Urtean Zeharreko II. astelehena
I. urtean
I. Irakurgaia
Semea
izanda be,
oinazearen
oinazez ikasi eban obeditzen.
Hebrearrei
egindako epistolatik
Heb 5, 1-10
Abade nagusia gizonen artetik hartua eta
Jainkoaren aurrean gizon-emakumeen ordezkari izateko jarria izaten da,
pekatuakaitik emoitzak eta opariak eskeintzeko.
Badaki ezjakinez eta okerbideratuez
errukitzen, bera be giza makaltasunez inguratuta dagoan ezkero. Horregaitik,
bere pekatuakaitik be opariak eskeini behar ditu, herriaren pekatuakaitik lez.
Eta ezin dau inork abade nagusitzaren ohorea beretzat hartu, Jainkoak deiturik
ez bada, Aaronek lez.
Holan, Kristok be ez eutson berak emon bere
buruari abade nagusitzaren ospea, Jainkoak baino, honan hitz egin eutson-eta:
«Nire
Seme zara Zu,
Neuk
zaitut gaur sortu».
Beste salmo baten be hau esaten deutsa:
«Abade
zara Zu, Melkisedek lez, betiko».
Kristok, bere giza bizitzaldian, deadar handiz eta negarrez egin eutson otoitz eta erregu heriotzatik libratu eikean Jainkoari, eta, Kristok begirune izan eutsolako, entzun egin eutson Jainkoak. Eta Semea izanda be, oinazearen oinazez ikasi eban obeditzen; holan, bere betera heldurik, betiko salbazinoaren iturri egin zan obeditzen deutsoen guztientzat, abade nagusi izentatu eban-eta Jainkoak, Melkisedek lez.
Jaunak esana.
Erantzun salmoa
Sal 110 [109], 1. 2. 3-4 (R/. 4bc)
R/. Abade zara Zu, Melkisedek lez, betiko.
V/. Hona Jaunak nire jaunari esana:
«Jesarri
nire eskuman,
zeure
arerioak oinazpian jartzen deutsudazan bitartean». R/.
V/. Siondik zabaltzen dau Jaunak
zure
errege-makilaren aginpidea;
menperatu
egizuz guduan arerioak. R/.
V/. Zu nagusi garaipen-egunean
santutasun-distiraz;
gaztetasun-iruntza
datorkizu egunsentiaren altzotik.
Zin
egin dau Jaunak eta ez da damutuko:
«Abade
zara Zu, Melkisedek lez, betiko». R/.
II. urtean
I. Irakurgaia
Hobe
da Jaunaren esana egitea, opariak eskeintzea baino.
Baztertu
egin zaitu Jaunak erregetzatik.
Samuel lehenengo liburutik
1 Sm 15, 16-23
Egun hareetan, Samuelek esan eutson Sauli:
«Bart Jaunak esan deustana adierazo behar deutsut». Saulek esan eutson: «Esan».
Samuelek, orduan: «Zeure burua txikitzat dozun arren, ez zara zu Israelgo
leinuen buruzagia ala? Jaunak Israelgo errege igurtzi zaitu eta amalektar
pekatari horreek hondatzera bialdu zaitu, danak desegiteraino burrukatzera.
Zergaitik ez dozu entzun Jaunaren esana? Zergaitik hartu dozuz harrapakinak,
Jaunaren begietan txarto dagoana eginez?»
Saulek erantzun eutson: «Ez ete dot, bada,
egin Jaunaren esana? Berak bialdu ninduan bidetik ibili naz. Ekarri dot Agag,
Amalekeko erregea, eta hondatu ditut amalektarrak. Desegin beharrekoak ziran
harrapakinetatik ardirik eta idirik onenak hartu ditu gudarosteak, Jaunari,
zure Jainkoari, Gilgalen opari eskeintzeko».
Samuelek, ostera, esan eutson:
«Atseginago
ete ditu Jaunak erre-opariak eta sakrifizioak
beraren
esana egitea baino?
Hobe
da haren esana egitea opariak eskeintzea baino,
hobe
haren esaneko izatea ahari-koipeak eskeintzea baino.
Aztikeria
adinako pekatua da desleial izatea,
eta
sasijainkokeria adinakoa setakeria.
Jaunaren
esana baztertu dozulako,
baztertu
egin zaitu berak be erregetzatik».
Jaunak esana.
Erantzun salmoa
Sal 50 [49], 8-9. 16b-17. 21 eta 23 (R/. ik. 23b)
V/. Zuzen dabilenari deutsat
Jainkoaren salbazinoa erakusten.
V/. Ez zaitut salatzen zeure sakrifizioakaitik;
zure
erre-opariak aurrean ditut beti.
Baina
ez dot hartuko zure kortako zekorrik,
ez
zure eskortako akerrik. R/.
V/. Zelan aitatu zeinkez nire arauak
eta
nire ituna ahotan hartu,
nire
zentzunbideari gorroto badeutsazu
eta
nire hitzei lepoa emoten? R/.
V/. Zuk horreek egin, eta Ni isildu?
Zu
lakoa nazala uste dozu ala?
Salatu
egingo zaitut, aurpegira botako dana.
Esker
onezko oparia eskeintzen deustanak,
horrek
emoten deust aintza,
onbideratzen
danari
erakutsiko
deutsat neure salbazinoa. R/.
I. eta II. urteetan
Aleluia
Heb 4, 12
R/. Aleluia.
V/. Bizia da Jainkoaren hitza, bizia eta
eraginkorra,
eta
barruko pentsamentuak eta asmoak aztertzen ditu. R/.
Ebanjelioa
Senar barria eurakaz daukie.
✠ Jesu Kristoren Ebanjelioa San Markosen liburutik
Mk 2, 18-22
Aldi haretan, Joan Bateatzailearen ikasleek
eta fariseuek barau-eguna eben. Jesusengana joan eta esan eutsoen: «Zelan
egiten dabe barau Joanen ikasleek eta fariseuek, eta zure ikasleek ez?» Jesusek
erantzun eutsen: «Ezteguetara deituek egin ete leikie barau, senar barria
eurekin dabela? Senar barria eurakaz daben bitartean, ezin leikie barau egin.
Etorriko jake, bai, senar barria kenduko deutsien eguna; orduan, egun haretan,
egingo dabe barau.
Inork ez deutsa josten jantzi zaharrari
oihal gordinezko adabakirik; ostantzean, adabaki barriak jantzi zaharra
behartu, eta tarratada handiagoa egiten da. Ez dau inork sartzen ardao barririk
be zahagi zaharretan; ardaoak zahagiak lehertu egingo leukez eta, orduan, ez
ardo eta ez zahagi. Ardao barria zahagi barrietan».
