IV. astea

Urtean Zeharreko IV. astelehena

I. urtean

 

I. Irakurgaia

Sinismenari esker erreinuak menperatu ebezan.
Jainkoak zeozer hobea prestatu eban guretzat.

Hebrearrei egindako epistolatik

Heb 11, 32-40

    Senideok: Zertan jarraitu hitz egiten? Ez neuke denporarik nahiko izango, Gedeon, Barak, Samson, Jefte, David, Samuel eta profetei buruz berbetan hasiko banintz.
    Sinismenari esker erreinuak menperatu ebezan, justizia egin, Jainkoak agindutakoa eskuratu, lehoien ahoak itxi, su gartsuak amatatu, ezpataz hilak izateari ihes egin, gaixotasunetatik osatu, guduan bulartsu jokatu eta atzerritarren gudari-taldeei atzera eragin.
    Emakume batzuek berbizturik berreskuratu ebezan euren hildakoak. Beste batzuk, barriz, torturapean hil ziran, handik libratzeari uko eginez, bizitza hobera bizteko itxaropenagaitik; beste batzuek irainak eta zigorradak, kateak eta espetxeak eroan ebezan; harrikatu egin ebezan, zerraz ebagi, ezpataz hil; hara eta hona ibili ziran, ardi- eta ahuntz-narruz estaldurik, premina gorrian, erasopean eta tratu txarrak hartuz. Munduak merezi baino hobeak ziran eta noraezean ibili ziran basamortuetan, mendietan eta lurreko leza eta kobazuloetan.
    Baina hareek, euren sinismenagaitik Jainkoak onartu ebazan arren, ez eben eskuratu Jainkoak agindutakoa; izan be, Jainkoak zeozer hobea prestatu eban guretzat, eta ez eban nahi izan hareek helmugara gu barik heltzerik.

Jaunak esana.

 

Erantzun salmoa

Sal 31 [30], 20. 21-22. 23. 24 (R/. 25)

R/.   Izan bihotz, Jaunagan itxaroten dozuen guztiok!

V/.   Bai handia, Jauna, zure ontasuna!
Begirune deutsuenentzat dozu gordea,
Zugan babesten diranei agertzen deutsezu
jentearen aurrean. R/.

V/.   Zeure aurpegiaren babespean gordetzen dozuz
jentearen azpikerietatik;
zeure txabolan babesten dozuz
mihinen liskarretatik.
Bedeinkatua Jauna,
mirariak egin ditu-eta nire alde maitasunez
uri gotorretik. R/.

V/.   Hauxe esan neban nik larriturik:
«Bota egin nozu zeure begi-bistatik».
Zuk, ostera,  entzun zenduan nire erregua,
laguntza eske oihu egin neutsunean. R/.

V/.   Maitatu egizue Jauna, haren fededun guztiok.
Jaunak zaintzen ditu leial jakozanak;
harroei, barriz, ordain gogorra emoten deutse. R/.

 

II. urtean

I. Irakurgaia 

Goazen ihesi Absalomengandik.
Madarikatu nagiala Xemeik, Jaunak agindu deutsan ezkero.

Samuel bigarren liburutik    

2 Sm 15, 13-14. 30; 16, 5-13a

    Egun hareetan, gizon batek barri hau ekarri eutson Davidi: «Israeldar guztiak Absalomen alde jarri dira». Orduan, esan eutsen Davidek Jerusalemen beragaz ebazan zerbitzariei: «Goazen ihesi; bestela, Absalomek ez deusku ihesbiderik itziko. Abiatu zaiteze lehenbailehen; ez dadila jazo berak, bizkorrago ibiliz, gu harrapatzea eta hondamena ekartzea, uriko guztiak ezpataz garbituz».
    David Oliamendiko maldan gora joian negarrez, burua estaldurik eta oinutsik; haregaz zan jente guztia be, burua estaldurik, negarrez joian aldapan gora.
    David erregea Bahurim urira heldu zanean, Ximei izeneko gizon batek urten eutson handik, Gera-ren semea, Saulen leinukoa; madarikazino baten etorren, David erregeari eta beronen zerbitzariei harriak jaurtiz. Jente guztia eta gudariak erregearen ezker-eskuma jarri ziran.
    Ximeik honan madarikatzen eban erregea: «Alde, alde hemendik, gizon odolzale eta maltzur gaizto hori! Saulen familian eragin dozuzan hildako guztien ordaina emon deutsu Jaunak. Erreinua kendu zeuntson hari; orain Jaunak zure seme Absalomi emon deutsa. Zeure gaiztakeriak hartu zaitu azpian, hiltzaile hori».
    Abixaik, Tzeruiaren semeak, esan eutson erregeari: «Zer? Holan madarikatu behar ete dau txakur akabatu horrek nire errege jauna? Itzi egidazu joaten, eta samea ebagiko deutsat!»
    Erregeak erantzun eutson: «Hau ez da zuen arazoa, Tzeruiaren semeok! Jaunak David madarikatzeko agindu badeutsa, nork hartu leikio horregaitik kargu?» Eta esan eutsen Abixairi eta zerbitzari guztiei: «Nire erraietatik sortutako semea ni hil nahian dabil, eta harritu egiten zarie benjamindar horregaz? Madarikatu nagiala, Jaunak agindu deutsan ezkero. Beharbada, Jaunak ikusiko dau nire atsekabea eta bedeinkazinoa ekarriko deust, gaurko madarikazinoaren ordain».
    Davidek eta haren lagunek bidean aurrera jarraitu eben.

Jaunak esana.

 

Erantzun salmoa

Sal 3, 2-3. 4-5. 6-7 (R/. 7b)

R/.   Jagi zaitez, Jauna, salbatu nagizu!

V/.   Jauna, bai ugari dirala nire arerioak,
bai ugari nire aurka jagitzen diranak.
Ugari dira nitaz dinoenak:
«Ez dau salbazinorik Jainkoagan». R/.

V/.   Baina Zu zaitut, Jauna, babeski, Zeu neure ohore;
Zuk deustazu burua jasotzen.
Oihuka dei egiten deutsat Jaunari,
eta erantzuten deust bere mendi santutik. R/.

V/.   Oheratzen naz, lokartu eta esnatzen,
Jaunak deust-eta eusten.
Milaka areriok inguratzen banau be
nik bildurrik ez. R/.

 

I. eta II. urteetan

Aleluia               

Lk 7, 16

R/.   Aleluia.

V/.   Profeta handia sortu da gure artean,
        eta Jainkoa bere herria salbatzera etorri da. R/.

 

Ebanjelioa      

Urten egik gizon honengandik, espiritu gaizto horrek!

