Urtean Zeharreko XXXIV. astelehena
I. urtean
I. Irakurgaia
Ez eban aurkitu
Daniel, Hananias, Mixael
eta Azarias
adinakorik.
Danielen Profezia liburuaren hasiera
Dn 1, 1-6. 8-20
Judako errege Joakimen erregealdiko
hirugarren urtean, Babiloniako errege Nabukodonosorrek Jerusalemen aurka etorri
eta inguratu egin eban, eta Jaunak eskura emon eutsozan Joakim Judako erregea
eta Jaunaren etxeko ontzi asko. Nabukodonosorrek Babiloniara eroan ebazan
ontziak eta bere jainkoen jauretxeko altxortegian gorde.
Erregeak bere funtzionarioburu zan Axpenazi
agindu eutson aukeratu egizala erregearen nahiz handikien familietako israeldar
gazte batzuk. Akatsik bakoak izan behar eben, itxura ederrekoak, jakituriaz
jantziak, adimentsuak eta kulturadunak, erregearen jauregian zerbitzeko
aukerakoak. Babiloniarren hizkuntza eta literatura irakatsi behar eutsiezan.
Erregeak agindu eban, gainera, beraren janari eta edari beretik emoteko hareei
egunero. Hiru urtez holan hezi ondoren, erregearen zerbitzari izango ziran.
Aukeratuen artean lau gazte judegu honeek
egozan: Daniel, Hananias, Mixael eta Azarias. Danielek erregearen janari-edariz
bere burua ez kutsatzea erabagi eban eta janari kutsatu hareetara ez behartzeko
eskatu eutson funtzionarioburuari.
Jainkoak eraginda, funtzionarioburuaren
onginahia eta errukia bereganatu ebazan Danielek; baina harek erantzun eutson:
«Erregeak berak erabagi dau zer jan eta zer edan behar dozuen; horregaitik,
errege jaunaren bildur naz, izan be, beste gazteei baino itxura txarragoa
ikusiko baleutsue, nire bizia jarriko zeunkie-eta arriskuan».
Funtzionarioburuak zaintzaile baten
ardurapean jarrita eukazan Daniel, Hananias, Mixael eta Azarias, eta Danielek
proposamen hau egin eutson: «Egizu proba gugaz hamar egunez; ez emon jaten eta
edaten barazkiak eta ura besterik. Ondoren, konparatu gure itxura eta
erregearen janaritik jaten daben gazteena, eta jokatu orduan gugaz
ikusitakoaren arabera».
Zaintzaileak onartu eban proposamena, eta
hamar eguneko proba egin eban hareekin. Hamar egunen buruan, erregearen
janaritik jan eben gazteak baino ederrago eta mardulago egozan. Ordutik,
agindutako janaria eta edaria baztertuz, barazkiak emoten eutsezan.
Jainkoak lau gazte hareei literatura eta
jakintza guztiak ikasteko adimena eta argitasuna emon eutsen. Danielek,
gainera, amesen eta ikuskarien esanahia argitzeko ahalmena eban.
Gazteen prestakuntzarako erregeak ezarritako
epea bete zanean, funtzionarioburuak Nabukodonosorri aurkeztu eutsozan.
Hareekin hitz egiten jardun eban erregeak, eta Daniel, Hananias, Mixael eta
Azarias lakorik ez eban aurkitu, eta laurak bere zerbitzurako hartu ebazan.
Jakituria eta buru-argitasuna behar zan arazoetan erregeak eretxia eskatzen
eutsenean, hareen erantzunak erreinuko azti eta igarle guztienak baino hamar
aldiz hobeak begitantzen jakozan.
Jaunak esana.
Erantzun salmoa
Dn 3, 52. 53. 54. 55. 56 (R/. ik. 52b)
V/. Bedeinkatua Zu, Jauna, gure asaben Jainkoa:
R/. Aintza eta gorespen Zuri gizaldietan!
V/. Bedeinkatua zure izen santua eta ospetsua: R/.
V/. Bedeinkatua Zu zeure tenplu santu eta ospetsuan: R/.
V/. Bedeinkatua Zu, errege-tronuan jesarrita zagozana: R/.
V/. Bedeinkatua Zu, kerubinen gainean jesarririk,
lezak
arakatzen dozuzana: R/.
V/. Bedeinkatua Zu zeru-sabaian: R/.
II. urtean
I. Irakurgaia
Kristoren eta
honen Aitaren izena
bekokian
idatzita eroien.
Apokalipsia liburutik
Ap 14, 1-3. 4b-5
Nik, Joanek, Bildotsa ikusi neban Sion
mendiaren gainean zutunik, eta haregaz batera ehun eta berrogeita lau mila
lagun, Bildotsaren eta honen Aitaren izena bekokian idatzita eroienak. Eta
zerutik etorren hotsa entzun neban, ur handien edo trumoi handi baten
burrundara lakoa, euren zitarak jotzen dabezan zitara-jotzaileen hotsa lakoa.
Kantu barria ziharduen kantatzen tronuaren
aurrean, lau izaki bizidunen eta zaharren aurrean; inork be ez eikean kantu ha
ikasi, lurrekoen artetik salbatutako ehun eta berrogeita lau mila hareek baino.
Honeek Bildotsari jarraitzen deutsoe, doan
lekura doala. Gizakien artetik salbatuak eta Jainkoarentzat eta Bildotsarentzat
lehen-frutu lez eskeiniak izan dira; honeen ahoan ez da maltzurkeriarik; akats
bakoak dira.
Jaunak esana.
Erantzun salmoa
Sal 24 [23], 1-2. 3-4b. 5-6 (R/. ik. 6)
R/. Hau da, Jauna, zure aurpegi bila dabiltzanen taldea.
V/. Jaunarena da lurra, eta lurra betetzen dauana,
mundua
eta bertan bizi diranak,
harek
ezarri dau-eta itsasoen gainean,
harek
finkatu lur azpiko ibaien gainean. R/.
V/. Jaunaren mendira nork igongo?
Haren
toki santuan nor egongo?
Eskuak
errubako eta bihotza garbi dituana,
sasijainkoetara
jotzen ez dauana. R/.
V/. Holakoa bedeinkatuko dau Jaunak,
justizia
egingo deutso Jainko salbatzaileak.
Hau
da haren bila ahalegintzen dan gizaldia,
Jakoben
Jainkoaren aurpegi bila dabilena. R/.
I. eta II. urteetan
Aleluia
Mt 24, 42a. 44
R/. Aleluia.
V/. Zagoze erne,
gitxien
uste dozuen orduan
etorriko
jatzue-eta Gizonaren Semea. R/.
Ebanjelioa
Alargun
behartsu bat ikusi eban
txanpon bi
botatzen.
