak, Jauna, ene Jauna,
Zugan naz babesten, ez nagizu hiltzen itzi. R/.

 

I. eta II. urteetan

Aleluia

Ik. Mt 11, 25

R/.   Aleluia.

V/.   Bedeinkatua Zu, Aita, zeru-lurren Jauna,
        erreinuari buruzko Barri Ona
        jente xumeari agertu deutsazulako. R/.

 

Ebanjelioa

Jainkoaren erreinua ume batek lez hartzen ez dauana
ez da ezelan be bertan sartuko.

✠ Jesu Kristoren Ebanjelioa San Markosen liburutik

Mk 10, 13-16

    Aldi haretan, umeak eroan eutsoezan Jesusi, ikutu egizan; ikasleek, baina, hasarre egiten eutsien. Hori ikustean, hasarratu egin zan Jesus eta esan eutsen: «Itzi umeei Nigana etortzen, ez galazo, ze, holakoena da Jainkoaren erreinua. Benetan dinotsuet: Jainkoaren erreinua ume batek lez hartzen ez dauana ez da ezelan be bertan sartuko».
    Eta, besarkatuz, bedeinkatu egiten zituan umeak, eskuak gainean ezarriz.

Jaunak esana.

 

IRUZKINA

«Ez galazo umeei nigana etortea…» Aurreragokoan esan dauana bera: ez galazo… gure taldekoa izan ez arren on egiten diharduanari. Inori ez geuskio galazo behar, ba.

Aldi haretan umeak ez ziran kontuan hartzekoak (emakumeak ere ez); enbarazu ziran gizonezkoen handitasunaren aurrean.

Baina Jesusentzat umeek nabaritzen dabe Erreinuak eskatzen dauzan baloreak: erabatekotasuna, apaltasuna, xalotasuna… nagusitan erakusten edo azaleratzen ez diran baloreak.

Horrexegaitik hartzen ditu Jesusek umeak erreinuan sartu gura dauanarentzako eredu lez. Eta harek onartze ezaugarria iragarten deutse eskuak gainean ezarriz eta bedeinkatuz.

Badaukagu horretan aurreratu beharrik gizarte matxista eta patriarkal honetatik urten gura badogu, zeruetako erreinuaren testigu izateko gure inguruan.