✠  Jesu Kristoren Ebanjelioa San Markosen liburutik

Mk 5, 1-20

    Aldi haretan, Jesus eta ikasleak itsasoaz bestaldera joan ziran, gerasatarren lurraldera. Jesus ontzitik jatsi zaneko, espiritu gaiztoaren menpe egoan gizon batek urten eutson hilobi artetik bidera. Hilobietan bizi zan, eta ezin eban inork lotuta euki, ezta katez be; askotan lotu izan eben girgiluz eta katez, baina harek kateak hausi eta oin-burdinak apurtu egiten zituan, eta ez zan inor be ha menperatzeko gauza. Gau eta egun, hilobi artean eta mendiz mendi ibiltzen zan gelditu barik, oihuka eta bere burua harriz zauritzen.
    Urrutitik Jesus ikustean, lasterka joan eta aurrean ahuspeztu jakon. Eta oihu handiz esan eutson: «Zer dozu nigaz, Jesus, Goi-goiko Jainkoaren Seme horrek? Jainkoarren, ez nagizu oinazetu». Izan be, Jesusek hauxe agindu eutson-eta: «Urten egik gizon honengandik, espiritu gaizto horrek!»
    Orduan, Jesusek itaundu eutson: «Zelan dok izena?» Harek erantzun: «Taldea, asko gara-eta». Eta arren eta arren eskatzen eutson, ez egizala lurralde haretatik kanpora bialdu.
    Txarri-aldra handia ebilen mendi inguru haretan, musturketan. Espiritu txarrek eskatu eutsoen Jesusi: «Bialdu gagizuz txarrietara, euretan sartu gaitezan». Harek baimena emon eutsen; orduan, espiritu gaiztoak gizonagandik urten eta txarrietan sartu ziran, eta txarri-aldra labarrean behera itsasora jausi zan; bi mila txarri inguru ito ziran.
    Txarrizainek iges egin eta gertatuaren barri zabaldu eben herrian eta auzoetan; eta jentea, zer gertatu zan ikustera etorri zan. Jesusengana heltzean, han ikusi eben deabruduna, jesarrita, jantzita eta bere senean, artean deabru-taldearen menpe egoan haxe berbera, eta guztiz ikaratu ziran. Ikusi ebenek, deabrudunari gertatua eta txarriena kontatu eutsien. Orduan, euren lur-mugetatik alde egiteko eskatu eutsoen Jesusi.
    Jesusek ontzira igotzean, deabrudun izanak arren eskatzen eutson beragaz ibiltzen izteko; baina Jesusek ez eutson itzi, ezpada ze, hauxe esan eutson: «Zoaz etxera, zeure senitartera, eta jakin eragin Jaunak, zutaz errukiturik, egin deutsun guztia». Joan zan, bada, eta Jesusek egin eutsona iragartzen hasi zan Dekapolisko lurraldean. Harriturik gelditzen ziran danak.

Jaunak esana.

 

IRUZKINA

Jesusen ahalmena ezagutzen jarraitzen dogu Markos ebanjelariaren eskutik. Oraingoan, Jesusek atzerrian jardungo dau. Jesusen ahalmena, ba, ez da bere lurraldeari mugatua; Jainkoaren erreinua atzerrian ere iragarri behar da, asko izan arren aurkako indarrak.

Honeek Jesusi gogor egiten deutsoe. Gaixoz josita dagoan gizon bat dogu horren adierazle. Harek bere egoeran jarraitzea dau nahiago, Jesusek oraindino txarrago ipintea baino. Baina Jesus ez jatorko kalte egitera, daukazan deabruetatik askatzera baino.

Txarriak trokan behera itsasora jausteak Egiptotik urtetean Faraonen gudariak itsasoan galtzea ekarri leigu gogora. Txarkeriaren aurkako Jesusen ahalmena atzerritarrak ere askatzen agertzen da; baina ez jakoz danak inguratzen.

Batzuk eurenean eta euren ziurtasunetan jarraitzea dabe nahiago, eta euren lurraldetik alde egiteko eskatuko deutsoe.

Osatuak haren atzetik joan gura dau, haren ikasle izan gura dau. Baina Jesusek bere etxera bialtzen dau han ere iragarria izan daiten Jainkoaren erreinua. Eta halantxe egingo dau oihu handiz, berari jazoa aldarrikatuz.

Guk ere egingo bagendu topo osatu geinkezan Jesusegaz, ziur emongo geukela horren barri.

 

 

 

Urtean Zeharreko IV. martitzena

I. urtean

 

I. Irakurgaia 

Ekin deiogun atzera egin barik
aurrean dogun lasterketari.

Hebrearrei egindako epistolatik    

Heb 12, 1-4

    Senideok: Hainbat eta hainbat testiguz inguraturik gagozan ezkero, itzi dagigun oztopo jakun guztia eta inguratzen gaituan pekatua, eta ekin deiogun atzera egin barik aurrean dogun lasterketari. Jarri daiguzan begiak sinismenaren iturri eta betetzaile dogun Jesusengan. Honek be, itxaroten eban zorionagaitik, kurutzean hiltzea onartu eban, heriotza lotsagarria zala kontuan hartu barik, eta orain Jainkoaren tronuaren eskumaldean jesarrita dago.
    Izan egizue, bada, gogoan pekatarien aldetik halako erasoaldia jasan eban ha, adorea galdu eta atzera egin ez dagizuen. Oraindino ez zarie bizia galtzeraino heldu pekatuaren aurkako zeuen burrukan.

Jaunak esana.

 

Erantzun salmoa

Sal 22 [21], 26b-27. 28. 30abcd. 30e-32 (R/. ik. 27b)

R/.   Goratuko zaitue, Jauna, zure bila dabiltzanek.

V/.   Beteko ditut neure agintzariak begirune deutsoenen aurrean.
Asetzeraino jango dabe behartsuek,
goratuko dabe Jauna beraren bila dabiltzanek.
Bizi bedi zuen bihotza betiko! R/.

V/.   Gogoratuko dira eta Jaunagana bihurtuko
lurreko herri guztiak,
haren aurrean ahuspeztuko dira
herrietako familia guztiak. R/.

V/.   Haren aurrean ahuspeztuko dira
lurpean lo dagozan guztiak,
haren aurrean makurtuko
hilobiko hautsera jatsiak. R/.

V/.   Ni, ostera, harentzat biziko naz,
nire ondorengoek Jauna zerbiduko dabe,
haretaz hitz egingo deutsie datozan gizaldiei,
haren salbazino-egintza iragarriko deutsoe
sortzeko dagoan herriari:
«Holan jokatu dau Jaunak». R/.