✠ Jesu Kristoren Ebanjelioa San Lukasen liburutik
Lk 21, 1-4
Aldi haretan, begira egoala, aberats batzuk ikusi zituan Jesusek tenpluko diru-kutxara limosna botatzen. Ikusi eban emakume alargun txiro bat be txanpon bi botatzen. Eta esan eban: «Benetan dinotsuet: alargun behartsu honek beste guztiek baino gehiago bota dau. Izan be, beste guztiek sobran dabenetik egin dabe limosna; honek, ostera, bere urrian, bizitzeko eukan guztia emon dau».
Jaunak esana.
IRUZKINA
Jesusek begitu egiten dau ikusteko. Eta ikusten dauana ez da azaleko hutsa, barrukoagoa ere ikusten dau: aberatsak dirala batzuk eta emakume alargun txiro bestea… eta ondorioak ataraten dauz eta bereei jakinazo.
Begiratzen badogu, ikasi ere egin geike, eta ikasia partekatu. Baina ez ete da egia maila honetan ezer gitxi partekatzen dogula, bakotxak berean jarraitzen dogula eta, gehienez ere, kritikatu egiten dogula norbere jarreraren bat ezkutatzeko edo justifikatzeko?
Daukan guztia emoten dauanak —bera gitxi izan arren— asko maite dauala agertzen dau. Gainezka daukanetik emoten dauanak —asko izan arren— bererik ez dau-eta konprometitzen, ez dau maitasunik agertzen.
Ez dozu uste lehengo aldietan, pobreagoak ginanean, eskuzabalagoak ginala? Eta gaur, lehen baino asko gehiago daukagunean, zekenagoak garala, eta gehiago kritikatzen dogula Eleizea, ondasun handien jabe dala esateraino? Maite ete dogu Eleizea?
Emoten dogunak zenbateraino gagozan ondasunetatik aske edo eurei lotuta azaleratzen dau…
Urtean Zeharreko XXXIV. martitzena
I. urtean
I. Irakurgaia
Inoiz hondatuko
ez dan erreinua eraikiko dau Jainkoak,
eta beste
erreinuak hondatuko ditu.
Danielen Profezia liburutik
Dn 2, 31-45
Egun hareetan, esan eutson Danielek
Nabukodonosor erregeari: «Hauxe da ikusi dozuna, errege jauna: irudi erraldoi
bat egoan zure aurrean, guztiz distiratsua eta itxura bildurgarrikoa. Irudiaren
burua urre garbikoa zan, bularra eta besoak zidarrezkoak, sabela eta izterrak
brontzezkoak, hankak burdinazkoak; oinak, barriz, burdinazkoak eta
buztinezkoak.
Zu hari begira zengozala, harri bat askatu
zan menditik, inork be bultzatu barik, eta irudiaren burdinazko eta buztinezko
oinak jo eta txiki-txiki egin ebazan. Une berean, burdina eta buztina ez ezik,
brontzea, zidarra eta urrea be haustuta gelditu ziran, eta haizeak eroan
ebazan, udan larraineko lastoa lez, arrastorik be itzi barik. Bitartean, irudia
jo eban harria mendi handi bihurtu zan, eta mundu osoa bete eban.
Horixe izan da zure amesa. Orain amesaren
esanahia azalduko deutsut, errege jauna: Zeu zara danetan erregerik handiena;
zeuri emon deutsuz zeruko Jainkoak erregetza, agintea, ahalmena eta ohorea;
zure esku itzi ditu gizakiak, piztiak eta hegaztiak, edonon bizi dirala be;
guztien nagusi egin zaitu. Zeu zara, bada, urrezko burua.
Zure ondotik beste erreinu bat sortuko da,
zurea baino txikiagoa. Gero, hirugarren bat, brontzezkoa, mundu osoa
menperatuko dauana. Laugarren erreinu bat be izango da, burdina baizen gogorra;
zelan burdinak dana hausi eta apurtzen dauan, halan hausi eta apurtuko ditu
harek beste erreinuak.
Ikusi dozunez, oinak eta behatzak
burdinazkoak eta buztinezkoak ziran; erreinua zatitua izango dala esan nahi dau
horrek. Izango dau, bai, burdinaren gogortasunik be, burdina buztinagaz
nahastauta dago-eta, ikusi dozun lez. Oinetako behatzek, burdinaz eta buztinez
osatuak, hauxe esan nahi dabe: aldi berean indartsua eta makala izango dala
erreinua. Eta burdina buztinagaz nahastauta ikusteak beste hau be adierazoten
dau: ezkontzaz batuko dala erreinu horreetako jatorri desbardineko jentea,
baina ez dauala batasun iraunkorrik lortuko, burdinak eta buztinak alkarregaz
bat egiten ez daben lez.
Errege horreen sasoian, erreinu bat eraikiko
dau zeruko Jainkoak; hori ez dabe inoiz be hondatuko eta erreinu horren agintea
ez da inoiz beste herri baten eskuetara aldatuko. Gainerako guztiak hondatu eta
desegingo ditu, baina berak betiko iraungo dau. Horixe esan nahi dau, inork be
bultzatu barik, menditik askatu eta buztina, burdina, brontzea, zidarra eta
urrea txikitzen ikusi dozun harriak. Holan, errege, gerora jazoko dana
jakinarazo deutsu Jainko handiak. Egia da amesa, eta sinisgarria emon deutsudan
azalpena».
Jaunak esana.
Erantzun salmoa
Dn 3, 57. 58. 59. 60. 61 (R/. ik. 59b)
V/. Jaunaren sorkari guztiok, bedeinkatu egizue Jauna:
R/. Goratu eta ospatu gizaldietan!
V/. Jaunaren aingeruok, bedeinkatu egizue Jauna: R/.
V/. Zeruok, bedeinkatu egizue Jauna: R/.
V/. Zeru gaineko ur guztiok, bedeinkatu egizue Jauna: R/.
V/. Ortziko astro guztiok, bedeinkatu egizue Jauna: R/.
II. urtean
I. Irakurgaia
Ekin
uzta-batzeari,
helduta
dago-eta lurreko uzta.
Apokalipsia liburutik
Ap 14, 14-19
Nik, Joanek, hodei zuri bat ikusi neban, eta
hodeiaren gainean gizaseme antzeko norbait jesarrita, buruan urrezko koroa eta
eskuan igitai zorrotza ebazala.
Tenplutik beste aingeru batek urten eta
hodei gainean jesarrita egoanari esan eutson ahots handiz: «Hartu igitaia eta
ekin uzta-batzeari; heldu da igitatzeko ordua, helduta dago-eta lurreko uzta».