Jaunak esana.
IRUZKINA
Ardau barria zaragi barrietan… Heldu dira aldi barriak. Jesus da barritasuna. Haren zain gengozan, baina bada hemen. Ez gaitezan lehengotan geldi; onartu daigun harek dakarskun barritasuna.
Baraua prestakuntzarako da. Zeozeri itxaroten dauanaren iragarpena. Joane ikasleak eta farisearrenak ez dira ohartu; ez dabe ezagutzen Jesus; eta barau egiten jarraitzen dabe,
Ohartu ete gara gu? Onartu ete dogu Jesusen barritasuna, ala lehengo lez bizi gara, prestakuntza aldiak ezagunagoak ditugulako eta gehiago asebeteten gaituelako? Ez ete gagoz lehengoari lotuegiak? Barritasunak dakarrena ezezaguna dogu. Bildur emoten ete deusku. Ez dogu uste onik Jesusengan?
Jesus, ardao barria, ezin dogu zaragi zaharretan hartu; lehertu egingo ditu. Eta gitxiago jarri geikeo arropa zaharrari barriaren zati bat ipingi lez!
Ez jaku eskatzen dana oso-osoan ikustea eta jakitea, Jesusi jarraitzea baino. Berak barriztatuko gaitu bere barritasunaz. Izan daigun harengan uste on.
Urtean Zeharreko II. martitzena
I. urtean
I. Irakurgaia
Itxaropen
hau dogu
geure
bizitzaren aingura sendoa eta segurua.
Hebrearrei egindako epistolatik
Heb 6, 10-20
Senideok: Jainkoa ez da zuzenbakoa eta ez dau ahazten zuek egin dozuena, ezta, lehen eta orain fededunak zerbiduz, beraren izenari agertu deutsazuen maitasuna be. Hauxe nahi geunke, halan be: guztiok azkeneraino erakutsi dagizuela orain arte izan dozuen ardura bera, zuen itxaropena bete-betea izatera heldu dadin; ez zaitezela nagi bihurtu, euren fedeaz eta iraupenaz Jainkoaren agintzariak jasotzen diharduenen antzeko baino.
Jainkoak, Abrahami agintzaria egin eutsonean, bere buruagaitik egin eban zin, ez eban-eta bera baino handiagorik zin egiteko. Hau esan eutson: «Bai, oparo bedeinkatuko zaitut eta neurri barik ugarituko». Eta, eroapenez itxaron ondoren, eskuratu eban Abrahamek agindu jakona. Gizakiek, eurak baino handiago dan norbaitengaitik egiten dabe zin, eta zin eginez erabagitzen dabe edozein eztabaida.
Horra zergaitik, Jainkoak be lotu eban bere burua, zin eginez, agindutako ondasunak hartuko ebezanei bere asmoa aldatuezina zala erakutsi nahirik. Beraz, gauza bi doguz Jainkoaren asmoa aldatuezina dala adierazoten deuskuenak: agintzaria eta zina –eta horreetan Jainkoak ezin leike guzurrik esan–; horreetan oinarriturik, adorez beteak sentitzen gara aurrean dogun itxaropenari eusteko. Itxaropen hau dogu geure bizitzaren aingura sendoa eta segurua, zeruko santutegiaren barruraino sartzen dana; han sartu zan-eta Jesus gugaitik aurrelari lez, Melkisedeken antzera behin betiko abade nagusi egina.
Jaunak esana.
Erantzun salmoa
Sal 111 [110], 1-2. 4-5. 9 eta 10c (R/. 5b)
R/. Gogoan dau beti Jaunak bere ituna.
Edo: Aleluia.
V/. Bihotz-bihotzez emoten deutsadaz eskerrak
Jaunari,
zintzoekin
batera batzarrean alkarturik.
Jaunak
eginak handi dira,
gogoko
dabezan guztientzat aztergai. R/.
V/. Bere mirariak gogoangarri egin ditu;
errukiorra
da Jauna eta bihozbera.
Begirune
deutsoenei janaria emon deutse,
gogoan
dau beti bere ituna. R/.
V/. Askatasuna emon deutsa bere herriari,
betiko
ezarri dau bere ituna,
santua
eta bildurgarria da haren izena.
Betiko
dirau Jaunaren gorespenak. R/.
II. urtean
I. Irakurgaia
Samuelek
igurtzi egin eban David
bere
anaien aurrean.
Eta
Jaunaren espiritua Davidengan sartu zan.
Samuel lehenengo liburutik
1 Sm 16, 1-13
Egun hareetan, Jaunak esan eutson Samueli:
«Noiz arte egon behar dozu Saulengaitik negarrez? Neuk baztertu dot, Israelgo
errege izan ez dadin. Bete adarra orioz, eta zoaz. Betleemgo Jeserengana
bialtzen zaitut, haren semeen artean begiz jo dot-eta nire errege izango dana».
Samuelek erantzun: «Zelan joango naz baina?
Saulek jakiten badau, hil egingo nau». Jaunak esan eutson: «Eroan egizu zeugaz
bigantxa bat, eta esan Jaunari eskeintzera zoazala. Dei egiozu Jeseri oparira,
eta Neuk esango deutsut orduan zer egin behar dozun. Erakutsiko deutsudana
igurtziko dozu».
Egin eban, beraz, Samuelek Jaunak agindu
eutsona eta Betleemera joan zan. Herriko arduradunek ikaraz urten eutsoen
bidera eta itaundu eutsoen: «Bake onean zatoz?» Samuelek erantzun: «Bai, bake
onean nator; Jaunari oparia eskeintzeko asmoz nator. Egin garbikuntza eta
zatoze nigaz oparira». Samuelek garbikuntza egin eutsen Jeseri eta beronen
semeei, eta oparira dei egin eutsen. Heldu ziranean, Samuelek Eliab ikusi eta
esan eban bere barruan: «Zalantza barik, aurrean dau Jaunak bere igurtzitakoa».
Baina Jaunak esan eutson Samueli: «Ez begiratu horren itxurari eta luzerari,
alde batera itzia dot-eta. Jainkoak ez deutsa begiratzen gizakiek begiratzen
deutsoenari, gizakiek itxurari begiratzen deutsoe-eta; Jainkoak, barriz,
bihotzari».
Deitu eutson Jesek Abinadabi eta Samuelen
aurrera eroan eban. Samuelek esan eban: «Ez dau hau be aukeratu Jaunak».