 

II. urtean

I. Irakurgaia 

Ene seme Absalom,
zergaitik ez naz ni hil zure ordez?

Samuel bigarren liburutik

2 Sm 18, 9-10. 14b. 24-25a. 30–19, 4

    Egun hareetan, Absalomek, mando gainean joiala, Daviden gudariekin topo egin eban uste barik. Mandoa haretx handi baten azpira sartu zala, Absalomi haretx-adarretan trabatu jakon ulea eta, mandoak aurrera egin ebalako, dindilizka gelditu zan zeruaren eta lurraren artean. Gizon batek ikusi eta barri emon eutson Joabi, esanez: «Haretx batetik dindilizka ikusi dot Absalom». Joabek hiru gezi hartu eta bihotzean sartu eutsozan Absalomi, ondino bizirik egoala haretxaren adarretan.
    David jesarrita egoan uri-sarrerako ate bien artean. Ate gaineko solairuan, harresi gainean, egoan zaintzaileak begiak jaso eta gizon bakarra arineketan etorrela ikusi eban. Eta oihuka jakinazo eutson erregeari.
    Erregeak esan eban: «Zagoz hor atzean». Joan zan atzera eta han gelditu zan.  Orduan, etiopiarrak agertu eta esan eban:  «Barri onak dakartsudaz, ene errege jauna. Zure alde urten dau gaur Jaunak eta libratu zaitu aurka jagi jatzuzan guztien eskuetatik».
    Erregeak itaundu eutson etiopiarrari: «Onik da Absalom gaztea?» Etiopiarrak erantzun: «Gazte horri jazo jakona bera jazo bekie nire errege jaunaren arerioei eta erregeari kalte egiteko beraren aurka jagi ziran guztiei». Orduan, erregea dardarka hasi zan. Uri-sarrera gaineko gelara igon eta negarrari emon eutson. Bidean hau inoan: «Ai ene seme Absalom, ene seme, ene seme Absalom! Zergaitik ez naz neu hil zure ordez? Absalom, ene seme, ene seme!»
    Jakinazo eutsoen Joabi erregea negarrez eta aieneka egoala Absalomengaitik. Egun haretan, garaipena dolu bihurtu zan gudaroste osoarentzat, jakin eben-eta gudariek erregea atsekabetuta egoala bere semeagaitik. Horregaitik, gudarostea isilik sartu zan urian, gudutik ihesi datorren gudarostea, lotsaz, isilik sartzen dan lez.

Jaunak esana.

Erantzun salmoa

Sal 86 [85], 1-2. 3-4. 5-6 (R/. 1a)

R/.   Makurtu belarria, Jauna, erantzun.

V/.   Makurtu belarria, Jauna, erantzun,
dohakabe eta behartsu nozu-eta.
Babestu nire bizia, Zuri lotuta nago-eta;
Zeu zaitut neure Jainko,
salbatu egizu Zugan uste on dauan zerbitzari hau. R/.

V/.   Erruki nitaz, Jauna,
Zuri deika dihardut-eta egun osoan.
Alaitu egizu zerbitzari honen bihotza,
Zugana jaso dot-eta gogoa, Jauna. R/.

V/.   Ona zara, Jauna, eta parkabera,
dei egiten deutsuenentzat onginahiz betea.
Entzun nire otoitza, Jauna,
jaramon egin nire erregu-oihuari. R/.

 

I. eta II. urteetan

Aleluia

Mt 8, 17

R/.   Aleluia.

V/.   Kristok bere gain hartu ebazan gure makaltasunak
        eta gure gatxak eroan. R/.

 

Ebanjelioa

Neskatila, zeuri dinotsut, jagi.

✠  Jesu Kristoren Ebanjelioa San Markosen liburutik

Mk 5, 21-43

    Aldi haretan, Jesus itsasoaz bestaldera bihurtu zanean, jente-talde handia batu jakon. Horretan, itsaso ondoan egoala, sinagogako buruzagietako bat etorri zan, Jairo eritxona; Jesus ikustean, honen oinetan ahuspezturik, arren eta arren eskatzen eutson: «Hilzorian dot alabatxua; zatoz haren gainean eskuak ezartzera, osatu dadin eta bizi».  Jesus harekin abiatu zan.
    Jente asko joiakon atzetik, estutuz. Bazan han emakume bat, hamabi urte haretan odoljarioa ebana. Hamaikatxu osagileren eskuetan gorriak ikusia zan, eta bere ondasun guztiak be horrexetan emonak zituan; baina osatu beharrean, gero eta okerrago joian. Jesusen barri entzunda, jente artean atzetik joan eta jantzia ikutu eutson, ze hauxe inoan bere artean: «Jantzia behinik behin ikutzen badeutsat, osatuko naz». Une berean gelditu jakon odoljarioa, eta gatxa osatuta eukala igarri eban bere gorputzean.
    Behingoan ohartu zan Jesus halako indar batek urten eutsola barrutik eta, jente artera bihurturik, itaundu eban: «Nork ikutu deust jantzia?» Ikasleek erantzun eutsoen: «Hainbeste jentek estutzen zaituala ikusi, eta nork ikutu zaituan itauntzen dozu?» Baina Jesus ingurura begira ebilen, nork egin ete eutson hori. Orduan, emakumeak, bildurrez dar-dar –ze, ondo ekian zer gertatu jakon–, oinetara jausi eta egia osoa autortu eutson. Baina Jesusek esan eutson: «Alaba, zeure sinismenak osatu zaitu; zoaz bakean, eta osatua bekizu gatxa».
    Oraindik berbetan ziharduala, sinagogako buruzagiaren etxetik etorri ziran, esanez: «Hil jatzu alaba. Zertarako emon neke gehiago Maisuari?» Baina Jesusek, berba horreek entzunik, sinagogako buruzagiari esan eutson: «Ez bildurrik izan; zuk sinistu egizu!»
    Ez eutson inori be berarekin joaten itzi, Pedrori, Santiagori eta honen anaia Joani izan ezik.
    Sinagogako buruzagiaren etxera heltzean, ikusi eban Jesusek hango astrapala, jentea negarrez eta zarataka. Sartu eta esan eutsen: «Zer dala-eta horrenbeste astrapala eta negar? Neskatila ez dago hilda, lo dago». Hareek barre egiten eutsoen. Baina Jesusek danak bialdu zituan kanpora eta, neskatilaren aita-amak eta beragaz zituanak hartuta, neska egoan tokira sartu zan. Neskari eskutik heldu eta esan eutson: «Talitha, kum» (hau da: «Neskatila, zeuri dinotsut, jagi»). Behingoan zutundu eta ibiltzen hasi zan, hamabi urte bazituan-eta. Jente guztia harri eta zur gelditu zan. Jesusek zorrotz agindu eutsen inork be ez egiala jakin. Eta neskatilari jaten emoteko esan eutsen.