Eta hodei gainean jesarrita egoana igitatzen hasi zan eta lurreko uzta batu
eban.
Gero, beste aingeru batek urten eban zeruko
tenplutik, igitai zorrotza ebala harek be. Beste aingeru batek, suaren gain
agintea dauanak, urten eban altaratik, eta oihu egin eutson ahots handiz igitai
zorrotza ebanari: «Hartu zeure igitai zorrotza eta batu lurreko mahastiko
mordoak, mahatsa helduta dago-eta». Hasi zan aingerua igitatzen eta lurreko
mahastia batu eban eta mahatsa Jainkoaren zigorraren dolare handian bota.
Jaunak esana.
Erantzun salmoa
Sal 96 [95], 10. 11-12. 13 (R/. 13b)
R/. Badator Jauna lurra epaitzera.
V/. Esaizue nazinoetan: «Errege da Jauna.
Sendo
ezarrita dago mundua, ez da kili-kolo egongo;
herriak
zuzenbidez ditu epaitzen». R/.
V/. Poztu bedi zerua, alaitu lurra,
egin
begi orroe itsasoak eta bertako guztiak,
egin
jai landa zabalak eta bertan dan guztiak,
egin
poz-oihu, basoko zuhaitz guztiak. R/.
V/. Jaunaren aurrean, badator-eta,
badator
lurra epaitzera.
Justiziaz
epaituko dau mundua
eta
leialtasunez herriak. R/.
I. eta II. urteetan
Aleluia
Ap 2, 10c
R/. Aleluia.
V/. Izan zaiteze leial heriotzaraino, dino Jaunak,
eta
garaipen-koroa, betiko bizia, emongo deutsuet. R/.
Ebanjelioa
Ez da harririk harri gainean geldituko.
✠ Jesu Kristoren Ebanjelioa San Lukasen liburutik
Lk 21, 5-11
Aldi haretan, tenpluari buruz ziharduen
batzuk, harri ederrez eta opariz apainduta egoala aitatuz. Orduan, Jesusek esan
eutsen: «Etorriko da, hor ikusten dozuezan horreetatik guztietatik harririk
harri gainean geldituko ez dan sasoia; dana desegingo dabe».
Ikasleek itaundu eutsoen: «Maisu, noiz
gertatuko da hori? Eta zertan igarriko dogu gertatzera doana?»
Jesusek erantzun eutsen: «Kontuz, ez
zagiezala inork engainatu! Asko etorriko dira nire izenean, “neu naz Mesias”
edo “gainean da sasoia” esanez. Ez joan holakoen atzetik. Gerra- eta
iraultza-hotsak entzutean, ez ikaratu, ze, lehenengo gertatu beharrekoa da hori
guztiori; baina ez dator behingoan azkena».
Esan eutsen, gainera: «Nazinoa nazinoaren
aurka eta erreinua erreinuaren aurka altzatuko dira; lurrikara handiak izango
dira, eta izurriteak eta goseteak han eta hemen. Gauza ikaragarriak gertatuko
dira, eta seinale handiak agertuko zeruan.
Jaunak esana.
IRUZKINA
Gaur egun ere, turismoa egikeran, jauretxeak eta katedralak eta basilikak eta eleizak ikuskatzen eta goraltzen dira. Orduko judeguak harro egozan euren jauretxeaz eta gogoz goraltzen eben.
Zenbatek emongo ete eben (daben gaur ere) dirutzak Jauretxea eraikitzeko, emoten ebena Jainkoari eskeinia zala-eta.
Eta zein gitxik ikusten dauan bere bizikerea aldatua, barritua, bihurtua, hori egin ondoren…
Lukasek Jauretxea hondatua izan zanetik urteetara idazten dau, eta bere kristau taldeko sena agertzen dau.
Alde batetik Jesusek goraltzen dauan edertasuna kanpotikoa dala, eta ez dauala luzaroan iraungo.
Bestetik, berezko hondamenak edo gizakiak berak sortuak (gerrak) ugariak izango dirala, baina ez jakela bildurrik izan behar.
Lukasek luzarora begiratzen irakatsi nahi deutse, azkena laster dalakoan, azken hori luzatu egiten zala ikusten ebenei.
Gurea ez da, ba, azkena noiz izango dan jakitea, azkena egunero balitz lez bizi izatea baino: uste on osoa Jainkoagan jarrita, bildurretatik urrun.
Urtean Zeharreko XXXIV. eguaztena
I. urtean
I. Irakurgaia
Giza esku bat agertu zan eta hatzamarrez idazten hasi.
Danielen Profezia liburutik
Dn 5, 1-6. 13-14. 16-17. 23-28
Egun hareetan, Balxatzar erregeak mila
goi-funtzionario konbidatu ebazan jatordu handi batera, eta ardaoa edaten hasi
zan hareen aurrean. Ardaoak beroturik, bere aita Nabukodonosorrek Jerusalemgo
tenplutik hartu ebazan urrezko eta zidarrezko ontziak ekartzeko agindu eban,
bere funtzionario, emazte eta ohe-lagunekin batera hareetatik edateko asmoz.
Ekarri ebezan, bada, Jerusalemgo tenplutik hartutako urrezko eta zidarrezko
ontziak eta hareetatik edan eben erregeak eta funtzionarioek, beraren emazteek
eta ohe-lagunek. Ardaoa edaten eben bitartean, urre, zidar, brontze, burdina,
zur eta harrizko jainko-irudiak goresten hasi ziran.
Bat-batean giza esku bat agertu zan eta
aretoko horman, argimutilaren aurrean, hatzamarrez idazten hasi. Idazten
ziharduan eskua ikustean, erregea zuri-zuri jarri eta, burua nahastauta,
indarrik barik eta belaunak dar-dar gelditu zan.
Sartuarazo eben Daniel erregeagana eta honek
itaundu eutson: «Zu ete zara Daniel, nire aitak Judatik katigu ekarri ebazan
judeguetakoa? Jainkozko inspirazinoa dozula eta aparteko buru-argitasunaren,
adimenaren eta jakituriaren jaube zarala jakin dot. Zuk ba ei dakizu gauza
ilunak argitzen eta arazo korapilatsuak erabagitzen. Beraz, hor idatzia
irakurri eta esanahia azaltzen badeustazu, purpuraz jantziko zaitut, lepoan
urrezko katea jarriko, eta agintez hirugarrena izango zara nire erreinuan».