Ondoren, Jesek Xama eroan eban. Samuelek, orduan: «Ezta hau be, ez dau aukeratu
Jaunak». Jesek bere zazpi semeak eroan ebazan Samuelen aurrera; baina Samuelek
esan eutson: «Jaunak ez dau horreetatik inor aukeratu». Orduan, Samuelek
itaundu eutson Jeseri: «Honeek dozuz seme guztiak?» Harek erantzun: «Txikiena
gelditzen da; artzain dabil». Samuelek esan eutson Jeseri: «Agindu ekartzeko;
ez gara jaten hasiko, bera etorri arte». Ekarriazo eban, beraz, mutila:
ule-gorria zan, begi ederra, itxura bikainekoa. Jaunak esan eutson Samueli:
«Jagi eta igurtzi egizu; horixe da».
Hartu eban, bada, Samuelek orio-adarra eta
igurtzi egin eban bere anaien aurrean. Egun haretan Jaunaren espiritua
Davidengan sartu zan eta haren jaube izan zan aurrerantzean. Amaitzean, Samuel
Ramara bihurtu zan.
Jaunak esana.
Erantzun salmoa
Sal 89 [88], 20. 21-22. 27-28 (R/. 21a)
R/. David neure zerbitzaria aurkitu dot.
V/. Ikuskaritan berba egin zeuntsen bein baten
zeure fededunei:
«Koroa
ezarri deutsat indartsu bati,
herriko
gazte bat goratu dot tronura. R/.
V/. David neure zerbitzaria aurkitu dot
eta
neure orio santuaz igurtzi.
Nire
eskuak sendo deutsa eutsiko,
nire
besoak indartsu dau egingo. R/.
V/. Harek dei egingo deust: "Zu nire aita,
nire
Jainkoa, nire harri salbatzailea".
Eta
Nik neure lehen-seme egingo dot,
lurreko
erregeen artean goren». R/.
I. eta II. urteetan
Aleluia
Ik. Ef 1, 17-18
R/. Aleluia.
V/. Jesu Kristo gure Jaunaren Aitak
argitu
dagizala gure barruko begiak,
jakin
dagigun zer itxarotera dei egin deuskun. R/.
Ebanjelioa
Zapatua
gizakiarentzat egin eban Jainkoak,
ez
gizakia zapatuarentzat.
✠ Jesu Kristoren Ebanjelioa San Markosen liburutik
Mk 2, 23-28
Behin baten, zapatuz gari-soloetan zehar
joian Jesus. Eta ikasleak igarokeran galburuak ebagiten hasi ziran. Fariseuek
esan eutsoen Jesusi: «Zelan dihardue egiten, zapatuz legezko ez dana?»
Harek erantzun: «Ez ete dozue inoiz irakurri
zer egin eban Davidek beharrizan baten, bera eta bere lagunak gosekilik gertatu
ziranean? Zelan, Abiatar abade nagusi zala, Jainkoaren etxean sartu eta Jaunari
eskeiniriko ogiak jan zituan, legez abadeek bakarrik jan eikiezanak, eta zelan
bere lagunei be emon eutsen?»
Eta esan eutsen: «Zapatua gizakiarentzat
egin eban Jainkoak, ez gizakia zapatuarentzat. Halandaze, Gizonaren Semea
zapatuaren beraren nagusi da».
Jaunak esana.
IRUZKINA
Eguneroko jazoerei begiratzeko era ezbardinak dagoz; eta zelan begiratzen jaken, halan ulertzen dira; eta ulerkera batzuk guztion ulerkera izan behar dabela uste izaten da sarritan, batez ere Legeari edo Ohiturei loturik badagoz.
Horretan maisu ziran Fariseuak: Legea beteten ete zanaren begirale eta zaintzaile ziran; eta halantxe beteten ebela —uste eben— Jainkoaren nahia. Ez zan, ba, txantxetako gauzea.
Jesusek, ostera, Legea betetearen arduratik barik beharrizanetik edo behartsuaren egoeratik begiratzen eban, eta egoera haretan Jainkoak zer eskatzen eutson bilatzen eban, halan erantzuteko, bere arduratik.
Batzuk euren ustea zaindu gura dabe, azken saria irabaztearren; besteak, behartsuengan Jainkoaren deia aurkitzen dau eta hareen laguntzan urtetekoa. Ez dago bere salbamen propioari begira; hori Jainkoaren esku izten dau. Hurkoaren salbatzaile izateari ekiten deutso, horixe dala uste izanez Jainkoak eskatzen deutsona.
Jarrera biok, alkar osotzen barik, alkarren aurka egozala emoten dau. Hortik Jesusek jasan behar dauan ez-ulertua izatea, eta Lege-zaleen artean zirrararik ez eragitea: nahikoa dabe-eta Legea beteteaz.
Urtean Zeharreko II. eguaztena
I. urtean
I. Irakurgaia
Abade
zara zu,
Melkisedek
lez, betiko.
Hebrearrei egindako epistolatik
Heb 7, 1-3. 15-17
Senideok: Salemgo errege eta goi-goiko
Jainkoaren abade zan Melkisedek. Bidera urten eutson Abrahami, erregeak garaitu
ondoren bihurbidetik etorrela, eta bedeinkatu egin eban.
Abrahamek guduan harrapatutako guztiaren
hamarrenak emon eutsozan. Alde batetik, Melkisedek izenak «Justizia-errege»
esan gura dau eta, bestetik, Salemgo errege zan, hau da, «Bake-errege». Liburu
Santuan ez da aitatzen haren aitarik, ez amarik, ez jatorririk, ez jaiotzarik,
ez heriotzarik; holan, Jainkoaren Semearen antzeko egina, abade dirau betiko.
Eta oraindino argiago da hori, beste abade
bat sortzen bada Melkisedek lez, hau da, ez giza jaiotzaren legez abade egina,
desegin ezin dan biziaren indarrari esker baino. Izan be, hauxe autortzen dau
Liburu Santuak:
«Abade zara Zu, Melkisedek lez, betiko».
Jaunak esana.
Erantzun salmoa
Sal 110 [109], 1. 2. 3-4 (R/. 4bc)
R/. Abade zara Zu, Melkisedek lez, betiko.
V/. Hona Jaunak nire jaunari esana:
«Jesarri
nire eskuman,
zeure
arerioak oinazpian jartzen deutsudazan bitartean». R/.
V/. Siondik zabaltzen dau Jaunak
zure
errege-makilaren aginpidea;
menperatu
egizuz guduan arerioak. R/.
V/. Zu nagusi garaipen-egunean
santutasun-distiraz;
gaztetasun-iruntza
datorkizu egunsentiaren altzotik.
Zin
egin dau Jaunak eta ez da damutuko:
«Abade
zara Zu, Melkisedek lez, betiko». R/.
II. urtean
I. Irakurgaia
David habailaz eta harriz nagusitu filistearrari.