Jaunak esana.

 

 

 

IRUZKINA

Ebanjelioak irakurtean Jesusengan jarten dogu gure arreta, haren esan-egintzez jabetzeko. Baina gaurkoan, inguruan jarriko bagendu gure arreta?

Izan daiguzan gogoan orduko arauek kutxatu lez baztertzen daben odol-jariodun emakumea: ez dau izenik; hamabi urtez (zenbaki teologikoa) bere ondasun guztiak eralgi dituana, hobekuntzarik igarri barik. Eta inguruan, Jesus estutzen dauan jentea.

Beste alde batetik, Sinagogako nagusia, izenduna (Jairo), eta alabea (12 urtekoa, zenbaki teologikoa) gaisorik daukana: hau ere izenik bakoa.

Jesusek bere ondora deitzen dauzan ikasleak: Pedro, Santiago eta Joan (zenbaki teologikoa hau ere).

Laburbatuz: emakumea erakundearen esparruan sendatu-ezinik dagozan guztien irudi dogu: erakundean salbamenik ez aurkitzea salatzen dau, eta Jesusengan dau ustea. Arauen hesi gainetik egingo dau jauzi, kutxatzearen bildurrez bada ere. Jesusek, osasunaz harago, duintasunean jarriko dau, haren sinismenaren eraginez.

Jairok ere, Sinagogako nagusi izan arren ez dau erakundean aurkitzen bere alabearentzako osasunik. Eta Jesus erakundeak baztertua dala jakinik ere, badoa harengana buru-belarri, debeku guztien gainetik.

Inguruko jenteak, ustea erakundean dauanak, enbarazu eta oztopo baino ez dira; eta hareik kanpora jaurti beharra dago; ikasleek ordezkatuko dabez.

Jesusen egintza sinismena biztea eta bizkortzea izango da. Honek osasuna baino harago doan salbamena emoten dau. Ez da hain agerikoa: horregaitik isilduazoten eta kanpora jaurtitzen ditu enparauak, ustea erakundean daukenak.

Erakundeak morroi-mirabe bihurtu geinkez; sinismenak Jainkoarekin topo egitera garoaz: salbamenera.

 

 

Urtean Zeharreko IV. eguaztena

I. urtean

I. Irakurgaia

Maite dauana zuzenduazoten dau Jaunak.

Hebrearrei egindako epistolatik

Heb 12, 4-7. 11-15

    Senideok: Oraindino ez zarie bizia galtzeraino heldu pekatuaren aurkako zeuen burrukan. Ahaztu egin dozue seme-alabei lez emoten jatzuen aholkua:

«Ene seme, ez baztertu Jaunaren eskarmentua,
ezta galdu be adorea, hasarre egiten badeutsu,
maite dauana dau-eta Jaunak zuzenduazoten
eta seme-alabatzat hartzen dauana dau zigortzen».

    Jasaten dozuena zuek zuzenduazoteko da; Jainkoak seme-alaba lez tratatzen zaitue. Izan be, zein seme nahiz alaba ez dau aitak zuzenduazoten?
    Egia esan, edozein eskarmentu, momentuan, mingarri da, ez pozgarri; baina, gerora, haren bidez hezitakoei bere frutuak ekartzen deutsez: bakea eta zuzentasuna. Jaso egizuez, beraz, esku jausiak eta belaun makalduak, eta ibili zaiteze bide zuzenean, herrenaren hanka hausi ez dadin, osatu baino.
    Ahalegindu zaiteze guztiekin bakean bizitzen, eta izan santu; bestela, ez dau inork Jauna ikusiko. Egon erne, inork Jainkoaren onginahia galdu ez dagian; ez dadila zuen artean guztiok nahastuko eta kutsatuko zaituen landare pozoitsurik hazi.

Jaunak esana.

 

Erantzun salmoa

Sal 103 [102], 1-2. 13-14. 17-18a (R/. 17)

R/.   Jaunaren maitasuna betidanik betidaino
        begirune deutsoenentzat.

V/.   Bedeinkatu begi nire arimak Jauna,
nire barru osoak haren izen santua.
Bedeinkatu begi nire arimak Jauna,
ez bedi ahaztu haren mesedeaz. R/.

V/.   Zelan aita seme-alabentzat errukior,
halan Jauna begirune deutsoenentzat bihozbera;
ondo daki-eta zerez garan eginak,
gogoan dau hautsa garala gu. R/.

V/.   Jaunaren maitasuna, barriz, betidanik betidaino
begirune deutsoenentzat,
haren salbazino-asmoak belaunez belaun dirau
haren ituna gordetzen dabenentzat. R/.

 

II. urtean

I. Irakurgaia

Neuk egin dot pekatu, herria zenbatzeko aginduz;
baina ardiak lez diran honeek zer egin dabe?

Samuel bigarren liburutik    

2 Sm 24, 2.  9-17

    Egun hareetan, David erregeak esan eutsen Joabi eta gudarosteko buruzagiei: «Zoaze Israelgo leinu guztietara, Dan uritik Beer-Xebaraino, eta egizue herritar guztien zenbaketa, hareen kopurua jakiteko».
    Joabek, beraz, herritarren kopurua emon eutson erregeari: Israelen zortzirehun mila gudagizon, ezpata erabiltzeko gai ziranak; Judan, barriz, bostehun mila.
    Herriaren zenbaketa egin ondoren, kezka sentidu eban Davidek barruan, eta esan eutson Jaunari: «Pekatu larria egin dot, bai, hori eginez. Halan be, Jauna, parkatu, mesedez, zeure zerbitzari honen pekatua, zorakeria egin dot-eta». David biharamon goizean jagi zanerako, zuzendu eutson Jaunak bere hitza Daviden zerbitzura egoan Gad profetari, esanez: «Zoaz eta esan Davidi: Hau dino Jaunak: "Hiru zigor jartzen deutsudaz aukeran; aukeratu bat eta haxe ezarriko deutsut"».
    Joan zan Gad Davidengana eta Jaunaren hitzaren barri emon eutson, esanez: «Zer nahi dozu: hiru urteko gosetea zeure herrian, hiru hilabetez zeure arerioen aurrean ihes egin beharra hareek segika dozuzala ala hiru eguneko izurritea zeure lurraldean? Hausnartu egizu, beraz, ea zer erantzun behar deutsadan bialdu nauanari».
    Davidek erantzun eutson Gadi: «Estualdi handian nago. Halan be, hobe Jaunaren eskuetan jausi, gizakien eskuetan baino, handia da-eta haren errukia». Eta Davidek izurritea aukeratu eban.
    Uzta-sasoia zan. Jaunak izurritea bialdu eban Israelera, goiz haretatik hasi eta jarritako epea bete arte. Hirurogeta hamar mila herritar hil ziran, Dan uritik Beer-Xebaraino.
    Aingeruak Jerusalem hondatzeko eskua luzatu ebanean, Jauna damutu egin zan zorigatx haretaz, eta herria hondatzen ziharduan aingeruari esan eutson: «Nahiko da! Geldi esku hori!» Davidek, aingerua herria jotzen ikusi ebanean, esan eutson Jaunari: «Neuk egin dot pekatu! Neu naz erruduna! Baina ardiak lez diran honeek, zer egin dabe? Zigortu gagizuz, arren, neu eta nire familia».