Danielek erantzun eutson: «Errege jauna,
gorde zeuretzat zeure erregaluak eta sariak, edota emon besteren bati. Baina
irakurriko deutsut hor idatzia eta azalduko esanahia. Zeruko Jaunaren aurka
jaso zara zu, haren tenpluko ontziak ekarriz eta zeure funtzionario, emazte eta
ohe-lagunekin ardaoa edateko erabiliz. Bitartean, urre, zidar, brontze,
burdina, zur eta harrizko jainko-irudiak, ezer ikusten, entzuten eta ulertzen
ez daben irudiak, goratu dozuz; baina ez deutsazu aintzarik emon zeure bizia
eta etorkizuna bere esku dituan Jainkoari. Horregaitik bialdu dau Jainkoak
idazki hori egin dauan eskua.
Idatzirik dagoana hauxe da: Mene, Tekel,
Parsin. Hitz horreen esanahia, barriz, hauxe: Menek "zenbatua" esan
nahi dau, hau da, zenbatu ditu Jainkoak zure erregetzako egunak eta muga jarri
deutse. Tekelek "pisatua" esan nahi dau, hau da, pisuan pisatu zaitue
eta eskas aurkitu. Parsinek "zatitua" esan nahi dau, hau da, zure
erreinua zatitua izan da eta mediarrei eta pertsiarrei emona».
Jaunak esana.
Erantzun salmoa
Dn 3, 62. 63. 64. 65. 66. 67 (R/. ik. 59b)
V/. Eguzki eta iretargi, bedeinkatu egizue Jauna:
R/. Goratu eta ospatu gizaldietan!
V/. Zeruko izarrok, bedeinkatu egizue Jauna: R/.
V/. Euri eta iruntz, bedeinkatu egizue Jauna: R/.
V/. Haize guztiok, bedeinkatu egizue Jauna: R/.
V/. Su eta bero, bedeinkatu egizue Jauna: R/.
V/. Hotz eta sargori, bedeinkatu egizue Jauna: R/.
II. urtean
I. Irakurgaia
Moisesen eta
Bildotsaren abestia
kantatzen eben.
Apokalipsia liburutik
Ap 15, 1-4
Nik, Joanek, beste seinale handi eta
harrigarri bat ikusi neban zeruan: zazpi aingeru zazpi izurritegaz; azken
izurriteak ziran, hareetan burutzen zan-eta Jainkoaren zigorra.
Ondoren, suz nahastautako kristalezko itsaso
antzeko zeozer ikusi neban, eta kristalezko itsasoaren ondoan, piztia, beronen
irudia eta izenaren zenbakia garaitu ebenak zutunik. Jainkoaren zitarak ebezan
eskuetan eta Jainkoaren zerbitzari Moisesen eta Bildotsaren abestia kantatzen
eben:
«Bai
handiak eta harrigarriak Zuk eginak,
oi
Jauna, Jainko ahalguztiduna!
Bai
zuzena eta leiala zure jokabidea,
oi
herrien Erregea!
Nork
ez Zuri begirune, Jauna?
Nork
ez goratu zure izena?
Zeu
bakarrik zara santua!
Herri
guztiak etorri
eta
zure aurrean ahuspeztuko dira,
zure
salbazino-asmoa agertu da-eta».
Jaunak esana.
Erantzun salmoa
Sal 98 [97], 1. 2-3b. 7-8. 9 (R/. Ap 15, 3b)
R/. Bai handiak eta harrigarriak Zuk eginak,
oi Jauna, Jainko ahalguztiduna!
V/. Kanta Jaunari kantu barria,
egintza
harrigarriak egin ditu-eta;
garaipena
emon deutso bere eskumak,
bere
beso santuak. R/.
V/. Bere garaipena ezagutuazo dau Jaunak,
bere
salbazino-egintza agertu nazinoen aurrean.
Ez
da ahaztu bere maitasunaz,
Israel
herriari deutson leialtasunaz. R/.
V/. Egin begi orroe itsasoak eta bertako guztiak,
munduak
eta bertan bizi diranek.
Egin
begie txalo ibaiek,
poz-oihu
aho batez mendiek. R/.
V/. Jaunaren aurrean,
badator-eta
lurra epaitzera.
Justiziaz
epaituko dau mundua,
eta
zuzenbidez herriak. R/.
I. eta II. urteetan
Aleluia
Ap 2, 10c
R/. Aleluia.
V/. Izan zaiteze leial heriotzaraino, dino Jaunak,
eta
garaipen-koroa, betiko bizia, emongo deutsuet. R/.
Ebanjelioa
Guztiek gorroto
izango deutsuee Nigaitik;
baina ez dozue
buruko ule bat be galduko.
✠ Jesu Kristoren Ebanjelioa San Lukasen liburutik
Lk 21, 12-19
Aldi haretan, Jesusek esan eutsen ikaleei:
«Eskua botako deutsuee eta eraso egingo, sinagogetara eta kartzeletara eroango
zaituee, eta erregeen eta agintarien aurrera zuzenduko Neugaitik. Autormen
egiteko aukera emongo deutsue horrek guztiak. Hartu gogoan ez dozuela zeuen
burua zelan defendiduko kezkatan ibili beharrik; Neuk adierazoko deutsuet zer
eta zelan esan, eta zuen arerioetako inork ez dau zuei aurre egiterik edo
erantzuterik izango.
Zeuen guraso eta senideek eurek, ahaide eta
adiskideek eurek salduko zaituee, eta zuetariko batzuk hilko; guztiek gorroto
izango deutsuee Neugaitik; baina ez dozue buruko ule bakar bat be galduko.
Iraupenaren iraupenez lortuko dozue bizia».
Jaunak esana.
Urtean Zeharreko XXXIV. eguena
I. urtean
I. Irakurgaia
Jainkoak
aingerua bialdu dau
lehoien ahoak
ixtera.
Danielen Profezia liburutik
Dn 6, 12-28
Egun hareetan, Danielen arerioak arrapaladan
sartu ziran haren etxean eta bere Jainkoari otoitzean aurkitu eben. Orduan,
erregeagana joan eta esan eutsoen: «Errege jauna, ez dozu agindu, hogeta hamar
egun honeetan zuri ez beste jainkori nahiz gizakiri otoitz egingo deutsona
lehoien zulora jaurtitzeko?» Erregeak erantzun eban: «Bai, halantxe da! Eta,
mediarren eta pertsiarren legeen arabera, emondako agindua aldatuezina da».
Orduan, hareek erregeari: «Ba, errege jauna, Judatik katigu ekarritako Daniel
horrek ez deutsue bape begirunerik, ez zuri, ez zure aginduei; egunean hiru
bider egiten deutso-eta otoitz bere Jainkoari».