Samuel lehenengo liburutik
1 Sm 17, 32-33. 37. 40-51
Egun hareetan, Saulek bere aurrera ekarriazo
eban David, eta honek esan eutson: «Ez dadila inor ikaratu Goliatengaitik. Neu,
zure zerbitzari hau, joango naz filistear horregaz burrukatzera». Saulek esan
eutson Davidi: «Ezin dozu filistear horren aurka burruka egin; gaztetxu bat
besterik ez zara; hori, barriz, gaztetatik da gudaria».
Davidek esan eutson: «Lehoiaren eta
hartzaren atzaparretatik atara nauan Jaunak atarako nau filistear horren
eskuetatik». Saulek, orduan: «Zoaz, eta izan bedi Jauna zugaz».
Hartu eban Davidek eskuan makilea, errekan
bost harri leun-leun aukeratu eta bere artzain-zorroan sartu ebazan; hartu eban
habaila eskuan eta filistearragana hurreratu zan.
Filistearra be baetorren eta Davidengana
hurreratzen ziharduan, ezkutaria aurretik ebala. Begiratu eban filistearrak
eta, David ikustean, gitxietsi egin eban, gaztetxu ule-gorri eta apaina
zan-eta. Filistearrak esan eutson Davidi: «Txakurra nok ni ala, makila bategaz
nire aurka etortzeko?» Madarikatu egin eban Goliatek David bere jainkoen
izenean, eta esan eutson: «Hator nigana. Zeruko txoriei eta lurreko piztiei
emongo jeutseat hire haragia».
Davidek erantzun eutson filistearrari:
«Ezpataz, lantzaz eta azkonaz armaturik zatorkidaz; ba, ni Jaun ahalguztidunaren
izenean natorkizu, zuk erronka egin deutsazun Israelgo gudarosteen Jainkoaren
izenean. Gaur nire eskuetan jarriko zaitu Jaunak, eta nik hil eta samea ebagiko
deutsut; zure gorpua eta filistear gudarienak zeruko txoriei eta lurreko
piztiei emongo deutsedaz; holan, mundu osoak jakingo dau badauala Israelek
Jainkoa. Eta hemen batuak diran guztiek jakingo dabe Jaunak ez dauala behar
ezpatarik, ez lantzarik, gu salbatzeko, Jaunak erabagitzen dau-eta gudua, eta
berak emongo zaitue gure eskura».
Filistearra abiatu eta Davidengana
hurreratzen joianean, hau arineketan joan zan burruka-tokira, filistearrari
aurre egitera. Sartu eban eskua zorroan, harri bat atara, habailaz jaurti eta
bekokian jo eban filistearra; harria bekokian sartu jakon, eta ahuspez jausi
zan lurrera.
Halantxe nagusitu jakon David filistearrari,
habailaz eta harriz; holan jo eta hil eban. Davidek, ez eban-eta ezpatarik
eskuetan, arineketan joan eta, filistearraren gainean jarririk, haren ezpata
zorrotik atara eta samea ebagi eutson.
Jaunak esana.
Erantzun salmoa
Sal 144 [143], 1. 2. 9-10 (R/. 1a)
V/. Bedeinkatua Jauna, nire harkaitza.
V/. Bedeinkatua Jauna, nire harkaitza,
eskuak
gudurako eta ukabilak burrukarako
trebatzen
deustazana. R/.
V/. Nire laguntzailea eta gaztelua,
gotorlekua
eta askatzailea,
nire
babeskia eta kerizpea.
Berak
deustaz herriak menpean jartzen. R/.
V/. Kantu barria kantatuko deutsut, oi Jainko,
hamar
hariko harpa joko Zuretzat;
Zeuk
emon zeuntsen erregeei garaipena,
Zeuk
askatu zenduan David, zeure zerbitzaria. R/.
I. eta II. urteetan
Aleluia
Ik. Mt 4, 23
R/. Aleluia.
V/. Erreinuari buruzko Barri Ona
iragartzen eban Jesusek
eta
herrian gatx guztiak osatzen ebazan. R/.
Ebanjelioa
Zapatuz
zer da zilegi:
bizia
salbatzea ala kentzea?
✠ Jesu Kristoren Ebanjelioa San Markosen liburutik
Mk 3, 1-6
Aldi haretan, Jesus sinagogan sartu zan
barriro. Bazan han gizon beso-igar bat. Zelatan egokiozan zapatuan osatzen ete
eban, zertan salatuko ebiltzan-eta.
Jesusek beso-igarrari esan eutson: «Jagi eta
zatoz hona erdira».Eta besteei esan eutsen: «Zapatuz zer da bidezko, ona egitea
ala txarra egitea, bizia salbatzea ala kentzea?» Hareek, ostera, isilik.
Jesusek, ingurukoei hasarre begiraturik eta euren burugogorkeriaz mindurik,
esan eutson gizonari: «Luzatu beso hori». Harek luzatu eban, eta osatu egin
jakon.
Handik urten orduko, fariseuek eta Herodesen
alderdikoek alkar hartu eben Jesusen kontra, bera zelan galduko.
Jaunak esana.
IRUZKINA
Jesus sinagogan; farisearrak ere bai; eta baita esku iharrak mugatua daukan gizona ere. Zeren bila jo dabe sinagogara? Zer ataraten dabe handik? Jainkoaren berba iragarri eta irakatsiak argituta urtengo ete dabe?
Jainkoaren berbearen argitasunak Jesusi gaixoaren egoerea ikusazoten deutso; farisearrei Legea betetea eskatzen deutse, horretantxe datza euren salbamena; eta gizon esku iharrak osakuntza itxaroten dau.
Zerk emongo deutso osakuntza (salbamen) hori: Legea beteteak, ala Jesusen jardunak? Zer esanik ere ez, azken honexek! Eta galdera hauxe egitera eroan geinkez Jesusen jardunak farisearren jardunaren aurrean: zergaitik jokabide hain aurkakoak?
Farisearrek Legea betetzeaz lortzen dabela salbamena uste dabe; euren burua da lehenen. Jesusentzat gizakia da —ez bere burua— erdian jarri beharrekoa —batez ere hau gaixorik edo preminean bada—.
Eta bere buruaren kaltetan bada ere, osakuntza jazoazoko dau.
Jainkoagazko hartu-emonek batzuk askatu egiten ditu, beste batzuk morroi bihurtu. Jesusek lehenengo bidetik eroan gura gaitu.
Urtean Zeharreko II. eguena
I. urtean
I. Irakurgaia
Jesusek
behin betiko oparia eskeini eban
bere
burua eskeini ebanean.
Hebrearrei egindako epistolatik
Heb 7, 25–8, 6
Senideok: Jesusek betiko salbatu leikez beraren bidez Jainkoagana hurreratzen
diranak, bizirik dago-eta hareen alde beti erregutzeko.