Jaunak esana.

 

Erantzun salmoa

Sal 32 [31], 1-2. 5. 6-7 (R/. ik. 5c)

R/.   Parkatu, Jauna, nire pekatuaren errua.

V/.   Zorionekoa hobena kendu
eta pekatua parkatu deutsoena.
Zorionekoa Jaunak errurik botatzen ez deutsana,
barruan maltzurkeriarik ez dauana. R/.

V/.   Orduan, autortu neutsun neure pekatua,
neure errua ez neutsun ezkutatu.
Esan neban: «Autortuko deutsat Jaunari neure hobena»,
eta Zuk parkatu zeunstan neure pekatuaren errua. R/.

V/.   Horregaitik, otoitz egin deizula fededunak
larrialdian aurkitzean;
uriola jausita be, ez dau harrapatuko.
Zeu zaitut babesleku, arriskutik libratzen nozu,
askapen-kantuz inguratzen. R/.

 

I. eta II. urteetan

Aleluia

Jn 10, 27

R/.   Aleluia.

V/.   Nire ardiek entzuten dabe nire ahotsa, dino Jaunak;
        Nik ezagutzen ditut,
        eta hareek jarraitu egiten deuste.  R/.

 

Ebanjelioa

Profetari edonon emoten deutsoe ohore,
bere herrian izan ezik.

✠  Jesu Kristoren Ebanjelioa San Markosen liburutik

Mk 6, 1-6

    Aldi haretan, Jesus bere herrira joan zan, ikasleak ondoren ebazala. Hurrengo zapatuan, sinagogan irakasten hasi zan. Entzule askok, harriturik, hauxe inoen: «Nondik dau honek hori guztia? Zer da emon jakon jakituria hori? Eta honen eskuz gertatzen diran mirari horreek? Hau ez ete da, ba, arotza, Mariaren semea eta Santiago, Jose, Judas eta Simonen anaia? Eta honen arrebak be ez ete dira hemen gure artean bizi?» Eta ezin eben sinistu harengan.
    Jesusek esan eutsen: «Profetari edonon emoten deutsoe ohore, bere herrian, senitartean eta etxean izan ezik».
    Eta ezin izan eban han miraririk egin; halan be, gaixo bakar batzuk osatu zituan, eskuak gainean ezarriz. Eta harrituta egoan hareen sinisgogorkeriaz. Gero, inguruko auzoetan ibili zan, irakasten.

Jaunak esana.

 

IRUZKINA

Oraingoan bere herritarren artean dihardu Jesusek, eta bazterreratzea hartuko dau hareengadik. Zer dala-eta? Eta, zer irakatsi leigu horrek guri?

Jesus bere herritik urrun dagoan artean entzute handikoa da eta bere herritarrek ere txalotua, ha ezagutzeko irrikitan dagoz. Baina euren artera etortean, honeek hur-hurretik ezagutu leikee zer esaten, zer egiten eta noren izenean diharduan… Eta hori ez da eurek uste eta itxaroten ebena…

Herritarren galderea —Jesus ondo baino hobeto ezagutzen dabela uste dabe-eta— ahalmenok ea nondik jatorkozan izango da. Eta, mesprezu modura, Mariaren semea dala esango dabe, aitarik ez dauala (hau da: noren antzeko izaterik ez daukala) esatea lez. Eta harriduratik mesprezura eta bazterkuntzara helduko dira. Larregi ezagutzen dabe. Ez deutse erantzuten euren uste eta ziurtasunei.

Inguru txiki baten egoteak, handik inora ere urten barik, norberea baino ez ezagutzeak, eta luzaroan gainera, ikuspegi murritzera eroan leike, adimena lehortu egiten dau, egiatzat norberea baino ez hartzera eroaten dau… Egoera horretan Jesusek ezin dau ezaugarritik egin.

Espiritua barritasuna dala dinogu. Daukagun Eleizea, eleiz alkarteak, eleizkizunak eta ohikune eta ohiturak… ez ete dira barriztau beharrekoak? Ez ete dogu geuretxotik urtenda, aldietara egokitu behar?

Espirituaren barritasunari, harek geureari ez deutsola erantzuten-eta, lepo emongo ete deutsagu?

 

 

Urtean Zeharreko IV. eguena

I. urtean

I. Irakurgaia

Sion mendira hurreratu zarie zuek,
Jainko biziaren urira.

Hebrearrei egindako epistolatik

Heb 12, 18-19. 21-24

    Senideok: Zuek ez zarie hurreratu, israeldarrak lez, ikutu leiteken mendi batera, su kiskalgarria, hodei itxia, ilunpea eta ekatxa egozan mendira; ez dozue entzun turuta-hotsik, ezta ahotsik be. Ahotsa entzun eben israeldarrek gehiago ez ekiela hitz egin eskatu eben. Hain zan ikaragarria ikuskizuna, Moisesek berak be esan eban-eta: «Bildur-ikaraz nago».
    Sion mendira hurreratu zarie zuek, Jainko biziaren urira, zeruko Jerusalemera, Jainkoa goresteko baturik dagozan milaka eta milaka aingerurengana, euren izenak zeruetan idatzirik dabezan lehen-semeen batzarrera, guztien epaile dan Jainkoagana, euren helburura heldu diran zintzoen espirituetara, eta itun barriaren bitarteko dan Jesusengana, Abelena baino indartsuago berba egiten dauan odolaz garbitu gaituanagana.

Jaunak esana.

 

Erantzun salmoa

Sal 48 [47], 2-3a. 3b-4. 9. 10-11 (R/. 10)

R/.   Oi Jainko, hausnartzen dogu zure maitasuna,
        zure tenpluaren erdian.