Hori entzutean, erregea biziro nahigabetu
zan eta Daniel libratzea erabagi eban. Iluntzera arte ibili zan ha salbatzeko
ahaleginetan. Baina etorri ziran barriro be gizon hareek erregeagana eta esan
eutsoen: «Errege jauna, ondo dakizu, mediarren eta pertsiarren legeen arabera,
erregeak sinaturiko debekua nahiz agindua aldatuezina dana». Orduan, erregeak
Daniel ekarri eta lehoien zulora jaurtitzeko agindu eban. Erregeak esan eutson
Danieli: «Hain leial zerbitzen dozun zeure Jainkoak salbatu zagizala!» Harri
bat ekarriz, lehoi-zuloaren sarreran ipini eben, eta erregeak bere
errege-zigiluz eta funtzionarioenaz zigilatu eban, Danieli buruz erabagitakoa
inork aldatu ez egian. Gero, erregea jauregira bihurtu zan eta baraurik eta
emakumerik barik igaro eban gaua. Ez eban gau osoan loak hartu.
Eguna argitu orduko, jagi zan erregea eta
lehoi-zulora joan zan arin-arin, eta, hurreraturik, Danieli dei egin eutson
ahots saminez: «Daniel, Jainko biziaren zerbitzaria, zuk hain leial zerbitzen
dozun Jainkoak libratu ete zaitu lehoietatik?»
Danielek erantzun eutson: «Bizi zaitez
luzaro, errege jauna! Nire Jainkoak aingerua bialdu dau lehoien ahoak ixtera,
eta ez deuste kalterik egin. Izan be, badaki Jainkoak errubakoa nazana eta zure
aurka, errege jauna, ez dodana hobenik egin». Orduan erregeak, pozaren pozez,
Daniel zulotik ataratzeko agindu eban. Atara ebenean, ez eban urratu bat be,
bere Jainkoaz fidatu zalako. Gero, Danielen salatzaileak ekartzeko agindu eban
erregeak, eta lehoi-zulora jaurti ebezan euren seme-alabekin eta emazteekin.
Eta, zulo barrenera heldu baino lehen, lehoiek euren atzaparretan hartu eta
txiki-txiki egin ebezan.
Orduan, Dario erregeak munduko herri, arraza
eta hizkuntza guztietakoei mezu hau bialdu eutsen: «Bake osoa! Hauxe agintzen
dot: nire erreinu guztian Danielen Jainkoari begirune osoa izan deioela
guztiek:
Bera
Jainko bizia da-eta, bera betiko dirauana.
Haren
erregetza ez da hondatuko,
haren
ahalmenak ez dau azkenik.
Bera
da askatzaile, bera salbatzaile;
egintza
harrigarriak eta mirariak
egiten
ditu zeru-lurretan.
Berak
askatu dau Daniel lehoien atzaparretatik».
Jaunak esana.
Erantzun salmoa
Dn 3, 68. 69. 70. 71. 72. 73. 74 (R/. ik. 59b)
V/. Iruntz eta edurtza, bedeinkatu egizue Jauna:
R/. Goratu eta ospatu gizaldietan!
V/. Izotz eta lei, bedeinkatu egizue Jauna: R/.
V/. Zurdai eta edur, bedeinkatu egizue Jauna: R/.
V/. Gau eta egun, bedeinkatu egizue Jauna: R/.
V/. Argi eta ilunpe, bedeinkatu egizue Jauna: R/.
V/. Tximista eta hodei, bedeinkatu egizue Jauna: R/.
V/. Bedeinkatu begi lurrak Jauna: R/.
II. urtean
I. Irakurgaia
Jausi da, jausi, Babilonia handia!
Apokalipsia liburutik
Ap 18, 1-2. 21-23; 19, 1-3. 9a
Nik, Joanek, beste aingeru bat ikusi neban
zerutik jaisten; ahalmen handia eban eta haren distirak lurra argitu eban.
Ahots indartsuz egin eban oihu:
«Jausi
da, jausi, Babilonia handia!
Deabruen
bizitoki bihurtu da,
espiritu
gaizto guztien zulo,
piztia
kutsatu eta nazkagarri guztien zulo».
Aingeru indartsu batek harri bat, errotarri
handi bat lakoa, jaso eta itsasora jaurti eban, esanez:
«Holako
indarrez jaurtiko dabe Babilonia uri handia,
eta
betiko desagertuko da.
Zurean
ez da sekula entzungo zitara-soinurik eta kantu-hotsik,
txirularik
eta turutarik;
zurean
ez da sekula artisaurik izango,
ezta
errota-hotsik entzungo be;
zurean
ez da sekula kriseilu-argirik izango,
ezta
ezkonbarrien kanturik entzungo be;
hain
zuzen be zure merkatariak lurreko ahaltsuenak ziralako,
eta
zure sorginkeriez herri guztiak okertu ziralako».
Gero, jentetza handi batena lako
zarata-hotsa entzun neban zeruan, esaten:
«Aleluia!
Salbazinoa,
aintza eta indarra gure Jainkoarenak,
haren
epaiak egiazkoak eta zuzenak dira-eta.
Kondenatu
dau emagaldu handia,
bere
prostituzinoaz mundua usteltzen ebana,
eta
beraren bizkar mendekatu dau
bere
zerbitzarien heriotza».
Barriro esan eben:
«Aleluia!
Haren
sutearen kea
gizaldiz
gizaldi gora doa».
Gero, aingeruak esan eustan: «Idatzi: "Zorionekoak Bildotsaren eztegu-jatordura deituak!"»
Jaunak esana.
Erantzun salmoa
Sal 100 [99], 2. 3. 4. 5 (R/. Ap 19, 9a)
R/. Zorionekoak Bildotsaren eztegu-jatordura deituak!
V/. Lurtar guztiok, egin irrintzi Jaunari,
zerbidu
egizue Jauna pozaren pozez,
sartu
zaiteze oihu alaiz haren aurrera. R/.
V/. Jakizue Jauna dala Jainkoa,
harek
egin gaitu, harenak gara,
haren
herri eta haren larreko artalde. R/.
V/. Sartu haren tenpluko ateetatik eskerrak emonez,
haren
atarietan gorazarreak abestuz.
Emon
eskerrak, bedeinkatu haren izena. R/.
V/. «Ona da-eta Jauna,
haren
maitasuna betikoa,
haren
leialtasuna gizaldiz gizaldikoa». R/.
I. eta II. urteetan
Aleluia
Lk 21, 28
R/. Aleluia.
V/. Izan bihotz eta jaso burua,
hurreratzen
dihardu-eta zuen askapenak. R/.
Ebanjelioa
Jentilek
zapalduko dabe Jerusalem,
nazinoentzat
Jainkoak erabagitako epea guztiz bete arte.