Benetan, Jesus lako abade nagusia behar
genduan guk: santua, errubakoa eta kutsubakoa, pekatariengandik bereizia eta
zeruak baino gorago jasoa. Honek ez dau, beste abadeek lez, lehenengo bere
pekatuakaitik eta gero herriarenakaitik egunero opariak eskeini beharrik, behin
betiko egin eban-eta hori, bere burua opari eskeini ebanean. Legeak, izan be,
gizon makalak izentatzen ditu abade nagusi; legea baino geroagokoa dan
Jainkoaren zinak, ostera, Semea izentatu dau abade nagusi, betieran bete-betea
dana.
Hau da esaten dihardugunaren gailurra: hain
handia da gure abade nagusia ze, Jainko handiaren eskumaldean jesarrita dago
zeruetan, eta bere abade-zerbitzua Jainkoak egindako santutegian betetzen dau,
eta ez gizakiek egindako itun-txabolan.
Edozein abade nagusi emoitzak eta opariak
eskeintzeko jarrita dagoanez, Jesusek be zeozer eskeini behar eban. Lur honetan
balego, Jesus ez litzateke abade be izango, hor dagoz-eta legearen arabera
opariak eskeintzen dabezan abadeak. Honeen zerbitzua, ostera, zeruko gauzen
irudi eta kerizpe besterik ez da, Jainkoak Moisesi, txabola egitekoan, adierazo
eutsonaren arabera: «Izan arreta –esan eutson Jaunak–, dana mendian erakutsi
jatzun ereduaren arabera egiteko».
Baina, orain, Jesusek kultu-zerbitzu
bikainagoa lortu dau, itun hobearen, agintzari hobeetan oinarrituta dagoan
itunaren, bitarteko dan ezkero.
Jaunak esana.
Erantzun salmoa
Sal 40 [39], 7-8a. 8b-9. 10 eta 17 (R/. ik. 8a eta 9a)
R/. Hemen nozu, Jauna, zure nahia egin dagidan.
V/. Zuk ez dozu sakrifiziorik eta eskeintzarik
nahi izan,
ez
erre-oparirik eta pekatuen parkamen-oparirik eskatu;
baina
belarriak edegi deustazuz.
Horregaitik
dinot: «Hemen nozu». R/.
V/. Hauxe dago nitaz liburuan idatzita:
egin
dagidala zure nahia.
Atsegin
dot, ene Jainko,
barru-muinetan
dot zure legea. R/.
V/. Iragarri dot batzar nagusian zure justizia,
ez
ditut ezpanak itxi, ondo dakizu, Jauna.
Poztu
eta alaitu beitez Zugaz
zure
bila dabiltzanak.
«Handia
da Jauna» esan begie beti
zure
salbazinoa maite dabenek. R/.
II. urtean
I. Irakurgaia
Gure aita Saul zu hiltzeko asmotan dabil.
Samuel lehenengo liburutik
1 Sm 18, 6-9; 19, 1-7
Egun
hareetan, Davidek Goliat filistearra hil eta
gudutik etozala, Israelgo uri guztietatik bidera urten eutsoen emakumeak
Saul erregeari pozez kantari eta dantzari, danbolinak eta txilinak joz.
Emakumeek, dantza eginez, hauxe kantatzen eben, alkarri erantzunez:
«Saulek mila hil,
Davidek hamar mila».
Saulek
ez eban kopla ha gogoz entzun. Biziro hasarratu zan, eta hau inoan: «Hamar mila
Davidi, eta mila niri; erregetza besterik ez dau falta». Egun haretatik
aurrera, begitan hartu eban Saulek David.
Saulek
David hiltzeko asmoa agertu eutsen bere seme Jonatani eta zerbitzari guztiei.
Saulen seme Jonatanek, ostera, oso maitea eban David, eta asmo horren barri
emon eutson Davidi, esanez: «Gure aita Saul zu hiltzeko asmotan dabil. Ibili
erne bihar goizean; gorde zaitez toki ezkuturen baten. Ni aitaren ondoan
jarriko naz, zu egongo zaran landan. Zutaz berba egingo deutsat aitari eta, zer
dinoan ikusi ostean, aditzera emongo deutsut».
Jonatanek,
beraz, Daviden alde hitz egin eutson bere aita Sauli, esanez: «Errege jauna, ez
zeunskio gatxik egin behar zeure zerbitzari Davidi, berak be ez deutsu-eta
gatxik egin; zerbitzu handiak, bai, egin deutsuz. Bere bizia arriskuan jarri
eban Goliat filistearra hil ebanean; holan, garaipen handia emon eutson Jaunak
Israel osoari. Zeuk ikusi zenduan eta poztu egin zinan. Zergaitik egin behar
dozu gaiztakeria hori, odol errubakoa isuriz, David arrazoirik barik hilez?»
Saulek Jonatanen hitzak entzun eta zin egin eban: «Ala Jainkoa, ez da hilko!»
Dei
egin eutson orduan Jonatanek Davidi eta honen guztiaren barri emon eutson.
Gero, Saulengana eroan eban David, eta haren zerbitzura gelditu zan lehen lez.
Jaunak esana.
Erantzun salmoa
Sal 56 [55], 2-3. 9-10. 11. 12-13 (R/. 5bc)
R/. Jainkoagan dot konfiantza,
ez naz ezeren bildur.
V/. Erruki nitaz, Jainko, segika dabilkidaz,
egun
osoan eraso egin eta zapaltzen nabe.
Egun
osoan segika ditut arerioak,
ugari
dira-eta erasotzen deustenak. R/.
V/. Gogoan dozuz nire ibilerak;
jaso
nire malkoak zeure pergaminoan.
Ez
ete dago dana zure liburuan idatzita?
Nik
Zuri deitu eta arerioek atzera egitean,
orduan
jakingo dot neure alde dodala Jainkoa. R/.
V/. Jainkoaren promesa goratzen dot,
Jaunaren
agintzaria goratzen,
Jainkoagan
dot konfiantza. R/.
V/. Ez naz ezeren bildur:
zer
egingo deust gizaki hutsak?
Ene
Jainko, egin neutsuzan promesei deutset eutsiko
eta
esker onez ditut beteko. R/.
I. eta II. urteetan
Aleluia
Ik. 2 Tm 1, 10
R/. Aleluia.
V/. Kristo Jesus gure salbatzaileak heriotza
ezereztu dau
eta
bizia argitu Barri Onaren bidez. R/.
Ebanjelioa
Espiritu
gaiztoek oihuka esaten eutsoen:
Jainkoaren
Semea zara Zu.