V/.   Handi da Jauna, guztiz goresgarri.
Gure Jainkoaren urian haren mendi santua:
muino eder, lur osoaren pozgarri. R/.

V/.   Sion mendi, Jainkoaren egoitza,
errege handiaren uri.
Hango jauregien artean
gotorleku sendo agiri da Jainkoa. R/.

V/.   Entzun genduana geuk ikusi dogu
Jaun ahalguztidunaren urian, geure Jainkoaren urian:
sendo ezarri dauala Jainkoak betiko. R/.

V/.   Oi Jainko, hausnartzen dogu zure maitasuna,
zure tenpluaren erdian.
Zure ospea lez zure gorespena be, oi Jainko,
mundu osora heltzen da;
zure eskua justiziaz dago betea. R/.

 

II. urtean

I. Irakurgaia

Ni banoa gizaki guztiak joaten diran bidetik.
Izan adore, Salomon, eta agertu zaitez gizon!

Erregeak lehenengo liburutik        

1 Erg 2, 1-4. 10-12

    Davidi hiltzeko egunak hurreratu jakozala, agindu honeek emon eutsozan bere seme Salomoni: «Ni banoa gizaki guztiak joaten diran bidetik. Izan adore eta agertu zaitez gizon! Bete Jaunaren, zeure Jainkoaren, aginduak, haren bideetan ibiliz. Gorde haren lege, arau, erabagi eta irakatsiak, Moisesen legean idatzirik dagoan lez, eta arrakasta izango dozu zeure jardunbide guztietan. Holan, Jaunak beteko dau niri emon deustan hitza: "Zure semeek zintzo jokatzen badabe, bihotz-bihotzez eta gogo osoz nire aurrean leial ibiliz, ez jatzu faltako ondorengorik Israelgo tronuan"».
    Hil zan David eta Daviden Urian hilobiratu eben. Berrogei urtez izan zan David Israelgo errege: zazpi urtez Hebronen eta hogeita hamahiru urtez Jerusalemen.
    Ondoren, Salomon jesarri zan bere aita Daviden tronuan, eta sendotu egin zan haren erregetza.

Jaunak esana.

 

Erantzun salmoa

1 Kro 29, 10bc. 11. 12 (R/. 12b)

R/.   Jauna, zeure menpe dozu dana.

V.    Bedeinkatua Zu, Jauna, gure aita Israelen Jainkoa,
betidanik betidaino. R/.

V/.   Zeurea dozu, Jauna, handitasuna eta indarra,
ospea, distira eta nagusitasuna;
zeurea dozu zeru-lurretan dagoan guztia,
zeurea, Jauna, erregetza
eta diran guztien gaineko nagusitza. R/.

V/.   Zugandik datoz aberastasuna eta ospea,
zeure menpe dozu dana.
Zeure esku dozu indarra eta ahalmena,
zeure esku guztia handi eta sendo egitea. R/.

 

I. eta II. urteetan

Aleluia

Mk 1, 15

R/.   Aleluia.

V/.   Hurrean da Jainkoaren erregetza, dino Jaunak:
        bihotz-barritu zaiteze eta sinistu Barri Ona. R/.

 

Ebanjelioa

Jesus Hamabiak bialtzen hasi zan.

✠  Jesu Kristoren Ebanjelioa San Markosen liburutik

Mk 6, 7-13

    Aldi haretan, Jesus Hamabiei dei egin eta binaka bialtzen hasi zan, espiritu gaiztoak botatzeko ahalmena emoten eutsela.
Biderako ezer ez hartzeko agindu eutsen, makila besterik: ez ogirik, ez zakutorik, ezta dirurik be garrikoan; oinetan sandaliak eroan egiezala; baina aldatzeko soinekorik ez.
    Gero, zelan jokatu esan eutsen: «Etxe baten sartzean, gelditu bertan herri haretatik urten arte. Eta non edo non onartzen ez bazaituee eta entzun gura ez badeutsuee, handik alde egitean, astindu zeuen oinetako hautsa, hareen kontrako seinaletzat».
    Joan ziran, bada, Hamabiak eta Barri Ona iragarri eben, jentea bihotzbarritu zedin. Deabru asko botatzen eben eta gaixo asko osatzen, olioz igurtziz.

Jaunak esana.

 

IRUZKINA

Holango aginduen aurrean babes bila jarten gara, eta atxakiak jarten arrazoiak balira lez.

Jesusi jarraitzeko, bertan-behera laga behar dodaz emaztea/senarra, seme-alabak, etxea, ondasunak… eta oinetakoekaz eta makila bategaz ibili behar dot hara-honaka?

Hau ezinezko dodanez, lehengotan jarraitzen dot, inguruak iruntsita eta harexen aginduetara.

Apur bat sakonduko bagendu, bakotxak bere lekua aurkituko geuke pasarte honen harira.

Jesusen antzeko profetak behar doguz; baina danok ez gara horretarako gauza. Pobrezian bizi izatea aintzat hartzen dogu; baina…

Eta, bitartean, uraren eskasia jasaten dogu, edo Planeta hondamenera daroagu, edo han-hor-hemen gosea eta gerrak…

Munduaren beste alderdiraino joan behar da zoriontsu izateko? Horrenbeste eralgi behar da, edo ondasunak metatu, edo sasoi bakotxeko aldatu arropak goitik-behera…?

Neurritasuna ezin ete geike DANOK bizi, bai eta familia bakotxak ere? Eta horrexetan ezin ete geikez hazi eta hezi gure seme-alabak?

Jesusen agindu honetan bai aurkitu leikela bere neurria gure bizikereak… ez mundu hobea lortzeko, Jesusen antzeko izateko baino.

 

 

Urtean Zeharreko IV. barikua

I. urtean

I. Irakurgaia

Jesu Kristo bat bera da atzo, gaur eta beti.

Hebrearrei egindako epistolatik

Heb 13, 1-8

    Senideok: Iraun egizue senide-maitasunean. Ez ahaztu arrotzei ostatu emoteaz, holan jokatuz, batzuek, jakin barik, aingeruak hartu ebezan-eta etxean. Izan gogoan preso dagozanak, zeuek be hareekin preso bazengoze lez; eta beste horrenbeste tratu txarrak hartzen dabezanak, zeuek be, hareek lez, gorputza dozue-eta.
    Hartu egizue guztiok ezkontza errespetu handiz, eta izan garbi ezkontza-hartu-emonetan, epaitu egingo ditu-eta Jainkoak lizunak eta adulteriogileak.
    Ez izan diru-gose; egon pozik dozuenagaz, Jaunak esana dau-eta: «Ez zaitut itziko, ez baztertuko». Beraz, uste osoz esan geinke:

«Jauna dot laguntzaile, ez naz bildur:
zer egin leike nire kontra gizakiak?»