✠ Jesu Kristoren Ebanjelioa San Lukasen liburutik
Lk 21, 20-28
Aldi haretan, Jesusek esan eutsen ikasleei:
«Jerusalem gudarostez inguratuta ikustean, jakizue gainean dauala bere
hondamendia. Orduan, Judean dagozanek ihes egin begie mendietara; Jerusalem
barruan dagozanek alde egin begie, eta soloan diranak ez beitez urian sartu.
Zigor-egunak izango dira, orduan beteko dalako Liburu Santuan idatzirik dagoan
guztia.
Errukarriak egun hareetan seindun diranak
edota bularreko umeak dituenak! Ze, estualdi handia izango da lur honetan, eta
hasarre-zigorra herri honentzat. Ezpatapean jausiko dira eta nazino guztietara
eroango ditue katigu; jentilek zapalduko dabe Jerusalem, nazinoentzat Jainkoak
erabagitako epea guztiz bete arte.
Seinaleak izango dira eguzkian, iretargian
eta izarretan, eta estu ibiliko dira lurrean herrialdeak, itsasoaren orroaz eta
olatuen indarrez artegaturik. Arnasarik barik geldituko da jentea, munduari
gainera datorkionaren bildurrez, ortzia be dardaratuko da-eta.
Orduan, Gizonaren Semea indartsu eta aintza
handiz hodeian etortzen ikusiko dabe. Hori guztia gertatzen hastean, izan
bihotz eta jaso burua, ze, hurreratuz dator zuen askapena».
Jaunak esana.
IRUZKINA
Izan daigun gogoan ebanjelio hau idatzi zanean guzti hau zala jazoera. Jesusen lehen jarraitzaileak, judeguak izanik, aurrean erabiliak izan ziran (pertsegituak), batez ere Jerusalem eta Jauretxea hondatu ebezanean.
Aurrean erabili ebezan euren kide judeguek, kristauek ez ebelako salbamenaren uste bardina. Hareek erromatarren menpeko izatetik askatuko zituen Mesias itxaroten eben; Jesusen jarraitzaileek ostera Jainkoaren erreinua itxaroten eben eta biztuerea.
Eta gogoan hartu behar da zelan eurenganatu ebezan Jesusen berbak eta bizikerea, ezeri bildurrik ez izatea, gogotsu emoten ebelako euren sinismenaren barri bai euren herritarren artean eta baita atzerritarren artean ere.
Eta guztiz sinistuta euken euren heriotza frutu ugariren hazi izango zala: martirien odola sinistun barri ugariren hazia zala uste eben.
Egoera horrek eroan ebazan Jesusen lehen jarraitzaileak inguruetara sakabanatzera, eta herrialde barriotan ere euren sinismena adoretsu autortzera.
Euren antzekoak bagina gaur egungo kristauok…
Urtean Zeharreko XXXIV. barikua
I. urtean
I. Irakurgaia
Gizaseme
antzeko bat ikusi neban,
zeruetako
hodeietan etortzen.
Danielen Profezia liburutik
Dn 7, 2-14
Nik, Danielek, ikuskaria izan neban gauez;
zeruko lau haizeek itsaso handia harrotzen eben. Eta lau piztitzarrek, laurak desbardinak,
urten eben itsasotik. Lehenengoak lehoia zirudian, baina arrano-hegoak ebazan.
Hari begira nengoala, hegoak kendu eutsoezan eta, lurretik jaso ebela, hanka
biren gainean zutunik jarri zan, gizakia lez, eta giza adimena emon eutsoen.
Bigarren piztiak hartza zirudian; erdi
jagita egoan eta ahoan, hortz artean, hiru saihets-hazur ebazan. Hau esan
eutsoen: «Jagi eta jan haragia ugari». Gero, begira nengoala, beste piztia bat
ikusi neban, lehoi nabarraren antzekoa; lepoaldean lau hego ebazan eta lau
buru, eta agintea emon eutsoen.
Neure gau-ikuskarian laugarren piztia bat
ikusi neban; bildurgarria zan, ikaragarria eta biziro indartsua; burdinazko
hagin handiak ebazan; dana irunsten eta txikitzen eban, eta jan barik izten
ebana hankapean apurtzen. Beste piztiak ez lakoa zan: hamar adar ebazan.
Adarrei begira nengoala, adar txiki batek urten eutson beste adarren artean,
eta adar txikiari leku egiteko beste hareetako hiru atara eutsoezan. Adar
txikiak gizakiarenak lako begiak eta harrokeriaz berba egiten eban ahoa ebazan.
Begira nengoala, tronu batzuk jarri ebezan
eta gizon zahar bat jesarri zan.
Haren
soinekoa edurra baizen zuri,
buruko
ulea artilea baizen garbi!
Haren
aulkia eta gurpilak, sugar kiskalgarri!
Suzko
ibaiak urteten eban haren aurretik.
Jentetza
izugarria eban zerbitzari,
milaka
eta milaka egozan haren aurrean zutunik.
Auzia
hasi eta zabaldu ziran liburuak.
Artean begira nengoan, adar txiki harek
esaten ebazan berba harroakaitik harrituta. Honetan, hil egin eben laugarren
piztia, eta haren gorpua txikitu eta sutara bota eben. Beste piztiei agintea
kendu eutsien, baina bizirik itzi ebezan aldi baterako.
Neure gau-ikuskarian, gizaseme antzeko bat
ikusi neban zeruko hodeietan etortzen. Gizon zaharragana hurreratu zanean,
beroni aurkeztu eutsoen. Agintea, aintza eta erregetza emon eutsoen: herri,
nazino eta hizkuntza guztietako jenteak zerbitzen eban.
Haren
agintea betikoa, ez da inoiz amaituko;
haren
erregetza ez da inoiz hondatuko.
Jaunak esana.
Erantzun salmoa
Dn 3, 75. 76. 77. 78. 79. 80. 81 (R/. ik. 59b)
V/. Mendi eta tontor, bedeinkatu egizue Jauna:
R/. Goratu eta ospatu gizaldietan!
V/. Lurreko landareok, bedeinkatu egizue Jauna: R/.
V/. Iturriok, bedeinkatu egizue Jauna: R/.
V/. Itsaso eta ibai, bedeinkatu egizue Jauna: R/.
V/. Arrain handi eta txiki, bedeinkatu egizue Jauna: R/.
V/. Zeruko hegazti guztiok, bedeinkatu egizue Jauna: R/.
V/. Piztia eta abere, bedeinkatu egizue Jauna: R/.
II. urtean
I. Irakurgaia
Hildakoak nor
bere egintzen arabera epaitu ebezan.
Jerusalem
barria ikusi neban, zerutik jaisten.