Jesusek
zorrotz agintzen eutsen, ez egiela ezagutzera emon.
✠ Jesu Kristoren Ebanjelioa San Markosen liburutik
Mk 3, 7-12
Aldi haretan, Jesus itsasbazterrera joan zan
bere ikasleekin. Galileatik etorritako jentetza handiak jarraitu eutson. Eta,
berak egiten zituanak entzunik, Judea, Jerusalem eta Idumeatik, Jordanez
bestaldetik eta Tiro eta Sidon aldetik be jentetza handia batu jakon. Jesusek
txalupa prest eukitzeko agindu eutsen ikasleei, hainbeste jenteren artean
zapaldu ez egien. Izan be, asko zituan osatuak, eta gatxen bat eben guztiak
gainera etorkozan, ikutu nahian. Espiritu gaiztoek, ikusten ebeneko, haren
oinetan jausi eta oihuka esaten eutsoen: «Jainkoaren Semea zara Zu».
Harek, ostera, zorrotz agintzen eutsen, ez
emoteko ezagutzera.
Jaunak esana.
IRUZKINA
Handia da Jesusen entzutea. Baina badirudi haren berbea baino erakargarriagoa dala harek emoten dauan osakuntza, harengandik urteten dauan indarrari esker.
Herrialde guztietatik etorkozan gainera. Eta honen aurrean, galdetu beharrean aurkitzen gara: zeren bila? Jesusek irakatsi egiten dau, Jainkoaren eta haren erreinuaren barri emoten dau; eta ezaugarri bidez emoten dau hori ezagutzera…
Baina jentea ez ete da ezaugarrietan gelditzen, harago joan barik? Gatxen bat eben guztiak gainera etorkozan, ikutu nahian.
Jesusek ez eban gura osakuntzak azaleko hutsak izan eitezan. Jente gaixo ha lotura guztietatik askatu gura izan eban. Baina loturok ez ete eutsen zelan-halango ziurtasuna emoten?
Deabruak ere burruka horretan sartzen ziran, goraka hareetan gelditu eiten Jesus, jentetzaren txaloak onartu eizan eta bere bidetik desbideratu eiten.
Ezin eikean hori Jesusek onartu; bere bideari eta eginkizunari jarraitzea zan bere bizia, eta horretarako deabruak isilduazo egingo ditu.
Zer bilatzen dogu Jesusengan: azaleko osakuntza, ala, bere jarraian, geure eginkizunari erantzutea?
Urtean Zeharreko II. barikua
I. urtean
I. Irakurgaia
Kristo itun hobearen bitarteko.
Hebrearrei egindako epistolatik
Heb 8, 6-13
Senideok: Orain, Jesusek kultu-zerbitzu
bikainagoa lortu dau, itun hobearen, agintzari hobeetan oinarrituta dagoan
itunaren, bitarteko dan ezkero. Izan be, lehenengo ituna akatsik bakoa izan
balitz, ez legokean bigarren batentzat lekurik. Baina Jainkoak hasarre egiten
deutse antxinakoei, esanez:
«Hara,
badator –dino Jaunak–
Israel
herriagaz eta Juda herriagaz
itun
barria egingo dodan sasoia.
Ez
da izango,
Egiptotik
ataratzeko eskutik hartu nituanean
hareen
asabekin egin nebana lakoa.
Hareek
hausi egin eben nire ituna,
eta
Neuk be bazterrera itzi nituan –dino Jaunak–.
Hona
hemen etorkizunean
Israelegaz
egingo dodan ituna –dino Jaunak–:
Buruan
ezarriko deutsedaz neure legeak, eta bihotzean idatziko.
Hareen
Jainko izango naz Ni, eta hareek nire herri.
Ez
dabe alkarri irakatsi beharrik izango,
"Ezagutu
Jauna" esanez,
guztiek,
txiki nahiz handi,
ezagutuko
nabe-eta –dino Jaunak–;
parkatu
egiten deutset-eta euren gaiztakeria,
eta
hareen pekatuaz ez naz gehiago gogoratuko».
Jainkoak, itun barria aitatzean, lehengoa zahartutzat emoten dau, eta zaharkiturik dagoana desagertzeko zorian dago.
Jaunak esana.
Erantzun salmoa
Sal 85 [84], 8 eta 10. 11-12. 13-14 (R/. ik. 11a)
R/. Maitasunak eta leialtasunak topo dabe egiten.
V/. Erakutsi guri, Jauna, zeure maitasuna,
emon
zeure salbazinoa.
Hurrean
dabe salbazinoa begirune deutsoenek;
bai,
gure lurraldean kokatuko da Jaunaren aintza. R/.
V/. Maitasunak eta leialtasunak alkar dabe
aurkitzen,
justiziak
eta bakeak alkar besarkatzen.
Leialtasuna
lurretik da ernetzen,
justizia
zerutik jaisten. R/.
V/. Jaunak emongo dau euria,
eta
gure lurrak ekarriko bere uzta.
Haren
aurretik joango da justizia,
haren
pausuei jarraituko deutse ondoizateak. R/.
II. urtean
I. Irakurgaia
Ezin
dot neure jaunaren aurka eskurik jaso,
Jaunak
igurtzia da-eta.
Samuel lehenengo liburutik
1 Sm 24, 3-21
Egun hareetan, hartu ebazan Saulek hiru mila
gizon, Israel osotik aukeratuak, eta Daviden eta honen gizonen bila joan zan
Basahuntzen Hatxak izeneko lekura.
Bide ondoan egozan ardi-eskortetara
heltzean, inguru haretako hartzulo batera sartu zan Saul, sabela hustera. David
eta beraren gizonak hartzulo haren barrenean gordeta egozan, hain zuzen.
Beragaz ebazan gizonek esan eutsoen Davidi: «Gaur betetzen da Jaunak esan
eutsun ha: "Nik eskura jartzen deutsut zeure arerioa; egiozu egokien
begitantzen jatzuna"». Jagi zan David eta, isil-isilik, Saulen
soingainekoaren ertza ebagi eban. Baina behingoan bihotzeko harra sumatu eban, Sauli
soingainekoaren ertza ebagi eutsolako. Eta esan eutsen bere gizonei: «Jaunak
gorde nagiala neure jaunari holakorik egitetik. Ezin dot haren aurka eskurik
jaso, Jaunak igurtzia da-eta». Hitz honeen bidez geldituazo ebazan Davidek bere
gizonak eta ez eutsen itzi Sauli eraso egiten.
Jagi zan Saul, hartzulotik urten eta bere
bideari jarraitu eutson. Ondoren, jagi zan David be, hartzulotik urten eta oihu
egin eban Saulen atzean: «Ene errege jauna!»