    Gogoratu egizuez Jainkoaren hitza agertu eutsueen zeuen gidariak, eta jarraitu hareen fedeari, zelan bizi eta zelan hil diran kontuan hartuz.
    Jesu Kristo bat bera da atzo, gaur eta beti.

Jaunak esana.

 

Erantzun salmoa

Sal 27 [26], 1. 3. 5. 8c-9c (R/. 1a)

R/.   Jauna dot argi eta salbamen.

V/.   Jauna dot argi eta salbazino,
nork ni bildurtu?
Jauna biziaren babes,
nork ni ikaratu? R/.

V/.   Gudarosteak inguratzen banau be,
nire bihotzak bildurrik ez;
nire aurka burruka lehertzen bada be,
nire barrua konfiantzaz betea. R/.

V/.   Bere txabolan gordeko nau zoritxar-egunean,
bere txabolaren gordeenean ezkutatuko,
harkaitzera nau jasoko. R/.

V/.   Zure aurpegi bila nabil, Jauna,
ez ezkutatu niri zeure aurpegia.
Ez baztertu zeure zerbitzari hau hasarre,
Zeu zaitut-eta laguntza. R/.

 

II. urtean

I. Irakurgaia

Bihotz-bihotzez kantetan ebazan Davidek gorazarreak
eta bere Egilea maitatzen.

Siraken liburutik

Si 47, 2-13 (gr. 2-11)

    Sakrifizioetan zatirik aukeratuena koipea dan lez,
halantxe David israeldarren artean.
Aumeekin lez egin eban jolas lehoiekin,
bildotsakaz lez hartzakaz.
Ez ete eban gaztetan erraldoia hil
eta iraina kendu herriaren gainetik?
Habaila besoaz astindu
eta Goliaten harrokeria makurtuazo eban.
Izan be, dei egin eutson Jaunari, Goi-goikoari,
eta honek indarra emon eutson haren besoari,
gudari trebea menperatzeko
eta bere herriaren indarra sendotzeko.
Horregaitik, hamar milaren garaile lez ospatu eben David
eta Jaunak haren bidez bedeinkatu ebazalako goratu,
errege-koroa distiratsua eskeiniz.

Inguru guztiko arerioak zapaldu ebazan
eta aurka ebazan filistearrak menperatu,
hareen indarra behin betiko hausiz.
Bere egintza guztiakaitik eskerrak emon
eta goratu egiten eban Goi-goiko Santua;
bihotz-bihotzez kantatzen ebazan gorazarreak
eta bere Egilea maitatzen.
Abeslariak jarri ebazan altara aurrean,
doinu eztiz kantetan ebela.
Handitasuna emon eutsen jaiei,
ezin ederrago bihurtu ospakizunak;
Jaunaren izen santua goresten eben,
santutegia egunsentitik kantuz betetzen zala.

Parkatu egin eutsozan Jaunak pekatuak,
eta betiko sendotu haren indarra;
erregetza agindu eutson,
ospez beteriko tronua izango ebala Israelen.

Jaunak esana.

 

Erantzun salmoa

Sal 18 [17], 31. 47 eta 50. 51 (R/. ik. 47b)

R/.   Bedeinkatua nire Jainko salbatzailea!

V/.   Jainkoaren bidea jatorra da,
Jaunaren hitza sutan garbitua;
babesgarri da Jauna harengana jotzen daben guztientzat. R/.

V/.   Gora Jauna! Bedeinkatua nire harkaitza!
Goratua nire Jainko salbatzailea.
Horregaitik, Jauna, nazinoen artean goratuko zaitut
zure izena kantuz ospatuko dot. R/.

V/.   Garaipen handiak emon deutsaz erregeari,
maitasuna agertu deutsa bere igurtzitakoari,
Davidi eta honen ondorengoei betiko. R/.

 

I. eta II. urteetan

Aleluia

Ik. Lk 8, 15

R/.   Aleluia.

V/.   Zorionekoak Jainkoaren hitza
        bihotz onez eta zabalez entzunik,
        barruan gorde eta iraupenez frutua emoten dabenak. R/.

 

Ebanjelioa

Nik samea ebagi neutsan Joan berbera biztu da.

✠  Jesu Kristoren Ebanjelioa San Markosen liburutik

Mk 6, 14-29

    Aldi haretan, jakin eban Herodes erregeak Jesusen barri, beronen izena oso ezaguna zan-eta. Batzuk inoen: «Joan Bateatzailea biztu da hilen artetik; horregaitik dauka mirariak egiteko ahalmen hori». Beste batzuk, barriz: «Elias da». Eta beste batzuk: «Profeta da, antxinako profetak bezalakoa». Eretxi honeek entzutean, hauxe inoan Herodesek: «Nik samea ebagi neutsan Joan berbera biztu da».
    Izan be, Herodesek Joan harrapatu eta kartzelan lotuta eukan, Herodias zala-eta. Herodesen anaia Feliperen emaztea zan Herodias, baina Herodesek bere emaztetzat hartuta eukan, eta Joanek esaten eutson: «Ez jatzu bidezko zeure anaiaren emaztea eukitzea».
    Horregaitik, gorroto eban Herodiasek Joan eta hil egin nahi eban, baina ezin, ze Herodesek begirunea eutson Joani; gizon artez eta santutzat eukan, eta babestu egiten eban. Joanen berbek ardura sortzen baeutsoen be, gogoz entzuten eutson.
    Etorri jakon, baina, Herodiasi aukerako eguna: Herodesek, bere urtebetetzean, afaria emon eutsen agintari, gudalburu eta Galileako handikiei. Sartu zan jantokian Herodiasen alaba eta dantzan egin eban, eta atsegin izan jaken Herodesi eta mahaikideei. Orduan, erregeak esan eutson neskatilari: «Eskatu gura dozuna, eta emongo deutsut». Eta zin eginez agindu eutson: «Eskatu ahala guztia emongo deutsut, nire erreinuaren erdia bada be». Urten eban neskatilak eta bere amari itaundu eutson: «Zer eskatuko deutsat?» Amak erantzun: «Joan Bateatzailearen burua».
    Bihurtu zan arin-arin erregeagana eta eskaria egin eutson: «Emoidazu oraintxe berton Joan Bateatzailearen burua azpilean». Goibel jarri zan erregea, baina mahaikideen aurrean egindako zinagaitik, ez eutson ukatu gura izan. Behingoan, bere guardiako bat bialdu eban, Joanen burua ekartzeko aginduz. Joan zan ha kartzelara eta samea ebagi eutson, eta azpilean ekarri eban burua; neskatilari emon eutson, eta neskatilak amari.
    Joanen ikasleak, hori jakitean, haren gorpua jasotzera etorri eta hilobian lurperatu eben.