Apokalipsia liburutik
Ap 20, 1-4. 11–21, 2
Nik, Joanek, aingeru bat ikusi neban zerutik
jaisten; lurrazpiko lezako giltza eta kate handi bat eroiazan eskuan. Harrapatu
eban herensugea, antxinako sugea –hau da, deabrua eta Satanas–, eta mila
urterako lotu eban. Lezara bota, sarrera giltzaz itxi eta zigilatu eban mila
urteak bete arte, aurrerantzean herriak liluratu ez egizan. Mila urte honeen
ondoren, apur baterako aske gelditu behar dau.
Tronu batzuk be ikusi nituan; hareetan jesarri
ziranei epaitzeko ahalmena emon eutsen Jainkoak. Ikusi nituan Jesusen
testigantza egiteagaitik eta Jainkoaren hitza iragartzeagaitik samea ebagi
eutsienak be, hau da, piztia eta beronen irudia gurtu ez ebezanak eta haren
marka bekokian eta eskuetan hartu ez ebenak; honeek bizira bihurtu ziran eta
Mesiasegaz errege izan ziran mila urtez.
Tronu handi zuri bat ikusi neban, baita
bertan jesarrita egoana be; beronen aurretik ihes egin eben lurrak eta zeruak,
eta aztarrenik itzi barik desagertu ziran.
Eta hildakoak ikusi nituan, handi nahiz
txiki, tronuaren aurrean zutunik. Liburuak edegi ebezan; beste liburu bat be
edegi eben, biziaren liburua. Eta liburuetan idatzita egoanaren arabera epaitu
ebezan hildakoak, nor bere egintzen arabera.
Itsasoak bere barruan eukazan hildakoak
bihurtu ebazan, eta baita be Heriotzak eta Hilen Egoitzak, eta nor bere
egintzen arabera epaitu eben.
Orduan, Heriotza eta Hilen Egoitza suzko
zingirara bota ebezan –suzko zingira bigarren heriotza da–. Izena biziaren
liburuan idatzirik ez ebenak be suzko zingirara bota ebezan.
Nik, Joanek, zeru barria eta lur barria
ikusi nituan, desagertuak ziran-eta lehenengo zerua eta lehenengo lurra, eta
itsasorik be ez zan.
Uri santua ikusi neban, Jerusalem barria,
zerutik Jainkoagandik jaisten, andragaia bere senarrarentzat lez apaindua.
Jaunak esana.
Erantzun salmoa
Sal 84 [83], 3. 4. 5-6a eta 8a (R/. Ap 21, 3b)
R/. Hona Jainkoaren bizilekua gizakien artean.
V/. Indarra galtzen doakit barrua,
Jaunaren
tenpluko atarien gogo biziz.
Nire
bihotzak eta gorputzak
poz-oihu
dagioe Jainko biziari. R/.
V/. Txoriak aurkitu dau etxea,
baita
elaiak be kumeentzat habia:
zure
altarak, Jaun ahalguztiduna,
ene
Erregea eta ene Jainkoa! R/.
V/. Zorionekoak zure etxean bizi diranak
eten
barik Zu goresten!
Zorionekoak
euren indarra Zugan dabenak,
gainez
gain doaz. R/.
I. eta II. urteetan
Aleluia
Lk 21, 28
R/. Aleluia.
V/. Izan bihotz eta jaso burua,
hurreratzen
dihardu-eta zuen askapenak. R/.
Ebanjelioa
Gauza horreek
jazotzen ikustean,
jakizue hurrean
dala Jainkoaren erregetza.
✠ Jesu Kristoren Ebanjelioa San Lukasen liburutik
Lk 21, 29-33
Aldi haretan, Jesusek adibide bat jarri eutsen ikasleei: «Begira ikondoari edo edozein zuhaitzi: kimu-barritzen hasi dirala ikusi eta, beste barik, badakizue hurrean dala uda. Era berean, gauza horreek gertatzen ikustean, jakizue hurrean dala Jainkoaren erregetza. Benetan dinotsuet: gizaldi honetakoak hil baino lehen gertatuko dira gauza guztiok. Zeru-lurrak igaroko dira, baina nire berbak ez dira bete barik igaroko».
Jaunak esana.
IRUZKINA
Jesusek begitu egiten eban, eta ikusi; eta, ikusiz, ikasi eta bizitzarako ondorioak atara. Eta hauxe da bere ikasleei irakatsi gura deutsena: begiratzen, ikusten eta, ikusiz, ondorioak ataraten.
Halan ere, egoera apokaliptikoetan jaio zan kristautasunak luzaroan uste izan dau azken egunetan bizi zirala; laster baten zala parousia (edo munduaren azkena). Eta ausartu egiten dira Jesusen ahotan jarten belaunaldi bateko gauzea dala Jainkoaren Erreinuaren etorrera eta ezarpena. Gerorantza ordea aldatu beharra izango dabe.
Baina zein da gure egoerea? Gure umearoan sarri entzuten zan badator munduaren azkena! 2000. urtea izan zan holango oihartzun handikoa. Baina isildu dira ahots guztiak.
Ezerk gitxik kezkatzen gaitu, gehienbat gainera, aurretiaz esaten deuskuelako noiz joko dauan euriak, edo haize bortitzak datozala eta kontu izateko, edo…
Eta begiratzerik ere ez dogu behar: lo gagoz holango alarmak itxartu gaiezan arte.
Ez da hori Jesusek guretzat nahi dauana, adi egon eta begirale izan gaitezala baino: arduraz b izi izan gaitezala.
Urtean Zeharreko XXXIV. zapatua
I. urtean
I. Irakurgaia
Goi-goikoaren
herri santuari emongo jako
erregetza,
agintea eta handitasuna.
Danielen Profezia liburutik
Dn 7, 15-27
Ikara larrian nengoan ni, Daniel, neure
barruan, ikusten nebazan guztiakaitik. Han egozanetako batengana hurreratu eta
ikusi neban guztiaren benetako esanahia azaltzeko eskatu neutsan. Guztiaren
argitasuna emon eustan berak.
Lau piztitzar horreek, sortuko diran lau
erreinu dira. Baina horreen ondoren Goi-goikoaren herri santuari emongo jako
erregetza, eta harena izango da betieran.
Gero, laugarren piztitzar ha zer zan jakin
nahi neban, hain zan-eta besteak ez lakoa: guztiz izugarria, burdinazko haginak
eta brontzezko atzaparrak ebazana; dana irunsten eta txikitzen eban, eta jan
barik izten ebana hankapean apurtzen. Jakin nahi neban, era berean, zer esan
nahi eben haren buruko hamar adarrek, baita honeen artean urten eta hareetatik
urten eutsoen hiru adar txikiak be; begiak eta harrokeriaz berba egiten eban
ahoa ebazan izan be adar harek eta besteak baino handiago agiri zan agiri be.