Saulek atzera begiratu eban. David, lurreraino makurtuz, ahuspeztu egin
jakon.
Gero esan eutson Sauli: «Zergaitik sinisten
deutsazu David zu galdu nahian dabilela dinotsun jenteari? Gaur zeure begiz
ikusi dozu Jaunak nire eskura jarri zaituala hartzuloan. Zu hiltzeko esaten
eusten, baina parkatu egin deutsut, neure buruari hau esanez: "Ez dot
neure jaunaren aurka eskurik jasoko, Jaunak igurtzia da-eta". Ikusi, ene
aita, zeure soingainekoaren ertza nire eskuan. Soingainekoaren ertza ebagi bai,
baina zu ez zaitut hil; ohartu zaitez eta ikusi ez dodala asmo txarrik, ez
gaiztakeriarik, eta ez deutsudala kalterik egin; zu, barriz, niri bizia kendu
guran zabiltz. Izan bedi Jauna gu bion artean epaile. Hartu dagiala Jaunak nire
mendekua zure aurka, baina nire eskuak ez zaitu ikutuko. Halan dino esaera
zaharrak: "Gaiztoari txarra dario". Nire eskuak, ostera, ez zaitu
ikutuko. Noren bila urten dau Israelgo erregeak? Noren atzetik zabiltz? Txakur
akabatuaren atzetik? Zorri baten atzetik? Izan bedi Jauna epaile eta erabagi
begi berak gu bion artean; aztertu eta babestu begi nire auzia, eta askatu
nagiala zure eskuetatik».
Davidek hitz honeek amaitzean, Saulek esan
eutson: «Zure ahotsa ete dot hori, David, ene seme?» Eta oihuka, negarrari emon
eutson Saulek. Gero, Davidi esan eutson: «Ni baino zuzenagoa zara. On baino ez
deustazu egin; nik, barriz, gatxa bihurtu deutsut. Gaur erakutsi dozu on baino
ez deustazula egin, Jaunak zure eskura jarri nau eta ez nozu hil. Gizon batek
bere arerioa aurkitu eta itziko ete leuskio bere bidetik bakean joaten?
Ordaindu deizula Jaunak zuk gaur niri egindako mesedea. Orain ziur dakit errege
izango zarala eta Israelgo erregetzak zure eskuetan iraungo dauala».
Jaunak esana.
Erantzun salmoa
Sal 57 [56], 2. 3-4. 6 eta 11 (R/. 2a)
R/. Erruki nitaz, ene Jainko, erruki nitaz.
V/. Erruki nitaz, ene Jainko, erruki nitaz,
Zugan
babesten naz-eta;
zure
hegoen kerizpean babesten naz,
ezbeharra
igaro artean. R/.
V/. Jainkoari egiten deutsat dei, Goi-goikoari,
hainbeste
mesede egiten deustan Jainkoari.
Bialdu
dagiala norbait zerutik,
erasotzaileen
irainetik ni salbatzera.
Bialdu
dagiala Jainkoak bere maitasuna eta leialtasuna. R/.
V/. Zerua baino garaiago zara, ene Jainko,
zure
ospea mundu osoaren gain dago!
zerua
baino handiagoa da-eta zure maitasuna,
hodeietarainokoa
zure leialtasuna. R/.
I. eta II. urteetan
Aleluia
2 Ko 5, 19
R/. Aleluia.
V/. Jainkoak ziharduan Kristogan mundua beragaz
adiskidetzen,
eta
geuri emon deusku adiskidetzearen mezua. R/.
Ebanjelioa
Berak
nahi izan ebanei dei egin eutsen
Beragaz
bizitzeko.
✠ Jesu Kristoren Ebanjelioa San Markosen liburutik
Mk 3, 13-19
Aldi haretan, Jesusek mendira igon eban, berak nahi izan ebanei dei egin eutsen eta hareek hurreratu egin jakozan. Hamabien taldea eratu eban, beragaz bizitzeko eta Barri Ona iragartzera bialtzeko; eta deabruak botatzeko ahalmena emon eutsen. Hamabi honeek aukeratu zituan: Simon –honi Pedro izena ipini eutson–, Santiago Zebedeorena eta Joan, Santiagoren anaia –honeei Boanerges izena ipini eutsen, hau da, «Trumoi-seme»–, Andres, Felipe, Bartolome, Mateo, Tomas, Santiago Alfeorena, Tadeo, Simon Zelote eta Judas Iskariote, Jesus saldu ebana.
Jaunak esana.
IRUZKINA
Jesusek hamabi aukeratzen ditu otoitz egin ondoren. Berak nahi ebenei deitzen deutse. Eta aukeratuak ez dira apartekoak, edo lehenen heldu ziranak, edo gehien ekienak, edo familiarik esanguratsuenetakoak… bere ondoan egozanetarikoak baino.
Jesusengan askatasun osoa azpimarratzen da Berak nahi ebenei horregaz; baina azpimarra gehiago ere aurkitu geike: berea da ekimena, eta askatasun osoz aukeratzen dau otoitz egin ondoren. Jainkoagandiko gauzea da, ba.
Eta hamabi aukeratzen ditu. Honek Israelgo leinuak dakarskuz gogora. Bere ondora deitzen ditu, baina asmo eta helburu zehatzak ditu buruan Jesusek, edo ebanjelariak egoerak argitu gura dauz.
Lehenengo kristauek judu herriarekin apurtu beharra ikusten dabenean, euren burua aurkeztu behar izango dabe benetako Jainkoaren Herri aukeratu, Jainkoaren Semearen inguruan eratzen dana, unibertsala izango dana, era guztietakoei eta guztiei deitzen deutsena, eta helburu hauxe dauana: Jainkoaren ondasunen barri emotea euren bizikereaz; deabruak uxatuz (hau da, txarkeria alde batera itziz) senide lez bizi izatea, maitasunean. Hauxe da Jesusek irakatsiko dauana.
Urtean Zeharreko II. zapatua
I. urtean
I. Irakurgaia
Kristo
behin betiko sartu da santutegian
bere
odola eskeiniz.
Hebrearrei egindako epistolatik
Heb 9, 2-3. 11-14
Senideok: Santutegia honan egoan antolatuta:
lehenengo aldean, «Santua» izenekoan, argimutila, mahaia eta Jaunari
eskeinitako ogiak egozan; gero, bigarren gortinaren atzean, «Toki santu-santua»
izeneko aldea egoan.
Kristo, barriz, datozan ondasunen abade
nagusi lez agertu da. Bera sartu dan santutegia lehengoa baino handiagoa eta
bikainagoa da, ez giza eskuz egina, hau da, ez mundu honetakoa. Kristo behin
betiko sartu da santutegian, ez akerren eta zezenen odola eskeiniz, berea baino,
holan betiko askatasuna lortu deuskula.