Jaunak esana.

 

Urtean Zeharreko IV. zapatua

I. urtean

I. Irakurgaia

Bakearen Jainkoak biztu eban hilen artetik artzain handia;
berak egin zagiezala gai egite on guztietarako.

Hebrearrei egindako epistolatik

Heb 13, 15-17. 20-21

    Senideok: Jesusen bitartez eskeini deiogun Jainkoari oparitzat etenbako gorespena, geure ezpanez beraren izena autortuz. Ez ahaztu on egitea eta alkarri laguntzea, holako opariak ditu-eta Jainkoak atsegin.
    Egizue zeuen gidarien esana eta izan euren menpeko, zuetaz arduratzen diralako eta zuen kontu emon beharko deutsoelako Jainkoari; holan, pozik beteko dabe euren egitekoa eta ez marmarka; hau zeuen kalterako izango litzateke.
    Bakea emoten dauan Jainkoak biztu eban hilen artetik Jesu Kristo gure Jauna, ardien artzain handia, betiko ituna ezartzeko bere odola isuri ebana. Bakearen Jainkoak egin zagiezala gai egite on guztien bidez bere nahia betetzeko; Jainkoak burutu dagiala gugan berari atsegin jakona Jesu Kristoren bidez. Aintza beroni gizaldi eta gizaldietan. Amen.

Jaunak esana.

 

Erantzun salmoa

Sal 23 [22], 1-3. 4. 5. 6 (R/. 1)

R/.   Jauna dot artzain, ez naz ezeren beharrean.

V/.   Jauna dot artzain, ez naz ezeren beharrean;
larre gurietan etzunazoten nau,
ur-bazter nasaira eroaten
eta indarrak deustaz barritzen;
bide segurutik naroa,
bere izenari ohore eginez. R/.

V/.   Ibar baltz ilunean banabil be,
ez naz gatxaren bildur,
Zu nigaz zagoz-eta;
zure artzain-makilak nasaitzen nau. R/.

V/.   Mahaia atontzen deustazu
arerioen begi-bistan;
olioz igurzten deustazu burua,
gainezka dot edontzia. R/.

V/.   Zoriona eta maitasuna ditut lagun,
bizitzako egun guztietan,
eta Jaunaren etxean biziko naz
amaibako egunetan. R/.

 

II. urtean

I. Irakurgaia

Emoiozu zeure zerbitzari honi adimen argia,
zeure herria gobernatzeko.

Erregeak lehenengo liburutik

1 Erg 3, 4-13

    Egun hareetan, Gabaonera joan zan Salomon erregea opariak eskeintzera, ha zan-eta kultu-lekurik nagusiena. Mila erre-opari eskeini eban Salomonek altara gainean. Gau haretan Jauna agertu jakon amesetan Gabaonen, eta esan eutson: «Eskatu nahi dozuna, eta emongo deutsut».
    Salomonek erantzun eutson: «Onginahi handia agertu zeuntsan zeure zerbitzari David nire aitari, zure aurrean leial, zuzen eta bihotz zintzoz jokatu ebalako. Eta onginahi hori gorde zeuntsan, ni, gaur haren tronuan jarririk nagoan seme hau, berari emonez. Jauna, ene Jainkoa, nire aita Daviden ordez neu, zeure zerbitzari hau, egin nozu errege. Ni, ostera, gaztea naz eta ez dakit zelan gobernatu. Zure zerbitzari hau Zeuk aukeratu dozun herriaren erdian dago, herri ikaragarria, ugariaren ugariz ezin konta ahalakoa. Emoiozu zeure zerbitzari honi adimen argia, zure herria gobernatzeko, eta ona eta txarra bereizteko. Bestela, zelan gobernatu zure herri handi hau?»
    Atsegin izan jakon Jaunari Salomonen eskaria, eta esan eutson: «Hori eskatu dozulako, eta ez zeuretzat urte asko, aberastasunak edota zeure arerioen heriotza, zuzen gobernatzeko jakituria eskatu dozulako baino, beteko dot zuk eskatua; zure aurretik inork izan ez dauan eta zure ondoren be inork izango ez dauan adinako jakituria eta adimena emongo deutsut. Gainera, eskatu ez dozuna be emongo deutsut: aberastasunak eta ospea, zure egunetan inongo erregek izango ez dituan neurrian».

Jaunak esana.

 

Erantzun salmoa

Sal 119 [118], 9-10. 11-12. 13-14 (R/. 12b)

R/.   Irakatsi niri, Jauna, zeure arauak.

V/.   Zelan gordeko dau gazteak bere burua garbi?
Bere jokaera zure hitzari egokituz.
Bihotz-bihotzez nabil zure bila,
ez itzi ni zure aginduetatik aldentzen. R/.

V/.   Gogoan jasotzen dot Zuk agindua,
zure aurka pekaturik ez egiteko.
Bedeinkatua Zu, Jauna,
irakatsi niri zeure arauak. R/.

V/.   Neure ezpanez adierazoten ditut
zure ahoko erabagi guztiak.
Zure aginduak betetzea niretzat pozgarriago,
aberastasun guztiak baino. R/.

 

I. eta II. urteetan

Aleluia

Jn 10, 27

R/.   Aleluia.

V/.   Nire ardiek entzuten dabe nire ahotsa, dino Jaunak;
        Nik ezagutzen ditut,
        eta hareek jarraitu egiten deuste. R/.

 

Ebanjelioa

Artzain bako ardiak lez ebiltzan.

✠  Jesu Kristoren Ebanjelioa San Markosen liburutik

Mk 6, 30-34

    Aldi haretan, apostoluek, barriro Jesusengana batu ziranean, egin eta irakatsi eben guztiaren barri emon eutsoen. Jesusek esan eutsen: «Zatoze zeuok bakarrik leku bakarti batera, eta hartu atseden apur bat». Ze, asko ziran joan-etorrian ebiltzanak, eta ez eben jateko be astirik.
    Orduan, bazter batera joan ziran eurak bakarrik, txalupaz. Baina jente askok ikusi zituan alde egiten, eta nora joiazan igarri be bai, eta herri guztietatik leku haretara jo eben lasterka, oinez, hareei aurrea hartuz.
    Txalupatik urtetean, Jesusek jentetza handia ikusi eban. Errukitu egin jaken, ze, artzain bako ardiak lez ebiltzan, eta luzaro irakasten hasi jaken.

Jaunak esana.