Begira nengoala, adar ha Jainkoaren herri
santuaren kontra burrukan ebilen eta ia menperaturik eukan. Baina etorri zan
gizon zaharra eta Goi-goikoaren herri santuaren alde urten eban, heldu zan-eta
herri santua erreinuaren jaube egiteko sasoia.
Ondoren, esan eustan: «Laugarren piztia
lurrean izango dan laugarren erreinua da, besteak ez lakoa. Mundu osoa
iruntsiko dau, hanka azpian hartuko eta txikituko. Hamar adarrak erreinu honetan
izango diran hamar errege dira. Ondoren, beste bat sortuko da, aurrekoak ez
lakoa, hareetako hiru errege menperatuko dituana. Goi-goikoaren kontra biraoka
jardungo dau eta herri santua zapalduko dau; jaiak eta legea aldatu nahi izango
ditu. Hiru urte eta erdiz egongo da herri santua haren menpean. Baina etorriko
jako auzi-sasoia, kenduko deutsoe agintea, eta guztiz hondatuta eta ezereztuta
itziko dabe.
Orduan, Goi-goikoaren herri santuari emongo
jako zerupean dagoan erreinu guztietako erregetza, agintea eta handitasuna.
Beti iraungo dau herri horren erregetzak, eta munduko aginte guztiek obediduko
deutsoe eta zerbiduko».
Jaunak esana.
Erantzun salmoa
Dn 3, 82. 83. 84. 85. 86. 87 (R/. ik 59b)
V/. Gizakiok, bedeinkatu egizue Jauna:
R/. Goratu eta ospatu gizaldietan!
V/. Israeldarrok, bedeinkatu egizue Jauna: R/.
V/. Jaunaren abadeok, bedeinkatu egizue Jauna: R/.
V/. Jaunaren zerbitzariok, bedeinkatu egizue Jauna: R/.
V/. Bihotz-zintzook, bedeinkatu egizue Jauna: R/.
V/. Santu eta bihotz-apalok, bedeinkatu egizue Jauna: R/.
II. urtean
I. Irakurgaia
Ez da
aurrerantzean gaurik izango,
Jainko Jaunak
egingo deutselako argi.
Apokalipsia liburutik
Ap 22, 1-7
Niri, Joani, ur biziko ibaia erakutsi eustan
Jaunaren aingeruak, kristala baizen distiratsua; Jainkoaren eta Bildotsaren
tronutik urteten eban. Uriko plazaren erdian, ibaiaren ertz bietan, biziaren
zuhaitza egoan; urtean hamabi uzta emoten ditu, hileko bat, eta zuhaitzaren
orriak herrientzat osagai dira.
Han ez da aurrerantzean ezer madarikaturik
izango. Urian Jainkoaren eta Bildotsaren tronua egongo da, eta Jainkoaren
zerbitzariek kultu emongo deutsoe. Aurrez aurre ikusiko dabe, eta haren izena
bekokian eroango. Ez da aurrerantzean gaurik izango; ez dabe kriseilu-argirik,
ez eguzki-argirik beharko, Jainko Jaunak egingo deutselako argi, eta errege
izango dira gizaldien gizaldietan.
Aingeruak esan eustan: «Hitz honeek
egiazkoak eta fidagarriak dira. Jaunak, profetak inspiratu ebazan Jainkoak,
bere aingerua bialdu dau, laster jazotzekoa dana bere zerbitzariei erakusteko».
Jesusek dino: «Hara, laster nator. Zorionekoa liburu honetan emoten dan mezu
profetikoa gordetzen dauana!»
Jaunak esana.
Erantzun salmoa
Sal 95 [94], 1-2. 3-5. 6-7c (R/. 1 Ko 16, 22 eta Ap 22, 20c)
R/. Marana tha! Zatoz, Jesus Jauna!
V/. Zatoze, dagiogun poz-oihu Jaunari,
poz-irrintzi,
salbatzen gaituan harriari.
Aurkeztu
gakiozan eskerrak emonez,
dagiogun
jai txaloka eta kantari. R/.
V/. Jainko handia da-eta Jauna,
jainko
guztien gain errege handia;
bere
esku daukaz lurpeko lezeak,
bereak
ditu mendi-gailurrak;
berea
dau itsasoa, berak egina,
baita
lehorra be, bere eskuz moldatua. R/.
V/. Zatoze, gurtu daigun ahuspezturik,
belaunikatu
gaitezan egin gaituan Jaunaren aurrean.
Bera
da-eta gure Jainkoa,
eta
gu harek larraturiko herria,
haren
zainpeko artaldea. R/.
I. eta II. urteetan
Aleluia
Lk 21, 36
R/. Aleluia.
V/. Egon erne eta egin otoitz une oro,
zutunik
egon ahal zaitezen Gizonaren Semearen aurrean. R/.
Ebanjelioa
Egon zuhur,
etorri behar
daben horreei guztiei ihes egin ahal deiozuen.
✠ Jesu Kristoren Ebanjelioa San Lukasen liburutik
Lk 21, 34-36
Aldi haretan, Jesusek esan eutsen ikasleei: «Zabiltze kontuz! Ez bedi moteldu zuen bihotza edanaz, mozkorkeriaz eta bizitza honetako kezkaz, egun ha ezustean gainera etorri ez dakizuen, ze, sarea bezala etorriko da lurrean bizi diran guztien gainera. Beraz, egon zuhur eta egin otoitz eten barik, etorri behar daben horreei guztiei ihes egin ahal deiozuen eta zutunik egon ahal zaitezen Gizonaren Semearen aurrean».
Jaunak esana
IRUZKINA
Testu apokaliptikoek (azkena iragarten dabenak dira apokaliptikoak), bildurgarriak emoten daben arren, bildurra sartzea baino, arretaz egotera deitzea bilatzen dabe.
Urtearen amaierako testuok hauxe dabe helburu, jakinik, gainera, Jesusek bere ikasleei behin eta barriro errepikatzen eutsen gauzea zala.
Egia esan, amaierarantza nekeak gehiago egiten deusku gehienetan, eta arreta galtzera eroaten gaitu, errelaxatzera, lotara eta ardurea bera ere galtzera.
Gehiago oraindino irabazia ziur ikusten danean. Zenbat partidu galdu diran, errelaxatzeagaitik, askogaitik irabazten joanda!
Liturgia urtearen azkenak ez gaizala eroan, ba, arduragabekeriara, mozkorkeriara edo lotara, gure inguruan jazoten dagoanari arreta jartera baino.
Jesusek agindu euskun Jainkoaren Erreinuari harrera egitera, zutunik, arreta handiz eta itxaropenez.