Beraz, akerren eta zezenen odolak eta
erretako behi baten errautsek, kutsaturik dagozanen gain txipriztinduz,
pertsona horreek sagaratzeko indarra badabe, kanpotik garbi eginez, zenbatez
gehiago Kristoren odolak –betiko Espirituaren bidez bere burua Jainkoari opari
garbi eskeini eutson harenak– ez dau garbituko gure barrua heriotzara daroen
egintzetatik, guk Jainko bizia gurtzeko!
Jaunak esana.
Erantzun salmoa
Sal 47 [46], 2-3. 6-7. 8-9 (R/. ik. 6)
R/. Oihu alaien artean igon dau Jainkoak,
turuta-soinuz Jaunak.
V/. Herri guztiok, jo egizue txalo,
egin
pozez oihu eta irrintzi Jainkoari,
ikaragarria
da-eta Jauna, Goi-goikoa,
mundu
osoaren errege handia. R/.
V/. Irrintzi artean igon dau Jainkoak,
turuta-soinuz
Jaunak.
Kanta
Jainkoari, kanta,
kanta
gure erregeari, kanta. R/.
V/. Jainkoa da mundu osoaren errege,
kanta
trebetasunez hari.
Jainkoa
nazinoen errege da,
Jainkoa
bere tronu santuan dago jesarrita. R/.
II. urtean
I. Irakurgaia
Zelan jausi diran gizon handiak guduan!
Samuel bigarren liburuaren hasiera
2 Sm 1, 1-4. 11-12. 19. 23-27
Egun hareetan, Davidek, amalektarrak
menperatu ondoren, bihurtu eta egun bi emon ebazan Tziklagen. Hirugarren
egunean, Saulen kanpalekutik etorren gizon bat agertu zan, jantziak urraturik
eta burua hautsez estaldurik. Davidengana heltzean, lurreraino ahuspeztu zan.
Davidek itaundu eutson: «Nondik zatoz?» Harek erantzun: «Israeldarren
kanpalekutik nator ihesi». Davidek itaundu eutson: «Zer jazo da? Esaidazu!»
Harek erantzun: «Jenteak ihes egin dau gudu-zelaitik; gizon asko jausi da
hilik. Saul eta Jonatan aita-semeak be hil dira».
Davidek bere jantziak hartu eta urratu
ebazan, eta gauza bera egin eben haregaz ziran gizon guztiek be. Dolu, negar
eta barau egin eben gaua arte, Saulengaitik, beronen seme Jonatanengaitik,
Jaunaren herriagaitik eta Israel osoagaitik, ezpatapean jausi ziralako. Davidek
hileta-kantu hau abestu eban:
«Oi
Israel, horra zure ospea zure mendietan jausia!
Zelan
jausi diran gizon handiak!
Saul
eta Jonatan, maiteak eta maitagarriak,
bizitzan
eta heriotzan beti alkartuak;
arranoak
baino azkarragoak, lehoiak baino indartsuagoak!
Israelgo
alabak, egin negar Saulengaitik!
Dotore
janzten zinduezan eta apaintzen,
urrezko
bitxiz ebazan zuen soinekoak edertzen.
Zelan
jausi diran gizon handiak guduan!
Zelan
hil daben Jonatan zure gailurretan!
Hau
samina zugaitik, Jonatan, ene anaia;
hain
zinan niretzat maitea!
Zure
maitasuna niretzat gozoago emakumeen amodioa baino.
Zelan
jausi diran gizon handiak!
Hondatu
dira burrukarako armak!»
Jaunak esana.
Erantzun salmoa
Sal 80 [79], 2-3a. 3bc eta 5. 6-7 (R/. 4b)
R/. Erakutsi guri, Jauna, aurpegi argia,
salba gaitezan.
V/. Entzun, Israelen artzain,
Joseren
familia artaldea lez daroazun horrek!
hegodun
izakien arteko tronuan zagozan hori,
agertu
zakiguz dirdaitsu
Efraim,
Benjamin eta Manasesen leinuei. R/.
V/. Bizkortu zeure ahalmena
eta
zatorkiguz salbatzera.
Jauna,
Jainko ahalguztiduna,
noiz
arte egon behar dozu hasarre,
zeure
herria otoitzean dozun bitartean? R/.
V/. Negarra emon deuskuzu janari,
malkoak
erruz edari.
Auzokoen
hizpide egin gozuz,
arerioak
burlaka dabilkiguz. R/.
I. eta II. urteetan
Aleluia
Ik. Eg 16, 14b
R/. Aleluia.
V/. Edegi, Jauna, gure bihotza,
gogoz
onartu dagiguzan zure Semearen hitzak. R/.
Ebanjelioa
Jesusen
senideek
burutik
egina egoala esaten eben.
✠ Jesu Kristoren Ebanjelioa San Markosen liburutik
Mk 3, 20-21
Aldi haretan, Jesus etxera bihurtu zan bere ikasleekin. Barriro be jentetza handia batu zan, eta ezin eben jatordurik be egin Jesusek eta ikasleek. Jesusen ahaideak, hori jakitean, bera hartu eta eroateko asmotan etorri ziran ze, burutik egina egoala esaten eben.
Jaunak esana.
IRUZKINA
Zer da burutik eginda egotea? Gure inguruak edo aldiek uste dabenetik kanpo egotea ete da burutik eginda egotea?
Gizarte batek, aldi bakotxak, bere burubideak daukazala esan geike, eta burubideotan emoten dira han bizi diranen hartu-emonak, danek onartzen dabezan erakoak, danek ulertzen dabezanak.
Baina inoren jokabidea, uste dan eta onartua dan jarrereagaz bat ez badator, urli hori burutik eginda dagoala esango da; eta itxituan eta gordean jarri beharrekoa dala.
Horixe egin gura izan eben Jesusen etxekoek haregaz. Ez dago ondo ikusia inguruan zer esana emotea. Non gelditzen da etxekoen izen ona? Ez dago ondo ikusia arauetatik eta ohituretatik edo danek onartuak dituen usteetatik kanpo ibiltea.
Eta Jesus, sarritan, bai ebilela usteetatik kanpo: baztertuen, pekatarien, gaixoen, emagalduen… alboratu guztien artean.
Zer dala-eta? Jesusek zeregin bat hartu eban bere bizitzarako, eta ez dau ezerk ez inork desbideratuko: Jainkoaren erreinua iragartea. Eta hori iraultzailea da; burutik eginda egon behar da holangorik egiteko.
Ze Jainko sinisten dogu? Jesusek iragarten dauana? Ala geure arauetan sartu daitekeana?
